Itangazo rigenewe abanyamakuru

Banyarwanda mwirinde gukoreshwa amahano!

Ikigo kitiriwe Nyakwigendera Seth Sendashonga (Institut Seth Sendashonga pour la citoyenneté démocratique, ISCID asbl) gihangayikishijwe n’ubwicanyi bukabije burimo gukorerwa mu gihugu cyacu, ubwo bwicanyi bukaba bwibasiye abacitse ku icumu rya jenoside yakorewe abatutsi mu mwaka w’1994 nk’uko bitangazwa na leta ubwayo ndetse n’imiryango inyuranye. Uretse abacikacumu ubwo bwicanyi burahitana n’abandi baturage mu bisa no guhôra kandi bikozwe n’abitwaga ko barinda umutekano. Urugero rwa vuba ni ibyabereye i Gishali mu karere ka Rwamagana aho uwitwa Kabera Samuel washinjwaga kwica umucikacumu Sibomana Emmanuel nawe yishwe nta rubanza rubaye kandi yari mu maboko y’inzego zishinzwe umutekano.

Mu itangazo Institut Seth Sendashonga yashyize ahagaragara ku itariki ya 20 Ugushyingo 2024, yamaganye ijambo umukuru w’igihugu yavugiye mu nama ya Unity Club yateranye tariki ya 16 Ugushyingo 2024 agereka ubwo bwicanyi ku barwanya igitugu cya FPR no kuri Madame Victoire Ingabire by’umwihariko. Ibyo yongeye kubitsindagira tariki ya12 Ukuboza 2024 mu ijambo yavuze mu muhango wo kurahiza perezida na visi perezida b’Urukiko rw’ikirenga.

Institut Seth Sendashonga itewe impungenge n’uko ubwo bwicanyi butarakorerwa iperereza ryimbitse, ababukoze bakaba batarashyikirizwa inkiko kugirango bisobanure kubyo bashinjwa, ukuri kuri ubwo bwicanyi n’ikibwihishe inyuma bikajya ahagararagara, ahubwo buhinduka iturufu ya politiki hagamijwe gucecekesha abaharanira impinduka mu gihugu cyacu.

Biteye inkeke kumva ko Perezida Paul Kagame ufite mu nshingano ze ibijyanye no kubahiriza itegekonshinga n’andi mategeko mu nyungu rusange z’igihugu atangaza ko ateganya kunyura mu nzira ziciye ukubiri n’amategeko kugirango ahagarike ubwo bwicanyi. Nk’uko amateka y’imiyoborere ye abigaragaza izo nzira avuga ziciye ukubiri n’amategeko nta kindi bisobanura; ni ayandi mahano ashaka gukora kandi akazabikora mu nyungu za politiki.

Birakwiye kandi gusobanukirwa ko izo nyungu za politiki za Perezida Paul Kagame zishingiye ahanini ku mugambi we wo gutsimbarara ku butegetsi kugeza ubwo azaburaga abamukomokaho.

Abasesengura ibirimo kubera mu gihugu cyacu ntibashidikanya ko jenoside yakorewe abatutsi mu w’1994, ubutegetsi bwa FPR bwayigize iturufu yo kwiharira ubutegetsi no kuburambaho. Ni muri urwo rwego n’ubu bwicanyi burimo kwibasira abacikacumu benshi babona nta kindi kibwihishe inyuma uretse amanyanga ya politiki. Bitabaye ibyo wasobanura ute ukuntu polisi ifata umuntu ushinjwa icyaha bitirira ko yagitewe n’ingengabitekerezo ya jenoside ahuriyeho n’abandi bantu (barimo n’abanyapolitiki batavuga rumwe n’ubutegetsi) aho gushyikirizwa inkiko kugirango ukuri kujye ahagaragara ahubwo akicwa?

Institut Seth Sendashonga yamaganye yivuye inyuma ibigaragara nk’imigambi mibisha ubutegetsi bwa Kagame burimo gutegura, ikaba isaba abanyarwanda kwirinda gushorwa mu bwicanyi n’andi marorerwa nk’uko byagiye bikorwa mu mateka y’igihugu cyacu. Ntabwo ubutegetsi buri mu marembera bukwiye kubagira ibikoresho by’amahano kuko ni mwe bigiraho ingaruka ziremereye. Nimureke abicanyi babage bifashe.

Institut Seth Sendashonga iboneyeho kwibutsa ko inzira Perezida Paul Kagame yatangaje yo gukora ibiciye ukubiri n’amategeko atari nshya kuri we, ahubwo igishya nuko noneho yabyatuye imbere y’abacamanza n’abagize inteko ishinga amategeko. Imyaka yose amaze ku butegetsi, Perezida Paul Kagame yaranzwe no kwica abaturage, kubanyereza, kubafungira ubusa, kubahungeta, kubaroga,n’ibindi nkabyo. Muri iki gihe ubutegetsi bwe bugenda burushaho kugeranirwa, intambara yashoje ku gihugu cy’abaturanyi cya Kongo ikaba igejeje ubukungu bw’igihugu aharindimuka, kuyisohokamo mu buryo bw’ibiganiro bikaba nabyo byaramushobeye kubera ingaruka byamugiraho (nta yindi mpamvu yanze kujya gusinya amasezerano y’i Luanda muri Angola tariki ya 15 Ukuboza 2024), ibikorwa nk’ibyo byo kwiheba no guteza akavuyo mu gihugu ni ukubyitegura. Niko abanyagitugu barangiza. Abwirwa benshi akumva beneyo.

Institut Seth Sendashonga iboneyeho umwanya wo kwifuriza abanyarwanda bose n’inshuti z’u Rwanda Noheri nziza n’umwaka muhire wa 2025.

Bikorewe i Buruseli, tariki ya 21 Ukuboza 2024

Jean-Claude Kabagema

Perezida wa ISCID asbl

The post UBUTEGETSI BWA KAGAME MU MIGAMBI MIBISHA appeared first on Umunyarwanda.

Yanditswe na Muamini UWASE.

U Rwanda ruzwi cyane mu mahanga kubera ubwicanyi ndengakamere bwibasiye Abatutsi bari barutuye mu mwaka w’1994. Ubu bwicanyi bwiswe jenoside maze umuryango w’abibubye (ONU/UN) ushyiraho urukiko mpuzamahanga mpanabyaha rushinzwe gukurikirana abagize uruhari muri ubwo bwicanyi bwahitanye inzirakarengane zisaga miliyoni.

