Abategetsi muri Amerika baratangaza ko irekurwa rya Paul Rusesabagina riri mu muhate w’ubutegetsi bwa Perezida Joe Biden w’uko buri muturage wese w’Amerika uri mu ngorane mu bihugu by’amahanga acyurwa mu gihugu cye agahuzwa n’umuryango we amahoro.

Ibi byagarutsweho n’abategetsi bakuru b’Amerika ubwo basobanuraga uko irekurwa rya Rusesabagina ryagezweho.

Umwe mu bategetsi bakuru muri guverinema yavuze ko irekurwa rya Paul Rusesabagina rije ryiyongera ku bandi banyamerika benshi barekuwe mu bihugu bitandukanye bigizwemo uruhare na Perezida Biden n’ubutegetsi bwe.

Yavuze ko n’ubwo byagizwe ibanga ku bwende, ariko hari abaturage benshi b’Amerika bacyuwe bavanywe mu bihugu nka Afuganistani, Birmaniya, Uburusiya, Irani n’ahandi.

Yongeraho ko ibikorwa nk’ibyo bigamije gukura Abanyamerika mu kaga barimo hirya no hino ku isi bikomeje.

By’umwihariko ku irekurwa rya Rusesabagina, uyu mutegetsi yatangaje ko ryagezweho nyuma y’amezi menshi y’umuhate mu biganiro bihuje impande zombi. Avuga ko uruzinduko Minisitiri w’Ububanyi n’Amahanga w’Amerika, Antony Blinken, yagiriye mu Rwanda mu kwezi kwa munani k’umwaka ushize rwari rugamije kongera imbaraga mu byari bimaze kugerwaho muri uwo muhate.

Uyu mutegetsi yatangaje ko Leta zunze ubumwe z’Amerika yari yaramenyesheje leta y’u Rwanda ko ikibazo cya Rusesabagina, mu gihe kitaganiriweho ngo haboneke igisubizo gikwiriye, kizakomeza kuba intambamyi ikomeye mu mibanire y’ibihugu byombi.

Avuga ko hari umujyanama mukuru mu biro bya Perezida Biden wafashe iki kibazo mu biganza kugeza ibiganiro bifashe umurongo.

Uyu ngo yatangiye kugirana ibiganiro byihariye mu buryo bwa dipolomsi ituje n’umujyanama wa hafi wa Perezida w’u Rwanda Paul Kagame, byatangiye mu buryo bwo guhamagarana kuri telefone, nyuma baza guhura imbona nkobone.

Uyu mutegetsi mukuru muri guverinema ya Biden yatangaje ko ibiganiro hagati y’aba bajyanama bombi byari bigamije guhindura icyerekezo, ibyafatwaga nko kwamagana ku ruhande rw’Amerika no gutsimbarara ku ruhande rw’u Rwanda bigafata umujyo w’ibiganiro biganisha ku ho impande zombi zahuriza.

Muri ibyo biganiro, uyu mutegetsi yavuze ko uburyo bwumvikanweho bwaje kugerwaho, hanyuma leta y’u Rwanda yemera kurekura Rusesabagina, ariko n’Amerika yemera kuyishimira iyo ntambwe yagezweho, nk’uko bikomeje gukorwa.

Mu kiganiro n’abanyamakuru, undi mutegetsi, yavuze ko ibiganiro biganisha ku kumvikana byatangiye gufata umujyo nyuma y’aho Rusesabagina akatiwe n’urukiko gufungwa imyaka 25 mu kwezi kwa Cyenda kwa 2021.

Uyu akavuga ko ibiro bya Perezidansi y’Amerika yatangiye gukorana n’umuryango we, ndetse n’abagize inteko nshingamategeko y’Amerika bashishikarije impande zombi gukoresha uburyo bw’imbabazi busanzwe buriho mu mategeko y’u Rwanda. Ibyo bigakorwa hagamijwe guhosha umwuka wo guhangana hagati ya leta y’u Rwanda na Rusesabagina.

Uyu mutegetsi akaba yashimiye Perezida Kagame igisubizo cye cyiza cyavuye mu biganiro yagiranye na Minisitiri w’ububanyi n’amahanga w’Amerika mu kwa Munani k’umwaka ushize. Avuga ko irekurwa rya Rusesabagina ari inkuru nziza ku muryango we, ariko kandi ikanaba n’inkuru nziza ku butegetsi bw’Amerika bwakoze ibishoboka byose ngo rigerweho.

