Umushumba wa Kiliziya Gatolika, Papa François, yasabye imbabazi ku Mana kubera ibyaha n’intege z’abayo muri Jenoside yabaye mu Rwanda. Hari mu biganiro yagiranye na Perezida Paul Kagame wari mu ruzinduko i Vatikani kuwa 20 Werurwe 2017.

Izo mbabazi zavuzweho byinsi niyo mpamvu Radio Inkingi yasabye inzobere ngo zidukorere isesengura. Abo ni Justin Bahunga ushinzwe ububanyi n’amahanga muri FDU-Inkingi na Dr Innocent Biruka, impuguke mu by’amategeko akaba anashinzwe itangazamakuru mw’ishyaka FDU-Inkingi.

Amakuru agera kuri The Rwandan kuri uyu wa gatanu tariki ya 24 Werurwe 2017 aravuga ko Denis Ntirugilimbabazi yitabye Imana bivugwa ko yaba yazize uburwayi yari amaranye igihe.

-Denis NTIRUGIRIMBABAZI uvuka mu byahoze ari Ruhengeri

-Yari muri Guverinoma ari Ministre w’imali n’ubukungu mu 1979

-Yategetse ikigo gishinzwe gutwara abantu mu Rwanda OFFICE NATIONAL DES TRANSPORTS EN COMMUN (ONATRACOM) mu myaka ya za 1980

-Denis NTIRUGIRIMBABAZI yabaye Guverineri wa Banki nkuru y’igihugu (BNR): 1991-1994

-Mu 1995 yari umubitsi wa Rassemblement Républicain pour la Démocratie au Rwanda (RDR) rimwe mu mashyaka yaje kuvamo FDU-Inkingi mu 2006.

Yaguye mu gihugu cy’u Buhorandi kuri uyu wa gatanu tariki ya 24 Werurwe 2017.

Ben Barugahare

Kuri uyu wa gatanu tariki ya 24 Werurwe 2016, i Arusha muri Tanzaniya mu rukiko Nyafurika rw’Uburenganzira bwa Muntu hatangiye urubanza Lt Gen Kayumba Nyamwasa n’abandi nka Stanley Safari barezemo Leta y’u Rwanda.

Nk’uko bigaragara mu incamake y’ikirego cya Lt Gen Kayumba Nyamwasa ngo yamaganye ihindurwa ry’itegeko nshinga ry’u Rwanda kugira ngo Perezida Kagame ashobore kongera kwiyamamaza ku nshuro ya 3.

Kuri Lt Gen Kayumba Nyamwasa ngo uburyo ihindurwa ry’itegeko nshinga mu ngingo yaryo ya 101 byakozwe ngo byarimo iterabwoba ndetse ngo nta n’umucamanza wari kuburizamo ihindurwa ry’iyo ngingo kubera ko ngo ubutabera bw’u Rwanda ngo butigenga kandi abacamanza hafi ya bose bakaba ari abarwanashyaka b’ishyaka FPR riri ku butegetsi.

Avuga ku bijyanye n’abarwanije ihindurwa ry’ingingo ya 101 y’itegeko nshinga ry’u Rwanda, Lt Gen Kayumba Nyamwasa avuga ko ishyaka Green Party riyobowe na Frank Habineza ndetse watangaje ko aziyamamariza umwanya wa Perezida wa Repubulika mu matora yo muri Kanama 2017, ngo iryo shyaka ryashinzwe na Perezida Kagame mu rwego rwo kujijisha no kwiyerurutsa ngo yerekane ko hari abatavuga rumwe nawe mu gihugu kandi bagaragaza ibitekerezo byabo mu bwisanzure ntibabizire!

Leta y’u Rwanda iraregwa :

• Kutubahiriza ingingo ya 13, 19, 21 na 22 z’amahame nyafurika ku bureganzira bw’ikiremwamuntu n’abaturage.
• Kutubahiriza ingingo ya 23 y’amahame nyafurika ku bijyanye na demokarasi, amatora n’imiyoborere.
• Kutubahiriza ingingo ya 6 (d) y’amasezerano agenga umuryango w’ibihugu bigize umuryango w’Afrika y’uburasirazuba (East African Community)
• Kutubahiriza ingingo ya 101 y’itegeko nshinga ry’u Rwanda.

Leta y’u Rwanda yo yavuze ko bamwe mu batanze ikirego batakagombye guhabwa ijambo muri urwo rukiko. Ngo nka Lt Gen Kayumba Nyamwasa na Stanley Safari ngo bakatiwe badahari n’inkiko z’u Rwanda kubera Genocide n’ibindi byaha byo guhungabanya umutekano w’igihugu ngo uretse n’ibyo ngo bashyiriweho inyandiko mpuzamahanga zo kubata muri yombi.