Urwo rukiko rwari rufite icyicaro Arusha muri Tanzaniya rwasoje imirimo yarwo muri 2015, nyuma y’imyaka 21 rwari rumaze rushinzwe, ruciriye imanza Abanyarwanda batageze ku ijana kandi rutwaye akayabo ka miliyoni nyinshi z’amadolari. Mu Rwanda naho hagiyeho amategeko n’inkiko ziburanisha abakekwagaho kugira uruhare muri jenoside yakorewe Abatutsi. Gusa rero, izi nkiko zose zaciriye imanza abakoze ibyaha ku ruhande rumwe kandi nyamara imiryango mpuzamahanga yita ku burenganzira bw’ikiremwamuntu kimwe n’abashakashatsi banyuranye banditse kuri jenoside yakorewe Abatutsi mu Rwanda mu mwaka w’1994, bemeza ko impande zombi zari zihanganye kuva mu mwaka 1990 kugera mu 1994, ni ukuvuga Leta ya Habyarimana Juvénal hamwe n’ingabo za FPR-Inkotanyi, zaragize uruhare rukomeye mu gutuma jenoside yakorewe Abatutsi iba kuko buri ruhande rwifuzaga kwikubira ubutegetsi bwose.

Aho ingabo za FPR-Inkotanyi zifatiye ubutegetsi muri Nyakanga 1994 zakoze uko zishoboye zicecekesha abantu bose bashakaga kugaragaza ko na zo zishe Abahutu mu bice by’igihugu zari zarigaruriye. Ni muri urwo rwego Leta ya FPR-Inkotanyi yubatse urukuta rw’amategeko ahana umuntu wese ugerageje kugaragaza ko na zo atari shyashya mu byabaye mu gihe cya jenoside, ugerageje wese kubihingutsa ashinjwa gupfobya cyangwa guhakana jenoside cyangwa se kugira ingengabitekerezo yayo. Hari ababizize baricwa, abandi barafatwa bajugunywa mu buroko, bakatirwa imyaka myinshi y’igifungo, abandi barameneshwa. Ibi byatumye Abanyarwanda basigaye mu gihugu bagira ubwoba bwo gutanga ibitekerezo byabo mu bwisanzure ku mateka ya jenoside yakorewe Abatutsi no ku ngaruka zayo, ngo hato badakoma rutenderi FPR-Inkotanyi n’abambari bayo bakabakanira urubakwiye.

Leta ya FPR-Inkotanyi yitwaza cyane jenoside kugira ngo ibuze Abanyarwanda ubwisanzure cyangwa ihohotere abatavuga rumwe na yo. Ugize icyo avuga kinyuranyije n’umurongo wa politiki wayo ashakirwa biriya byaha navuze haruguru. Ibi byagize uruhari mu gutesha uburemera n’agaciro jenoside yakorewe Abatutsi kuko iyo Leta ya FPR-Inkotanyi ishinje buri wese ko ahakana jenoside yakorewe Abatutsi, ko ayipfobya cyangwa afite ingengabitekerezo yayo kubera gusa ko atabona ibintu kimwe na yo, iba irimo gutesha jenoside agaciro n’uburemere.

FPR-Inkotanyi ikunze kubeshya ko ikunda igihugu kurusha abandi, ko yahagaritse jenoside yakorewe Abatutsi, ko ari Umucunguzi w’Abatutsi. Yita uwo batavuga rumwe wese umwanzi, ikamushakira ibyaha byo kugira ingengabitekerezo ya jenoside, ikamwambika ibara. Ibi birababaje kuko atari uko bapima ko umuntu afite ingengabitekerezo ya jenoside. Kugira ingengabitekerezo ya jenoside ni icyaha gikomeye cyane, ikwiye rero kurekeraho gukomeza kugikinisha no kukigira igikangisho.

Ishyaka rya FPR-Inkotanyi ryafashe Abanyarwanda bugwate ribagenera icyo bakwiye kuvuga n’icyo batagomba kuvuga. Abanyamuryango bayo bibeshyako aribo bazi ibyabaye mu Rwanda, bagahimba amateka adafite aho ahuriye n’ukuri ku byabaye muri jenoside, bagashora urubyiruko rw’u Rwanda mu ngando zigamije kuboza ubwonko no kubabuza kwisanzura mu kuvuga ku bijyanye na jenoside, bagafata mu mutwe amateka yuzuye ibinyoma babatekereye.

Nubwo hari abantu bahakana jenoside yakorewe Abatutsi cyangwa bayipfobya, yewe banafite ingengabitekerezo yayo, ntabwo kubuza Abanyarwanda kuvuga bisanzuye kuri jenoside aribwo buryo bwo kubarwanya.

Mu Rwanda hakwiye kubaho urubuga ruha abaturage ubwisanzure bwo gutanga ibitekerezo byabo kuri jenoside yakorewe Abatutsi no ku bundi bwicanyi bwabaye mu Rwanda, bakavuga uko byagenze aho bari baherereye, uko byatangiye, ababikoze, abishwe n’abarokotse. Ibi bigakorwa mu bwisanzure, ntawe uniganywe ijambo. Ibi nibyo bizatuma bagera ku bumwe n’ubwiyunge nyabwo.

The post Abanyarwanda bavukijwe uburenganzira bwo kuvuga mu bwisanzure ku mateka ya jenoside yakorewe Abatutsi babaga mu Rwanda mu mwaka w’1994. appeared first on Umunyarwanda.

The post NOHELI NZIZA N’UMWAKA MUSHYA MUHIRE WA 2025. UBUTUMWA BWA Victoire INGABIRE appeared first on Umunyarwanda.

The post BOMBORI:ABASHINGWACUMU/”Les petits Tutsi”/Kagame mu iturufu y’amoko/Abatutsi bibeshye kuri Kagame… appeared first on Umunyarwanda.

The post 2025:Ubutegetsi bwa Kagame ku muteremuko/Amakuru yaranze umwaka wa 2024/FPR yagonze ibikuta byinshi appeared first on Umunyarwanda.

Nk’uko nabisobanuriye “rubanda” natangiye kwitoza “intera” z’urwego rutugeza ku “Inzira y’ubupfura”.

Izo ntera ni izi:

1°) kwiga guca bugufi

2°) kwiga kureba kure

3°) kwiga kuvuga make

4°) kwiga guteg amatwi

5°) kwiga kumva

6°) kwiga kumvira

7°) kwiga kubaha

8°) kwiga kwihangana

9°) kwiga kugira ijabo

10°)kwiga kugira ijambo

Reka mbatume rero:

Muzambwirire bene Mukurira, bene Mbaguta, bene Karekezi, bene Nahayo, bene Sebyondo, bene Karera, bene Mutabazi, bene Gakwavu, bene Ruhambiransina, bene Kabahizi, bene Kabenga, bene Bucyizi, bene Karegeya, bene Basomingera, abo mu gipayongo n’abandi muti: mwaje tugaca bugufi tugafatanya n’abandi gusigasira AMAHORO n’UBUMWE, kugirango buli wese arusheho gutera imbere afatanya n’abandi kuva mu ubunyamaswa agana ubumuntu. Muti ni urugamba rukomeye.

