Mu cyumweru gishize Ubwo bari bagiye gushinyagurira abaturage bo mu karere ka Rusizi, inkotanyi idasa n’izindi Bamporiki umumotsi wa Kagame, shebuja yamushinze kumokera Abaturage ba Rusizi.

Uyu mumotsi yarihandagaje asuka amagambo y’urukozasoni agamije gushimisha shebuja wabuze icyo yabwira Abaturage bari bahatiwe kuza kumushungera.

Ibi Kagame arimo akora byo gukoresha Abamotsi nka Bamporiki binyibukije umugabo witwaga Ntantege, Ntantege yariyemeraga cyane abaturanyi bose bari baziko ari igitangaza, gusa we muri we yarazi ko nta mbaraga afite.

Nuko yagiraga imbwa, iyo mbwa niyo yashumurizaga abo yabonaga atahangana nabo, yapfaga kuyijugunyira igufwa yahaga imbwa nta kindi yakoraga uretse kumoka gusa. Ariko byarangiye Ntantege amenyekanye ko ari nta ntege nyine na ka kabwa yakoreshaga kagezaho kazinga umurizo. Niseguye ku basomyi, simvuze ko Bamporiki ari imbwa, gusa ibyo arimo akoreshwa na Kagame binyibukije Umugabo Ntantege n’imbwa ye.

Reka rero ngire icyo mvuga ku magambo umumotsi yabwiye shebuja amuhumuriza ko abaturage bo mu karere ka Rusizi batari inyuma y’umupadiri wahindutse umupagani n’umunyapoliki ushaje. Aya magambo yanteye kwibaza impamvu Umupadiri wahindutse umupagani yahinduka ikibazo ku mu “malaika ” intungane Kagame?

Kuki iyi ntungane yitwaza umumotsi wo kuyihumuriza? Aho siyo rubanda rubona nk’umupagani butwi? Kuki iyi ntungane itaretse uwo mupadiri ngo aze maze rubanda rwibonere intungane n’umupagani aho kubyumvira mu kanwa k’umumotsi?

Umumotsi Bamporiki yarakomeje ahumuriza Shebuja ko hari n’undi munyapolitike ushaje nawe udafite abamukurikiye, Kuki uyu munyapolitike ushaje Mutamuretse nawe ngo aze maze rubanda rubone uwo mukambwe utahatana n’uwo musore w’intugane?

Iyi niyo gahunda mufitiye rubanda? Umupadiri wahindutse umupagani n’umunyapolitike ushaje guhangana nabo bizamarira iki abaturage ba Rusizi cyangwa abanyarwanda muri rusange?

Kuki mwatinye kubwira abaturage ba Rusizi icyatumye muheza uyu mu Padiri umwana wabo hanze?

Kuki mwatinye kubabwira impamvu mwanze ko aza ngo mumushinje ubwo bupagani imbere y’abaturage(Ababyeyi be)?

Uyu munyapolitike ushaje, kuki mwatinye kubwira rubanda uko mwamwibiye amajwi murangije muramumenesha?

Ibi byerekana ikimwaro Kagame afite, aho ubwe we bimugora guhagarara imbere y’imbaga agahitamo gukoresha umumotsi. Ntantege n’imbwa ye, nguwo.

Ubusanzwe muri kampanye y’amatora umunyapolitike abwira rubanda ibyo ateganya gukora, mu rwego rwa Kagame nka Prezida, asobanura ibyo yasezeranyije abaturage ubwo bamutoraga ko yabigezeho, ibyo ateganya gukora n’uko azabikora. Biragaragara ko ntacyo afite cyo kwereka abaturage yagezeho kandi nta yindi gahunda afitiye rubanda uretse kwiyimika ubuziraherezo.

Kwitwaza umumotsi nka Bamporiki rero bituma shebuja yikura mu kimwaro kuko ntacyo yabona yavuga.

