Yanditswe na Ben Barugahare
Amakuru agera kuri The Rwandan kuri uyu wa kabiri tariki ya 18 Nyakanga 2017 aravuga ko abasirikare bagera kuri bose hamwe 817 basezerewe mu ngabo z’u Rwanda, barimo ba Ofisiye na ba Su-ofisiye 369, hakabamo 378 barangije amasezerano y’akazi bari bafitanye na RDF na 70 bakuwe muri RDF kubera impamvu z’uburwayi.
Abasirikare bo mu rwego rwo hejuru bashoboye kumenyekana ko basezerewe ngo kubera izabukuru nk’uko urubuga rwa Ministeri y’ingabo mu Rwanda rubitangaza ni ba Lt Gen Emmanuel Karenzi Karake, Maj Gen Jackson Nkurunziza na Brig Gen John Gashayija Bagirigomwa.
Umuhango wo gusezererwa ku mugaragaro wabaye kuri uyu wa mbere tariki ya 17 Nyakanga 2017 ku Kimihurura ku cyicaro cya Ministeri y’ingabo mu muhango wari uyobowe na Ministre w’ingabo Gen James Kabareba ndetse n’umugaba w’ingabo Gen Patrick Nyamvumba.