Dutahe cyane.

Jean Daniel Mbanda

The post Jean Daniel Mbanda ati: -Natangiye kwitoza “intera” z’urwego rutugeza ku “Inzira y’ubupfura”- appeared first on Umunyarwanda.

The post IKIBYIMBYE KIMENEKE: Kagame ararangisha ingaboze/Tems ahise asubika igitaramo cye ikigali appeared first on Umunyarwanda.

The post Theogene Rudasingwa arasaba Leta zunze ubumwe z’Amerika guhakira u Rwanda imfashanyo za gisirikare appeared first on Umunyarwanda.

The post IKIBYIMBYE KIMENEKE: Intambara ya DRC/Abarundi bariye karungu/Ibibera Goma bisa n’ibya FPR muri 1994 appeared first on Umunyarwanda.

The post GAHUNDA ZO GUTSINDIRA PAUL KAGAME MURI CONGO: DORE UKO BIMEZE NGUKU appeared first on Umunyarwanda.

The post IKIBYIMBYE KIMENEKE: Kagame yiyemeje gusiga ayogoje akarere/M23-RDF bakomeje kumena Amaraso appeared first on Umunyarwanda.

Abashakaga kumushyira ku butegetsi bamaze kwivugana Perezida Habyarimana n’Umugaba mukuru w’ingabo z’u Rwanda Generali Nsabimana ; bityo Paul Kagame atoragura ingoma mu giteme. Ahinduka Indahangarwa, yigira akandare n’akarahakajyahe ! Yiba impundu. Abagiye abagira inyangabirama, bahabwa induru kuko batabonye umwanya wo kugira ibyo basobanura. Yiha kwica abatavugarumwe na we n’abavuga ibyo atemera. Ijambo yarihawe na Mpatsibihugu ! Rusahulira mu nduru wafashe ubutegetsi mu mivu y’amaraso y’abenegihugu b’ingeri zose si ugutema arahuga. Mu ijambo rye rya mbere yarivugiye ati : « Mfite ukwihangana guhagije, kuzamfasha kuvoma ingunguru y’amazi n’akayiko k’icyayi cyangwa se umufuniko w’icupa rya byeri. » Amaze gufata ibyo yarwaniye amena amaraso menshi kurusha ayamenetse mu ntambara yafashemo igihugu. 

 Kuwa 8 ukwakira 1995, mu ijambo yafatiye i Nyamirambo, Paul Kagame yahavugiye aya magambo : « Abagiye bishe abantu hano, Loni nitabafata tuzihorera ». Bukeye mu gitondo, nibwo umunyamakuru Louiza Kayibanda yagerageje gutega mikoro uwo murwanyi Kagame Paul ngo akosore iryo jambo « Tuzihorera ». Uwo mudamu yabigerageje ubugira kabiri. Undi umwereka n’umujinya mwinshi ko yabivuze abikuye ku mutima. Louiza Kayibanda asanga nta mwanya agifite muri icyo gihugu, arahunga. Umupadiri wakomokaga muri Yougoslavie wamufashije guhunga ku wa 14 ukwakira 1995, Inkotanyi zamugongesheje ikamyo ku wa 31 ukuboza 1998, Nyabugogo. Inzika y’imyaka itatu yose ! Uwa 1996 utangiye, ni bwo, ari ku Kibuye, Paul Kagame yagize ati : « Izo mbwa zagiye ziriye abantu zihungira hakurya aha. Tuzazisanga yo. » Ni bwo kandi abatekerereza bene ngofero batangiye kuvuga ko : « Impunzi zibangamiye ibidukikije n’umutekano w’abenegihugu cyabakiriye. » Minisitiri w’Intebe wariho, Bwana Kengo Wadondo aza i Kigali. Inama zo gusenya inkambi z’impuzi ziracurwa. Mbere y’uko ubutegetsi bwa Kenya bufata Generali Kabiligi Gratien wari i Nairobi, Inkotanyi zabaye ibyihebe ziyobya indege ya Cybe-Zaïre yavaga i Kinshasa ijya Bukavu, ziyigusha i Kamembe. Zashakaga guta muri yombi uwo Gratien Kabiligi. Abamushakaga ntibamenya ko yasigaye i Lubumbashi. Iyo ndege yahamaze hafi umwaka kuko izategereza intambara izaza gukuraho Perezida Mobutu. 

 Isenywa ry’inkambi z’impunzi ryabaye urwitwazo rwo gushoza intambara kuri Zaïre ; kuko Perezida Mobutu wakoze uko ashoboye kugira ngo aryanishe abasilikare n’abaturage bashinzwe gucungira umutekano yabuze abamurwanirira. Bamushozaho intambara cancer yari arwaye na yo igeze mu bihe bya nyuma, igihugu kibura abo cyiyambaza. Ku kagambane ka Kengo Wadondo, mu mpera z’ukwakira 1996, Inkotanyi zinjira muri Zaïre zitangira gusenya inkambi z’impunzi z’abanyarwanda, bamwe zibicira aho, abandi zibacyura ku ngufu. Abazicitse zibakurikirana mu mashyamba y’inzitane zibarasa umugenda n’i Mbandaka. Abagaruwe mu gihugu baruhukiraga mu buroko aho 8/10 baguye. Abasilikari 23 bakuru bacyuwe ku ngufu, bishwe ku wa 21/2/1997. APR na NRA bafatana mu nda bafata mpiri Zaïre. Bimika Laurent Désiré Kabila bamuha abategetsi bashya. Generali Kabarebe w’unyarwanda aba Umugaba mukuru w’Ingabo za Congo. Zigizwe n’abancancuro. Zaïre ijyana na nyirayo. 

