Ubuyobozi bw’ishyaka rya Opozisiyo, ISHEMA ry’u Rwanda, bushimishijwe no kumenyesha abahagarariye ibihugu byabo mu Rwanda, abanyamakuru, abayobozi b’amashyaka ya Politiki n’abahagarariye amashyirahamwe ya Sosiyete sivile ndetse n’abanyarwanda bose muri rusange ibi bikurikira :

1. Igihe kirageze cyo kujya gukorera politiki mu Rwanda nk’uko Ishyaka ISHEMA ryabyiyemeje.
2. « Kunga abenegihugu kugira ngo bafatanye kwiyubakira u Rwanda moderne », ni wo mushinga Ishyaka ISHEMA ryifuza kugeza ku Banyarwanda.
3. Bwana Padiri Thomas NAHIMANA, Umunyamabanga Mukuru w’ishyaka ISHEMA ry’u Rwanda akaba n’umukandida ku mwanya wa Perezida wa Repubulika mu matora ya 2017, n’ikipe ayoboye bazahaguruka ku mugabane w’u Burayi kuri uyu wa Kabiri tariki ya 22 Ugushyingo 2016 ku isaha ya saa kumi n’iminota 50 z’umugoroba (16: 50). Ikibuga cy’indege bazahagurukiraho ni Paris Charles de Gaulle mu Bufaransa.
4. Bazasesekara i Kigali kuwa Gatatu tariki ya 23 Ugushyingo 2016 ku isaha ya saa munani n’iminota 55 z’amanywa (14 :55).
5. Turashishikariza ababyifuza bose kuzaza kuduherekeza i Paris no kudusanganira i Kigali.

Demokarasi ni urugamba rugoye, ntidushobora gusongongera ku byiza byayo hatabonetse abenegihugu b’intwari biyemeza kuyitangira.

Harakabaho u Rwanda ruha abana barwo bose amahirwe angana.

Bikorewe i Le HAVRE kuwa 21 Ugushyingo 2016.

ITANGAZO N°008/PS.IMB/2016:

Rishingiye ku byaha Ubushinjacyaha bukurikiranyeho Me Ntaganda Bernard; Prezida Fondateri w’Ishyaka PS IMBERAKURI;

Ibyago u Rwanda rwahuye na byo birenze imivugirwe. Ni akumiro nyuma y’imyaka irenga makumyabiri umunyarwanda yarumiwe ntashobora kuvuga ibyamubayeho. N’ubwo hari abirirwa bamukina ku mubyimba ibyago yagize bakabihindura umushinga munini wo kwiberaho.

Ibyago bikomeye yagize ariko yabuze mukuru. Igihugu cyacu nta bakuru gifite cyabuze abahanuzi ngo bahane bahanure. None dore n’abakorera Imana, abepiskopi gatolika, abenshi twizeraga ko bashobora kugira ubushishozi, babyinnye iya rusange, babaye intore, barashaka gushimisha FPR.

Hari abibeshya ko abanyamahanga cyane abazungu aribo bazatuma twumva tugasobanukirwa ibyatubayeho. Nyamara abakurambere bacu bavuzeko “ak’imuhana kaza imvura ihise “. Izahita ryari ko ndeba ibaye umugwajoro.

Nta gushidikanya ko abepiskopi bazi neza ibibazo by’u Rwanda. Bahisemo gusubiza ibintu irudubi aho abantu bari babategerejeho umusanzu ukomeye mu kunga abanyarwanda. Ese koko bamurikirwa na Roho Mutagatifu?

Ibi ntibabizi :

• Kiliziya Gatolika ifite uruhare rutaziguye mu gutera amacakubiri mu banyarwanda

Abanyarwanda bazi neza ko nta rwango kamere ruri hagati y’abahutu n’abatutsi. Nyamara bagwiriwe n’amahano akomeye arimo jenoside n’ubwicanyi ndengakamere ndetse bugikomeza.

Kiliziya Gatolika iyo ishaka gufasha abanyarwanda yakwerekana neza uruhare rwayo mu byabaye. Birahari biranditse cyangwa hari ababibonye bakiriho. Ntibisaba amashuri menshi ngo ubibone. Ibitabo byinshi ni yo ibibitse kandi ifite abahanga bahagije bo kubisobanura. Habuze ubushake.

Kiliziya nihere ku ruhare abamisiyoneri bagize mu gukomeza amacakubiri mu banyarwanda. Mu bitabo biranditse aho abo bamisiyoneri baje berekana ko amoko ari mu Rwanda asumbana hari abagomba kuba abagaragu b’abandi. Ko hari abafite ubwenge bw’inkomoko.

Myr Léon Classe yabaye impirimbanyi ikomeye y’iyi myumvire ashinga amashuri n’imiryango y’abihayimana y’ubwoko bumwe. Imungu ikomeye iba yinjiye mu mutima wa Kiliziya mu Rwanda no mu muryango nyarwanda muri rusange. Kuva icyo gihe imiryango myinshi y’abihayimana ifite ubwoko bugomba kuyiyobora no kuyiha icyerekezo. Ibyo abanyarwanda n’ubu turabireba, turabibona.

Buriya umuryango wa Rukara rwa Bishingwe ushobora gushora urubanza ko yari muri “Légitime défense”, Kiliziya Gatolika izatanga impozamarira.

Uruhare rwa Myr Perraudin mu mpinduka zabaye mu Rwanda guhera muri 1959 kuruhakana biragoye. Kuvuga ko ntaho yanditse ibitekerezo biteranya abantu ntibihagije. Amafoto yose yerekana ibirori byishimira ubwigenge yari afatanye urunana n’abari babuharaniye. Ibyo ntibikwiye ku mushumba wari uzi neza ko hari abanyarwanda benshi birukanwe mu gihugu abandi bakicwa. Ni nde utazi ko kugira ngo abanyarwanda bange UNAR bayise abakomuniste (abanzi bakomeye ba Kiliziya), bigatuma no muri za Misiyoni hirya no hino banga guhisha abatutsi ngo ni abakomuniste. Abapadiri kugira ngo umutimanama utabacira urubanza bahisemo kwambika abatutsi umwambaro w’ubukomuniste. Ibyo byabaye ejobundi tubireba. Iyo abapadiri babishaka bari kurengera abatutsi ntibicwe muri 1959.

Muri Misiyoni mvukamo umutware wari uhari yishwe avuye kwa padiri banze kumuhisha. Ibyo byababye ejobundi tubireba. Abapadiri bari bumvikanye n’ababirigi ko abatutsi bahunga bakabisa abahutu. Umwami Kigeli Ndahindurwa yirukanwe nande? Kinyamateka yakwirakwizaga amatwara y’abarwanya ubwami n’abatutsi yandikirwagahe? Iyo usomye Kinyamateka y’icyo gihe urumirwa. None Perraudin ni umwere Kinyamateka yarandikirwaga iwe, n’inama zigakorerwa ku matariki azwi? Waba uri injiji bwo ibyo ntiwabibona.

N’uyu munsi uwakora igenzura yabona uruhare rwa Kiliziya mubyabyaye muri 1959. Ni ejobundi abenshi barabibonye kandi baracyariho. Umunsi byashyizwe ahagaragara Kiliziya Gaturika izaha indishyi imiryango yabuze abayo muri icyo gihe ndetse n’ibintu byangijwe. Ibimenyetso ntibibuze.

Aha Kiliziya yagombye gusaba imbabazi zitaziguye, atari kujijisha ngo abana bayo abahe? Bande?