Rusizi abaturage bahingaga umuceri mu bishanga, agatsiko karabibohoje ubu abaturage baricwa n’inzara, Nkaho yakabwiye aba baturage uko bazasubizwa ibyabo bambuwe n’agatsiko umupadiri wahindutse umupagani niwe ubaye ikiganiro cy’umunsi, nonese uyu mu Padiri niwe wabohoje ibi bishanga? Aho mubyo mwamutinyiye si uko yarikuza agatunga urutoki ibisambo byubikiye abanyarusizi imbehe maze mukamwara? Ni murahire ko atarimwe bapagani bujuje byose? Mukeneye penetensiya y’uyu mupadiri ahubwo.

Kagame reka gukina rubanda ku mubyimba, ukomeje gufunga ikibuga cya politike ugenda wicenga wenyine, uheza abandi banyarwanda wabura icyo ubwira rubanda rumaze imyaka 23 ku ngoyi yawe ugakoresha umumotsi ufite ubwonko bwatokojwe n’ivumbi ry’imisarani yacukuraga nk’aho wakamuvuje?

Abo baturage bahatirwa kuza kugushungera benshi warabiciye, urabafungira, urabambura abandi ubahereje abana ishyanga ubahorako bashaka kuzana impinduramatwara ya demokarasi.

Bampolikimwana w’Iwacu, ivumbi wakuye mu gucukura imisarani ryagutokoje ubwonko, sintinya kubikubwira, sinavuga ko uhakwa kuko birenze guhakwa, ni uburwayi. Ejobundi wandagaje umubyeyi wakubyaye kubera inama nziza za kibyeyi yakugiriye, umushyira ku karubanda. None Ejobundi nabwo uti nyakubahwa ntutinye umupadiri w’umupagani n’umunyapolitike ushaje ntawe ubarinyuma, abo nicyo kibazo akarere ka Rusizi gafite?

Reka nkumenere iri banga nibo muti nyabusa we, kandi na shobuja arabizi. Wegere abaganga bagusuzume mu  bwonko, imisarani wacukuye Ivumbi ryaragutokoje, amazuru wikuruye ushaka kugira irisongoye nk’irya sobuja wasanga hari umutsi wo ku bwonko wakomeretse, ibi byose wirirwa uvuga ni ingaruka z’ibyo waciyemo.

Egera abavuzi bagusuzume. Shobuja yakabaye agukunze yarikukureka ukaruhuka ariko ibyo wirirwa uvugaguzwa abifitemo inyungu, uzageraho ipatalo uyambare mu mutwe, umubyeyi wawe yakumeneye iryo banga uramwandagaza, mbigusubiriyemo, shobuja azakureka i Ndera batagishoboye kukuvura.

Mbaye nsubikiye aha. Ibyawe nzaba mbigarukaho.

Umutaripfana, Jeanne Mukamurenzi.

Nyuma y’ibikorwa bimaze iminsi byibasira zimwe mu mfungwa za politiki ndetse n’imibereho mibi muri rusange hirya no hino mu magereza aho imfungwa n’abagororwa bakomeje kudahabwa amafunguro ahagije, ubu noneho bigeze iwandabaga muri gereza ya Nyanza.

Muri gereza ya Nyanza hamaze gushyirwaho umutwe w’abicanyi ugizwe n’imfungwa zahoze mu mutwe w’interahamwe ndetse n’abahoze muri APR bose bakatiwe gufungwa burundu.

Uyu mutwe ukaba warahawe mission yo kwica imfungwa ziregwa ibyaha bihungabanya umutekano w’Igihugu zavanywe muri gereza ya Kigali 1930, ndetse n’abayoboke b’amashyaka PDP IMANZI, FDU INKINGI, RNC.

Uyu mutwe w’abicanyi ukaba ariwo uherutse guhitana umugororwa witwa Minani Froduard aho bamusanze aho aryama mu ijoro, ndetse bakomerekeje n’abandi 6 ubu barembeye mu bitaro i Nyanza.