Laurent Désiré Kabila, wuriye ikamyo yagendaga yigize Perezida intambara igeze iwabo i Lubumbashi. Leta zunze ubumwe za Amerika zaramuretse ngo areke gushega. Uko ni ko Laurent Kabila yabaye Perezida mu gihugu gifite ingabo z’abacanshuro ! Amaze kubona ko yabaye umupfayongo yirukanye abasilikali b’abanyarwanda. Abakuru bagiye, abasigaye yo barisuganya barema akaduruvayo na Azaliyasi Ruberwa. Abakurambere bacu bagize bati : « Akaboko kishe inkware gahora karegetse ». Mu Rwanda, impuha zakwirakwijwe amezi 5 yose mbere yo guhahurwa ku iyicwa ry’abatutsi. Intambara zose zatewe kuri Congo zihishe inyuma y’iyicwa ry’abatutsi b’Abanyamulenge. Nyamara Inkotanyi ni zo zivuganye impunzi z’Abanyamulenge zaje mu Rwanda zari i Mudende ubwo Madeleine Albright anyura i Kigali ajya i Kinshasa, kuwa 12 ukuboza 1997. Ageze i Kinshasa amenyeshwa na FPR ko FDLR yateye inkambi yarimo Abanyamulenge, ikica abarenga 140 n’intwaro gakondo abandi 100 ikabica ibatwitse. Nibwo yavuze aya magambo : « Abatutsi bo mu Rwanda ni nk’imboni z’amaso yacu. »  Madame Albright yohereza abantu 3 ako kanya bagaruka gukora iperereza ku byahabereye. Inkotanyi zalindaga iyo nkambi zisobanuye zivuga ko abo ba ex-Far baziguye gitumo, bakabambura intwaro, maze bica impunzi. Barangije baragenda basiga babakingira-nye mu cyumba. Kuva uwo munsi, Madeleine Albright yakoresheje Loni ifata ibyemezo byo guhiga no kwica ku mugaragaro abitwa « ex–Far » biyise Fdlr. Byakozwe byitwa : « Umoja wetu », « Amani leo », « Kimia mosi » na « Kimia ya 2 ». Abo bantu barishwe biratinda, bahizwe bukware nk’uko Loni yatanze uburenganzira, nta n’uwigeze abavugira. 

 U Rwanda rwahakanye rwivuye inyuma ko rutari muri RD Congo. Ku ngarukamwaka yo kwibohora, 04 nyakanga 1998, mu ijambo Anastase Gasana, wari minisitiri w’Ububanyi n’amahanga yavuze, yahakanye, acuritse icumu, ko u Rwanda rutari mu RD Congo. Afashe ijambo Paul Kagame yagize ati : « Abaturega kuba muri Kongo bamazeyo imyaka 200, niba turi yo, TURAMAZE ! ». Kuva icyo gihe na magingo aya, FPR iri muri Kongo. Kuko itigeze ivayo ku mugaragaro, nk’uko Paul Kagame yatubwiye ko ari yo atigeze atubwira ko yavuye yo. Mu ngabo zashyizeho Laurent Kabila harimo FPR, ingabo zamusimbuje Joseph Kabila ni FPR, ingabo zaremye Bosco Ntaganda n’umutwe yayoboraga CNDP ni FPR, izaremye Jules Mutebutsi ni FPR, izaremye CMC/FDP na Dominique Ndaruhutse ni FPR : muri make M23 ya Corneille Nangaa na yo yaremwe na FPR. Ibyo Paul Kagame ahakana magingo aya yarabyiyemereye ubwe bwite kuwa 04 nyakanga 1998 imbere y’amahanga amaze kuvuguruza minisitiri w’Ububanyi n’amahanga ngo : « Ntabyo nzi », ni ibyo abwira abatibuka badashobora no kumuvuguruza. FDRL ni urwitwazo kuko abo bantu barishwe, abari kuzabara inkuru. Perezida Tchikesedi yabaye Paul Kagame, abica ku mugaragaro. Ng’ayo, ng’uko, uko RD Congo yahinduwe ibihu bahingana ! Ikitarusange cy’iyo mitwe yumva ko igomba kuvuba imvura igacana izuba muri RD Congo ni FPR. Ni yo Nyirabayazana. Nk’uko uyu Corneille Nangaa ari agakingirizo ka Paul Kagame.  

Yanditswe na:

UWASE Fidéline

The post Akumiro ni amavunja ! appeared first on Umunyarwanda.

Abatavugarumwe n’ubutegetsi bw’u Rwanda baba mu bihugu byo hanze, imiryango yabo iba mu Rwanda ikunze kwibasirwa na leta y’u Rwanda ibashinja kugirana imikoranire ya hafi na bene wabo bakorera ibikorwa bya politiki hanze y’u Rwanda.

Amakuru dukesha umuryango wa NKUNZIMANA Assoumani aravuga ko yaburiwe irengero kugeza na n’ubu.

Ayo makuru akomeza avuga ko yahamagawe kwitaba kuri RIB (Rwanda Investigation Bureau) ibiro bya Kimihurura ku itariki 11/12/2024 arihanangirizwa ku mikoranire yakekwagaho ko afitanye n’abatavugarumwe na leta y’u Rwanda barimo na mwishywa we witwa RURAKAZA Herman uzwi ko ari umurwanashyaka w’ishyaka FDU-INKINGI ritavugarumwe na leta y’u Rwanda.

NKUNZIMANA Assoumani yongeye guhamagazwa ku itariki 06/01/2025 agomba kwitaba ku itariki 10/01/2025, ariko ngo ntabwo yabashije kwitaba kuri iyo tariki kuko yari yagiye gushyingura mu gihugu cy’abaturanyi cya Uganda, nyuma yo kuva gushyingura ku itariki 14/01/2025 yavuye mu rugo agiye ku kazi bisanzwe, kuva icyo gihe ntiyigeze ataha!

Abo mu muryango we bategereje ko ataha baraheba, numero ye ya telephone ntabwo yari iriho (ntabwo yari ku murongo), nyuma y’iminsi ibiri umuryango we watangiye gushakisha, bajya aho yakoreraga babaza abo bakoranaga bavuga ko nabo bamuherukaga mu minsi ibiri ishize. Umuryango we wagerageje no kubaririza ku ma Stations ya police atandukanye babwirwako batamufite.

Abo mu muryango wa NKUNZIMANA Assoumani bavuga ko ashobora kuba yarazize ko ari nyirarume wa RURAKAZA Herman ndetse akaba ari nawe wamureze nk’umubyeyi we, RURAKAZA Herman akaba yarahunze u Rwanda, ubu akaba abarizwa mu bihugu by’i Burayi aho yakomereje ibikorwa bye bya politiki mu ishyaka rya FDU-INKINGI.

Leta y’u Rwanda ikunze gukoresha uburyo bwo kwibasira imiryango y’abatavuga rumwe nayo iba mu Rwanda kugirango icecekeshe abanenga imikorere yayo baba mu mahanga.

The post Nyarugenge:Ushinjwa gukorana n’abatavugarumwe n’ubutegetsi yaburiwe irengero appeared first on Umunyarwanda.

The post Ikibyimbye kimeneke: Ibihano birarikoze! appeared first on Umunyarwanda.

