Umuhezanguni Tom Ndahiro, akaba n’umumotsi wa Leta y’i Kigali, yasohoye inyandiko igayitse mu kinyamakuru kivugira Leta igihe.com ku italiki ya 13/09/2019. Yongeye kuvubura ubumara bwe bw’urwango mu nyandiko yise ngo «Guha agaciro FDU-Inkingi ni ugukabya kubeshya no kwibeshya ».

Tom Ndahiro aratsindagira bya byaha  asanzwe akora ntabihanirwe

• Tom Ndahiro arongera kwikoma ishyaka FDU-INKINGI na prezidante waryo, Madame Victoire INGABIRE Umuhoza, akabagereranya n’idwara ya Ebola, akavuga ko bafite ingengabitekerezo, mbi kurusha iyo ndwara. Iki ni icyaha cyo gutesha abantu ubumuntu agira ngo ahamagarire rubanda kubibasira.
• Tom Ndahiro aremeza ko azi ko hari ikirego Madame INGABIRE yatanze mu butabera, ariko Tom Ndahiro abirengaho agakora insubiracyaha.  Twibutse ko kugeza magingo aya, nta suzumwa rirakorwa ku kirego cyatanzwe tariki ya 21 Nyakanga 2019.
• Tom Ndahiro ashaka guhatira abanyamakuru kurwanya nka we FDU-INKINGI na prezidante wayo, maze bakamwima ijambo, ngo batabikora akaba « ari ukuba icyitso cyangwa umufatanyacyaha mu gukwiza ingengabitekerezo yoretse u Rwanda ». Arahamagarira abanyamakuru kugira urwango n’ubuhezanguni nk’ibye. Arabahatira kubogama mu mwuga wabo w’itangazamakuru.
• Tom Ndahiro arashimangira ko ngo afite uburenganzira bwo gutangaza ibihuha n’urwango, ngo niba abeshya abo bireba bakabeshyuza bakoresheje « uburenganzira bwo gusubiza ». Tom Ndahiro arifuza kwidegembya nk’umwana wateteshejwe na Leta, maze agaharabika uwo ashatse, akarangaza abantu abatesha igihe bari kumusubiza no kubeshyuza. Ni yo mpamvu natwe tutazongera kumutaho igihe.
• Tom Ndahiro, kubera gutinya ko bigaragara ko imitekerereze ye iri hasi, abyikuraho akabyitirira abandi, akavuga ko hari abanyamakuru bagwingiye mu myumvire no mu bitekerezo.

Tom Ndahiro ari mu butumwa yahawe na Leta y’u Rwanda

Tom Ndahiro yahawe umurimo w’ubuhezanguni : ahagarariye abandi bahezanguni bari muri Leta, badatinyuka kwigaragaza kubera imyanya y’ubutegetsi barimo. Tom Ndahiro afite ubutumwa bwo guhora akwiza inyandiko z’urwango n’ubuhezanguni yifashishije ibinyamakuru bivugira Leta, harimo igihe.com.  Ntabwo rero Tom Ndahiro tuzajya tumutaho igihe tumusubiza kuko we ari igikoresho ; tuzajya dusubiza Leta yamutumye tuyereka ko yananiwe n’inshingano zayo, ko ibihuha by’urwango bya Tom Ndahiro bigamije kurangaza kugira ngo hatagira ubona ko Leta yananiwe.

Hari ubwo umusazi agwa ku ijambo

Muri uko gukwiza ibihuha, Tom Ndahiro afata ibyo hirya no hino, agasakuma agateranya agira ngo aharabike uko bishobotse kwose ishyaka FDU-INKINGI, umukuru waryo ndetse n’abayoboke baryo. Ariko hari aho yageze ukuri kuramucika maze yandika ko Madame Victoire INGABIRE Umuhoza ari umuntu uhabwa agaciro gakomeye na « Dr. Claudine Kuradusenge-McLeod, umunyarwandakazi uba muri Leta Zunze ubumwe za Amerika (USA), … uri mu kigero cy’imyaka 30. Ufite impamyabumenyi y’ikirenga yakuye muri George Mason Univeristy». Uwo Dr. Claudine Kuradusenge akaba avuga ko Madame Victoire INGABIRE Umuhoza atavuga rumwe na Leta, bityo akaba atotezwa kandi akazira ubusa.

Tom Ndahiro yemeza ndetse ko ibyo atari umwihariko wa Dr. Claudine Kuradusenge wenyine, « kuko hari abanyamakuru benshi bamubonamo umuntu uri mu rwego rwo gukosora Leta y’u Rwanda aho kuba umukangurambaga w’ingengabitekerezo ya Jenoside. Muri abo banyamakuru natangaho urugero aba televiziyo zo kuri murandasi nk’UMUBAVU, abanyamakuru ba BBC-Gahuzamiryango, n’ab’Ijwi rya Amerika (VOA) ». None se Tom Ndahiro ahindukira ate, uretse uburwayi bw’urwango n’ubuhezanguni, agahakana ibyo abo bose babona kandi bemeza ?