Umwe mubagize aka gatsiko k’abicanyi utarifuje ko amazina atangazwa akaba yaratubwiye ko ubu bakoze urutonde rw’abantu 40 bagomba kwicwa kandi ko amabwiriza bayahawe n’inzego z’ubuyobozi bwa gereza!

Uyu kandi akaba yarashoboye kuduha n’amazina ya bamwe mu bayoboye aka gatsiko k’abicanyi barangajwe imbere na:

-MVUYEKURE ALEXANDRE (uyu niwe uyobora gereza imbere mu bafungwa),

-NDAYIZEYE PHOCAS (uyu niwe ushinzwe umutekano w’imbere mu mfungwa),

-AHISHAKIYE BONAVENTURE (uyu niwe ugenda nijoro ayoboye ibyo byihebe)

abandi barimo bagendana amahiri n’ibyuma ni Gatete Jean Damascene, Nyabyenda Evariste, Nsengiyumva Xavier.

Kugeza ubu imfungwa zo muri gereza ya Nyanza zikaba zitekewe n’ubwoba kuko zabuze n’uwo zitakira kuko n’umuyobozi wa gereza SP MUKONO JOHN mu nama yakoresheje kuri uyu wa kabiri yavuzeko ashyigikiye uwo mutwe kuko ushinzwe umutekano!

Imfungwa n’abagororwa bakaba baryamiye amajanja buri wese n’intwaro gakondo bategerejeko hagira igikoma zikirwanaho, kuko zidashobora kurebera ubwicanyi nk’ubwabaye tariki 28/07/2017 bwahitanye Minani Froduard.

Kugeza ubu kandi haribazwa impamvu ubuyobozi bw’urwego rw’igihugu rushinzwe imfungwa n’abagororwa bwahisemo kwicecekera mu gihe umwuka utari mwiza.

Mu bihe bishize imfungwa ziregwa politiki zakusanyirijwe muri gereza ya Nyanza, ibintu byafashwe nk’ibifite ikindi bihishe mu minsi idatinze muri iyi gereza ibintu bikaba bishobora kuba bibi niba ntagikozwe ngo uyu mugambi mubisha wateguwe uhagarare.

Umusomyi wa The Rwandan

Gereza ya Nyanza

Yanditswe na Frank Steven Ruta

Mu ijoro ryo ku kuwa mbere rishyira kuwa kabiri w’iki cyumweru, tariki ya 31/07 ishyira iya 01/08, humvikanye amasasu yateye ubwoba abatyuye ku Kacyiru hafi y’ibiro by’Akarere n’abatuye mu Kanserege. Iyateye iryo rasa n’ibyo amasasu yangije bikomeje kugirwa ibanga.

Nk’uko umwe mu batuye mu Kanserege abivuga, ahagana mu ma saa munani ya nijoro, nibwo amasasa atatu yabanje kumvikana, hacani iminota mike humvikna andi, aya nyuma yumvikana hashize nk’iminota itanu.

Undi mugabo utuye neza neza munsi y’ikigo cya Polisi ayagize ati:”Si rimwe si kabiri hano humvikanye amasasu, dusa n’ababimenyereye ko nka rimwe cyangwa kabiri mu kwezi twumva isasu rirashwe, ubwo nyine tukamenya ako hari uwo barigasuye!” Yongeraho ko iryo joro yatunguwe no kumva amasasu agenda yisubiramo ubugira gatatu, kandi habanje kubamo akaruhuko gato, nyuma aza kuyumva abaye menshi.