Aha ababigizemo uruhare ni abayobozi barazwi, biri mu nyandiko nyinshi: Myr Classe na Myr Perraudin. Nk’ubu abepiskopi basabye imbabazi mu izina rya bagenzi babo abantu babyumva kandi byavura umuryango nyarwanda ibikomere byinshi.

• Kiliziya Gatolika ifite uruhare rutaziguye mu kwirukana umwami Musinga

Igihe birukanaga umwami Musinga abamisiyoneri nibo bateguye Rudahigwa wagombaga kumusimbura. Iyo ni Kiliziya. None se gufata Musinga bakamuta inyuma y’igihugu akagwayo niko kubahiriza ivanjili batwigishaga? Nyamara bakomeje kubwira abanyarwanda ko babazaniye Inkuru Nziza. Batubaha ikiremwa muntu bahereye ku mwami. Ni ugusuzugura igihugu bikabije.

None se ni nde wateguye Rudahigwa hari ibanga ririmo? Hari umunsi Kiliziya Gatolika izadusobanurira ako gasuzuguro aho gahuriye n’Ivanjili. Umuryango wa Musinga ushobora kuzasaba indishyi. Kandi koko ukeneye kurenganurwa. Amategeko yakurikijwe ni ayahe? Aha Kiliziya yagombye gusaba imbabazi zitaziguye, kandi igatanga indishyi. Iyo bakubwiye agahinda n’akaga Musinga yatanzemo nibwo ubona ubugome bw’abo bamisiyoneri.

Biracyaza

Emmanuel Musangwa

Evode se yagiye agiye guhanyanyaza uko mubizi? Biratandukanye. Evode yagiye agiye gukorera FPR naho Nahimana we agiye guhanyanyaza nkuko nawe yabyivugiye!

Guhanyanyaza nta n’ubwo azanabishobora kubera impamvu zikurikira:

(1)itegeko nshinga ridoze nk’ikote ryo kwambika Kagame na FPR ye ntabwo ari iryo kwambika u Rwanda rwose n’abanyarwanda bose na Nahimana arimo;

(2)itegeko rigenga amashyaka rirazitira amashyaka yose avuga ko atavuga rumwe na FPR; niba Nahimana agiye atavuga rumwe na FPR ntaho azarinyura. Ngirango wakurikiye Kagame yibarisha ngo “harya ngo kutavugarumwe ngo na FPR ni ibiki??” ngo “ese umuntu utavuga rumwe na FPR yaba akora iki hano, ahangaha!”;

(3)itegeko rigenga amatora ryakozwe na FPR ryakorewe gutanga buri gihe intsinzi ya FPR, ntaho Nahimana yarinyura, niyo yararara agenda bukamukeraho;

(4)abategura ibikoresho by’amatora, abatoresha n’ababara amajwi abaguverineri b’intara, abameya b’amadistricts abakuru b’imidugudu bose ni abakada ba FPR BAZATEKINIKA BYOSE NKUKO BABYIVUGIRA MU MVUGO NSHYA YABO MU Rwanda(GUTEKINIKA);

(5) abaDMI na polisi y’igihugu na DASSO bahagarikira amatora n’umutekano wayo no kurinda les urnes na sites ibarura ry’amajwi riberaho ni abakozi ba  Kagame na FPR ye;

(6)abakora kuri computers zishinzwe gukora ku birebana n’amatora byose ni FPR nsa nsa nsa;

(7) abagize Komisiyo y’amatora ni abakada ba FPR;

(8)abagize urukiko rw’ikirenga bemeza ibivuye mu matora ni abakozi ba FPR.

Ubu hari uwanyereke aho Nahimana yamenera “ahanyanyaza” nkuko ubivuze ko jye mbona no guhanyanyaza byonyine bisa n’ibidashoboka?

Guhanyanyanyaza kwe ni ukugira ibyo yakumvikanaho na FPR kugirango ayiherekeze mu bujura bwayo bw’ubutegetsi bw’igihugu cy’u Rwanda, nta kindi!

Ese abantu baribuka ko Dr. Niyitegeka yavuye I New York muri Amerika aho yakoraga aje mu Rwanda kwiyamamariza ubuperezida mu 2003 yumva nawe ko ari uburenganzira bwe nta n’ishyaka yari yarashinze ari candidat independent akabizira ubu akaba amaze imyaka 13 afunze?

Ku bya Nahimana n’igisa na we reka nkubwire uko bigenda niba mutari mubizi:

Dr Ntawukuriryayo Jean Damascene ntuzi ko ari we wari umuherekeza. N’ubwo yari umuherekeza Forum des partis zikorana na FPR ari uko yabigennye, FPR yashyiragaho deployment y’abapolisi n’abaDMI ibihumbi bitatu(3000) mu gihugu cyose bambaye en civil bakwira igihugu cyose gukorana na local government authorities mu kubuza abaturage kujya muri za mitingi(rallies) za Dr. Ntawukuriryayo wa PSD.

N’igihe Twagiramungu yajyaga kwiyamamaza  niko byagenze. Na n’ubu niko bizagendekera uzaherekeza Kagame uwo ari we wese, yaba Dr.Ntawukuriryayo wa PSD, yaba Padiri Nahimana w’ishyaka Ishema.

Dr. Gasana Anastase,
umuyobozi w’shyaka Nyarwanda ry’Imberabose PRM/MRP-ABASANGIZI ishyaka rigamije gusangiza abanyarwanda bose ibyiza by’igihugu cyabo birimo n’ubutegetsi bwacyo ntawe uhejejwe inyuma y’urugi, ntawe ubundikiye ipfunwe, ntawe ugaragiye undi, ntawe uherekeje undi, ntawe uragiye undi nkuragiye inka ihene cyangwa intama, ntawaje kuvumba iwabo; ntawica undi.

Mu kiganiro yagiranye na Radio BBC Gahuza-miryango kuri uyu wa mbere tariki ya 21 Ugushyingo 2016, Musenyeri Filipo Rukamba, umwepiskopi wa Diyosezi ya Butare akaba n’umuvugizi w’inama y’abepiskopi mu Rwanda yatangaje ko Kiliziya Gatorika itigeze isaba imbabazi nka Kiliziya ko hari uruhare yagize muri Genocide ahubwo yazisabiye abakristu bayo bayigize uruhare.

Mushobora kumva hano hasi ikiganiro yagiranye n’umunyamakuru wa BBC Gahuza-Miryango, Prudent Nsengiyumva:

Umunyamakuru wa Radio Ijwi ry’Amerika, Etienne Karekezi nawe yavuganye na Musenyeri Filipo Rukama nawe amusobanurira imbabazi zasabwe na Kiliziya izo ari zo:

Mu kiganiro yahaye Radio BBC Gahuza Miryango cyatambutse kuri uyu mugoroba wo ku wa kane tariki ya 22 Ugushyingo 2016, Padiri Thomas Nahimana yiyamye

abashaka kumutera ubwoba dore ko hari benshi mu bashyigikiye Leta ya Kigali barimo gukorera hasi kubura hejuru ngo batere ubwoba Padiri Nahimana ye kujya mu Rwanda ndetse umuryango Ibuka wo wasabye ko ngo yahita afatwa akigera ku kibuga cy’indege!