U Rwanda mu mwaka ushize wa 2016 rwikuye mu masezerano rwari rwasinyanye n’Urukiko Nyafurika rw’Uburengnzira bwa Muntu n’Abaturage yavugaga ko Umunyarwanda ku giti cye cyangwa itsinda ry’Abanyarwanda bashobora gutangamo ikirego kijyanye n’uburenganzira bwa muntu.

Guverinoma y’u Rwanda kandi ishinja abaterankunga b’uru rukiko ari bo Ikigo cy’Abanyamerika gishinzwe iterambere mpuzamahanga (USAID), ikigo cy’ubufatanye mu bya tekiniki cy’Abadage (GTZ) ndetse n’Ishyirahamwe mpuzamahanga ry’Uburenganzira bwa Muntu (FIDH), kuba barahaye ruswa umwanditsi ndetse n’abacamanza b’uru rukiko ngo bakire ikirego cya Ingabire Victoire nawe wari wareze u Rwanda muri uru rukiko aho kuri uyu wa 22 Werurwe 2017 urubanza rwe rwari ruteganyijwe Leta y’u Rwanda ikanga kurwitabira.

Ntabwo ari Lt Gen Kayumba Nyamwasa wenyine wareze Leta y’u Rwanda muri uru rukiko kuko hari n’abandi banyarwanda bayireze nka:

–Victoire Ingabire

–Kennedy Gihana ari kumwe n’abandi bantu

–Rutabingwa Chrysanthe

–Laurent Munyandilikirwa

U Rwanda kandi rushinja uru Rukiko Nyafurika rw’Uburenganzira bwa muntu n’Abaturage kugerageza guharabika u Rwanda ku kijyanye no kubahiriza uburenganzira bwa muntu .

 Frank Steven Ruta

Impamvu Perezida Paul Kagame yitabiriye inama ihuza Isiraheli na Leta Zunze Ubumwe z’Amerika AIPAC mu gihe ari we mukuru w’igihugu wenyine uzayizamo ndetse na Ministre w’intebe wa Israheli, Benyamini Natanyahu akaba atazayizamo akazatanga ibiganiro akoresheje ikoranabuhanga (Video conference) zirumvikana cyane dore ko na Tony Blair wahoze ari Ministre w’intebe mu Bwongereza akaba na somambike we azaba ari muri iyo nama.

Impamvu nyamukuru ni uko Kagame yari inshuti y’umuryango Clinton ibyo Trump n’abafasha be ba hafi barabizi, ikindi abantu bose bari mu butegetsi bwa OBAMA na CLINTON bafashaga Perezida Kagame nka ba Susan Rice, Samantha Power (muri ONU) n’abandi ntibakirimo.

Iyi nama ni uburyo bwo kwinjirira Ubutegetsi bwa TRUMP hakoreshejwe abayahudi basanzwe baziranye na Kagame dore ko iyi nama izaba irimo Visi Perezida wa Leta Zunze Ubumwe z’Amerika Mike Pence na Nikki Haley Ambasaderi wa Leta Zunze Ubumwe z’Amerika mu muryango w’abibumbye ONU.

Kagame akeneye kwiyegereza ubutegetsi bwa TRUMP ndetse akegera na Nikki Haley Ambasaderi wa Leta Zunze Ubumwe z’Amerika mu muryango w’abibumbye ONU by’umwihariko kubera ko ubu Abarusiya bamaze kwerekana ko bashyigikiye igihugu cy’u Burundi na Perezida Pierre Nkurunziza.

Mu bibazo u Rwanda rufite ubu rukeneye umuntu uri ku ruhande rwarwo mu muryango w’abibumbye ONU cyane cyane mu kanama k’umuryango w’abibumbye gashinzwe amahoro kw’isi (UN Security Council) kuko dufate urugero u Rwanda ruramutse rugiranye ikibazo n’u Burundi Abarusiya bavugira U Burundi none Kagame we yavugirwa na nde mu kanama k’umuryango w’abibumbye gashinzwe amahoro kw’isi (UN Security Council)?

Nabibutsa ko u Rwanda rufitanye umubano ukomeye na Isiraheli kubera cyane cyane uburyo ba kabuhariwe mu gutekinika bashoboye gusanisha Genocide y’abayahudi n’iy’abatutsi mu Rwanda ndetse hakaba hari n’abakabya bagashaka kwemeza ko abatutsi n’abayahudi bafite icyo bapfana.

Ikindi ni uko abasirikare benshi b’u Rwanda baherwa imyitozo n’amasomo bya gisirikare bikomeye mu gihugu cya Isiraheli ndetse n’intwaro nyinshi zo mu rwego rugezweho u Rwanda ruzigurira muri Isiraheli.