Imishyikirano y’ibihugu by’iburayi izwi nka conférence de Berlin (kuva ku ya 15 Ugushingo 1884 kugera tariki ya 28 Gashyantare 1885) yari yatumijwe n’igihangange cy’icyo gihe Otto Von Bismarck (reba ifoto). Niwe wari chancellier cyangwa ministiri w’intebe w’ubudage. Muri iyo mishyikirano yamaze amezi atatu n’igice abanyaburayi bagabanye Afurika nk’abagabana umihigo, bategura gahunda yo kuyikoroniza. U Rwanda n’ u Burundi ndetse n’igihugu cyitwaga Tanganika (cyaje kuba Tanzaniya kimaze kwihuza n’ikirwa cya Zanzibar) byagizwe itako ry’umutware Bismarck arabyegukana. Ndetse yegukanye ibindi bihugu bitatu aribyo Togo, Namibiya na Cameroun.

Uburyo imipaka yakaswe icyo gihe byari bishingiye ahanini ku makuru abashakashatsi bazwi nka explorateurs bari barabashije kumenya, ubundi hakarebwa ibisiza n’imisozi, inyanja, imigezi n’inzuzi. Ibyo bumvaga byaba nk’imipaka ya karemano cyangwa frontières naturelles. Ni muri urwo rwego ikiyaga cya Kivu cyakaswemo umupaka w’u Rwanda na Kongo, Akagera kaba umupaka w’u Rwanda na Tanganika naho Akanyaru kaba umupaka w’u Rwanda n’u Burundi. Ubudage bwumvaga bunyuzwe no kugenzura igihugu kivuye ku nyanja y’abahinde kugera ku kiyaga cya kivu harimo n’ikiyaga cya Tanganika ndetse n’icya Victoria. Itako ry’umutware nyine.

Ikintu abantu batazi cyane nuko muri iyo mishyikirano ya Berlin Ubufumbira bwari bwashyizwe mu Rwanda. Ni ukuvuga igice kinini ubu kiri muBugande cyari icy’u Rwanda. Ndetse umwami Rwabugiri yagiraga urugo ahitwa i Mabungo mu Bufumbira. Abongereza bari bahawe gukoroniza ubugande barebye ibirunga bagira ikintu cy’ishyari, bumva barabishaka. Biza kuba ngombwa kwegera Abadage babasaba ko umupaka wimurwa kugirango nabo bagere ku birunga.
Aha rero habaye ubugambanyi bukomeye. Abadage babwiye abongereza bati : reka tubahe Ubufumbira ariko namwe muraturekera ikirwa cyo muri Mer du Nord cyitwa Heligoland. Abongereza baje kubyemera icyo kirwa bakirekera abadage (ubundi bahoraga bahanganye buri gihugu kivuga ko icyo kirwa ari icyacyo). Amasezerano yo guha ubwongereza akarere ka Bufumbira yabaye muw’1911.

Igihangange Kagame niba abishoboye azagaruze Ubufumbira bwahoze ari ubwacu cyangwa se bamuhe ikirwa cya Heligoland muri Mer du Nord. Nduzi rero hari impamvu zihagije zo kwihanangiriza ubudage dore ko nabwo bwadushyize ku bihano ndetse bikakaye kurusha iby’ububiligi. Wasanga kandi mu Bufumbira haba naho hariyo amabuye y’agaciro ndetse na peteroli.

Mbere yo gusoza nagirango nibutse ko icyo kibazo cy’imipaka cyafatiwe umwanzuro ukomeye ubwo ibihugu by’Afurika byashingaga umuryango w’ubumwe bw’Afurika mu w’1963. Ibyo bihugu byasanze ikibazo cy’imipaka yashyizweho n’abakoloni kiramutse cyongeye gusuzumwa buri gihugu kigashaka gusubirana imipaka cyaba cyarambuwe intambara zaba urudaca amaherezo Afurika ikaba umuyonga. Hafashwe rero icyemezo cy’,uko imipaka abakoloni basize ariyo izakomeza kubahirizwa. Biri mu nyandiko ifite uburemere cyane bise charte de l’OUA. Iyo nyandiko ifatwa nk’itegeko mpuzamahanga. Ngayo nguko.

The post UBUDAGE NABWO BUKWIYE KWIHANANGIRIZWA! appeared first on Umunyarwanda.

Bavandimwe, amahoro n’imigisha bituruka ku Imana bihorane namwe iteka ryose. Bavandimwe, burya Zahabu ica mu muriro, nagenze urugendo rurerure mboneramo byinshi, ariko igikomeye ni uko niboneye imbaraga z’Imana.

Nk’uko mwabikurikiye, nyuma y’uko Ishyaka riri ku butegetsi FPR-INKOTANYI ritinye umukandida wa P.S (Parti Social) IMBERAKURI, Me NTAGANDA Bernard mu matora yari ateganyijwe mu 2010, bakamufunga hamwe n’abandi bayoboke banze kuyoboka Mukabunani Christine, naje gukiza amagara mpungira mu gihugu cya Uganda, ubuzima bwanze nkomereza mu gihugu cya Congo, aho nashoboraga kubona ubutaka bwo guhinga.

Nagezeyo mu 2011, mu mpunzi z’Abanyarwanda, twibaruza muri UNHCR, na CNR( Commission Nationale pour les Refugiés). Mu mwaka wa 2019, FARDC ( Force Armée de la République Démocratique du Congo) yaratwirukankanye, iradufata, itwambura ibyangombwa by’ubuhunzi n’ibindi, iducyura mu Rwanda turenga impunzi 2.200 tugera Mukamira kuwa 16/12/2019, bankuyemo bajya kumfunga bandega ibyaha bitandatu ntigeze nkora birimo:

1. Kurema cyangwa kuba mu mutwe w’ingabo utemewe;
2. Iterabwoba ku nyungu za politiki;
3. Kuba mu mutwe w’iterabwoba;
4. Kugambana
5. Gukwirakwiza ibihuha no gutangaza amakuru atari yo bigamije kwangisha Leta y’u Rwanda mu bihugu by’amahanga
6. Gukora no kugira uruhare mu bikorwa by’iterabwoba.

Bandegeye HC/ICC urukiko ruburanisha ibyaha ndengamipaka, bankatira imyaka itanu, ndayijuririra baranga, barayishimangira. Urebye banzizaga ko ndi mu Ishyaka rya Opposition, ritavuga tumwe n’ubutegetsi ni yo mpamvu nakuwe mu zindi mpunzi nkafungwa, nyamara Kandi P.S Imberakuri ni Ishyaka ryemewe n’amategeko y’u Rwanda, ribaruye muri J.O no 45 yo ku itariki 22/07/2009.