Mushobora kumva ikiganiro Bwana Thomas Nahimana yahaye BBC Gahuza Miryango

Undi wagize icyo avuga Ni Tom Ndahiro uvuga ko ari umushakashatsi ku bijyanye na Genocide ariko bitewe n’ibyo atangaza hakaba hari benshi bahamya ko ubwo bushakashatsi buhishe irondakoko n’izindi nyungu za politiki zibogamiye ku butegetsi bwa FPR buriho mu Rwanda.

Ntabwo ari Tom Ndahiro gusa kuko n’ibinyamakuru biri mu kwaha kwa Leta ya Kigali nka igihe.com byatangiye kwibasira Padiri Thomas Nahimana.

Biravugwa ko umuvugizi w’inama y’Abepiskopi mu Rwanda Musenyeri Filipo Rukamba yatangaje ko ngo Kiliziya idakorana na Padiri Thomas Nahimana ko ibikorwa bya politiki abirimo ku giti cye.

N’ubwo abahagarariye u Rwanda mu gihugu cy’u Bufaransa ntacyo bavuze kuri uru rugendo rwa Padiri Nahimana, uhagarariye u Rwanda ku mbuga nkoranyambaga (Twitter na Facebook) ndetse no mu gihugu cy’u Bubiligi Bwana Olivier Nduhungirehe uzwi no kw’izina rya Budome yatangaje ku mbuga nkoranyambaga inyandiko nyinshi ndetse zica n’amabanga y’akazi aca amarenga igitegereje Padiri Nahimana nagera i Kigali, ntabwo yaciye ku ruhande kuko yiyambuye umwambaro w’ubw’Ambadasaderi agahinduka umushinjacyaha.
Umwe mu bayobozi b’ishyaka Ishema ry’u Rwanda Bwana Chaste Gahunde akoresheje urubuga nkoranyambaga rwa Facebook yatangaje ko bafite inshingano zo gutabara igihugu cyabo kuko ngo abona nta gahunda ikiba mu Rwanda kuko ngo Kiliziya yigize umucamanza naho Ambasaderi Nduhungirehe akigira umushinjacyaha.

Marc Matabaro

Email: therwandan@ymail.com

Ese umwicanyi si nk’undi ?

Kimwe mu bimenyetso ko no mu bihayimana hari irondakoko ni uko hari abapadiri n’abandi bihaye Imana b’Abahutu bishwe n’abandi bafunzwe hirya no hino mu Rwanda baregwa ko ngo bagize uruhare mu itsembabwoko ryibasiye Abatutsi mu Rwanda. Bamwe muri bo batangirwa ubuhamya bubagira abere n’abacikacumu ubwabo, ariko bakarenga bagakomeza kuborera mu munyururu. Ikitaravuzwe kugeza ubu ni uko :

1°. Hari abapadiri n’abandi bihayimana b’Abatutsi bakotanye koko ku buryo bwose bushoboka : gukusanya imisanzu, kuyicunga, kurema za “brigades” za FPR, kohereza urubyiruko muri FPR n’ibindi. Ntabwo yari impamvu ihagije yo kugirango bicwe.

2°. Hari abatahukanye na FPR. Ntibarutashye imaze gutsinda intambara, ahubwo bazanye nayo “bavuza icyuma” nk’uko babyivugira, bisobanura ko bari mu mutwe wayo w’ingabo zirwana (APR). Ese bahamya ko abantu bose bishe babahoraga ko ari abicanyi koko  ?

3°. Akandi kaga katazirikanyweho bihagije ni uko Abafurere bamwe b’Abatutsi b’Abayozefiti bari i Gakurazo binjiye mu ngabo za FPR zari zimaze kwica abakuru ba Kiliziya Gatolika abo bafurere bari barihayemo Imana, ndetse n’umukuru w’umuryango wabo, Furere Nsinga. Mu gitekerezo cyabo bagomba kuba baragiraga bati : “Uwiyishe ntaririrwa. Nsinga yanze kwitandukanya n’Abahutu bagombaga kwicwa, ibikundanye birajyana, ni akazi ke”. Ubwicanyi bw’i Gakurazo ntibwahagarariye aho. Izo ngabo Abayozefiti bamwe bari bamaze kwinjiramo zahize bukware abakozi n’Abafurere b’Abahutu (Balthasar na Vivens) bahabaga, zishirwa zibishe nabo.

Kugirango umuntu asange uwishe abo nakwita ise, ba se wabo 2 na mukuru we, afatanye nawe guhiga no kwica abavandimwe be bari basigaye, uwo muntu agomba kuba yarazonzwe n’irondakoko. Ndahamya ko Abafururere b’i Gakurazo bagiye mu Nkotanyi batatinze kubona ko bibeshye, ubu bakaba baricujije.

4°. Hari n’abapadiri bari basanzwe mu Rwanda bagize uruhare mu bwicanyi bwakorewe Abahutu. Ibyo ntibyavuzwe. Niba hari n’uwigeze abihingutsa, byarazinzitswe, ntibyagira inkurikizi, mbega nka biriya by’i Gakurazo.

Inkotanyi zimaze gukubura diyosezi ya Byumba zakomereje i Kibungo. Bamwe mu bapadiri b’iyo diyosezi bazifashije gutangira Abahutu batagira ingano ngo badahungira muri Tanzaniya no kubatsemba bivuye inyuma. Igihe cyarageze, Musenyeri Ferderiko Rubwejanga wari umwepiskopi wa Kibungo icyo gihe, arababwira ati “Muhitemo kugaruka mu buzima bwa gipadiri cyangwa mujye mu gisirikari cya FPR burundu”. Bahisemo gusubira mu gipadiri, ariko umwe muri bo witwaga Callixte bahimbaga irya Bombasi, ari nawe wampaye ubu buhamya, aranga. Yabwiye bagenzi be ati : “Koko nyuma y’ibintu twakoze, mwebwe musubiye mu gipadiri ?”. Ati :“njyewe singisubiramo kuko «inkoko yaraye mu gihuru iba yabaye inkware»”. Yaragiye yibera konseye wa segiteri, nyuma aza kwicwa n’indwara.

Mu kwitegura yubile yo mu w’i 2000, diyosezi gatolika zose zo mu Rwanda zakoze sinode ku birebana n’amoko, irondakoko n’ubwiyunge bw’Abanyarwanda. Ba bapadiri b’i Kibungo bo barabyanze, basaba ko hasuzumwa ahubwo itegeko ribuza abapadiri gushaka abagore n’ibirebana n’ubukene bw’amafaranga bari bifitiye. Musenyeri Ferederiko Rubwejanga wacyuye igihe cye akajya kwibera umumonaki mu Bubiligi, ku bw’amahirwe aracyahumeka. Ibi nanditse aha nawe ubwe yabitangira ubuhamya, ahubwo uwakwibaza impamvu kugeza ubu ntacyo yari yavuga ntiyabigayirwa.

Muri arkidiyosezi ya Kigali, padiri Wenceslas Munyeshyaka yarezwe gufatanya n’Interahamwe ateshwa umutwe karahava ! Urukiko rw’Ubufaransa rwashatse kumucira urubanza kuri icyo cyaha rwategereje ko Kigali yohereza dosiye ifatika, ruraheba ! Nyamara nta muntu n’umwe wigeze acisha ibigwi bya padiri Eustache Butera. Taliki ya 22/04/1995 yari i Kibeho hamwe na koloneli Ibingira. Padiri Eustache yari yambaye gisirikari, afite n’imbunda ngo agiye gushaka mu nkambi y’i Kibeho uwishe nyina. Bamwe mu baguye i Kibeho rero bishwe n’amasasu yarashwe na padiri Eustache Butera.