Si ibyo gusa kuko u Rwanda ruri mu bihugu byagiranye amasezerano y’ibanga na Isiraheli ngo bijye byakira abimukira b’abanyafrika birukanwa n’igihugu cya Isiraheli.

Marc Matabaro

Email: therwandan@ymail.com

Ishyaka DGPR riramagana kumugaragaro ibinyoma byatangajwe na Général Kayumba Nyamwasa wahungiye muri Africa y’epfo, aho mu Kirego cye yagejeje m’urukiko rushinzwe uburenganzira bwa muntu n’ubwabantu  (AFRICAN COURT ON HUMAN and PEOPLES Rights), yatesheje agaciro ikirego cy’Ishyaka DGPR  ryagejeje m’Urukiko rw’Ikirenga rw ‘ Urwanda 2015  kubirebana na gahunda yari ihari yo guhindura Itegeko Nshinga ry’Urwanda, iryo sebanya yarikoze yibwira ko ryamuhesha imbaraga m’ urukiko  (ACHPR) Arusha.

Birababaje cyane kuba umuntu nkawe ndetse wigeze gushinjwa kugira uruhare mw’ishingwa ry’Ishyaka DGPR gusubira inyuma agakora amakosa yo kudushinja ibinyoma kandi bidafite ishingiro azi neza ukuntu byari bikomeye kugira ngo Ishyaka DGPR ribe rigeze aho rigeze uyu munsi, ibi mubyukuri ni ikimenyetso cyo gutandukira no kwirengagiza n’ukudaha agaciro inyungu rusange z’Igihugu n’abagituye.

Ishyaka DGPR n’  Ishyaka ry’abaturage kandi ryashinzwe n’abanyarwanda banyotewe impinduka za  Demokarasi rishingirwa imbere mu gihugu Taliki 14 Kanama 2009 mugihe bamwe muribo bareberaga bibereye mu myanya muri Guverinoma mbere yuko bayitakaza.

Abagize Ishyaka DGPR bafite ishema ryibyo bamaze kugeraho kandi banejejwe no gukomeza guteza imbere Demokarasi babikorera imbere mu gihugu. Ishyaka DGPR ni Ishyaka rya Politiki Ritavuga rumwe na leta ariko ryubaha amategeko n’amabwiriza by ‘ Igihugu. Ishyaka DGPR ariko rikaba ritavugirwamo n’umuntu uwo ariwe wese utari umurwanashyaka waryo.

Tuzakomeza amahame atugenga ntawe duhohotera kandi dukemura amakimbirane m’uburyo bw’amahoro. Tuzakomeza kandi gushaka ibisubizo bya Demokarasi no gucyura impunzi tubinyujije munzira z’ukuri n’amahoro.

Bikozwe Taliki 26 Werurwe 2017

Dr. Frank Habineza

Umuyobozi Mukuru

Green Party ni ishyaka ryashinzwe na Perezida Kagame: Lt Gen Kayumba Nyamwasa

Paul Kagame yongeye kubyutsa ingendo ze. Uko azerera ni nako anasesagura umutungo w’ibya rubanda : nko kwicuruzaho n’ibiciro bihanitse na Leta y’u Rwanda.

Ubu birazwi neza ko uyu munyagitugu akaba n’umwicanyi kabombo atunze indege 3 zihenze cyane zo mu bwoko bwa « Gulfstream » zari zisanzwe ziba i Athènes mu gihugu cy’u Bugereki muri sosiyeti yitwa ‘GainJet Aviation’ : Gulfstream G450 (ifite nimero SX-GAB), Gulfstream G550 (yari isanzwe ifite nimero SX-GJJ) na Gulfstream G650 (nayo yari isanzwe ifite nimero SX-GSB). Izi ebyiri zanyuma mu ntangiriro z’Ukwa Cumi na Kabiri umwaka ushize (12/2016) bongeye kuzihungisha mu gihugu cya Ireland muri sosiyeti yitwa ‘GainJet Ireland’ ifite ikicaro ku kibuga cy’indege kiri mu mujyi witwa Shannon : Gulfstream G550 isigaye ifite nimero yo muri Ireland EI-LSY naho Gulfstream G650 ifite nimero EI-LSN.

Mu gihe cyashize ubwo yaragifite indege 2 gusa zo mu bwoko bwa za « Bombardier Global Express » atarazigurisha we ubwe yari yarishyiriyeho igiciro cyo kujya azikodesha na Leta y’u Rwanda kw’isaha indege iguruka gusa byo nyine bingana n’amaEuro ibihumbi umunani magana atandatu (€ 8.600) cyangwa mu manyamerika US$ 9.280.