Leta y’u Rwanda (iyobowe na FPR) irananiwe

Leta iyobowe na FPR ifite imikorere igaragaza guhuzagurika, kunanirwa no kutiyizera. Niyo mpamvu yihisha inyuma y’abamotsi b’abahezanguni kugira ngo ivuge ibitavugwa na Leta nzima. Dore aho Leta ya FPR igeze :yananiwe inshingano zayo : 

yananiwe inshingano zayo 

• ubukungu bw’abaturage ntabwo uretse ubw’agatsiko,
• imibereho ya rubanda ni inzara ya Nzaramba, 
• umutekano ni uw’imirambo itoragurwa buri munsi, hakabura n’iperereza, 
• imibare y’imihigo yahindutse imihimbano, 
• ububanyi n’amahanga bwuzuye amahane n’ubushotoranyi, 
• ubumwe n’ubwiyunge bwasimbuwe n’umwiryane n’ubwoba, 
• vision 2020 ntikivugwa kuko yari umuyaga n’uruhendabana.

• yananiwe no kuvugira ahagaragara, ihitamo kwisunga abamotsi n’abahezanguni nka Tom Ndahiro ;
• yananiwe demokarasi : ntishobora gutinyuka amashyaka menshi kuko itibonamo imbaraga zo guhangana muri politiki binyuze mu mucyo no mu matora.

Leta nk’iyo yananiwe abamotsi bayo ntabwo aribo bagena agaciro k’ishyaka rya FDU-INKINGI.

Leta nk’iyo yananiwe abamotsi bayo ntabwo aribo bagena agaciro k’ishyaka rya FDU-INKINGI.

Ni nde ugena agaciro k’ishyaka rya FDU-INKINGI ?

FDU-INKINGI ni ishyaka ryiyubatse kandi rikomeje kugaragaza ubutwari mu gushaka impinduka nziza ku gihugu no ku banyarwanda bose. Agaciro karyo gashingiye ku bitekerezo byaryo : imigabo n’imigambi, programme politique, projet de société n’ibindi byiza abanyarwanda bakwigezaho ribibafashijemo. Inyandiko n’ibiganiro dutanga birabigaragaza.

Agaciro ka FDU-INKINGI gatangwa n’abayoboke n’abandi bakunzi baryo kuko baryibonamo kandi bakaribonamo ejo hazaza heza kurusha none. Uretse iterabwoba rya FPR, uwabaza abaturage mu bwisanzure, byagaragara ko abaturage benshi bibona mw’Ishyaka rya FDU-Inkingi bakaba bakunda cyane Prezidante Victoire INGABIRE Umuhoza, akaba ari nacyo FPR n’intagondwa zayo batinya.

Agaciro ka FDU-INKINGI ni abayobozi baryo b’inyangamugayo, ibyo bikaba bitera ipfunwe FPR ku buryo ihora ishaka kubaharabika no kubitirira ingengabitekerezo mbi badafite.

FDU-INKINGI ni ishyaka rifite amateka. Ariko ayo mateka ntabwo azandikwa n’abahezanguni nka Tom Ndahiro cyangwa abandi bamotsi ba Leta yananiwe. Nta n’ubwo tuzemera ko yandikwa n’abandi bashaka kuyagoreka ku bushake, bagira ngo bikureho ikimwaro n’ubusembwa baterwa n’ubwicanyi bwa FPR barimo kandi bakorera.

Agaciro kacu kari muri twe, ntabwo abahezanguni n’abamotsi b’i Kigali ari bo bakwiha kukatugenera. Imbaga y’abanyarwanda batwibonamo ni bo kimenyetso ndakuka cy’igihagararo dufite muri FDU-INKINGI. FPR nifungure urubuga rwa politiki maze FDU igaragaze uko ihagaze.

Bikorewe i Rouen, kuwa 18/09/2019

Théophile MPOZEMBIZI

Komiseri wa FDU-Inkingi ushinzwe Itangazamakuru

info@fdu-rwanda.com

Tubanje kubaramutsa mu ntego y’Urugaga rwacu FDLR, nimugire kandi muharanire igihe cyose na hose UBUTABERA, AMAHORO, UBWIYUNGE n’AMAJYAMBERE.