Mu cyumweru cy’icyunamo mu mwaka ntibuka neza, i Masaka ho muri Kigali padiri Claudien Ruhumuriza na nyirarume, nyakwigendera padiri Didace Ruzindana, bashyikirijwe abagabo b’Abahutu babiri bashinjwaga ubwicanyi, nabo babashyikiriza abasirikari ba FPR, babasaba ko babakubita. Bahagarariye ikubitwa ryabo kugera bavuyemo umwuka, babona gutaha.

Igihe ubucamanza bwo mu Rwanda bwakoreshaga ikinamico ngo buraburanisha ababojozi (bouchers) b’i Gakurazo, isi yose yumvise padiri Aloys Munyensanga w’ i Kabgayi avuga ko abo babojozi bagize neza, ndetse yongeraho ko iyo agira ibikoresho, bari gusanga nawe ubwe yararangije kwiyicira izo nzirakarengane. Umupadiri w’umuhutu wari kuvuga ibintu nk’ibyo ashima Interahamwe yari gufungwa burundu. Tugumye muri diyosezi ya Kabgayi, ibyabaye kuri padiri Hildebrand Karangwa wafatiwe “mu byo abagore bakenyereraho”, amafoto ye agakwira isi yose, burya benshi babifashe nk’igihano kubera ubugome butagira ingano yagaragaje mu gushinja ibinyoma bagenzi be nka Joseph Ndagijimana na Laurent Ndagijimana. Hildebrand bari baramuhimbye irya “Afandi Gacaca”.

Muri diyosezi ya Butare, padiri François Mana ni umwe mu bagiye ku mugaragaro i Kibungo hamaze kwigarurirwa n’Inkotanyi, gukurikira amasomo ya gisirikari. I Save, uwo padiri François Mana na padiri Jean Marie Vianney Gahaya bice Abahutu benshi ku manywa y’ihangu. Ku by`umwihariko, padiri Mana yagize uruhare rukomeye mu iyicwa rya Padiri Claude Simard w’umunyacanada wari muri paruwasi ya Ruyenzi. Yamuzizaga ngo ko yari yanze ko aba padiri ubwo yakoreraga staje muri iyo paruwasi, akitwara uko ashaka. Ibyo Musenyeri Gahamanyi yabirenzeho, amuha ubupadiri. Mana agarutse ari padiri-Nkotanyi, ahitana uriya muzungu. Mana na Gahaya baje kuva mu bupadiri, ntibigeze babazwa iby’abantu bishe, kandi ubanza batazanigera babibazwa.

Muri diyosezi ya Cyangugu, padiri Ignace Kabera yishe Félix Kaboko, mwene Karoli Bishembegeri wo mu cyahoze ari selire Rwinzuki, segiteri Kiranga, komini Gishoma. Ko byavuzwe, bikandikwa, hari ubwo yigeze abibazwa n’ubucamanza, kugirango abe yavuga nibura ko bamubeshyera ? Padiri Ubald Rugirangoga yagize uruhare rukomeye mu rupfu rwa Jean Pierre Sindayiheba w’ i Rwabidege. Yarongeye agira uruhare rukomeye mu gusenya urugo rwa Rugumayo w’i Nyakabuye. Uko byagenze byabara umwanzi : Umuhutu Rugumayo w’i Nyakabuye muri Cyangugu yari i Butare igihe cya jenoside. Yabashije gukiza Janvière, umwana w’umukobwa w’umututsikazi, amugeza iwabo i Karengera muri Cyangugu. Janvière yasanze nta kindi yahemba Rugumayo kitari ukumubera umugore, aramutse abishatse. Nta ngufu Rugumayo yigeze ashyira kuri Janvière. Padiri Ubald Rugirangoga, afatanije na mukuru wa Janvière witwa Alice ushatse mu Bufaransa bakoze uko bashoboye kose ngo basenye urwo rugo, Janvière ababera ibamba. Icyo bakoze ni ugushimuta Rugumayo no kumufungisha imyaka 5 yose. Yaje gufungurwa muri Nzeri 1999 ntacyo agishoboye kwimarira kubera ibibi yakorewe afunze. Yasanze kandi Janvière yaramaze gushaka undi mugabo kubera kwibwira ko Rugumayo yapfuye yishwe. Ko ibyo bizwi na bose, hari uwigeze atunga padiri Ubald n’urutoki rw’agahera ? Rugumayo aracyariho nabi nabi, ushidikanya yamwegera, akamubwira ibyamubayeho. Janvière nawe aracyariho, yabitangira ubuhamya.

Muri diyosezi ya Nyundo, ba nyakwigendera bapadiri Jean Kashyengo na Straton Karanganwa bakoreraga FPR kurusha uko bakoreraga Imana. Hagati yabo ariko baranganaga ku buryo n’ikuzimu bagomba kuba barakomeje kurwana. Ni bamwe mu bapadiri bo ku Nyundo batifuzaga ko mugenzi wabo padiri Edouard Nturiye bita Simba yabaho. Babigezeho kuberako ari hafi kuzagwa muri gereza ya Gisenyi arengana.

Ndagirango ndagize ntanga ibyifuzo 3 :

Icyambere kirebana n’uko ntarondoye ibimenyetso byose bifitanye isano n’ubwicanyi byerekana ko no mu bihayimana hari irondakoko. Ababishoboye nibanyunganire.

Icyakabiri ni uko i Gakurazo n’ahandi hose Inkotanyi zatikirije Abahutu b’inzirakarengane nko mu buvumo bwa Kanama (Gisenyi) n’ahandi henshi hahindurwa inzibutso izo nzirakarengane zajya zibukirwaho.

Icyagatatu ni uko Kiliziya gatolika dukunda yari ikwiye gusaba Abihayimana bayo bose gukora SINODI idasanzwe maze ikabasaba kugira ubutwari bwo gusubiza iki kibazo gikomeye cyangwa ikindi cyenda gusa nacyo :

“Nk’Abihayimana ba Kiliziya ya Kristu iri mu Rwanda, kugirango turusheho kuba Abahanuzi n’Abahamya nyakuri b’urukundo rwa Kristu mu bantu, twakora iki gifatika kugira ngo twerekane ku mugaragaro ko tudashyigikiye (complicité)  ivangura n’akarengane bidasanzwe  byakorewe Abatutsi ejo hashize , muri iki gihe bikaba bikorerwa  abo mu bwoko bw’Abahutu ?”

Jean de Dieu Musemakweli

Mu karere ka Kayonza mu murenge wa Rwinkwavu haravugwa inzara kuri ubu imaze guhitana abantu bane. Ubuyobozi buhakana aya makuru nyamara abaturage bo bakayemeza kimwe n’ibitaro bya Rwinkwavu.

Mu mezi ashize mu ntara y’uburasirazuba by’umwihariko mu karere ka Kayonza mu murenge wa Rwinkwavu, nibwo hagiye humvikana mu bitangazamakuru bivugwako abaturage bariho basuhuka kubera inzara, ariko ubuyobozi bwo bugahakana ayo makuru buvugako nta nzara ihari ahubwo igihari ari amapfa.

Kuri uyu wa 22 Ugushyingo bamwe mu baturage batuye mu murenge wa Rwinkwavu mu kagali ka Nkondo batangarije umunyamakuru w’imirasire.com ko hamaze kwitaba Imana abantu bane mu bihe bitandukanye bo bemezako bazize inzara. N’ubwo ubuyobozi bwako kagali buhakana ayo makuru.