Iki giciro n’icyo yakomeje gukoresha muri ziriya « Gulfstream » 2 : Gulfstream G450 (SX-GAB) na Gulfstream G550 (SX-GJJ, ubu yambaye EI-LSY).

Naho iriya ya 3, « Gulfstream G650 » (SX-GSB, ubu yambaye EI-LSN), niyo Paul Kagame akunze gukoresha muri iki gihe. Ni nayo ikomeye kurusha ziriya zindi ebyiri za mbere kandi niyo inahenda cyane. Ishobora kuguruka igihe kirekire idahagaze bingana na 7,000NM aribyo bihwanye na Km 12.964. Ikiguzi cyayo kingana na miliyoni 67 y’amadolari y’amanyamerika (US $ 67 million).

Iyi ayikodesha na Leta y’u Rwanda kw’isaha iguruka ku giciro kikubye hafi kabili ugereranyije na ziriya zindi bingana n’ibihumbi cumi na bine magana cyenda na biri y’amadolari y’amanyamerika (US $ 14.902). Ni ukuvuga 13.836 by’amaEuro (€ 13.836).

Reka turebe rero ingendo Paul Kagame yongeye kubyutsa muri uku kwezi kwa Gatatu (2017) :

• Tariki ya 6/03/2017 indege ya Kagame ariyo « Gulfstream G650» (EI-LSN) yahagurutse i Shannon muri Irlande aho isanzwe iba kuva mu kwa 12/2016 iguruka ibirometero (Km) 7.093 ijya i Kigali ihakoresha amasaha 8 n’iminota 51. Ubwo kuri fagitire bishyuza amasaha 9. Wabikuba na US$ 14.902 (igiciro kw’isaha) bikaba US$ 134.118.

• Bwaracyeye ihaguruka i Kigali mu gihe cya saa moja za mugitondo ijyana Paul Kagame i London mu Bwongereza. Aho gufata inzira yabugufi ingana na Km 6.646 yakagombye kuhakoresha amasaha 8 n’iminota 19 ni ukuvuga iciye hejuru y’imijyi ya Goma na Kisangani (RDC), ibihugu bya République centrafricaine, Tchad, imijyi ya Sebha na Tripoli muri Libya, hejuru y’umujyi wa Trapani mu ikirwa cya Sicile (uButaliyani), hejuru y’ikirwa cya Corse ndetse n’u Bufaransa yo yahisemo inzira ndende ingana na Km 6.917 iciye i Kagitumba, hejuru y’uburengerazuba bwa Uganda, hejuru y’umujyi wa Juba muri South-Sudan, i Kharthoum muri Sudan, i Alexandrie muri Egypte, ikirwa cya Chypre, u Bugereki, Albanie, Croatie, u Butaliyani, u Busuwisi n’amajyaruguru y’u Bufaransa. Yageze i London ihakoresheje amasaha arenga 9 n’iminota 8. Urwo urugendo rwatwaye amasaha 10 x US$ 14.902 (kw’isaha) = US$ 149.020.

• Nyuma y’iminsi ibiri (ubwo ni kw’itariki ya 9/03) yakomereje i Boston muri Leta Zunze Ubumwe z’Amerika aho yagaragaye bucyeye bwaho muri ‘Havard Business School’. Indege yagurutse ibirometero (Km) 5.245 mu gihe cy’amasaha 6 n’iminota 40 (Amasaha 7 x US$ 14.902 (kw’isaha) = US$ 104.314).

• Nyuma yaho yarabuze. Abantu bayobewe aho aherereye banibaza niba ataratashye cyangwa niba akibuyera aho muri Amerika (USA). Hagati aho nashoboye kubona indege ye yari yajyiye muli California aho muri Leta Zunze Ubumwe z’Amerika. Bivuze ko yagurutse Km 4.198 mu gihe cy’amasaha 5 n’iminota 26 kugera i Los Angeles (Amasaha 6 x US$ 14.902 (kw’isaha) = US$ 89.412).

• Tariki ya 15/03 nibwo yahagurutse i Los Angeles yerekeza i Hong Kong. Indege yakoze urugendo rwa Km 11.678 mu masaha 14 n’iminota 14 (Amasaha 15 x US$ 14.902 (kw’isaha) = US$ 223.530).

• Tariki ya 17/03 nibwo yakomereje mu murwa mukuru w’u Bushinwa ariwo Beijing (Pékin). Indege yakoze urugendo rwa Km 1.994 mu gihe cy’amasaha 2 n’iminota 51 (Amasaha 3 x US$ 14.902 (kw’isaha) = US$ 44.706).