Mu biganiro byahuzaga aba bategetsi bavuze ko Rusesabagina, ubu ucumbikiwe kwa ambasaderi wa Katari i Kigali, azahamara iminsi mikeya, nyuma akahava yerekeza i Doha muri Katari.

Aha naho aba bategetsi bavuze ko azahamara iminsi mike itatangajwe–ku mpamvu bavuze ko ari iko kubaha ubuzima bwite bwe nk’umuntu ubu widegembya- akazaha yerekeza muri Amerika.

Ku ruhare rwa Katari muri iki gikorwa, aba bategetsi bashimye akazi k’ubuhuza mu biganiro byagejeje ku irekurwa rya Rusesabagina iki gihugu cyakoze.

Bavuga ko ibi ari ibisanzwe ko Leta zunze ubumwe z’Amerika, mu gukora uko ishoboye ngo itahukane abaturage bayo, yifashisha igihugu gifitanye umubano mwiza n’igihugu abatahukanwa barimo.

Nkibutsa ko kuwa gatandatu ushize – ni ukuvuga umunsi umwe nyuma y’irekurwa rya Rusesabagina, minisiteri y’ububanyi n’amahanga y’Amerika yatangaje ko ivanyeho icyemezo cyayo cyavugaga ko avunzwe binyuranyije n’amategeko.

Paul Rusesabagina uherutse kurekurwa na leta y’u Rwanda yageze i Doha muri Qatar, nk’uko byemezwa n’abategetsi muri Amerika.

Ikinyamakuru The Washington Examiner kivuga ko John Kirby, umuvugizi w’inama y’umutekano ya Amerika, yabwiye abanyamakuru ko Rusesabagina yavuye mu Rwanda kandi yageze i Doha.

Iki kinyamakuru gisubiramo Kirby agira ati: “Vuba arafata urugendo agaruka muri Leta zunze ubumwe za Amerika. Kandi umuryango we, nzi neza ko nta wutunguwe, biteguye kumwakira hano, iwabo.”

Kugeza ubu nta makuru arambuye yatanzwe ku kuva kwe mu Rwanda n’igihe neza neza byabereye. BBC yagerageje kuvugisha umuryango we ariko ntibirashoboka.

Rusesabagina yari yarakatiwe gufungwa imyaka 25 mu Rwanda ahamijwe ibyaha by’iterabwoba bishingiye ku bitero umutwe wa FLN wagabye ku Rwanda mu 2018 na 2019.

Leta ya Amerika yakomeje kuvuga ko “yafunzwe mu buryo bunyuranyije n’amategeko” – nyuma y’uko ashutswe akajyanwa mu Rwanda mu ndege bwite azi ko agiye i Burundi nk’uko byavuzwe mu rukiko. Amerika kandi yakomeje gusaba ko arekurwa.

Qatar yagize uruhare mu biganiro byagejeje ku irekurwa rye, abahagarariye iki gihugu mu Rwanda ni bo bamukuye kuri gereza ya Kigali kuwa gatanu nijoro, aba ari nabo bamucumbikira kugeza avuye mu Rwanda.

Minisiteri y’ubutabera y’u Rwanda yatangaje amabaruwa y’uruhande rwa Rusesabagina irimo ivuga ko ari we wayanditse mu Ukwakira(10) gushize asaba imbabazi Perezida Paul Kagame ngo amurekure.

Muri iyo baruwa yanditsemo ko “nicuza” ihuriro rya MRCD yari abereye umwe mu bayobozi bakuru “n’ibikorwa by’ubugizi bwa nabi bya FLN”.

Muri iyo baruwa hagaragara ko Rusesabagina yemeje ko nagera muri Amerika “ibibazo bijyanye na politiki y’u Rwanda nzabisiga inyuma yanjye.”

BBC yagerageje kuvugisha abunganizi ba Rusesabagina kuri aya mabaruwa ariko nta cyo barasubiza.

Nyuma y’uko avuye muri gereza, leta ya Amerika yo yatangaje ko yishimiye kurekurwa kwa Rusesabagina, ufite uburenganzira bwo gutura muri iki gihugu.

Mu itangazo, Perezida Biden yagize ati: “Nshimiye Leta y’u Rwanda yatumye uku kongera guhura [n’umuryango we] gushoboka, nshimiye kandi Leta ya Qatar yagize uruhare mu irekurwa rya Paul no kugaruka muri Leta Zunze Ubumwe.”