Kubera impamvu z’umutekano wabo basabye ko imyirondoro yabo igirwa ibanga, uwitwa Kalisa (ntabwo ariyo mazinaye yukuri) yagize ati” hano mu murenge wa Rwinkwavu mu kagali ka Nkondo hamaze kwitaba Imana abantu bane bazize inzara.

Uyu muturage yavuzeko mu by’ukuri n’imfashanyo itangwa n’ubuyobozi bw’akarereka Kayonza arinkeya ugereranyije n’umubare w’abaturage bakeneye ubufasha.

Tukimara kumva iby’aya makuru y’abo bantu bitabye imana bazize inzara nkuko abaturage babyemeza, ku murongo wa Telefone twavuganye n’umuyobozi ushinzwe imibereho nyiza y’abaturage mu kagali ka Nkondo arinaho havugwa icyo kibazo, Mutesi Scovia avugako ayo makuru atariyo kuko n’abaturage bafite ikibazo cy’inzara ubuyobozi bubagenera ibifungurwa, Mutesi yagize ati’ Mubyukuri kwemezako abantu bitabye Imana baba barazize inzara ntabwo byaba aribyo kuko hari ubufasha akarere ka Kayonza kagenera abafite ikibazo cy’inzara bityo agahanyako ayo makuru atariyo.

Tumubagije ku mubare uvugwa n’abaturage w’abantu 4 bitabye Imana mu minsi ishize niba haricyo abiziho, Mutesi yavuzeko mu makuru afite nuko hari umusaza umwe uherutse kwitaba Imana ariko akavuga ko atazize inzara ahubwo bishoboka ko yaba yarazize izabukuru.

Nubwo Mutsi ahakana ayo makuru avugwa ku bantu bitabye Imana bazize inzara, byashoboka ko ayo makuru yaba afite ishingiro kuko hari amakuru twahawe n’umwe mu bakozi kubitaro bya Rwinkwavu nawe utashatse ko amazina ye agaragara mu itangaza makuru.

Yavuzeko kuri uyu wa 21 ugushyingo 2016 hari Umugore waguye kubitaro byaho Rwinkwavu aho yemezako yahageze yarazahaye ku buryo n’abaganga ba musuzumye ngo barebe indwara yari arwaye ba kayibura.

Uwo mukozi avugako ukurikije uko uwo mugore yari ameze ntiwashidikanyako yaba yarazize inzara.

Kuri ibi bibazo byose twashatse kumenya niba icyo kibazo ubuyobozi bw’akarere bukizi, Tuvugana n’umuyobozi wako Murenzi Jean Claude avugako bidashoboka ko hari umuturage wapfa azize inzara kuko hari ubufasha bw’ibiribwa bihabwa bamwe mu baturage bababaye kurenza abandi.

Mayor Murenzi yavuzeko niba hari n’uwitabye imana yaba yazize indwara ariko bitafatwa ko yazize inzara.

Nyuma yuko hari bamwe mu baturage bagiye bavugako inzara ibamereye nabi ndetse bamwe bakaba barahisemo gusuhukira mu gihugu cy’abaturanyi cya Uganda abasigaye nabo ubuyobozi bw’Akarere bukabagenera imfashanyanyo y’ibiribwa byiganjemo ibigori ndetse n’ibishyimbo.

Muminsi ishyize nibwo bamwe mu baturage bagiye bagaruka ku mazina y’inzara y’ibasiye by’umwihariko intara y’uburasirazuba, muri ayo mazina harimo iyobise , Warwaye ryari ? Kinga metarike duhurire ku mufungo, hamwe Ganira utahe, nayandi mazina.

JOHN Bagabo

Source: imirasire

Mu kiganiro Padiri Nahimana Thomas yagiranye na Bwana Simeon Musengimana umunyamakuru wa Radio Ijwi rya Rubanda, yasobanuye ko Leta y’u Rwanda yategetse indege ya Kenya Airways kutabatwara ibajyana mu Rwanda.

Mushobora kumva ikiganiro cyose hano hasi:

The Rwandan kandi yashobye kubona ifoto ya viza iri mu rwandiko rw’inzira rwa Padiri Nahimana imwemerara kwinjira mu Rwanda

Ikiganiro Padiri Nahimana yagiranye na BBC Gahuza Miryango ari i Nairobi aho yabujijwe gufata indege imuzana mu Rwanda.

Umunyamakuru wa Radio Ijwi ry’Amerika uri i Kigali, Eric Bagiruwubusa nawe yasobanuye uko umwuka wari umeze ku kibuga cy’indege Grégoire Kayibanda i Kanombe aho abanyamakuru benshi bari bategerereje Padiri Nahimana.

Uhagarariye Leta y’u Rwanda ku mbuga nkoranyambaga ndetse no mu gihugu cy’u Bubiligi, Bwana Olivier Nduhungirehe we yakomeje kwemeza ko Padiri Nahimana nta byangombwa byo kwinjira mu Rwanda yari afite ndetse anamwita umutekamutwe (Escroc) ariko nyuma y’aho ifoto ya viza ya Padiri Nahimana igaragariye ku mbuga nkoranyambaga, Bwana Nduhungirehe yahinduye amagambo avuga ko Padiri Nahimana atagombaga kwemererwa kwinjira mu Rwanda kuri viza y’ubukerarugendo ahubwo yagobaga kuba afite Visa yahawe n’imwe muri za Ambasade z’u Rwanda!

Marc Matabaro

Email: therwandan@ymail.com

Turi ku wa gatatu, taliki ya 23 ugushyingo 2016. Iyo taliki, umunsi n’umwaka, ni bwo abagize ishyaka Ishema ry’u Rwanda, bari biyemeje gutaha iwabo; mu Rwanda. Barangajwe imbere na Padiri Thomas Nahimana, umuyobozi w’ishyaka, bageze i Nairobi ku gicamunsi cyo kuri uwo munsi.

Uko ari bane, indege yari ibakuye mu bihugu by’i Burayi na Canada. Uretse gukumbura iwabo, bari bafite n’indi gahunda ibajyanyeyo: kwandikisha ishyaka baturuka mo no kurihagararira mu matora y’umukuru w’igihugu, azaba mu mwaka utaha wa 2017.

Nyamara burya inzira ngo ntijya ibwira umugenzi: mu gihe barimo gushaka kurira indege ya Kenya Airways, abakozi ba yo, babangiye kuyikandagiza mo ikirenge. Kubera izihe mpamvu? «Kigali yadusabye ko mutinjira muri iyi ndege». Nyuma y’iri jambo ry’abakobwa bo muri Kenya Airways, Padiri Nahimana n’ikipe ye batangiye gukanaguzwa amaso; batangiye kwibaza ibicu inkuba ibakubise iturutsemo; nyamara burya ngo ukuri gushirira mu biganiro. Ibyari bimeze nk’inzozi bibaye impamo: indege igurutse batayirimo, ari na bwo Padiri Nahimana na bagenzi be bahise babona ko, mu by’ukuri, ari «persona nona grata» mu gihugu cyabo.

Nta yandi mahitamo basigaranye, uretse kwitabaza itangazo, rimenyesha akaga cyangwa amahirwe yabo. Ikibazo gifashe indi ntera kuko abakekaga ko bagikemuye burundu, ahubwo bagitije umurindi. Abayobozi b’ishyaka Ishema ry’u Rwanda, ngo ntibashaka kumva ako gasuzuguro k’abashaka kubavutsa uburenganzira bwo gutaha iwabo. Ngo bazaguma muri «transit» i Nairobi kugeza Leta y’u Rwanda ikuyeho izo nzitizi zose; atari ibyo bazigaragambya kugeza ruriya ruhinja ruziranenge, inzara irutsinze ku kibuga cy’indege, kubera ko nyina warwo azaba atagifite amashereka yo kurwonsa! Quel cynisme!