Ubuyobozi bukuru bw’Urugaga FDLR bubabajwe no kumenyesha Abacunguzi, Abacunguzikazi n’Inshuti z’Urugaga inkuru y’incamugongo y’urupfu rutunguranye rw’umuyobozi mukuru w’ingabo z’Urugaga FDLR, Jenerali MUPENZI Pierre Bernard, rwabaye kuwa 18 Nzeli 2019 muri RUTSHURU/ NORD KIVU ruturutse ku gitero cyagabwe n’umwanzi.

Kubera iyo mpamvu, ubuyobozi bukuru bwa FDLR busabye buri wese, by’umwihariko umuryango wa Nyakwigendera kwihangana.
Ntagucika intege, dukomeze urugamba mpaka kugera ku ntsinzi twiyemeje.

IMANA imuhe iruhuko ridashira.

Bikozwe kuwa 18 Nzeli 2019

(Sé)
BYIRINGIRO Victor
Lt Gen
PRESIDENT a.i des FDLR

Umuntu wabyinaga w’itorero ry’igihugu urukerereza aratubwira ku karengane abakobwa n’abagore bakorerwa mu Rwanda. Umuco w’abagabo bari mu buyobozi baca ruswa yo kuryamana n’abagore ngo babahe amanota, akazi, cyangwa se babarekere mu mirimo yabo. Aranatubwira ukuntu abagabo babaca ruswa y’amafaranga cyangwa bakabahemba makeya.

Nubwo u Rwanda ruza ku isonga ku isi nk’igihugu gifite abagore benshi mu nteko inshingamategeko aho bari ku kigero cya 61.3 ku ijana, hari abashakashatsi basanga nta musaruro ufatika bitanga.

Ibyo bikubiye mu bushakashatsi buheretse gukorwa n’abashakashatsi b’abanyarwanda barimo Nadine Mumporeze afatananije na Dominique Nduhura bamaze iminsi muri kaminuza ya Hallym mu gihugu cya Koreya y’epfo.

Mu bushakashatsi bwabo bagaragaza ko gushyirwa kw’abagore muri nzego za politiki nta musaruro ufatika bitanga bitewe ahanini n’uko hakiri ubusumbane mu zindi nzego.

Mu kiganiro n’Ijwi ry’Amerika Mumporeze avuga ko ubushakashatsi bwabo bwerekanye ko n’ubwo mu nzego zimwe nko mu nteko usanga harimo umubare munini w’abagore, bamwe babigereranya n’uburo bwinshi butagira umusururu cyangwa nk’imitako.

Abo bashakashatsi bakomeza bavuga ko usanga ahanini abagore bashishikajwe no kuzuza inshingano bahabwa n’ishyaka riri ku butegetsi kurusha uko barengera inyungu za bagenzi babo.

Mu kiganiro yagiranye n’Ijwi ry’Amerika, madamu Mumporeze atanga urugero rw’umunyapolitike Diane Rwigara washatse kwiyamamariza kuba umukuru w’igihugu nyamara hakabura abategarugori bari mu nzego z’ubutegetsi bamuvuganira ubwo yafungwaga.

Ku bijyanye no kumenya icyo Leta y’u Rwanda ikora kugirango abagore bari muri politiki babone umwanya ko kwita ku miryango yabo, Mumporeze avuga ko Leta ishyira imbere kwerekana isura nziza mu kwerekana ko yateje imbere igitsina gore mu buryo bugaragarira mu mibare iri hejuru cyane.

Akomeza avuga ko ibyo bigakorwa mu rwego rwo gukurura abanyamahanga baza gushora imari mu Rwanda.

Kubera iyo mpamvu, Mumporeze ahamye ko Leta y’u Rwanda ikigaragaza intege nke mu gufasha abategarugori kugirango babashe kwita ku miryango yabo no gukora imirimo ya politiki nta na kimwe kibangamiye ikindi.

VOA

Yanditswe na Ben Barugahare

Mu mpera z’icyumweru gishize, mu binyamakuru byinshi byo mu Rwanda ndetse na mpuzamahanga havuzwemo urupfu rwa Lt Gen Sylvestre Mudacumura wari umukuru w’ingabo za FDLR-FOCA (Forces démocratiques de libération du Rwanda). Ingabo za Leta ya Congo (FARDC) zahise zigamba ko ari zo zamuhitanye. The Rwandan nyuma yo gukora icukumbura ryimbitse ikavugana n’abantu batandukanye barimo n’ababihagazeho yashoboye kumenya uko igikorwa cyo kwivugana Lt Gen Mudacumura cyagenze.