BBC

Yanditswe na Erasme Rugemintwaza

Ku ikubitiro Perezidansi ya Leta Zunze ubumwe z’Amerika yagaragaje ibyishimo bidasanzwe. Perezida Joe Biden yasohoye itangazo ryuzuye ibyishimo ashimira cyane Qatari uruhare yagize mu mishyikirano yo gufungura Paul Rusesabagina.  Perezida w’Amerika akaba aha ikaze Rusesabagina muri Amerika no mu muryango we. Ibyo byishimo bikaba  byashimangiwe na Minisiteri y’Ububanyi n’Amahanga nayo yasohoye itangazo nk’iryo.

Kigali mu cyunamo

Mu Rwanda cyane cyane mu mugi wa Kigali, urasanga abantu basa n’abari mu cyunamo kubera ikimwaro  cyatewe ahanini n’amagambo yo kurenga umupaka yavuzwe na Perezida Paul Kagame, wahaye gasopu nyinshi amahanga kugeza ubwo avuga ko ayo mahanga avuga ibitabapfu ku kibazo cya Rusesabagina. Yageze n’aho yihandagaza akora mu ijisho rya ba shebuja, arahira ko gufungura Rusesabagina bidashoboka keretse u Rwanda rugabweho igitero rugafatwa. Mu nama n’imihango yose yaberaga i Kigali, wabaga umwanya ukomeye wo gutitiza Abahagariye ibihugu by’Uburayi n’Amerika mu Rwanda, ababwira ko bigize ibimana bitanga amabwiriza muri byose.

Abanyarwanda barimo baratinya kuvuga ku mugaragaro ko Kagame yarengereye cyane, kubera gutinya inkurikizi zababaho, aho bashobora kuba bafatwa nk’abanzi. Ariko abashoboye kuvuga bongorerana baremeza ko bigaragara ko amahanga arambiwe ibinyoma bya Paul Kagame.

Hari n’abatangiye kwibaza niba koko ibyaha Rusesabagina na bagenzi be bahamijwe koko babikoze cyangwa se ari ikinamico rya Kigali kugira ngo ihuruze amahanga ko ifite imitwe iyirwanya. Aha benshi bakaba bavuga ko bidashoboka ko Amerika yahaguruka kuriya ari ukurwana ku muntu wayo gusa, ko ahubwo ishobora kuba yaratahuye ko ibyabereye i Nyabimata, aho barega MRCD-FLN ya Rusesabagina igitero cyahitanye abasivili, bishobora kuba ari ibikorwa by’ubutegetsi bwa Kigali.

Abandi bakaba bibaza amafaranga yose yatanzwe mu guhiga no gufata Paul Rusesabagina na Callixte Nsabimana icyo apfiriye ubusa ariko bakanibaza uzatanga indishyi n’impozamarira ku miryango yabuze ababo. Ibyo aribyo byose hari amabanga akomeye yihishe inyuma y’uyu mukino Rusesabagina avuyemo.

Ndizera ko “Hollywood” ibonye indi Filime, itari impimbano, izongera guhesha Paul Rusesabagina irindi shimwe rya OSCAR, dore ko hazaba harimo itsindwa ry’ibinyoma biba mu Butegetsi bw’Afurika n’agaciro gakomeye ubwo butegetsi bwoshyura kugira ngo bureme ibinyoma bigamije kugira abayobozi bo muri Afurika intwari, bityo babone uko babeshya abaturage ko babakunda, bikaba iturufu n’icenga rikomeye ryo kugundira ubutegetsi. Sinjye wahera, hahera…

Yanditswe na Marc Matabaro

Amakuru agera kuri The Rwandan kuri uyu wa mbere tariki ya 27 Werurwe 2023 ni avuga ku rupfu rw’uwitwa Innocent Ntirenganya witabye Imana umurambo we ugatoragurwa mu mugezi wa Nyabarongo.

Isoko z’amakuru za The Rwandan zashoboye kumenya ko Innocent Ntirenganya wari mu kigero cy’imyaka 30 yacururizaga services z’ikigo cy’itumanaho rya Telefone zigendanwa (MTN) mu gace ka Nyabugogo mu mujyi wa Kigali akaba yari atuye i Kinyinya.