Ni nde ufite ukuri, ni nde ukubuza abandi? Abataripfana ni byo bafite ukuri kose, ukuri gusesuye kuko umwana utaha iwabo, ntawe umutangira, cyane cyane iyo ataha atarwana. Nyamara uko kuri ngo ntikujya gukanga abanyagitugu bacu, babundaraye ku butegetsi, mpaka babusizeho agatwe. Kugirango aba barangaze abatazi ururo n’icyatsi, barimo kubeshya ko Nahimana n’abamuherekeje badafite ibyangombwa byo kwinjira mu gihugu cyabo, nyamara Nduhungirehe, umumotsi wabo, azi neza ko abataripfana bafite uburenganzira bubemerera kwinjira iwabo. Visa yo kwinjira mu Rwanda yatanzwe n’inzego za East African community, kubera ko bagenderaga ku mpapuro z’inzira z’abanyamahanga, zatanzwe n’ibihugu bari batuyemo.

Impamvu y’ibi ikaba iyihe kandi ari abanyarwanda? Igisubizo umenya cyoroshye: pasiporo z’u Rwanda barazisabye, ntibazihabwa, kuko ari «abanzi b’igihugu», cyangwa izindi mpamvu zitarashyirwa ahagaragara mu ibaruwa bandikiye «His Excellence», bamusaba «uburenganzira bwo gutaha iwabo». Igisubizo abahaye ni ikingiki : ukubafungira i Nairobi, nta cyaha kizwi gihanwa n’amategeko, yaba mpuzamahanga cyangwa ay’igihugu bari bagiyemo.

Ubwoba bw’ubutegetsi bw’u Rwanda, bushingiye kuki?

Hari abarimo kubyita ubwoba, nyamara baribeshya. Ni bya bindi ngo ijya kwica ubukombe, irabwagaza. Kagame uwo ajya kwica aramuteguza. Niba ari inzozi mbi Leta ya Kigali irota, ni iz’abashaka kuyirukana ku butegetsi, bakoresheje amatora. Aya matora aramutse abayeho ku buryo budafifitse, yahirika imijishi y’ingoma iganje. Ni ingoma itinya amatora kuko izi neza ko abatora barambiwe ubukana bwayo. Ngayo amatora yari ajyanye Padiri Nahimana mu Rwanda, kuko yanze kunyura inzira abo ashaka gusimbura, banyuzemo. Ni koko iyo nzira ni mbi, iranasenya, kandi ihira bake. Abo ihira ni abadatinya kumena amaraso y’abatagize aho bahuriye n’ubutegetsi: abaturage bene Ngofero, bazahajwe n’ingoma zica.

Ubu bwoba bwo gukumira abashaka amatora, bushingiye kuki, ko ba nyira bwo ngo bafite byose, imbunda za rutura n’amasasu yazo, adahusha n’abatabarwanya? Icyo buhishe gishobora kuba ikindi; ikindi kitazwi, ariko cyitwa ubwoba. Ubwoba bw’ingoma ishaje, ikeneye kubazwa bundi bushyashya. Ababaji bayo ni abangaba, barangaje imbere amahoro, bitwaje za Bibiliya, amashapure n’amasakaramentu ku bari barayavukijwe n’abagomeramana. Ngabariya ku ifoto, nta ntwaro bitwaje, uretse abamarayika barinzi na Roho Mutagatifu muziranenge w’amezi arindwi.

Inama yo mu Rugwiro

Iyi nama hari abatayizi. N’abataripfana sinkeka ko hari akanunu kayo bari bazi. Ni inama yatumijwe na Pahulo «wacu», Pahulo utari ya ntumwa y’Imana mwumva. «Nimumbwire uko tugomba kugenza uriya muginga, ugiye kuza»? Ibingira afashe ijambo, atarihawe. Mu ndimi we na bagenzi be batoraguye mu mihanda y’i Kampala, ati: «Your excellence, jyewe mpa uruhushya nzamwereke uko ingoma zambarwa»?

Ikibazo «His Excellence» yabazaga abatambyi be, ni nka cya kindi Pilato yabajije abayahudi, ubwo aba bamusubizaga bati «uyu wiyita umwami wacu, nabambwe»! Ngicyo igusubizo «Nyakubahwa» yashakaga kumva, nyamara hari undi mu bacurambwenge yagombaga kubanza kumva: «Nta mpamvu yo guhita mubamba uriya muziranenge, reka abanze akore ibindi byaha, byiyongera ku byo yakoreye i Le Havre». Inama nk’iyi si ubwa mbere Rutaremara ayigiriye Kagame, ubwo yashakaga guhita afunga Ingabire, akigera i Kanombe, mu mwaka wa 2010. Bwarakeye biraba, kandi yari yamuteguje, ubwo yamubwiraga ko «political space» arwanira, azayisanga muri 1930.

Ukubuzwa kwinjira mu gihugu kwa P. Thomas Nahimana n’abamuri inyuma, ni integuza kuri we n’abandi bashaka guhirika ubutegetsi ngo banyuze mu matora. Ibi babyita «signes avant courreur» mu rurimi rw’abafaransa. Ni integuza ku bashaka kumva neza uko ubutegetsi bwa Kagame bukora. Nkunda gutanga ingero zifatika, kugirango hatazagira umbeshyera ngo uriya muhutu w’ibizuru arangwa no kuraguza umutwe, gusa.

Muri 1996, nyuma gato y’uko mukuru wanjye, Edouard Mutsinzi aba DMI bamumennye agahanga, nahamagawe na Karenzi Karake mu biro bye, hariya ku Kabindi, muzi mwese. Yarambwiye ati: «ntidushaka gukomeza kwica abanyamakuru; niba na we ushaka gupfa, ngaho genda ukomeze wandike ibyo ushaka». Nta cyumweru cyashize, antumaho capitaine Joseph Nzabamwita, uyu aranshorera na none n’iwe. Ati «ibyo nakubwiye, ngirango warabyumvise». Nti «cyane». «None urashaka iki», «ibyo wandika ni uko ushonje, turakugira burugumesitiri wa Murama, urebe ko wakira iyo nzara»! Ni byo Buru nabaye we, ariko mu mpapuro gusa, mbere y’uko ndya ya ntumva, itunze intumva nyinshi!

Iyo ntumva ni ukwandika giparimehutu, nk’uko byari ibirego byanjye bya buri munsi, mbere y’uko ntumwaho indi ntumwa, noneho ya gatumwa, koko. Iyo ntumwa, Tom Ndahiro, abahutu benshi batigeze bamenya uwo ari we, ati: «ndashaka ko uzajya unyereka inyandiko zawe, mbere y’uko uzijyana mu icapiro rya Alphonse Kilimwobenecyo. Niba ari n’amafaranga ushaka tuzayaguha, ariko izo nkuru zawe za rutwitsi, ube uzihagaritse».