• Tariki ya 19/03 nibwo yavuye mu murwa mukuru w’u Bushinwa yerekeza i Roma m’u Butaliyani. Bukeye bwaho nibwo yabonanye na Papa François i Vatican. Indege yakoze urugendo rwa Km 8.155 mu gihe cy’amasaha 10 n’iminota 6 (Amasaha 11 x US$ 14.902 (kw’isaha) = US$ 163.922).

Muri izi ngendo tuvuze haruguru (kuguruka gusa) bihwanye n’amasaha 61 (61H). Zimaze gutwara amadolari y’amanyamerika angana n’ibihumbi magana cyenda n’icyenda makumyabiri n’abiri (US$ 909.022) bihwanye n’amafaranga y’u Rwanda miliyono magana arindwi na mirongo itandatu n’abiri ibihumbi magana arindwi na makumyabiri na tatu magana arindwi na mirongo icyenda n’atanu (RwF 762.723.795).

Nakomeza urugendo rwe yerekeza i Washington muri USA aho ategerejwe mu mpera z’iki icyumweru mu nama y’Abayahudi bo muri Amerika yitwa « American Israel Public Affairs Committee – AIPAC » kujyayo (Washington) ndetse no kuzahita asubira i Kigali inama irangiye n’indege ikazasubira muri Ireland aho isanzwe iba bizatwara andi mafaranga menshi :

• Azabanza ajye i Kigali. Kugera yo uvuye i Roma bingana na Km 5.575. Ubwo indege yahakoresha amasaha 7 n’iminota 47 (Amasaha 8 x US$ 14.902 (kw’isaha) = US$ 119.216).

• Indege izakomereza muri Ireland izongere igaruke i Kigali mbere yo gukomeza ijya i Washington bizatwara US$ 268.236 (US$ 134.118 x 2).

• Gukomereza i Washington bingana na Km 11.674. Ubwo indege yahakoresha amasaha 14 n’iminota 14 (Amasaha 15 x US$ 14.902 (kw’isaha) = US$ 223.530). Kujyenda i Washington no kuzagaruka i Kigali indege ikazanasubira i Shannon muri Ireland aho isanzwe iba byose hamwe bizatwara US$ 581.178).

Ubwo muri rusange (byose hamwe uhereye kuva kwa 6/03/2017) mu gihe gito indege izaba imaze kuguruka amasaha 114 (114H). Wabikuba US$ 14.902 (igiciro kw’isaha) bikangana na miliyoni imwe ibihumbi magana inani na mirongo irindwi n’arindwi magana atandatu na mirongo itanu n’ibiri y’amadolari y’amanyamerika (US$ 1.877.652) ni ukuvuga ko bingana n’amanyarwanda arenga miliyari imwe miliyoni magana atanu na mirongo irindwi n’abiri ibihumbi magana arindwi na mirongo inani n’ibiri ijana na makumyabiri n’ine (RwF 1.572.782.124).

Aha ntabwo twavuze amahoro (tax) y’ibibuga iba yaguyeho kandi siko byose biba bifite igiciro kimwe :

• Igiciro cya buri mugenzi uri mu ndege (unit tarif of passenger flight) ;
• Uburemere bw’indege mu gihe ihagurutse (maximum take-off weight – MTOW) ;
• Ibijyanye n’ibidukikije (environnement factor) ;
• Amahoro ajyanye n’urujya n’uruza haba k’umunsi cyangwa ijoro (day/night factor).

Hakiyongera ibijyanye na ‘Parking’ :

Ubundi indege igira igiciro cyayo cyo kwishyura ‘parking’ bitewe ahanini n’uburemere bwayo mu gihe cyo guhaguruka (maximum take-off weight – MTOW) ukabikuba n’igiciro cyifatizo ki kibuga cy’indege ukanabikuba n’igihe (isaha) ihamara.

Iriya ndege yo mu bwoko bwa « Gulfstream G650 » uburemere bwayo mu gihe cyo guhaguruka (MTOW) bungana na tonnes 45,1 (Kg 45.178).

Urugero : Mfatiye ku kibuga cy’i Zaventem ho mu gihugu cy’u Bubiligi igiciro cyifatizo kingana na 67 y’amasantime y’amaEuro (€ 0,67). Iriya ndege ije i Zaventem yakwishyura ‘parking’ gutya : € 0,67 (igiciro cyifatizo) x 45,1 (tonnes) x isaha = € 30,21. Ibaze ihamaze iminsi ibiri (amasaha 48) = €1.450,08 (€ 0,67 x 45,1 (tonnes) x 48H).