Ubufatanye bwa RDF na FARDC

Mu mezi ashize cyane cyane muri Kamena na Nyakanga 2019, abayobozi ba gisivile na gisirikare ba Congo bagiranye inama nyinshi na bagenzi babo b’u Rwanda baganira ku bijyanye n’umutekano mu karere. Muri izo nama abo bayobozi b’ibihugu byombi bemeranyije ko u Rwanda ruzohereza muri Congo ingabo kabuhariwe (Forces spéciales) zizajya zikora ibikorwa bya gisirikare mu ibanga byo kwibasira imitwe ya gisirikare y’abanyarwanda iri mu gihugu cya Congo. Ayo masezerano yavugaga ko ibikorwa byose bizajya bitegurwa, bikayoborwa ndetse bigakorwa n’abasirikare b’u Rwanda bambaye imyenda y’igisirikare cya Congo (FARDC). Abasirikare bakuru b’u Rwanda bahisemo bamwe mu basirikare ba Congo bashobora gufatanya muri ibi bikorwa ariko abayobozi bakuru b’igisirikare cya Congo nta makuru bagomba guhabwa bagomba kumenyeshwa gusa ibikorwa bya gisikare byarangije kuba kugira ngo bigambe bivuge ibigwi cyangwa bahakane ibitagenze neza nk’uko bagenzi babo bo mu Rwanda babyifuza.

Gutegura igikorwa nyirizina

Muri Nyakanga 2019, ingabo za RDF zatangiye kohereza ku bwinshi abasirikare muri Congo cyane cyane mu karere Rutshuru bambaye imyenda y’ingabo za Congo (FARDC). Zimwe muri izo ngabo zegereye cyane ibirindiro by’ingabo za FDLR ndetse mu duce tumwe na tumwe nko mu birometero biri munsi ya 3. Muri uko kwegera izo ngabo zirinze gushotora iza FDLR ahubwo zikora ibikorwa byo kuzitata no gukurikiranira hafi ibikorwa byazo n’imibereho yazo ya buri munsi. Hari n’amakuru avuga ko izo ngabo za RDF zitabaje ikoranabuhanga ririmo n’utudege duto tuguruka nta baderevu (drones) muri ibyo bikorwa byo gutata.

Muri Kanama 2019, umwe mu barindaga Lt Gen Mudacumura yatawe muri yombi n’abasirikare b’u Rwanda bari bambaye imyenda y’igisirikare cya Congo. Bivugwa ko nyuma yo kwicwa urubozo yatanze amakuru y’uburyo ubwirinzi bwa FDLR bumeze mu duce igenzura n’imikorere muri rusange ijyanye no gucunga umutekano w’abayobozi bakuru ba FDLR. Aya makuru yagiye asanga andi yagiye atangwa n’abandi mu gihe bitandukanye yaba ari ayatanzwe n’abatahaga ku bushake cyangwa abajyanywe ku ngufu.

Uko igikorwa cyagenze

Ku cyumweru tariki ya 15 Nzeli 2019, abayobozi bakuru ba gisirikare na gisivile ba FDLR bakoze inama yarimo abayobozi bakuru hafi ya bose ari abasirikare bakuru, abakuru b’imitwe y’ingabo ndetse n’abayobozi ba gisivile. Iyo nama yabereye ahitwa Makomerehe, muri zone ya Bukoma, muri Territoire ya Rutshuru, muri Kivu y’Amajyaruguru.

Iyo nama yarangiye mu mugoroba wo ku wa kabiri Tariki ya 17 Nzeli 2019. uwari ushinzwe ubwanditsi bw’inama witwa Sixbert Soso utari umusirikare, akaba yari ashinzwe ibikorwa by’ubunyamabanga mu biro by’umukuru wa FDLR, Gen Victor Byiringiro, na Major Gaspard, wari umwe mu bafasha ba Lt Gen Syslvestre Mudacumura batangiye gutegura neza inyandiko mvugo n’imyanzuro y’inama.

Abasirikare badasanzwe b’u Rwanda (Special Forces), bari kumwe n’abandi bake ba Congo (FARDC) bagabye ibitero mu ijoro ryo ku wa kabiri Tariki ya 17 rishyira ku wa gatatu tariki ya 18 Nzeli 2019. Izo ngabo zinjiye muri Congo ziva i Gisenyi ku wa mbere Tariki ya 16 Nzeli 2019 zicengera zihisha ingabo za FDLR. Ingabo zindi za RDF zambaye imyenda ya Congo zari zisanzwe zitumbereye ibirindiro bya FDLR zakomeje kwigaragaza bisanzwe ariko mu by’ukuri ari ukurangaza ingabo za FDLR kugirango ingabo zidasanzwe za RDF zaciye ruhinganyuma zishobore kwinjira nta nkomyi mu birindiro birimo abayobozi ba FDLR.