Ku ruhande rwe, Kilimwobenecyo na we yahise ategekwa kumpa ibiro by’ubuntu n’icapiro ry’ubuntu yayoboraga, ariko na we akagira icyo atanga: ugushyikiriza inyandiko zanjye zose Akabindi, mbere y’uko zisohoka. Ndahiro yaje kubona ko nabaye umunyeshuri mwiza, udakeneye kwicwa, noneho anyoherereza undi mwarimu, major Reveriyani Rugwizangoga, kugirango abe ari we noneho uzajya acisha umurongo mu nkuru zanjye, na we yitaga iz’abaparimehutu!

Iyi «torture morale» nayibaye mo umwaka wose, ibyo bishushungwe by’inkuru bikangarukira byose uko nabyohereje ku isoko. Lepartisan yari kugurwa na nde ko abaguzi bayo bari barampinduye igikoresho cy’ubutegetsi bukangisha kwica? Icyakurikiyeho ni ukwivumbura, kuko nari naratatiye amategeko agenga umwuga, nyamara ibyo byabaye nka ya mbwa umujinya wayo ushirira mu murizo, cyangwa wa mwana utazi ikimuhatse, ureba amabya ya se igitsure! Urupfu nakwepaga ntaho rutaniye cyane n’urwo Mutsinzi yapfuye, ni uko burya ngo abahutu banoga!

Kubera gukubitwa nyinshi, ngasagurira n’iz’ejo, muri gereza ya Kimironko nari nariyeguriye Imana, ntigeze menya ndi hanze. Nasomaga ishapure, iy’ishavu n’ububabare, nigishijwe na «parrain» wanjye Dominiko Makeli, mbere y’uko antegeka kubatizwa Jean-Jacques, mu idini ntakuriyemo. Nyuma ya «neuvaine» na none nigishijwe na Makeli, ni bwo Emmanuel Rukangira Roho mutagatifu yamumanukiraga mo, ati ngwino utahe, ariko unsinyire ko utazongera gukinisha iyo ntindi yawe ngo ni ikaramu! Ibyo nabyemeye ntazuyaje, kuko amamininwa n’ingorofani z’imihini, nari maze kubisesemwa!

Kubera ko burya hari abantu bariye intumva, amasezerano nagiranye na Rukangira nayarenzeho, maze ku wa 03 mutarama 2002, majoro Gacinya Rugumya na we ashyiraho ake: muri «interrogatoire» ye na «pistolet» ku meza, ati «ntituzongera kugufunga, kuko ntitugishaka ko bariya baginga b’abazungu bazajya bahora badusakuriza ngo dufunga abanyamakuru». Iyo «pistolet» n’iryo jisho risa n’igishirira, ni byo, mu by’ukuri, byatumye umwana w’umuhutu yiyemeza guhunga urupfu, n’ubwo ntaho waruhungira, kuko abatojwe kwica ntaho batagusanga!

Gutorwa ntutegeke, kuba perezida wapfuye, bimaze iki?

Nkunda kwibuka amagambo nyakwigendera Philippe Dahinden yambwiriye Arusha, ubwo nari mu mahugurwa yari yateguwe na «Fondation Hirondelle» yayoboraga. Ati: «umunyamakuru wapfuye, ntaba akiri umunyamakuru».

Hari abibwira ko aya mahamba yose ndimo kuvuga, ntaho ahuriye n’ukuri, nyamara ni ukuri kwambaye ubusa. Ni na yo mpamvu ntifuza ko na Padiri Nahimana azafungurwa n’amasengesho y’iminsi icyenda navugaga umunsi n’ijoro muri gereza ya Kimironko.

Mwifurije ibyambayeho, naba mbaye nka wa mwana wariwe n’inzuki, agakurubana murumuna we ngo na we naze zimurye, yumve uburyo urubori rwazo ruryana!

Icyo nifuriza Nahimana n’abataripfana be, ni ukubaho, bagatinya urupfu, n’ubwo ntaho waruhungira habaho, uretse mu ijuru! Ariko na none ntawabura kwibaza ngo tuzahunga urupfu tugeze hehe? Ko umenya ari ukuba ibigwari, nk’uko abanyaburayi batarahura n’aka kaga kose, bakunze kubihohamo?

Niba biyemeje gukuraho Kagame bakoresheje amatora, inama nabagira ni iyingiyi Nahimana yari yatekereje: ukwinjira mu gihugu utari inkehwe, utari nyakamwe nka madamu Victoire Ingabire, nka mucuti wanjye Déo Mushayidi, nka Dr Théoneste Niyitegeka, nka Maitre Bernard Ntaganda, ahubwo witwaje ikipi y’abazagusimbura uramutse wishwe, cyangwa wagizwe ikimuga nka Mutsinzi, Nkuliza n’abandi, batigeze bamenyekana! Nkaba ariko nanabaza Padiri Nahimana nti, utowe ntiwemererwe kuyobora u Rwanda, ubaye Perezida wapfuye, waba witwa perezida nyabuki?

Uburyo bwiza bwo gukora politiki mu Rwanda, ndavuga ubunyuze mu matora, ni uko izi ngenzi, izi manzi, izi ntaripfana, zazaba abaharamagara, zikavumbuka mu bwihisho bwazo i burayi na Amerika, zikiyemeza gusimburana mu magereza y’inkotanyi, kugeza igihe zizumva ko zirushywa n’ubusa, ko abo zirwana na bo bamaze kuba ibikuke, na ba «giharamagara». Atari ibyo gukorera politiki kuri «télécommande» uri nyakamwe, ntibizashoboka mba ndoga umwami!

Amiel Nkuliza,

Sweden.

Mu kiganiro yagiranye na Radio ijwi ry’Amerika, Bwana Chaste Gahunde yasobanuye ibibazo bahuye nabyo byo kwangirwa kwinjira mu Rwanda kandi ari abanyarwanda ndetse anashimangira ko batazava muri Transit ku kibuga cy’indege Jomo Kenyatta cy’i Nairobi muri Kenya ikibazo cyabo kidakemutse.

Chaste Gahunde yasubizaga ibibazo bya Thomas Kamilindi:

Mu kiganiro yagiranye na Radio ijwi ry’Amerika avuga kw’ikumirwa rya Padiri Thomas Nahimana mu kwinjira mu Rwanda, Me Bernard Ntaganda, Perezida w’ishyaka PS Imberakuri yatangaje ko atatunguwe n’uko Padiri Thomas Nahimana yangiwe kwinjira mu Rwanda ngo kuko iyinjira rye ryari guhindura byinshi mu Rwanda.

Kuri Me Ntaganda ngo FPR ishaka abantu baza bajya mu kwaha kwayo, ngo ntakizamubuza gukomeza kuvuga ibibi n’ibyiza FPR ikora.

Ni mu kiganiro n’umunyamakuru Etienne Karekezi:

Mu kiganiro yagiranye na Radio Itahuka ubwo yari ku kibuga cy’indege Jomo Kenyatta mu ijoro ryo kuwa gatatu tariki ya 23 Ugushyigo 2016 aho yari araye ategereje ko afungurirwa inzira ngo atahe mu Rwanda Padiri Thomas Nahimana yasobanuriye umunyamakuru Serge Ndayizeye uko byamugendekeye we n’abamuherekeje.

Ikibazo cyo kubuza Ishema Party gutaha mu Rwanda

ITANGAZO No 11/PDP-IMANZI/2017

Nyuma y’aho ishyaka ishema ry’u Rwanda ritangarije ko rigiye kuza gukorera Politike yaryo mu Rwanda aho umunyamabanga mukuru waryo Padiri NAHIMANA Thomas atangarije ko yiteguye kwiyamamaza mu matora y’umukuru w’igihugu ya 2017 aho ishyaka PDP-IMANZI mu ntumbero yaryo twashyigikiye uyu mugambi mwiza wo gukomeza guharanira Demokarasi.