Na none ntitwavuze amacumbi (hôtels) Kagame araramo ndetse n’abamuherekeje barimo n’abashinzwe kurinda umutekano we birimo n’ifunguro : Icyumba Kagame akunze gufata kiri mu kiciro cya ‘suite’ (‘présidentiel’ cyangwa ‘royal’). Icya make ntabwo kiri munsi ya US$ 15.000. Naho ibyumba byabashinzwe kumurinda (bamwe muri bo baba bahageze mbere ye) nabyo ntibiri munsi US$ 200 kimwe ndetse n’abamuherekeje. Ngaho bikube n’umubare w’abo bantu bose n’igihe bazahamara.

Muri make mu gihe kitarenze ukwezi kumwe gusa byose hamwe amaze gusesagura amafaranga menshi arenga US$ 3.000.000 ni ukuvuga amanyarwanda arenga miliyari ebyiri (RwF 2.514.753.219).

Ngayo nguko

F–Flavien Lizinde (FlavLiz)

Bruxelles, 22/03/2017

GREX ni Guverinoma y’u Rwanda ikorera mu buhungiro mu magambo ahinnye y’igifaransa. Iyo guverinoma ikaba iyobowe na Padiri Thomas Nahimana. Yagiriyeho i Paris tariki 20/02/17.

Mu mwanzuro w’itangazo ryari rigenewe abanyamakuru n’abanyarwanda ryashyizwe ahagaragara kur’iriya tariki, rigashyirwaho kandi umukono na Bwana Chaste Gahunde, Ministri w’Itangazamakuru muri GREX, hari ibikorwa bikomeye byatangajwe, n’uburyo bizakurikirana.

Ngirango byaba byiza ibyo bikorwa abantu babigarutseho, kugirango barebe niba ibyo GREX yatangaje hari ibiri kujya mu bikorwa uko byavuzwe, cyangwa se niba ari kwa kundi kw’abanyapolitiki bizeza abantu ibi n’ibi nuko bigaherera iyo.

Dore ibyari biteganyijwe nkuko ririya tangazo ryavuzwe haruguru ribivuga:

1. Kwemera no kwihutira kuganira na Guverinoma y’u Rwanda ikorera mu buhungiro.
2. Gufungura amarembo bitarenze tariki ya 23/03/2017, abanyarwanda bose bari hanze y’u Rwanda babyifuza bagataha mu mahoro, imfungwa za politiki zigafungurwa, amashyaka ya opozisiyo ashaka kugira uruhare mu matora ateganyijwe mu kwezi kwa Kanama 2017 akandikwa nta mananiza.

Mu gihe byarenga tariki ya 23/03/2017 nta gikozwe :

3. Kwimura gahunda y’amatora ya Perezida wa Repubulika yari ateganyijwe muri Kanama 2017 agashyirwa muri Kanama 2019, naho amatora y’intumwa zarubanda agashyirwa mu Ugushyingo 2019.
4. Gushyiraho Guverinoma y’inzibacyuho ihuriweho n’amashyaka menshi, igahabwa manda y’amezi 24, akaba ariyo itegura amatora y’umukuru w’igihugu n’ay’intumwa za rubanda mu buryo bunyuze mu mucyo.

Kubijyanye na kiriya gikorwa cya mbere cyasabwaga guverinoma ya FPR, ubwo GREX yazamenyesha abanyarwanda ibyaba byarakozwe, n’igisubizo yaba yarahawe. Aha ariko umuntu yanakwibaza ku buryo ibi byarikugerwaho, n’uburyo buboneye bwo kubikora ngo bigerweho. Habaye hari ubwakoreshejwe, GREX nibumenyekanisha, abantu bazibaza niba aribwo bwari buboneye kurusha ubundi bwarigukoreshwa.

Naho kubireba igikorwa cya kabiri, icyo abantu bakurikira bamenye nuko taliki 23/03/17 umwe mu banyapolitiki warukiburanira mu Rwanda, ariko atarakatirwa burundu, ariwe Leonille Gasengayire  wo muri FDU-Inkingi – yafunguwe. Byaba byaratewe se n’ubusabe bwa GREX? Ni ukubyibazaho. Naho kubindi byasabwaga mur’iyo ngingo byo gutaha kw’impunzi (hagati aho izo muri Congo Brazzaville zaratewe) no gukingurira amarembo amashyaka ya politiki ashaka kujya mu matora yo mu kwa munani 2017, benshi ntacyo babiziho.

Abanyapolitiki batavuga rumwe na FPR bafunze kandi bamaze imyaka mwinshi muri gereza, abo ni nka Dr Theoneste Niyitegeka, Victoire Ingabire Umuhoza na Deogratias Mushayigi n’abandi, iby’ugufungwa cyangwa gufungurwa kwabo ntacyahindutse hagati aho. Ariko kubireba Victoire, umuntu yakwibutsa gusa yuko mu rubanza yarafitanye na leta ya FPR rwagombaga kubera Arusha muri Tanzaniya tariki ya 22/03/17, Kigali yarwivanyemo.