Ayo makuru akomeza avuga ko yatawe muri yombi n’inzego zishinzwe umutekano z’u Rwanda tariki ya 15 Werurwe 2023 ariko atanga ruswa (amafaranga) arekurwa ku itariki ya 16 Werurwe 2023, abandi bari bafunganywe nawe bagera kuri 15 twashoboye kubona amakuru y’uko bajyanywe ahitwa i Nasho haba ikigo cy’ingabo z’u Rwanda (RDF) gitangirwamo imyitozo ya gisirikare. Hakaba hakekwa ko abo bose bafashwe bajyanywe mu gisirikare dore ko bose bari urubyiruko ruri mu myaka hagati ya 20 na 30.

Nyuma yaho ku cyumweri tariki ya 19 Werurwe 2023, inkuru yabaye kimomo ko Polisi y’u Rwanda yahamagaye ababyeyi ba Innocent Ntirenganya ibamenyesha ko umurambo we watoraguwe mu mugezi wa Nyabarongo mu karere ka Kamonyi hafi ya Ruliba, ko umurambo bajya kuwureba mu bitaro bya Remera-Rukoma.

The Rwandan yagerageje kugira abo yavugana nabo bo muryango wa Innocent Ntirenganya ariko ntibyadushobokera, twashoboye kumenya ariko ko nyakwigendera yashyinguwe kuri uyu wa gatatu tariki ya 22 Werurwe 2023.

Inkuru zikomeje gucicikana mu bice bitandukanye by’u Rwanda ko abasore benshi barimo gufatwa bakaburirwa irengero, hakaba hari amakuru amwe ava mu miryango imwe n’imwe avuga ko abana babo bajyanywe nta byaha baregwa bifatika bakajya gufungirwa ahantu hatazwi ndetse bajya gukurikirana bagahabwa ibisobanuro bidasobanutse. Ariko hari bamwe mu basore bashoboye kurekurwa batanze za ruswa cyangwa kubera ko bava mu miryango ikomeye. Amakuru yemezwa na bamwe akaba avuga ko aba basore baba bajyanwa mu gisirikare ngo bashyirwe mu bajya kurwana mu ntambara umutwe wa M23 ushyigikiwe na Leta y’u Rwanda uhanganyemo n’ingabo za Congo mu ntara ya Kivu y’amajyaruguru.

Turacyakurikirana iby’uru rupfu nitubona amakuru arambuye tuzayabagezaho!

Yanditswe na Marc Matabaro

Kuva mpera z’icyumweru gishize hatangiye gukwira inkuru z’ifungurwa rya Paul Rusesabagina, Callixte Nsabimana n’abo baregwanaga bo mu mpuzamashyaka MRCD/FLN tutibagiwe n’abandi bantu barenga 300 bari barahamijwe ibyaha bagakatirwa n’inkiko.

Aba bafunguwe bose nk’uko bitangazwa mu igazeti ya Leta nimero idasanzwe yo ku wa 25 Werurwe 2023 bahawe imbabazi na Perezida wa Repubulika.

Ibinyamakuru byinshi bitandukanye byavuze kuri iyi nkuru ndetse n’abantu batandukanye bayivuzeho ariko hari benshi batanaze ijisho ku rupapuro rwa 37 rw’iyo gazeti ngo barebe imfungwa nimero 24 yafunguwe.

Iyo mfungwa nta yindi ni Valens Kajeguhakwa, mu myaka yashize wari umwe mu baherwe ba mbere mu Rwanda ndetse yaje kuba n’umudepite FPR ifashe ubutegetsi mu 1994, ariko yaje guhunga ubutegetsi bwa FPR mu 1999 ndetse ajya mu bataravugaga rumwe n’ubutegetsi maze mu 2001 asohora igitabo yise “Rwanda de la terre de paix à la terre de sang et après?”.

Yatahutse mu Rwanda mu 2013 nyuma yo kumara igihe kigera ku myaka 14 mu buhungiro aho yabaga muri Leta ya Florida muri Amerika bivugwa ko yafungiwe muri icyo gihugu ndetse ko yatahutse nyuma yo gusaba imbabazi Perezida Kagame.

Mu bahawe imbabazi nk’uko bigaragara muri iyi gazeti ya Leta harimo uwitwa KAJEGUHAKWA Valens, w’igitsina GABO, mwene RUHUNZI na nyina KABUNGU wavutse tariki ya 1-01-1942 akavukira mu kagali ka Rubavu, umurenge wa Rubavu, akarere ka Rubavu, wahamijwe ibyaha by’Ubwambuzi bushakana, Ubuhemu, kwakira indonke mu rubanza RP245/04/TP/KIG -RM PC409/GG/RE rwaciwe ku itariki ya 29/07/2005 akatirwa Imyaka 7.