Politiki ya P.S Imberakuri ni guteza imbere imibereho myiza y’Abanyarwanda bose, ntawe usigaye inyuma rifite intego: URUKUNDO, UBUTABERA, UMURIMO. Ntihazagire ubayobya, Tujye tugira ukuri, tuvugishe ukuri kuko guca muziko ntugushya, PEREZIDA W’ISHYAKA P.S IMBERAKURI NI ME NTAGANDA BERNARD.

Bavandimwe, gufungwa biraryana. Na n’ubu nakuyemo ubumuga. Gusa icya ngombwa ni ugukomera no kwihangana.

Ku ruhande rwanjye, umuti w’ibibazo ntabwo ari ukubihunga ni uguhangana nabyo. Ntabwo nareka urugendo rwo guharanira ukuri, ubumwe N’ubwiyunge nyakuri, ubutabera, amahoro, ubwisanzure na Demokarasi.

Bavandimwe, gushaka ni ko gushobora kandi ahari ubushake, Ishyaka n’ubutwari byose birashoboka. Birakwiye ko twese tugira uburenganzira bungana mu gihugu cyacu, ibyo ni ukuri kandi ni ihame.

Murakoze, IMANA ibahe umugisha.

Mutarambirwa Théobald.
Tel: +250 73 530 90 82
E-mail: theobardmuta dorambirwa@gmail.com

The post INZIRA NDENDE IGANISHA KU: AMAHORO, UBWISANZURE NA DEMOKARASI appeared first on Umunyarwanda.

The post IKIBYIMBYE KIMENEKE: Qatar-Kagame yibagiwe urushinge rwo gutobora Tshisekedi/Akomeje kurindagizwa.. appeared first on Umunyarwanda.

Nyuma y’ijambo rikomeye Perezida Paul Kagame yagejeje ku Banyarwanda tariki ya 16 Werurwe 2025 abateguza kwizirika umukanda kubera ingaruka z’ibihano bikakaye igihugu cyacu kirimo guhabwa n’umuryango mpuzamahanga, Ikigo kitiriwe Nyakwigendera Seth Sendashonga (Institut Seth Sendashonga pour la citoyenneté Démocratique, Iscid asbl) kirageza ku Banyarwanda no ku nshuti z’u Rwanda ubutumwa bukurikira:

1. Birababaje kandi biteye agahinda kubona Perezida Paul Kagame yarabeshye abanyarwanda ko impamvu nyamukuru y’ibihano u Rwanda rurimo gufatirwa nta yindi uretse kuba ibihugu ngo byitwaga ko ari inshuti biba bigamije kuruheza mu bukene, ngo rugakomeza kubaho rudapfuye kandi rudakize. Perezida Kagame yunzemo avuga ko bikojeje isoni kubona isi yose iteranira ku gahugu gato nk’u Rwanda kandi ibyo karimo gukora ari ukwirwanaho. Intambara amahanga yose arimo kwamagana  ngo ni amahitamo y’abanyarwanda mu rwego rwo gushaka inzira yo guteza imbere ubukungu bw’igihugu cyabo. Iyo akaba ndetse ariyo impamvu Perezida Kagame mu ijambo rye yarakoresheje imvugo yo kogeza intambara: 

 ngo ni urugamba nyarwo, ngo ni “urugamba rw’umuriro”, ngo ni “urugamba nyine”. 

2. Institut Seth Sendashonga iributsa ko intambara yo mu burasirazuba bwa Kongo yatangiye mu mwaka w’1996, ikaba yaratangijwe mu izina ry’umutwe witwaga AFDL, uwo mutwe ugasimburwa n’undi mutwe yiswe RCD, nayo igasimburwa na CNDP, nayo igasimburwa na M23 yatsinzwe mu mwaka wa 2013 ikagaruka muri 2021, ikaba imaze hafi  imyaka itatu n’igice iyogoza uburasirazuba bwa Kongo.  Mu myaka itatu ishize, kuva M23 yongera kubura umutwe,  nta munsi w’ubusa urangira batavuze umubare w’abantu benshi bayiguyemo, haba mu barwanyi  ku mpande zombi, haba no mu baturage b’inzirakarengane. Nk’uko byagiye bivugwa kenshi mu kanama k’umuryango w’abibumbye gashinzwe amahoro ku isi imirwano yo mu burasirazuba bwa Kongo yakuye mu byabo abaturage basaga miliyoni zirindwi, ikaba ikorerwamo ibyaha bikomeye by’intambara harimo gufata abakobwa n’abagore ku ngufu. Muri iyo myaka itatu yose ubuzima busanzwe bwarahagaze mu turere twose tw’imirwano, amashuri arafunze abana ntibiga, abantu babuze epfo na ruguru. Hejuru y’ibibazo nk’ibyo ni gute Perezida Kagame atinyuka kubwira abanyarwanda iriya mvugo yo kogeza intambara ndetse akemeza ko ari amahitamo yabo mu rwego rwo gushaka ubukungu bw’igihugu cyabo?
3. Institut Seth Sendashonga irashimira ibihugu by’inshuti byafashiije u Rwanda mu kwiyubaka nyuma y’amakuba rwagize mu mwaka w’1994. Iramagana byimazeyo imvugo ya Perezida Kagame ivuga ko imfashanyo igihugu cyacu cyahawe zari izo gutuma gihora mu bukene aribyo yise kudapfa ariko ntukire. Irashimira ibihugu byanze gukomeza kurebera no gushyigikira politiki ya gashozantambara irimo guhitana abavandimwe bacu bo muri Repuburika iharanira Demokarasi ya Kongo. Ibihano n’ubwo bizagira ingaruka ku baturage basanzwe badafite ijambo mu gihugu ndetse ab’intege nke bakaba bazabigwamo,  nta yindi nzira ihari yatuma kariya gatsiko karimo kuyogoza akarere kavanwa ku izima kakemera kuvana ingabo z’u Rwanda muri Kongo no guhagarika inkunga gaha inyeshyamba za M23 nk’uko biteganywa n’icyemezo 2773 cy’akanama k’umuryango w’abibumbye gashinzwe amahoro ku isi.
4. Abaturage b’u Rwanda bazi neza ububi bw’intambara kuko ibibera mu burasirazuba bwa Kongo nabo babiciyemo. Ntabwo bakwiye guhindurwa inkundarubyino zo gukomera amashyi umunyagitugu wiyemeje kumena amaraso y’abaturanyi mu ntambara isi yose irimo kwamagana. Perezida Kagame n’abambari be bakoresheje iturufu y’irondakoko mu baturage ba Kongo bagamije kubaryanisha no gushaka impamvu yo kubashoramo intambara. Abanyarwanda bazi neza aho iyo turufu y’irondabwoko nabo yabagejeje. Ntabwo bakwiye kwemera gusubizwa mu mabi baciyemo kandi bazi ingaruka byabagizeho. Ubutegetsi iyo bugeze mu marembera ntibubura gufata abaturage ho ingwate abanda bukabisasira. Biteye agahinda kuba mu bihe bikomeye ubwo Perezida Kagame yavugaga ko inzara ikomeye igiye guca ibintu kubera ibihano bituruka ku makosa ubutegetsi bw’u Rwanda bwakoze abaturage bari muri stade Arena I Kigali iryo jambo bakaryakirana amashyi menshi n’impundu. Mbese abo baturage bazi neza icyo ibyo bisobanuye? Banyarwanda muramenye ntimuzagwe mu mutego w’ababacuze bufuni na buhoro.
5. Ibibazo igihugu cyacu gifite (nko kugira ubutaka buke ugereranije n’umubare w’abaturage, kutagira umutungo kamere uhagije, kutegera inyanja,…) bifite uburyo byashakirwa ibisubizo mu nzira y’amahoro, ibisubizo birimo no kubana nezan’ibihugu bikikije u Rwanda. Niyo nshingano y’abanyapolitiki. Birakwiye ko amarembo ya politiki afungurwa mu gihugu cyacu kugirango abana bacyo bahabwe ubushobozi bwo gushaka ibisubizo by’ibibazo bicyugarije aho kugirwa akarima k’umuntu umwe cyangwa agatsiko gashyize imbere inyungu zako gusa. Kuba FPR imaze imyaka irenga 35 ishakira ibisubizo byose mu nzira imwe yo kumena amaraso ni ikimenyetso cy’uko nta bundi bushobozi ifite. Abandi Banyarwanda bakwiye guhabwa amahirwe yo kwishakamon ibisubizo bikwiye.