Mu gihe rero ntabizwi bifatika ubuyobozi bw’u Rwanda bwakozwe bijyanye n’ibyo GREX yasabaga, none itariki ntarengwa ya 23/03/17 yariyatanzwe ikaba yarahise, Padiri Thomas Nahimana n’abo barikumwe muri GREX baba bagiye se guhagurukira uburyo bwose bushoboka ngo imfungwa za politiki zifungurwe cyangwa ngo amatora yarateganyijwe uyu mwaka yigizweyo?

Ibyerekeye gahunda y’amatora byo, kuri benshi ntakigaragarako yaba yarahindutse. Nkuko Kigali yatangajeko azaba mu kwa munani, ubwo GREX yazatubwira aho ibigeze ihinduza iyo gahunda, mu gihe amashyaka amwe akomeje gukumirwa nta mpamvu ifatika. Inzira ishobora kuba ikiri ndende, nubwo ishobora kwihuta bitewe n’imyitwarire y’abashaka bose impinduka mu Rwanda.

Naho ku byo gushyiraho Guverinoma y’inzibacyuho ihuriweho n’amashyaka menshi, nubwo bamwe mu banyarwanda dusanga igitekerezo cyayo cyaba kinyuranyije n’ihame rya demokrasi rigira riti ubutegetsi ni ubw’abaturage, abayobozi bashyirwaho nabo, n’ubutegetsi bukayoborera koko abaturage baba babwishyiriyeho mu bwisanzure bwose, simbona ukuntu hatangira gutekerezwa urundi rwego runyuranye na GREX, mu gihe nayo itaragira icyo yerekana ko yagezeho.

Umwanzuro

Hari byinshi abategetsi bizeza abo bayobora, cyangwa bifuza kuyobora. Iyo abaturage baba babwira badakurikiye ngo bahoze ku nkeke ababizeza isi n’ijuru, nta gikorwa. Ubwo ababitwaje ngo bagere ku nyungu zabo, bakomeza gukoresha akarimi keza, ibipfa bigakomeza gupfa.

Mu mpinduka abanyarwanda duharanira, twaridukwiye guca abanyapolitiki k’umuco wo kwizeza abo bifuza kuyobora ibidashoboka, nko kuvugango uzafunguza mu kwezi kumwe imfungwa za politiki Leta ya FPR imaze imyaka myinshi ifunze, utarerekana cyangwa udakoresha nibura imbaraga nk’izo yashyizeho izifunga.

Nubwo GREX ari indi ntambwe yatewe mu rwego rw’impinduka ikenewe cyane mu mitegekere y’u Rwanda, biragaragara ko hagikenewe byinshi kugirango iyo ntambwe, n’izindi ziriguterwa n’abanyarwanda banyuranye hirya no hino, zigire icyo zigeraho mu kurenganura rubanda rubabaye igihe kirekire mu buryo bwinshi bw’imibereho yarwo.

Ambrose Nzeyimana

Umunyamakuru ndetse akaba n’umunyamategeko Didas Gasana abicishije ku rubuga rwe rwa Facebook aragaragaza abafite ibyo bazi ku igurwa ry’indege za Perezida Paul Kagame zikunze kugarukwaho cyane n’abantu batandukanye.

Muri iyo nyandiko iri mu rurimi rw’icyongereza ndetse iherekejwe n’impapuro zishimangira ibyo avuga Bwana Didas Gasana ugenekereje mu kinyarwanda aragira ati:

“Niba ushaka ko abantu ibyo uvuga babiha agaciro vuga ukuri utaguciye ku ruhande (You need to call a spade a spade if you are to be taken seriously) Igihe kirageze ngo abanyarwanda bamenye iby’umutungo wa Perezida Kagame uva mu misoro yabo, cyane cyane indege. Abashaka kubimenya bagombye kubaza ababizi, ntibabaze Major Jean Marie Micombero cyangwa Bwana Frank Ntwali. Abantu nyabo bo kubaza ni Dr Gerald Gahima, General Dr Emmanuel Ndahiro, Capitaine Jack Callighan na John Nkongoli. Mubaze Dr Gerald Gahima iby’urugendo yakoreye muri Afrika y’Epfo mu 2002.”

Kuli uyu wa gatandatu taliki ya 25 Werurwe 2017, i Buruseli mu Bubiligi hateraniye inama yahuje abanyapolitiki bali mu mashyaka atavuga rumwe n’ishyaka rya FPR rili ku butegetsi mu Rwanda ndetse n’abayobozi b’imiryango nyarwanda idakora politiki, Société Civile.