Nubwo icyateye aya masasu kitamenyekanye, n’aho yarasiwe nyirizina hakagirwa ibanga, Madamu Mukayizere avuga ko urusaku yarwumvise aryamye, agakeka ko ruturutse muri Perezidansi, kuko ngo yumvaga ari ho birangirira. Ati “ Nabanje gukeka ko ari nk’abapolisi barakaranyije bagakozanyaho, ariko  mu kanya nk’ako guhumbya abajepe baraje bafungisha utubari na za butike zari zigifunguye basubirayo, bituma nkeka ko ayo masasu yavugiye iwabo.”

Umunyamakuru wagerageje kubaza Polisi icyo ayo masasu yari ahatse, yasubijwe ko nta byabayeho, ahita amenya ko amakuru yimanywe, ariko na none uko amategeko yo mu Rwanda ameze bikaba bitari gutuma agira icyo atangaza.

Abaturage banyuranye bayumvise, bemeza ko atarasiwe kure, ko ahubwo ari bishoboka ko yarasiwe mu barinda perezida, cyangwa se mu kigo cya Polisi byegeranye, iruhande rwa Ambasade ya Leta Zunze Ubumwe za Amerika ku Kacyiru.

Maze kumva ibigwi Makuza yavuze POLO Kagame, nahise mbona undi munyarwanda wanditse ati uRwanda ahubwo bazarwite Senga POLO aho kurwita Singapour. Nubwo ibi bintu bishaka gusetsa, ariko twari dukwiye kubyibazaho nkurikije aho Rwanda rugana
Kagame atorwa n’abantu barenga 98 kw’ijana.

Ngirango sinzi ko ni Imana yiyamamaje yageza aha Kagame. Kuko abashaka Jésus batatora nkabashaka Allah, ntibagiwe ko hari n’abavuga ko bishakira Ryangombe cyangwa Jehovah. Ariko nkurikije amagambo umwana w’umuparemehutu yavuze kuri Kagame, abanyarwanda twese tudashobora kwumvikana K’Uwiteka, kuri Kagame ho bihinduka ibindi.

Ese ntiwasanga ariyo Mana y’ uRwanda abakoloni batesheje agaciro bazana Kiliziya Gatolika. Iyo ibi bintu bivuzwe n’umwana wa Makuza wavuze muri za 1960, igihe MDR Parmehutu yimikaga Perezida ati abanyarwanda banyakuri ni Abahutu (le vrai peuple rwandais est hutu), bigira uburemere bunini cyane.

Kagame ubwe yivugiye ko, uRwanda rwahagaritse kuba uRwanda igihe Makuza n’abagenzi be bategekaka. None aho kwirirwa avuga Twagiramungu yarakwiye kuducira ibanga kubyahinduye imyumvirire ya Bernard Makuza . Natubwire IVANJILI yamwigishije maze tuyigishe Twagiramungu ajye murongo.

Abanyamahanga bakunze guseka abanyarwanda batubwira ko iyo tuvuze igifaransa tutamenya gutandukanya L na R, ko Air (UMWUKA) tuyivuka kimwe na AILE (Amababa). Ibi bishatse kuvugako Singapour abanyrawanda bivugira SINGAPULU. Ariko nkuko POLO akunze kubivuga abanyarwanda tugomba kwiha agaciro tugahagarara ku muco wacu, no kumyifatire yacu. Uko umunyarwanda avuga nabyo tugomba kubiha agaciro, tukemera tukita ibintu uko tubivuga nuko tubibona.

Singapour iba muri Asia mu gihe uRwanda ruba muri Afurika. Uko abategetsi b’ uRwanda babona uRwanda Makuza yarabyivugiye. Nitwemere tube abanyafurika, ndetse turusheho tube abanyarwanda mbere yo kuba abanyafurika.

FPR ikigera mu Rwanda ikintu cya mbere yakoze ni ugihindura ibintu byose FPR mu byo bitaga « Patriotique ». Kiliziya, amashyaka, igisoda, igipolisi, Amateka, ibendera, indirimbo yubahiriza igihugu byose FPR yahise ibihindura « Patriotique ».