Benshi barimo na twe baguye mu kantu basomye iryo zina mu igazeti ya Leta dore ko nta makuru ya Kajeguhakwa yari aherutse kuvugwa.

Ikindi ni uko ibigaragara mu igazeti ya Leta bidasobanutse ndetse biteye urujijo, kuko niba Kajeguhakwa yaratawe muri yombi mu 2013 atahutse bivuge ko igihano cy’imyaka 7 yakatiwe mu 2005 yaba yarakirangije mu 2020.

Amakuru The Rwandan yashoboye kumenya ni uko Kajeguhakwa yakennye cyane kuko ibintu bye byose byagurishijwe ku buryo abaho akodesha.

Ayo makuru akomeza avuga ko yari yarafashwe n’uburwayi bukomeye ku buryo n’ubwo bivugwa ko yari afunze atari muri Gereza nk’abandi bagororwa ahubwo igihano yagikoreraga iwe aho atuye.

Turakomeza gukurikirana aya makuru.

Itangazo rigenewe abanyamakuru:

Nyuma y’ifungurwa rya Paul Rusesabagina wari warashimuswe n’ubutegetsi bw’u Rwanda muri Kanama 2020, Ikigo kitiriwe Nyakwigendera Seth Sendashonga (Institut Seth Sendashonga pour la citoyenneté Démocratique, Iscid asbl) cyishimiye kugeza ku Banyarwanda n’inshuti z’u Rwanda ubutumwa bukurikira:

1. Ifungurwa rya Paul Rusesabagina ni inkuru nziza ku baturage b’u Rwanda ndetse n’abantu bo ku Isi bashyigikiye amahoro, demokarasi n’uburenganzira bw’ikiremwamuntu.

2. Ikigo kitiriwe Nyakwigendera Seth Sendashonga kirashimira byimazeyo abantu bose bagize uruhare mu kuvana Paul Rusesabagina mu menyo ya Rubamba. Mu b’ingenzi harimo Nyakubahwa Jo Biden, Perezida wa Leta Zunze Ubumwe z’Amerika n’abo bafatanije kuyobora icyo gihugu, umuryango wa Paul Rusesabagina, igihugu cya Qatar, umuryango w’ubumwe bw’ibihugu by’iburayi, n’abandi benshi bokeje igitutu ubutegetsi bw’umunyagitugu Perezida Paul Kagame.

3. Ikigo kitiriwe Nyakwigendera Seth Sendashonga kishimiye ko Paul Rusesabagina yafunguranywe n’abandi bantu 18 bari kumwe mu rubanza baciriwe n’ubucamanza bw’u Rwanda. Na none ariko hari abandi bantu benshi bafungiwe kuba bari baragaragaje ko bashyigikiye impinduka nyuma y’imyaka myinshi Perezida Paul Kagame na FPR bamaze ku butegetsi, Ikigo kitiriwe Nyakwigendera Seth Sendashonga kikaba gisaba ko nabo bafungurwa nta yandi mananiza. Muri abo harimo abanyaporitiki, abanyamakuru n’ impirimbanyi z’uburenganzira bw’ikiremwamuntu. Muri bo twavuga : Deo Mushayidi, Idamange Iryamugwiza Yvonne, Aimable Karasira Uzaramba, Abdul Rashid Hakuzimana, Sylvain Sibomana, Théophile Ntirutwa , Théoneste Nsengimana, Niyonsenga Dieudonné bakunze kwita Cyuma Hassan n’abandi barimo abaturage bazize ko basomye igitabo kigisha uburyo budahenze bwo guhirika ingoma y’igitugu.

Kuwa gatatu, Urukiko rwo mu Bufaransa rwakatiye Emmanuel Abayisenga gufungwa imyaka ine kubera gutwika no kwangiza katedrale yo mu mujyi wa Nantes mu 2020, nk’uko ibiro ntaramakuru AFP bibivuga.

Abayisenga, umunyarwanda w’imyaka 42, afite kandi urubanza rw’urupfu rw’umupadiri wishwe mu burengerazuba bw’Ubufaransa mu 2021.