Bikorewe i Bruxelles, le 21/03/2025

Jean Claude Kabagema

Président wa Iscid asbl

The post Perezida Kagame yemeje ko intambara arwana muri Kongo igamije gukura u Rwanda mu bukene! appeared first on Umunyarwanda.

Kuva uyu mwaka wa 2025 utangiye, intambara zibera mu burasirazuba bwa Congo zongeye ubukana, abarwanyi ba M23 bashyigikiwe n’u Rwanda nk’uko bivugwa na raporo z’umuryango w’abibumbye, bafashe ibice binini bya Congo birimo n’imijyi minini nka Goma na Bukavu. Ingaruka z’izo ntambara ntabwo zagarukiye muri Congo ahubwo zageze no mu Rwanda, aho icyo gihugu kimaze gufatirwa ibihano n’ibihugu byinshi nka Leta Zunze Ubumwe z’Amerika, Canada, Ubudage, Ubwongereza, Ububiligi ndetse n’Umuryango w’ibihugu by’u Burayi (Union Européenne). Uretse ibihano, nta munyarwanda n’umwe utazi undi munyarwanda mugenzi we wapfushije umwana, umubyeyi cyangwa umuvandimwe muri izi ntambara zo muri Congo.

Ubukene bukomeye bukomeje kwiyongera.

Abaturage b’u Rwanda basanzwe bifitiye ibibazo bitandukanye bibakomereye, iki sicyo gihe cyo kubasonga Leta y’u Rwanda yishora mu gufata ibyemezo bishyira abo baturage mu kaga, kubera inyungu z’agatsiko gato k’abantu bamwe bo mu ishyaka FPR-Inkotanyi riri ku butegetsi. Izi nyungu kandi ntizigera no kuri abo banyagupfa b’abaturage ahubwo bagerwaho n’ingaruka gusa.

Mu Rwanda hasanzwe ibibazo by’ubukene bukabije butera ubuzima bubi ku gice kinini cy’abanyarwanda, kegeza aho nyinshi mu ngo z’abanyarwanda zazonzwe n’ibibazo bituma abana bahura n’imirire mibi no kugwingira naho abantu bakuru barya kabiri ku munsi ni mbarwa. Indwara nka baki, amavunja n’izindi zikomeje kwiyongera mu baturage. Iterambere rigaragarira i Kigali muri za propaganda z’imihanda isukuye gusa nyamara benshi mu bagenda muri ibyo bishashagirana baba bashenjagira bashira.

Ubu bukene bumaze kuba karande bwibasira ibyiciro byinshi by’abanyarwanda ndetse ntibusiga urubyiruko narwo rwugarijwe bikomeye kubera ibibazo by’ubushomeri. Biragoye kubona akazi nta muntu ukomeye ukujyanye kubera ikimenyane, cyangwa udatanze ruswa yaba iy’amafaranga cyangwa iy’igitsina.

Leta y’u Rwanda ishyira ingufu nyinshi mu kwigaragaza neza mu rwego mpuzamahanga aho itemera ko ifite abakene ndetse haba inama zikomeye cyangwa hari abashyitsi basuye u Rwanda, bamwe mu baturage bagafungwa kugira ngo hatagira ubabona, hari igihe ibi bijyana n’imvugo zibabaje zikoreshwa na bamwe mu bayobozi zo kwita abo batishoboye umwanda utuma umujyi udasa neza cyangwa izindi mvugo zisesereza zikanatesha agaciro ikiremwamuntu.

Ibi bijyana no gusuhuka abantu bagana mu bihugu bituranye n’u Rwanda nka Uganda aho bamwe bajya gushaka amikoro ariko nabyo bigakorwa bucece dore ko mu bihe bishize hari benshi bagiye baraswa n’abashinjwe umutekano b’u Rwanda babahora ngo kwambuka imipaka mu buryo butemewe.

Gukoresha ingufu z’umurengera ni ibintu byeze mu Rwanda ku buryo nta gihe gishira ibinyamakuru bidatangaje umuntu warashwe n’inzego z’umutekano ngo agiye gutoroka cyangwa agiye kurwanya izo nzego yambaye amapingu! Wagira ngo igihano cy’urupfu kiremewe mu Rwanda. Abenshi mu baraswa ni abakene baba bashinjwa ubujura.

Intambara zidafitiye abanyarwanda akamaro

Leta y’u Rwanda yishoye mu ntambara muri Congo, iyo ntambara uretse guhitana ubuzima bw’abanyekongo, n’abanyarwanda barahatikirira uretse ko Leta y’Rwanda ikomeje guhakana ko nta ngabo ifite ku butaka bwa Congo ariko ibi binyuranya n’ibigaragarira buri wese aho ibiriyo n’ubutumwa bw’akababaro bihoraho ubudatuza ariko nyine bigakorwa bucece ngo badakoma rutenderi.