Batubwira Vision 2020 « Patriotique », bitiriye SINGAPOUR y’ AFURIKA. Ariko iko imyaka yegera 2020, Vision batubwiraga iragenda igaragara. Muzumve Radio Itahuka icyo ikunze kuvuga : FPR ntikibaho yahindutse iy’umuntu umwe witwa KAGAME. Iyo wumvise amagambo ya Makuza, nibivugwa muri aya matora usanga koko uRwanda rugana « SENGA POLO ».

Vision 2020 uretse kuba inyarwanda, igomba no gufata izina ririkwiye tukareka amarangamutima. Kagame utazamusenga azamukubita IFUNI, radio itamusenga azayifunga, abayumva abamene amatwi. Naho ibitabo, ibinyametaka bitamusenga bibuzwe gusomwa ndetse n’ababisoma bamenwe amaso. Iyi niyo VRAI VISION 2020
VISION 2020 OYE

Byandikiwe i Munich le 02-08-2017

Venant Habiyambere

Itangazo rigenewe Itangazamakuru

MU GIHE KITARENZE AMEZI 6 GUVERINOMA YA RUBANDA IKORERA MU BUHUNGIRO IZABA IMAZE GUHANGA INZIRA YO GUSEZERERA « Ikigirwamana » CYIYICAJE KU NGOMA.

Nyuma yo kwitegereza neza no gusesengura bihagije uko u Rwanda rwayobowe guhera taliki ya 1/10/1990 kugeza uyu munsi n’ibyago bikomeye byarugwiririye biturutse ku byemezo n’ibikorwa by’abategetsi babi , by’umwihariko Paul Kagame udaterwa isoni no kugenda arushaho kwerekana koko ko ari « Umunyagitugu w’umwicanyi utaranganwa impuhwe,Umusazi utagifite igaruriro, Umunyamurengwe usonzeye gusengwa nk’ Ikigirwamana » ;

I. Reka tubanze twibutse urugendo twakoze kugeza ubu :

1. Taliki ya 28/1/2013, Abataripfana b’ikubitiro bateraniye i Paris bashinga Ishyaka ISHEMA ry’URWANDA ryihaye intego yo gufasha abanyarwanda kwisubiza « ishema » ry’abenegihugu, bakanga kugirwa inkomamashyi n’abagereerwa mu Rwatubyaye ;

2. Ntibyatinze andi mashyaka ya « Nouvelle Génération » afata icyemezo cyo gushyigikira umushinga w’ishyaka Ishema wo kujya gukorera politiki mu Rwanda hashyizwe imbere « Kunga Abenegihugu kugira ngo bafatanye kwiyubakira u Rwanda rujya mbere »;

3. Twafashe igihe gihagije cyo kuganira , kujya impaka no kungurana ibitekerezo n’Abanyarwanda b’ingeri zose ndetse dukora ingendo zo gusanga impunzi mu bihugu binyuranye;

4. Twagendereye abayoboyi b’ibihugu by incuti tubasobanurira umushinga dufite, barawushima kandi batwizeza kuzawutera inkunga tugeze mu Rwanda ;

5. Hagenwe Ikipe igomba kuva mu buhungiro ikajya mu Rwanda, ihabwa Padiri Thomas Nahimana nk’umukandida mu matora y’umukuru w’igihugu yagombaga kuba muri Kanama 2017;

6. Nyamara uwo mugambi mwiza kandi w’amahoro wakomwe mu nkokora n’Umunyagitugu Paul Kagame wahisemo gukumira Padiri Thomas Nahimana n’Ikipe ye hifashishwa inzira igayitse yo kubasohora mu ndege zabajyanaga mu Rwanda incuro ebyiri zose, ni ukuvuga taliki ya 23/11/2016 i Nayirobi muri Kenya na taliki ya 23/1/2017 i Buruseli ho mu Bubiligi;