Mu guca urubanza, Urukiko rwavuze ko Abayisenga atari akomeye mu mutwe igihe atwika iyo katedrale ya Mutagatifu Petero.

Rwategetse kandi ko atagomba kwitwaza intwaro ndetse ntave mu gace ka Loire-Atlantique mu burengerazuba bw’Ubufaransa, aho umujyi wa Nantes uherereye, nibura mu myaka itanu.

Umunyamategeko we, Meriem Abkoui, yavuze ko ibisubizo by’umukiliya we mu rukiko rimwe na rimwe “byabaga bidafite ihuriro” kandi uruhare rwe mu cyaha rwakwibazwaho, nk’uko AFP ibivuga.

Meriem yongeraho ko ategereje ibisubizo by’isuzuma ryo mu mutwe Abayisenga yakorewe mu rubanza rundi aregwamo kwica umupadiri, avuga ko rushobora kuba umwaka utaha.

Abayisenga yageze mu Bufaransa mu 2012 akora imirimo y’ubukorerabushake muri Diyoseze ya Nantes, ubwo urubanza rwatangiraga yemeye ko ariwe watwitse kiliziya.

Yavuze ko yinjiye muri iyo katedrale gusenga maze “akabura intege zo kwifata” nyuma yo guca ahantu muri iyo nyubako yasagariwe bikomeye mu 2018.

Avuga mu ijwi ry’umusemuzi, Abayisenga yicujije ibyabaye asaba imbabazi.

Mu 2019, ubusabe bwe bw’ubuhingiro mu Bufaransa bwaranzwe bategeka ko ava muri icyo gihugu, ibintu bivugwa ko byamuhungabanyije cyane.

Urukiko rwemeye ko afite ibibazo by’amagara, harimo n’ibyo kutumva, kutitangira k’umubiri, ibibazo by’ibihaha, n’ibibazo mu mirire.

Ubushinjacyaha bwo buvuga ko yatwitse iyo katedrale abishaka kubera “umujinya mwinshi no gushaka kwihorera” ku bakuriye iyo katedrale.

Abazimya umuriro babashije gutabara bazimya igikanka cy’ibanze cy’iyo katedrale, ariko igice kiranga cyane iyi nzu yo mu kinyejana cya 17, yarokotse Impinduramatwara mu Bufaransa, n’ibisasu byo mu ntambara z’isi, cyo cyarangiritse.

Ibindi byahiye ni ibikoresho by’agaciro kandi bya kera, amashusho y’ubugeni, n’ibirahure by’imitako byo mu kinyejana cya 16.

Ba nyiri iyi katedrale bavuga ko ibyangiritse bifite agaciro ka miliyoni $43.

BBC

Mu igazeti ya leta y’u Rwanda nimero idasanzwe yo ku 25 Werurwe 2023 ku rupapuro rwayo rwa 10 hariho urutonde rw’abarekuwe ku mbabazi za Perezida wa Repubulika barahamijwe gukoresha ibiyobyabwenge bakaba ngo bari batarageza ku myaka 21 igihe bakoraga icyo cyaha.

Kuri urwo rupapuro rwa 10 kuri nimero ya 15 hagaragarago uwitwa MABUMBA NZIMA Buis, w’igitsina gabo, mwene Mabumba Oswald na nyina Yvonne Idamange Iryamugwiza, wavutse  tariki ya 02 Kanama 2004, avukira mu karere ka Gasabo, umurenge wa Kimironko, Akagari ka Gatare, akaba yarahamijwe ibyaha byo: Gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nka byo mu rubanza RP 01881/2022/TB/KICU, akaba yari yaratawe muri yombi tariki 17 Ugushyingo 2022, akaba yari yarakatiwe igifungo cy’umwaka 1.

Twabibutsa kandi ko kuri uyu wa Kane tariki ya 30 Werurwe 2023, urukiko rw’ubujurire rwategetse ko Madamu Yvonne Idamange Iryamugwiza afungwa imyaka 17 n’igice ndetse akazatanga ihazabu ya miliyoni 4 z’amafaranga.

Ubutabera bw’u Rwanda bwamuhamije ibyaha byo gupfobya no guhakana jenoside yakorewe abatutsi mu mwaka w’1994. Ibyaha aregwa arabihakana.

Umunyamkuru w’ijwi ry’Amerika, Eric Bagiruwubusa yari mu rukiko ategura inkuru ikurikira.