Nyuma y’aho kuri uyu wa gatatu,ku wa 23 Ugushyingo 2016 i saa munani n’iminota mirongo itanu n’itanu Imanzi,abanyamakuru n’abandi banyarwanda bari babukereye n’akanyamuneza kenshi ngo babashe kwakira Padiri NAHIMANA Thomas na bagenzi be bikarangira amaso aheze mu kirere amerwe agasubizwa mu isaho.

Dushingiye kandi ku itangazo ry’ishyaka ISHEMA RY’U RWANDA ryo kuri uyu wa 23/11/2016 Ishyaka PDP-IMANZI riramenyesha ibi bikurikira:

Ingingo ya mbere:Ishyaka PDP-IMANZI rirakomeza gushima umugambi mwiza w’ishyaka ISHEMA wo kuza gukorera politiki mu Rwanda.

Ingingo ya kabiri:Ishyaka PDP-IMANZi ryihanganishije Padiri NAHIMANA Thomas n’itsinda ayoboye mu ngorane zose bakomeje guhura nazo muri uru rugendo rutoroshye.

Ingingo ya gatatu:Ishyaka PDP-IMANZI rirashimira abari bitabiriye umuhango wo kwakira Padiri NAHIMANA Thomas n’itsinda rye aribo Imanzi, abanyarwanda muri rusange ndetse n’abanyamakuru ubwitange bagize rinabashishikariza kudacika intege ahubwo mu gihe bizamenyekana ko baza tukazarushaho kwitabira turi benshi.

Ingingo ya kane:Ishyaka PDP-IMANZI turasaba imiryango mpuzamahanga na leta y’u Rwanda gufasha Padiri NAHIMANA Thomas n’itsinda rye koroherezwa kugera mu gihugu cyabo nkuko bikorerwa abandi bene gihugu bose babyifuje.

Paris, 23/11/2016.

Banyarwanda Banyarwandakazi,

Bataripfana Bataripfanakazi bavandimwe,

1. Nk’uko mwabikurikiye, ejo tariki ya 23 Ugushyingo 2016 ni bwo intumwa z’ishyaka ISHEMA ry’u Rwanda zirangajwe imbere na Thomas NAHIMANA, umunyamabanga mukuru akaba n’umukandida ku mwanya wa Perezida wa Repubulika mu mwaka wa 2017, zagombaga kugera i Kigali.
2. Mwakurikiye kandi uko mu gihe bari bamaze gukora ibisabwa byose ngo binjire mu ndege, iva muri Kenya yerekeza i Kigali, Leta y’u Rwanda ibinyujije k’ushinzwe abinjira n’abasohoka, yatanze itegeko ko abo bantu badashobora gukandagira ku butaka bw’u Rwanda, ndetse yongeraho baramutse binjiye muri iyo ndege u Rwanda rutakwemera ko igwa ku butaka bwarwo.
3. Kubera iyo mpamvu twashatse kumenya icyo ako gasuzuguro gakorerwa Abanyarwanda bagiye iwabo gahatse, ushinzwe abinjira n’abasohoka atubwira ko agiye ku bisuzuma ko bidatinda.
4. Twafashe icyemezo cyo kwigaraga,bya tukanga gusohoka muri TRANSIT kugeza twemerewe gutaha i Rwanda.

Banyarwanda Banyarwandakazi,

Bataripfana Bataripfanakazi bavandimwe,

Nibimenyekane ko :

5. Twakoze ibikwiye byose ngo dutahe mu Rwanda twujuje ibisabwa. Ni muri urwo rwego Padiri Thomas NAHIMANA na bagenzi be Venant NKURUNZIZA, KASINGE Nadine Claire na KEJO Skyler (w’amezi 7) begereye inzego zibishinzwe ngo bahabwe visa.
6. By’umwihariko Padiri Thomas NAHIMANA yagiye kuri ambasade i Paris abanza gusaba ko bamuhindurira passeport kuko iyo yari afite yari yararengeje igihe. Bamuhaye icyemezo bamubwira ko bazamuhamagara akaza kuyifata.
7. Twabonye bitinze kandi igihe kihuta, dusaba Padiri Thomas ko noneho yasaba visa nk’umufaransa, dore ko FPR ivuga ko byo ngo bidatinda. Aha naho yakoze ibisabwa yuzuza impapuro za ngombwa, baramubaza ngo kuki ushaka visa nk’umufaransa kandi passeport ye nk’umunyarwanda iri mu nzira. Abasubiza ko abona biri gutinda. Bamubwira ko passeport ye nshyashya azayifatira i Kigali. Ariko na none, na viza nk’umufaransa, ambassade yatinze kuyimuha tubona ko ari amayeri yo kudutinza bwa kabiri kandi twari twarahinduye amatariki kenshi twibwira ko bazagera aho bakemera.
8. Twashakishije ubundi buryo bwo kugera mu Rwanda kandi tutishe amategeko. Ni muri urwo rwego, Padiri Thomas yasabye ko bamusubiza passeport y’Ubufaransa muri ambasade kuko yari afite izindi ngendo. Barayimuhaye niko gushaka visa igera muri East Africa (Rwanda,Uganda na Kenya).
9. Intasi za Leta y’u Rwanda ntizigeze zivumbura ko habonetse iyi visa kuko buri munsi twahamagaraga kuri ambasade tubaza aho visa twasabye igeze. Batunguwe no kubona amazina ya Thomas NAHIMANA kuri liste y’abagenzi bagiye kugera i Kigali bahita basaba Kenya Airaways kutwangira kwinjira mu ndege, banongeraho ko nitwinjiramo, batazemera ko iyo ndege ikandagira ku butaka bw’u Rwanda.

Bityo rero :

10. Turashimira abantu bose bakomeje kutuba hafi no kugerageza kumvikanisha iki kibazo hose. Turasaba Abataripfana bari mu Rwanda ndetse n’abanyamakuru gukomeza kudutegereza kuko dushirwa dutashye iwacu mu Rwanda.
11. Turasaba Leta y’u Rwanda gushyira ubwenge ku gihe, ikibuka ko dufite uburenganzira nk’ubw’abanyarwanda bose, ko tubizi, kandi ko tuzakomeza kubuharanira.
12. Turasaba Abanyarwanda batuye hanze y’u Rwanda cyane cyane abanyapolitiki na sosiyete sivile gukomeza gukwirakwiza amakuru y’ukuri ajyanye n’iki gikorwa kigayitse kandi cyuzuye ubwoba n’ubugwari cya Leta y’u Rwanda. Nibibere isomo buri wese ko rya terabwoba rya FPR Inkotanyi ntaho rishingiye, bisaba kuyitinyuka gusa no gushikama.
13. Muraza kugezwaho IGIKORWA gikurikiraho, nibigera kuri uyu mugoroba tariki ya 24 Ugushyingo 2016, Leta y’u Rwanda itatwemereye kwinjira mu gihugu. Mwirinde kandi abashaka kubayobya bakwirakwiza ibihuha, ukenera amakuru y’ukuri ayabaze ubuyobozi bw’ishyaka ISHEMA ku mirongo isanzwe ikoreshwa.

Harakabaho Abanyarwanda baharanira uburenganzira bwabo,

Muhorane ISHEMA

Chaste GAHUNDE,

Umunyamabanga ushinzwe itangazamakuru

+33643601311

chaste.gahunde@gmail.com