7. Icyo gikorwa cy’urugomo cyo guheza Ishyanga abenegihugu batavuga rumwe n’Inkotanyi cyahaye Bwana Paul Kagame, icyanzu cyo « kwiyimika nk’umwami wa Repubulika y’u Rwanda » binyuze mu ikinamico yiswe amatora yo ku ya3-4/8/2017;

II. Kubera izo mpamvu zose n’izindi nyinshi tutiriwe turondora, turatangariza Abanyarwanda n’umuryango mpuzamahanga ibi bikurikira :

1. Guverinoma y’u Rwanda ikorera mu buhungiro yashyizweho taliki ya 20 /2/2017,ikaba ihuriweho n’amashyaka menshi na Sosiyete Sivile, ntiyemera kandi nta gaciro na busa iha « ingirwamatora y’umukuru w’igihugu » yo ku itariki 3-4/8/2017 yahejwemo mu buryo buteye isoni abandi benegihugu bifuzaga kuba abakandida aribo Diane Shima Rwigara na Mwenedata Gilbert;

2.Turamenyesha rubanda ko Paul Kagame atakiri Perezida w’u Rwanda kuko manda ye ya nyuma yemererwaga n’Itegekonshinga yarangiye taliki ya 3/8/2017 bityo akaba atagomba kumvirwa no kuyobokwa nk’umukuru w’igihugu cyacu;

3.Dutangaje ko « Igisanaguverinoma » Paul Kagame yitegura gushyiraho ntaho kizaba gitaniye n’ « Agatsiko k’Abagizibanabi bitwaje imbunda » kagambiriye guheza Abanyarwanda mu iterabwoba no mu bucakara hagamijwe gusa gukomeza kubarya imitsi;

4 . Kuko twakomeje gusaba Paul Kagame ko yafungura imfungwa za politiki zirimo Victoire Ingabire Umuhoza, Deogratias Mushayidi, Theoneste Niyitegega, Padiri Eduwari Ntuliye, Padiri Mategeko Amatus n’abandi….ariko akica amatwi, dutangaje ko tutagikeneye kugirana ibiganiro na we;

5.Guverinoma y’u Rwanda ikorera mu buhungiro irahumuriza abenegihugu bose kandi irabizeza ko igiye gukorera ibishoboka byose kugira ngo mu gihe kitarenze amezi atandatu (6) hazabe habonetse inzira ikwiye yo kugamburuza « Agatsiko k’Abagizibanabi bitwaje imbunda »kaduhinduye twese nk’ingaruzwamuheto;

6.Turasaba Abenegihugu bose muri rusange na buriwese ku giti cye kwihutira gushyigikira mu nzira zose mushoboye Guverinoma yanyu ikorera mu buhungiro kugira umugambi mwiza wo kwibohoza ingoyi y’iterabwoba ry’Agatsiko ugerweho mu buryo bwihuse;

7.Turashimira abategetsi b’ibihugu by’incuti batugaragarije ko bahangayikishijwe n’uburiganya bwa Paul Kagame, bakaba batakimubonamo umukuru w’igihugu ukwiye kwemerwa no kwizerwa, ndetse bakaba biteguye gutera rubanda inkunga mu rugamba rwo kwishyiriraho ubutegetsi bushingiye kuri demukarasi nyakuri;

8.Turasaba umuryango mpuzamahanga gutera intambwe yo guha akato aka « Gatsiko k’Abagizibanabi bitwaje imbunda » no kugafatira ibihano bikakaye byo mu rwego rw ‘ubukungu, urwa politiki ,urwagisilikari n’urw’ubutabera mpuzamahanga  kugira ngo karekure ubutegetsi kibye rubanda, bityo hategurwe amatora y’umukuru w’igihugu adafifitse .