Icyari kigenderewe muri iki gitero ni ugufata mpiri Lt Gen Sylvestre Mudacumura ari muzima akajyanwa i Goma aho ingabo za Congo zari kwivuga imyato nyuma zikamuha Leta y’u Rwanda.

Ingabo zidasanzwe za RDF (Special Forces) ziherekejwe n’iza Congo nkeya zashoboye kwinjira ahari ubuyobozi bukuru bw’ingabo za FDLR-FOCA ndetse zigera n’aho Lt Gen Mudacumura yararaga aho zaguye gitumo Sixbert Soso (umusivile wari umunyamabanga mu Ubuyobozi bra FDLR) na Major Gaspard (wari umwe mu bafasha ba Lt Gen Mudacumura) barimo batunyanya inyandiko-mvugo n’imyanzuro y’inama na Lt Gen Mudacumura akaba yari aho aruhuka. Izo ngabo zashoboye kwica Sixbert Soso ako kanya zikomeretsa Major Gaspard, zishobora no gufata Lt Gen Mudacumura. Abasirikare babiri ba RDF yafashe Lt Gen Mudacumura mu gihe abandi bari babakingiye babari inyuma bagerageza kumusohora ahari ubuyobozi bw’ingabo za FDLR ngo bamutware.

Ingabo zidasanzwe za FDLR/FOCA zizwi ku izina rya CRAP (Commandos de Renseignement et d’Action dans la Profondeur/Reconnaissance and Deep Action Commandos) bari bamenye ko batewe ndetse n’ingabo zidasanzwe za RDF zacengeye bari zitangira kuzigabaho ibitero rurambikana. Haguye abasirikare ba RDF benshi ku buryo byagaragaraga ko mu gutegura icyo gikorwa abayobozi ba RDF batari bitaye ku buzima bw’abasirikare babo. Kuri bo umubare mwinshi w’abasirikare babo bapfuye nta gaciro bari bafite imbere y’ibyubahiro bakura mu kugeza Lt Gen Mudacumura nk’umunyago i Goma ari muzima. Ingabo za FDLR/FOCA zo mutwe wa CRAP zashoboye kwica umusirikare mukuru wa Congo wari kumwe n’ingabo zidasanzwe za RDF.

Ingabo zidasanzwe za RDF zageze aho zibona ko zidashobora gutwara Lt Gen Mudacumura ari muzima n’uko bamurasa mu mutima bahereye inyuma mu mugongo noneho bagerageza kwikorera umurambo we, ibi nabyo byaje kubagora kuko ingabo za FDLR zo mu mutwe wa CRAP zari zimaze kwica benshi mu bateye bashoboraga mu gufasha mu kwikorera umurambo wa Lt Gen Mudacumura.

Icyakurikiyeho byabaye noneho kureba ukuntu izo ngabo zidasanzwe z’u Rwanda zashobora kwikura muri ako kaga zari zishyizemo. Zajugunye hasi umurambo wa Lt Gen Mudacumura, zifata amafoto zitangira kureba uburyo zakizwa n’amaguru. Ku munsi wakurikiyeho mu gitondo ingabo zidasanzwe za RDF ziherekejwe n’ingabo nyinshi za Congo n’ibikoresho biremereye zagarutse gutwara imirambo y’abasirikare bazo baguye mu mirwano bapakirwa mu makamyo yari yasigaye kure gato abarwanyi RDF bajyanwa mu Rwanda naho Abu FARDC bajyanwa i Goma.

Igikorwa cy’ingabo zidasanzwe z’u Rwanda ntabwo cyagenze neza uko bari bagiteguye kuko ingabo zidasanzwe za FDLR/FOCA zizwi nka CRAP zashoboye gusubiza byihuse ariko FDLR/FOCA yatakaje umugaba wayo wari icyitegererezo kuri benshi mu bagize uwo mutwe.

Umurambo wa Lt Gen Mudacumura washyinguwe n’ingabo ze.

Buri ruhande ruravuga ko rwatahanye intsinzi, Leta ya Kigali n’igisirikare cya Congo baravuga ko bishe abasirikare benshi ba FDLR/FOCA barimo n’abayobozi bakuru mu gihe ku ruhande rwa FDLR /FOCA ho bavuga ko batakaje abakuru babiri gusa: Lt Gen Mudacumura na Sixbert Soso, Major Gaspard acaba yarakomeretse gusa.

Amakuru The Rwandan yashoboye kubona ni uko Lt Gen Mudacumura yashyinguwe mu ibanga rikomeye na bamwe mu ngabo ze birinda ko umurambo we watabururwa ugashinyagurirwa.

Lt Gen Mudacumura yari muntu ki?