U Rwanda rujya kohereza ingabo muri Congo nta muturage wagishijwe inama biciye mu babahagarariye, abantu bisanze igihugu gifatirwa ibihano ku bintu badafitemo uruhare batanasobanuriwe inyungu bafitemo.

Ubu urubyiruko rw’u Rwanda rurimo kuhasiga ubuzima kubera inyungu z’agatsiko gato k’abagashize bo mu ishyaka FPR. N’ibivugwa bisahurwa uretse kubyumva nta muturage rwimbi ugerwaho byibura n’ubuvungukira bw’ibyo za raporo zihora zivuga bisahurwa muri Congo ngo bikaba ari nawo muzi w’izi ntambara zihora ihitana imbaga.

Bamwe mu banyarwanda bake cyane bagerwaho n’inyungu z’izi ntambara nibo bahora biyasira ku mbuga nkoranyambaga no mu binyamakuru bishyigikiye Leta y’u Rwanda, aho birirwa mu mvugo za gashoza ntambara bogeza urugamba byacitse, mbese ubona baribwaribwa bibaza impamvu abayobozi babo badatangaza ku mugaragaro ngo banatere ibyivugo ko ari bo barimo kuyogoza Congo! Benshi rwose ntibahisha kwemeza ko iyi ntambara igamije kwisubiza uduce twari utw’u Rwanda abakoroni bahaye ibihugu by’abaturanyi birimo na Congo.

Gutema akaboko kakugaburira

Abaturage biganjemo urubyiruko ubu barashorwa mu bikorwa byo kwibasira ibihugu by’amahanga byafashe ibihano, bandagaza abayobozi babyo. Ubu byabaye nk’umuderi gutuka no gutera ubwoba umuntu wese utavuze rumwe n’ibivugwa na Leta y’u Rwanda, yaba umunyarwanda cyangwa umunyamahanga.

Ikimenyimenyi «umwera uturutse ibukuru bucya wakwiriye hose.» Ibi byo kwibasira ibihugu by’amahanga cyane cyane k’u Bubiligi byatangiwe na Perezida Paul Kagame ubwe aho yise icyo gihugu (Nyamara U Bubiligi buha u Rwanda inkunga itubutse) agahugu gato kagabanyije ubunini bw’u Rwanda gashaka ko rungana nka ko!

Mu kwibasira u Bubiligi, ubu hadutse intero yemeza akaga kose u Rwanda rwaciyemo ndetse n’ibirimo kuba ubu U Bubiligi ari bwo nyirabayazana, Leta y’u Rwanda aho kwisobanura ku byo iregwa byo muri Congo ahubwo ugasanga irajijisha ijyana ibibazo aho bitari yinjira mu mateka ngo irebe ko yashyira igitutu ku Bubiligi habe habaho koroshya ibihano.

U Bubiligi buhora bushinjwa ngo kwihanganira abakomoka mu Rwanda batuye ku butaka bwabwo batinyuka kuvuga ibitagenda mu Rwanda ndetse banasaba ko habaho ubutabera ku banyarwanda bose bahitanywe n’ibihe bibi u Rwanda rwanyuzemo mu myaka ishize. Ubu U Bubiligi burasabwa kubibasira nk’uko bikorwa i Kigali kuri ba Aimable Karasira, Victoire Ingabire n’abandi benshi!

Uku kwihenura ku bihugu by’amahanga ndetse n’imiryango mpuzamahanga nka Union Européenne, abategetsi b’u Rwanda birengagiza ukuntu inkunga, inguzanyo n’imfashanyo bahabwa bifasha abanyarwanda benshi b’abakene cyane cyane mu cyaro, ndetse harimo n’iminshinga myinshi iha abanyarwanda akazi. Ese kuba ba nyamwigendaho babona bizageza iki ku banyarwanda ko ubuzima ari magirirane?

Umwanzuro

Abaturage b’abanyarwanda ni abanyamahoro kandi bakunda umurimo. Rero abayobozi b’u Rwanda nibave mu ntambara za hato na hato bareke gushotora ibindi bihugu ahubwo bimakaze politiki y’umubano mwiza n’abaturanyi, habeho ubuhahirane n’ubufatanye hagati y’ibihugu bityo kwishishanya hagati n’abaturanyi bicike burundu.

Hakenewe kandi impinduka mu miyoborere abaturage bakagira abayobozi bishimiye ndetse bababajwe n’ibibazo byabo bya buri munsi ndetse bishyiriweho n’abo baturage. Ibi byagabanya ruswa, ikimenyane n’ibindi bikorwa byibasira abaturage.

Abayobozi b’u Rwanda kandi bagombye kumenya ko nta muntu wigira wenyine, bakimakaza ubwubahane n’ubufatanye n’ibihugu by’akarere n’amahanga ya kure  ndetse n’imiryango mpuzamahanga kugira ngo ubwo bufatanye bushobore gutuma ibibazo byinshi byugarije abaturage b’abanyarwanda bibonerwa umuti urambye.

The post Leta y’u Rwanda irimo irashyira abaturage bayo mu kaga! appeared first on Umunyarwanda.

Amakuru agera kuri The Rwandan kuri uyu wa kane tariki ya 3 Mata 2025 aravuga ko Alain Mukuralinda wari umuvugizi eungirije wa Leta y’u Rwanda yitabye Imana azize indwara itunguranye.

Umwe mu bantu bari hafi y’umuryango wa nyakwigendera yabwiye The Rwandan ko koko Alain Mukuralinda yapfuye ngo azize umutima (crise cardiaque). Yagize ati: “Alain yapfuye ubu n’iwabo ku babyeyi be i Bruxelles mu Bubiligi hari ikiriyo. Nkibyumva nabanje kugira ngo ni Se, Pascal Mukuralinda wapfuye kuko nawe amaze iminsi arembye, ariko naje kumenya ko ari Alain. Ngo yamerewe nabi ejo umugore we ahita afata indege ariko yageze i Kigali byarangiye!”

Alain Mukuralinda azibukirwa kuri byinshi uretse kuba apfuye yari umuvugizi wungirije wa Leta y’u Rwanda, yanabaye umuvugizi w’ubushinjacyaha bw’u Rwanda, aba n’umushinjacyaha aho yigaragaje mu rubanza rwa politiki rwibasiraga umunyepolitiki Victoire Ingabire.

Alain Mukuralinda yari n’umuhanzi wacuranze indirimbo nyinshi akanagira n’ubuhanga bwo kwigana iz’abandi. Yanagaragaye ibikorwa byo gufasha abahanzi bakizamuka mu bihe byashize nka Clarisse Karasira na François Nsengiyumva “igisupusupu”.

The post Alain Mukuralinda wari wungirije umuvugizi wa Leta y’u Rwanda yitabye Imana appeared first on Umunyarwanda.