Bikorewe i Paris, taliki ya 10 /8/2017
Padiri Thomas Nahimana, 
Perezida wa Guverinoma y’u Rwanda ikorera mu buhungiro

Yanditswe  na Frank Steven Ruta

Ubwo yatangazaga ibyavuye mu matora ya Perezida wa Repubuliak mu Rwanda, Professeur Kalisa Mbanda yatinye kugira icyo abazwa n’abanyamakuru n’indorerezi zari mu cyumba yabitangarijemo, ahaguruka bwangu abahunga.

Hari ku itariki ya 09/08/2017, ubwo Komisiyo y’Igihugu y’Amatora yatangazaga burundu ibyavuye mu matora y’Umukuru w’igihugu cy’u Rwanda nyuma y’amatora yo kuwa 03-04/08/2017. Ibi byaje bikurikira amajwi yiswe ay’icyerekezo yagiye atangazwa mu byiciro mu ijoro ry’umunsi amatora yari yakozweho, bugacya hagatangazwa amajwi y’agateganyo yahaga General Kagame intsinzi y’indi manda y’imyaka irindwi.

Mu itangazwa ry’amajwi y’agateganyo kuwa 05/08/2017, abanyamakuru hamwe n’indorerezi babajije ibibazo binyuranye, byiganjemo amakosa yari yakozwe na Komisiyo y’amatora, nko kuba ibyatangajwe byarabarwaga ntibigere ku 100%, kuba amajwi yabaga yatangajwe atarahuraga n’impuzandengoy’ijanisha ryayavuzweho, no kuba hamwe na hamwe imibare itarabaga isobanutse cyangwa se ikabamo kwivuguruza.

Ikindi kibazo yabajijwe icyo gihe ni ukuba nta majwi y’impfabusa yagaragaraga mu byo batangaje, kandi hari aho zabaga zabaye nyinshi no kurenza amajwi yagizwe na bamwe mu bakandida. Icyo gihe mu guhuzagurika, Prof Mbanda ukuriye komisiyo y’amatora, yagize igihunga kubwo gutungurwa n’icyo kibazo, televiziyo y’u Rwanda yatambutsaga ibyabaga ihita ibihagarika ngo Abanyarwanda batumva aho abisubiza, nawe ati “Twibanze ku kumenya uwatsinze … impfabusa tuzazirwanya…”

Kuwa 09/08/2017 hatangazwa amajwi ya burundu, akirangiza gusoma ibyo yateguriwe, Prof Kalisa Mbanda yabonye ibiganza by’abanyamakuru n’indiorerezi bifuzaga kugira ibyo basobanuza, atanguranwa avuga ngo ibyo yari afite byo gutangaza birarangiye, asaba uwifuza kugira ikindi abaza kuzaba bahura ikindi gihe (kitazwi), ubundi ahaguruka arombereje mu nzira isohoka, ngo hatagira n’umukurikiza micro.

Ubu noneho tumaze kumenya amakuru y’imvaho y’iyicarubozo riri gukorerwa Bwana Mutuyimana Anselme ;umurwanashyaka wa FDU Inkingi ufungiye muri gereza ya Mpanga.

Umwe mu bacungagereza uduhaye amakuru atubwiye ko uyu Anselme yakubiswe akagirwa intere ubwo yaravuye ku isurwa amaze gusurwa ahagana i saa saba nigice, amaze guhabwa ibyo asurishijwe yinjiye mu gikari cya gereza agaruka azanye igikapu nibwo yafashwe n’abacungagereza bayobowe na AIP NYAGATARE DELONOE ushinzwe imibereho myiza muri iyi gereza ari kumwe na AIP ALEX, AIP MARCEL bamushinja kuba “igipinga ” nibwo bamuhaye umucungagereza witwa ZIRARUSHYA amuhondaguza indembo mu bitugu no mu mutwe ndetse n’imigeri ku gice cy’inda no mu mayunguyungu ahegera igice kibarizwamo inyama y’impyiko maze amaze kumuhindura intere, umuyobozi wa gereza wungirije ategeka ko bamuhirikira muri kasho!