Lt Gen Sylvestre Mudacumura yavukiye i Gatumba muri Komini Kibirira mu 1954. Yize amashuri abanza i Gatumba n’amashuri yisumbuye mu iseminari nto yo ku Nyundo. Yinjiriye mu ishuri rikuru rya gisirikare ESM mu 1975 muri Promotion ya 16 arisohokamo mu 1978 ari Sous-Lieutenant. Yize i Hamburg mu ishuri ry’intambara ryo mu Budage (Führungsakademie der Bundeswehr (FüAkBw) aho yavuye ari Ingérieur de Guerre. Yabaye mu ngabo zishinzwe kurinda Perezida Habyalimana, aba umucungira ubuzima bya hafi nyuma yabaye ushinzwe ibikorwa bya gisirikare muri Bataillon Garde Présidentielle. Mu 1993 yasimbuye Major Alexis Rwabukwisi ku buyobozi bwa Bataillon ya 31 i Byumba. Mu 1994 yarwanye muri Byumba i Jali, muri Kigali, mu Bugesera, ku Mayaga, Gitarama na Butare kugeza yambukanye n’abandi basirikare ba FAR muri Zaïre. Ari mu basirikare ba FAR bashoboye gukingira impunzi mu Nzira Ndende nawe yamugejeje i Bangui muri Centrafrique aho yavuye mu 1999 asanze abandi ba FAR bari bitabiriye impuruza ya Perezida Laurent Désiré Kabila. Bamwe mu basirikare yari ayoboye bashoboye gutabara Joseph Kabila wari umugaba w’ingabo za Congo icyo gihe ubwo yari afatiwe n’ingabo za RDF hafi y’ahitwa Poweto.

Mu gihe amasezerano ya Sun City yashyirwagaho umukono we na benshi mu barwaniraga Kabila bashyizwe mu kigo cya Kamina muri Katanga aho we na bamwe muri bagenzi be bashoboye kuva bajya mu bice rya Kivu. Mu 2003 yasimuye Gen Paul Rwarakabije wari umaze gusubira mu Rwanda ku Ubuyobozi bw’ingabo za FDLR/FOCA kugeza ubwo yitabye Imana.

Lt Gen Mudacumura ni umwe mu banyarwanda bashoboye kuba indashyikirwa mu bikorwa byinshi by’ingororamubiri n’imikino itandukanye yaba ari isanzwe cyangwa imikino njyarugamba.

Yanditswe na Frank Steven Ruta

Amakuru agera kuri The Rwandan kuri uyu mugoroba wo ku wa mbere tariki ya 23 Nzeli 2019 ava mu ishyaka FDU-Inkingi ritaremererwa gukorera mu Rwanda aravuga ko umuhuzabikorwa rwaryo mu rwego rw’igihugu yishwe.

Nk’uko ayo makuru akomeza abivuga ngo Nyakwigendera Dusabumuremyi Syldio yatewe ibyuma n’abantu babiri bari kuri moto bamusanze aho yakoreraga ku bitaro mu karere ka Muhanga ahita yitaba Imana.

Amakuru The Rwandan yashoboye kubona avuga ko byabaye kuri uyu wa mbere tariki 23 Nyakanga 2019 ahagana mu ma saa tatu y’ijoro.

Nyakwigendera Dusabumuremyi Syldio ni umuyoboke wa 4 wa FDU-Inkingi mu gihe kitarenze umwaka Madame Victoire Ingabire Umuhoza amaze afunguwe. Aje akurikira Anselme Mutuyimana wishwe n’abandi babiri baburiwe irengero ari bo: Eugène Ndereyimana na Boniface Twagilimana.

Victoire Ingabire, umukuru w’ishyaka FDU-Inkingi akoresheje urubuga rwa Twitter yavuze ko nyuma y’impfu z’abayoboke be zitigeze zisobanuka nta cyizere afite ko urupfu rwa Dusabumuremyi Syldio rwo ruzashobora gusobanuka.

Nyakwigendera Dusabumuremyi Syldio asize umugore n’abana 2.

Imana imuhe iruhuko ridashira!

Yanditswe na Frank Steven Ruta

Amakuru agera kuri The Rwandan ava mu karere ka Rusizi aravuga ko habayeho kurasana hagati y’ingabo za RDF n’abantu bataramenyekana.

Nk’uko ayo makuru akomeza abivuga ngo ibyo byabaye mu ijoro ryo ku cyumweru tariki ya 22 Nzeli 2019 ahagana saa tatu n’igice ahitwa Kucyaba, mu murenge wa Nyakarenzo hafi y’ahari ikigo cya gisirikare cy’ingabo za RDF.