Abayihuliyemo:

1. Impuzamashyaka P5 yibumbiwemo n’amashyaka atanu (RNC, PS IMBERAKURI, AMAHORO PEOPLE’S CONGRESS, PDP IMANZI na FDU INKINGI) atavuga rumwe n’irya FPR rili ku butegetsi mu Rwanda;
2. Impuzamashyaka CNCD (Conseil National pour le Changement Démocratique) ihuliwemo n’amashyaka atatu aliyo CNR INTWALI, RUD URUNANA na MRP (Mouvement Républicain pour la Paix et le Progrès) nayo atavuga rumwe na FPR ili ku butegetsi mu Rwanda;
3. Hali kandi ayandi mashyaka yali yaje yihagaraliye nka RDI RWANDA RWIZA n’ ISHEMA PARTY;
4. Andi mashyaka atarahabonetse kandi nka PDR IHUMURE yakurikiraniye imilimo y’inama hafi kandi yemeza ko ibyo bose bemeza nabo babyemeje;
5. Hali kandi n’abahagaraliye amashyirahamwe nyarwanda menshi adakora politiki yibumbiye mu rugaga bita CCSCR (Cadre de Concertation de la Société Civile Rwandaise) ndetse n’andi mashyirahamwe yandi atali muli urwo rugaga;
6. Hali ndetse n’abahagaraliye Société Civile yo muli Republika iharanira Demokarasi ya Congo, nabo bali baje nk’indorerezi.

Muli make, muli iyo nama ikomeye, abanyarwanda bose, baba abakora politiki n’abatayikora bali bahagaraliwe.

Iyo nama yatangiye saa tanu z’amanywa. Mu ijambo rya Bwana SIMPUNGA Aloys, umuyobozi w’umuryango INITITIATIVE HUMURA ali nawo wali watumije iyo nama, yerekanye ko gushyirahamwe ibibahuza no kuvugira hamwe kw’abanyarwanda bali hanze y’u Rwanda ali ngombwa. Ubwo bufatanye buzabafasha kwumvikanisha akababaro n’akarengane abanyarwanda bakomeje gukorerwa na FPR, byagiye byongera intera uko imyaka yagiye ihita. Ikibabaje kurusha ibindi kikaba ali uko FPR na Prezida Kagame bashaka kwiyimika ubuziraherezo babinyujije mu ihonyorwa ry’Itegeko-nshinga n’amatora ya “Nyirarureshwa”. Muli iryo jambo ry’ikaze kandi, Bwana Simpunga Aloys yashimangiye ko uko guhuza imbaraga alibyo bizatuma bashobora gukora impinduka za politiki vuba kandi ku buryo bworoshye. Yarangije avuga ko impinduka zihuliweho mu bufatanye alizo buli wese azibonamo bityo zikazamara impungenge abanyarwanda n’abanyamahanga kuko benshi bakeneye guhabwa ikizere ko ubutegetsi buzasimbura FPR butazaba bubi nk’ubwayo.

Impaka zakozwe mu mutuzo no mu bwubahane, zirangira hemejwe ibi bikulikira:

1. Hemejwe bidakuka ko ubufatanye bw’amashyaka atavuga rumwe na FPR akorera mu mahanga ndetse na Société Civile butangijwe;
2. Ibikorwa rusange bishingiye ku ngamba bahuje bigiye gutegurwa maze byemezwe ku mugaragaro mu minsi ya vuba;
3. Hemejwe kandi n’uburyo ubwo bufatanye buzajya mu bikorwa: Uko buzayoborwa, abazabuyobora, imyitwarire ya buli wese muli iyo nzira y’ubufanye,…
4. Ibikorwa byihutirwa bazafatanya byaragenwe ndetse n’uburyo bizategurwa bikanashyirwa mu bikorwa;
5. Ingengabihe ihamye ku bikorwa byihutirwa bitaha yaremejwe. Ingengangabihe itaziguye y’ibikorwa by’ahazaza yaganiliweho aliko nk’icyitegererezo aliko izashyirwaho imaze kwumvikanwaho..

Inama yarangije imilimo yayo saa kumi n’imwe za nimugoroba.

Abahagaraliye INITITATIVE HUMURA:

SIMPUNGA Aloys, Umuyobozi

Padiri Mutarambirwa Athanase, Umujyanama

Contact:

komiteitumirainama@yahoo.com

Mr Aloys SIMPUNGA, Coordinateur 00 32 493 21 42 68

Mr Jean Baptiste SIBORUREMA, Secrétaire 00 32 486 05 91 37

Padiri Athanase MUTARAMBIRWA, Conseiller 00 32 488 48 02 98