Paul Kagame niwe watorewe kuyobora umuryango wa FPR inkotanyi mu gihe cy’imyaka 5.

Ni amatora yashoje Kongeri ya FPR inkotanyi yaberaga i Kigali, ikaba yarahuriranye no kwizihiza isabukuru y’imyaka 35 uwo muryango umaze uvutse.

Gutora abayobozi ni cyo gikorwa cyasoje kongere yari imaze iminsi. Ni amatora atagaragayemo impinduka zigaragara kw’isonga nyirizina. Perezida Paul Kagame ni we wongeye gutorerwa kuyobora FPR. Ku mwanya wa Visi perezida, uwatowe ni Madame Uwimana Concolee wahoze ari Senateri. Yasimbuye Bazivamo Christophe wari umaze imyaka 10 muri uwo mwanya. Ku mwanya w’umunyamabanga mukuru wa FPR inkotanyi hatowe Bwana Gasamageri Wellars wasimbuye Francois Ngarambe wari umaze imyaka 20 muri uwo mwanya.

Gutora abazayobora umuryango wa FPR inkotanyi mu gihe cy’imyaka 5 byahuriranye no kwizihiza isabukuru y’imyaka 35 umuryango FPR inkotanyi umaze uvutse.

Perezida kagame akaba n’umuyobozi wa FPR-Inkotanyi, yagarutse ko uyu muryango wanyuze mu nzira zitoroshe kugera aho ugeze ubu.

Perezida kagame akaba n’umuyobozi wa FPR Inkotanyi yumvikanishije ko abayobozi bahunze bananiwe gusobanura inshingano z’ibyo bakoraga bahitamo kuva muri FPR baragenda.

Perezida kagame yakomoje k’uwahoze ari umunyamabanga mukuru wa FPR, aho yumvikanishije ko uwo wari umunyamabanga mukuru yafatiwe mu bikorwa by’ubujura yiba amafaranga.

Usibye abanyamuryango ba FPR inkotanyi bagera ku bihumbi 2000 bitabiriye iyi nama, abahagarariye imitwe ya Politike yose ikorera mu Rwanda, n’abahagarariye imitwe ya politike iri ku butegetsi mu bihugu bituranye n’u Rwanda n’ibya kure na bo bari bahari.

Mu Burundi, ishyaka CNDD-FDD ryari ryohereje intumwa, harimo uhagarariye ishyaka FRORIMO ryo muri Mozambique, NRM ryo muri Uganda, Zanu PF yo muri Zimbabwe ndetse n’ishyaka Chama cha Mapinduzi yo muri Tanzaniya.

Impirimbanyi y’uburenganzira bwa muntu mu Rwanda Bwana Aimable Uzaramba n’abamwunganira mu mategeko barasaba umucamanza kubanza kumusuzuma uburwayi bwo mu mutwe mbere yo kumuburanisha ibyaha byo guhakana no guha ishingiro jenoside.

Bwana Aimable Karasira Uzaramba yagejejwe ku rukiko arinzwe bikomeye n’abacungagereza bavanze n’abapolisi benshi. Yari mu mpuzankano y’iroza iranga abafungwa yambaye amapingu ku maboko afite bibiliya mu ntoki.

Umwitegereje mbere y’iburanisha ari n’abamwunganira mu mategeko, Karasira yagaragaraga yacishagamo akamwenyura , ubundi akagaragara nk’uri mu ntekerezo zidashira.

Karasira yabwiye umucamanza mu rugereko rwihariye rw’urukiko rukuru ruburanisha ibyaha byo ku rwego mpuzamahanga n’ibyambuka imbibe ko n’ubwo yubahirije amabwiriza y’abamufunze atiteguye kuburana. Yavuze ko amaze icyumweru arwaye kandi ko gutegura urubanza ku byaha byo guhakana no guha inshingiro jenoside yamugize imfubyi birushaho kumusubiza inyuma.

Yasobanuye ko kuva yagera mu munyururu byarushijeho kumusonga ku burwayi bw’agahinda gakabije amaranye imyaka isaga 20 ndetse n’indwara y’igisukari izwi nka diyabete. Yasobanuye ko atanga kuburana na cyane ko yemera ashimitse ko biri mu nyungu ze ariko agasaba urukiko gutegeka ko avurwa bakamuburanisha ari muzima.

Ibindi wabyumva hasi mu nkuru y’Umunyamakuru w’Ijwi ry’Amerika, Eric Bagiruwubusa