Amakuru umwe mu basomyi ba The Rwandan uba muri ako gace yaduhaye avuga ko iyo mirwano yatangiye ubwo abo bantu batazwi  bahagalikaga imodoka y’ikamyo yo mu bwoko bwa SCANIA barayirasa, kubera ko byari imbere y’ikigo cya gisirikare ubwo imirwano ikarishye yahise itangira imara iminota nka 20 bahanganye.

Abaturage baturiye aho gace bemeza muri iyo mirwano hakoreshejwemo n’imbunda zikomeye. Abari bahanganye na RDF bateye n’ibisasu byinshi. Nyuma yaho gato bahise  bigendera, ntiharamenyekana ababa bahasize ubuzima hagati y’abari bashyamiranye cyangwa abari muri iyo kamyo.

Aya makuru kandi yatangajwe na Radio y’abaturage ya Rusizi.

Ibi bije kandi RDF yari yarongereye ingabo muri ako karere. Dore ko ibi bibaye nyuma y’ibindi bitero 3 byahagabwe bivugwa ko byakozwe n’abantu batazwi. Ariko abenshi bakeka ko ari ingabo za FLN. Abandi bakavuga ko ari ingabo za RDF ziba ziri mu kinamico. Abakeka FLN bavuga ko ari kimwe mu bisubizo bahaye Président Kagame kw’ijambo aherutse kuvuga yigamba ko yabatoratoye.

Hari amakuru kandi avuga ko no mu ishyamba rya Nyungwe naho uyu munsi ku wa mbere ingabo za RDF zarasanye ku manywa y’ihangu amasasu menshi n’abantu bakekwa kuba ingabo za FLN. Biravugwa kandi ko mu byumweru bibiri bishize ingabo za FLN zarasanye n’ingabo za RDF ahitwa mu Gisakura.

Kayumba Rugema yiganye na Kalisa Mupende mu mashuri abanza i Bugande. Barakuranye. Bageze mu Rwanda, barakoranye mu bya gisilikari. Kalisa Mupende, yize mu Rwanda, ajya mu Buhinde, akomereza muri Amerika. Arangije amashuri ye, yategetse ibiro bishinzwe imari muri Présidence akorana bya hafi na Paul Kagame.

Niho yatangiye kugira abanzi. Ajya gutegeka BRD, aho abakomeye bose bashakaga amafranga y’inguzanyo nta bwishyu bafite. Naho abanzi be bagiye biyongera. Haziramo n’ikibazo cy’amasoko yo kugemura ibintu muri Sudani birimo na Jeannette Kagame, James Kabarebe, Jack Nziza, na James Musoni.

Ng’uko uko hapanzwe dosiye yo kumufunga. Yari amazemo imyaka 10 kugeza bamwishe. Mwibuke ko bishe na Mupende Alexia mushiki we kwa se wabo. Mwumve byose uko byagenze mu magambo arambuye muri iki kiganiro.

“Barahekura u Rwanda bibwira ngo barahima Victoire Ingabire” Aya ni amagambo yavuzwe na Victoire Ingabire mu kiganiro yagiranye n’umunyamakuru Thomas Kamilindi wa Radio Ijwi ry’Amerika nyuma y’urupfu rw’umuhuzabikorwa w’ishyaka FDU-Inkingi mu Rwanda, Dusabumuremyi Syridio wishwe ateraguwe ibyuma.

Mwakumva ikiganiro cya Victoire Ingabire na Radio Ijwi y’Amerika hano hasi:

Rubicishije ku rubuga rwarwo rwa twitter urwego rw’igihugu rushinzwe ubugenzacyaha (RIB) rwatangaje ko rwataye muri yombi abantu babiri bakekwaho kugira uruhare mu rupfu rwa Dusabumuremyi Syldio wari umuhuzabikorwa mu rwego rw’igihugu w’ishyaka FDU-Inkingi.

Nabibutsa ko Dusabumuremyi Sylidio yishwe kuri uyu wa mbere tariki tariki 23 Nzeli 2019 mu masaa tatu z’ijoro atewe ibyuma n’abantu 2 bari kuri moto, bamwiciye muri Cantine y’ikigo nderabuzima cya Shyogwe mu karere ka Muhanga aho yakoreraga.

Umukuru wa FDU-inkingi, Victoire Ingabire yavuze ko bigaragara ko hari gahunda yo kumushyira mu kato kuko ngo uwo bakoranye bya hafi wese ahita yicwa, yavuze kandi ko atizeye abakora amaperereza kuko n’abishwe cyangwa bakaburirwa irengero mbere bo mu ishyaka rye ayo maperereza ntacyo berekanye yagezeho.

Kugeza ubu mu gihe kitarenze umwaka abayobozi babiri ba FDU-Inkingi bamaze kwicwa (Anselme Mutuyimana, Syldio Dukuzumuremyi), abandi babiri baburiwe irengero (Boniface Twagirimana na Eugene Ndereyimana)

Ishyaka FDU inkingi ritemewe n’ubutegetsi bw’U Rwanda riravuga ko umuhuzabikorwa waryo ku rwego rw’igihugu, Sylidio Dusabumuremyi, yishwe n’abantu bigaragara ko batojwe kwicisha ibyuma.

Iryo shyaka riravuga ko bamusanze aho yakoreraga mu karere ka Muhanga ahagana mu ma saa mbiri z’ijoro kuwa mbere.

Muri iryo shyaka kandi bavuga ko atari ubwa mbere abarwanashyaka baryo bicwa cyangwa se bakaburirwa irengero. 

Umunyamakuru Jacques Niyitegeka wa BBC Gahuza -Miryango yavuganye na Victoire Ingabire umukuru w’ishyaka FDU-Inkingi maze atangira amubaza uko byagenze.

(Ushobora kumva icyo kiganiro aho hejuru)

Yanditswe na Ben Barugahare

Nyuma y’urupfu rwa Nyakwigendera Syldio Dusabumuremyi wishwe atewe ibyuma kuri uyu wa mbere tariki ya 23 Nzeli 2019, amakuru atangwa n’abayobozi b’ibanze aravuguruzanya n’atangwa n’urwego rw’igihugu rushinzwe ubugenzacyaha (RIB).

Mu gihe RIB ikoresheje urubuga rwayo rwa twitter yemeje ko hari abantu babiri batawe muri yombi bakekwaho urupfu rwa Syldio Dusabumuremyi, Umunyamabanga Nshingwabikorwa w’Umurenge wa Shyogwe, Habinshuti Vedaste we yabwiye ikinyamakuru IGIHE cyegamiye ku butegetsi bw’u Rwanda ko nta muntu wigeze ufatwa kubera ubwo bwicanyi.

Dore uko ikinyamakuru IGIHE kibivuga:

Umunyamabanga Nshingwabikorwa w’Umurenge wa Shyogwe, Habinshuti Vedaste, yabwiye IGIHE ko ayo makuru nabo yababereye urujijo.

Ati “Gupfa byo bamwishe ariko uko byagenze sinabimenya kuko ntari hafi, nahageze bantabaje. Yakoreraga muri Cantine dusanga bamuteraguye ibyuma.Yari ahamaze igihe kinini ahakorera, icyatuyobeye ni uko nta muntu bari bafitanye amakimbirane kandi aho yabaga ni nko muri metero zitageze kuri 40 uvuye aho yakoreraga.”

Habinshuti yakomeje agira ati “Ibintu birimo n’amayobera aho haba hari n’abashinzwe umutekano kandi umuntu ajya kwinjira muri iyo cantine anyuze mu kigo, tukareba tugasanga ari amayobera. Ibyo batubwira, bavuga ko hari abantu baje kuri moto barangiza bakongera bakayigendaho.”

Habinshuti yavuze ko abo bantu batafashwe ariko iperereza rigikomeje.

Sylidio Dusabumuremyi w’imyaka 42 yari atuye mu Mudugudu wa Mapfundo, Akagari ka Mubuga, Umurenge wa Shyogwe. Umugore we bari bafitanye abana babiri, ni Umuforomokazi mu Kigo Nderabuzima cya Shyogwe.

Mu kiganiro yagiranye na Radio Ubumwe, umuvugizi wa FLN, Capitaine Herman Nsengimana, yemeje ko ingabo za FLN ari zo zagabye igitero mu karere ka Rusizi mu Murenge wa Nyakarenzo mu ijoro ryo kuri iki cyumweru tariki ya 22 Nzeli 2019.

Ibi bije byemeza amakuru The Rwandan yari batangaje aturutse mu batuye mu karere ka Rusizi avuga ko Hari abantu bataramenyekana bari bagabye igitero ahitwa ku Cyapa mu Murenge wa Nyakarenzo hafi y’ikigo cy’abasirikare ba RDF.

Mwakumva ikiganiro cyose umuvugizi wa FLN yagiranye n’umunyamakuru Erspérance Mukashema wa Radio Ubumwe:

Mu kiganiro yagiranye n’umunyamakuru Vénuste Nshimiyimana wa Radio Ijwi ry’Amerika, umuvugizi wa FDLR yatangaje ko bataciwe intege n’urupfu rwa Lt Gen Sylvestre Mudacumura, ko bazakomeza urugamba.

Mushobora kurva ikiganiro cyose hano hasi:

Ibi Victoire Ingabire yabitangaje mu kiganiro yagiranye n’umunyamakuru Gaspard Musabyimana wa Radio Inkingi.

Mwakumva ikiganiro cyose hano hasi: