Kuwa 28 ukuboza 2012 perezida wa commission y’amatora mu Rwanda Professeur Mbanda Kalisa mu ijambo yavuze ryasohotse ku rubuga www.igihe.com yabwiye abanyarwanda n’amahanga ko kuba inkunga yagenerwaga u Rwanda n’amahanga yaragabanutse, bitazabuza amatora y’abadepite ateganijwe muri 2013 kuba. Professeur Mbanda Kalisa aranatangaza kandi ko icyo gikorwa kizatwara miliyari 8 z’amafaranga y’u Rwanda.

FPR ishyiraho (nomination) Abadepite ikabeshya amahanga n’abanyarwanda ko habayeho  amatora !

Nta matora y’abadepite FPR yari yigera ikora mu Rwanda kuko abadepite bose bo mu Rwanda ni SYSTEME ya FPR ibashyiraho. Muti bishoboka gute? Nk’uko mu nyandiko yanjye y’ubushize naberetse uburyo mu Rwanda habaubutegetsi bubangikanye, abasilikari akaba aribo bafite ijambo gusa, mu gihe cy’amatora ho rero FPR n’Abasilikari bayo batsya batanzitse.

FPR ituruka muri Nyumbakumi iyo ariyo yose ikamenya abantu barimo bashobora cyangwa bifuza kuba abadepite. Iyo utarahiye muri FPR ho ntushobora guhirahira ngo uziyamamaza, KIRAZIRA ! Iki gikorwa cyo kumonitoringa (kubarura) aba bantu muri nyumbakumi gikorwa n’abasirikari. Ubwo bakagenda baharerekanya urutonde kugeze ku rwego rw’Intara.

Kubera bwa buriganya bwa SYSTEME ya FPR yo kwikubira byose ikabeshya amahanga ko ikurikiza amategeko, iyo bamaze kubona abantu bifuza bahwanye n’umubare ukenewe w’abadepite, nibwo bariya bagize komisiyo y’amatora binyara mu isunzu bakazana itegeko nshinga bakaryereka ba basilikari, bakicara bakareba umubare buri shyaka ryemewe mu gihugu rigomba guhabwa hakurikijwe abayoboke riba ryemerewe (soma ingingo ya 56 y’itegeko nshinga rya Repulika nkuko ryavuguruwe kuwa 4 Kamena 2003), ubwo niho bafata abantu runaka na runaka bakababwirako bazamamazwa ku budepite banyuze mu ishyaka iri niri.

Ingero ni uko batangira bavuga bati wowe Sebyatsi uzatanga kandidatire unyuze mu ishyaka (candidature via) PSD, wowe Sebijumba uzatanga kandidatire unyuze mu ishyaka PL, wowe …. unyuze PDC, wowe Gaciro uzanyura muri FPR, n’ibindi. Iyo uwo mupangu urangiye neza bamaze no kuwunononsora nibwo uwitwa Perezida wa Komisiyo y’igihugu y’amatora (nyamara ahubwo yagombye kwitwa umuvugizi w’urwego rwa FPR ushinzwe amatora), ajya ahagaragara agatangaza ijambo nk’iri kugira ngo abatazi FPR bagire ngo igira démocratie. NTAYO ndabarahiye !

Dore uko uyu mugambi mubisha abasirikare bawushyira mu bikorwa binyuze kandi bikitirirwa Komisiyo y’amatora

·Batangaza ko uwumva ashaka kwiyamamaza kuba depite atanga umwirondoro we (cv) ku biro bya comissiyo ku rwego rw’ubuyobozi uru n’uru (akarere, intara se, ..).

·Ubwo abasirikari bagatangira icicikana nk’iry’intozi, maze mu kujonjora imyirondoro (cv) yemewe bakagenzura neza ko hatambutse amazina y’abantu babo gusa. Iyo hagize undi muntu w’inkwakuzi wabatunguye agatanga kandidatire bakabona kuyikuramo bizazana rwasererera, umunsi w’ijonjora urasubikwa, bakabanza bakamwotsa igitutu, bakamutegeka uko agomba gukuramo kandidatire ye ku bushake, bamwizeza indi myanya ikomeye. Aha rero iyo uwo muntu ari uwo mu ishyaka badashaka noneho, batangira kumuteza abaturage bagatangira kumushakira abantu bo kuzamushinja muri gacaca ko yagize uruhare muri jenoside, ko ashyigikira FDLR, n’ibindi  byaha by’ubugome  FPR yisanganiwe muri systeme yayo.

Bene uyu muntu ubwoba butuma akuramo ake karenge, iyo yihagazeho bamuta muri gereza kugera amatora arangiye, noneho  komisiyo igaterana ikajonjora, ikemeza lisiti yateguwe mbere na kare ko bazaba abadepite.

·Nyuma yijonjora, nako nyuma yo kwemerera gusa amazina y’abakandida abasilikari batunze agatoki, aba basirikari bitwaje abayobozi ba gisivili batangira kuzenguruka mu giturage ngo barakoresha inama da !

·Ku munsi w’amatora abasirikari baba buzuye hose ku biro by’ubuyobozi no mu biro by’amatora,  no munzira (ubanza ariyo mpamvu FPR ifite umubare w’abasirikare benshi cyane ugereranije n’ibindi bihugu!). Mu mayira no mu mihanda hose mu gihugu abasirikare baba bajagata cyane (abambaye uniform n’abambaye gisivili), bakaba baba bashinzwe kumenya aho imodoka z’indorerezi ziza ziturutse, maze bagahita batanga ubutumwa ku biro by’amatora bigiye gusurwa n’izo ndorererezi. Icyo gihe iyo zihageze ntacyo zibona kuko bahita bahagarika amanyanga, uwateguwe uza kuganiriza indorerezi akajya kuzisanganira, bamara kuhava, amanyanga y’amatora agakomeza.

Dore amwe mu manyanga kamere SYSTEME FPR ikoresha mu matora:

·Gukurura igikumwe cy’utora kigashyirwa kuwo FPR ishaka

·Abasirikare bahagarara mu madirishya y’ibiro by’itora

·Abasirikare binjira mu kazu k’ubwiherero bw’itora bakareba utora

·Gushyira abatora (abaturage) ho iterabwoba ngo azatore neza (gutora neza ni ugutora uwo FPR ishaka GUSA).

·Guha abakorerabushake bo mu matora amabwiriza y’iterabwoba ko uwo FPR ishaka nadatorwa aha n’aha, abazahatoresha bazagira ingaruka mbi (aha Prof Mbanda Kalisa yavuzeko bamaze gutegura abakangurambaga bagera ku bihumbi 65!).

·Gushyira abakangurambaga ba FPR mu byumba by’amatora bakabeshya ko ari  abahagarariye andi mashyaka (ngo za PSD, PL etc.)

·Guhindura urupapuro rw’itora kuwatoye uwo badashaka mu gihe haba hari umuturage wabananiye kuva ku izima cyangwa hari uwatoye mu gihe indorerezi z’amahanga zagize agahenge bakazemerera kureba ibiri gukorwa..

Gutangaza ko bari kwitegura amatora rero aba ari urwiyerurutso kuko SYSTEME bayakoramo bashobora no kurara batangaje icyegeranyo (resultat) kuko baba baziko byakozwe na FPR yonyine. Ibi bikaba bigaragaza ko igihugu cyacu kiboshywe na FPR n’igisirikare cyayo mu buryo bukomeye. Iyo Urebye iriya mikorere rero ya komisiyo y’amatora, ukareba uburyo ikorera gusa ishyaka 1 ariryo FPR kandi mu gihugu hari amashyaka 5 yemewe n’andi bataremera, ukareba itegeko nshinga aho rivuga ko n’umuntu ku giti cye nawe ashobora kwiyamamaza nyamara komisiyo ntibe yabikozwa, bituma umuntu yibaza niba koko iriya ari KOMISIYO Y’IGIHUGU ISHINZWE AMATORA CYANGWA NIBA ARI URWEGO RWA FPR RUSHINZWE KWIBA AMATORA!

Mu gihe cy’amatora itegeko Nshinga rihura n’akaga gakomeye riterwa na Systeme FPR !

Ubusanzwe itegeko nshinga iyo abaturage bamaze kuritora rigomba kurindwa bihagije, hanyuma imigendekere y’igihugu ikarishingiraho. Kirazira kurihindagura uko wishakiye kuko icyo gihe ntabwo riba rikikuyoboye ahubwo wowe uba uriyoboye. Imigambi ihishe (Agenda caché) ya FPR rero ni uko iyo amatora yegereje, abagize agatsiko bagasanga nibakurikiza itegeko nshinga bizababuza gusahura, bahitamo kubanza kurihindura. Ibi rero byerekana ukwivuguruza kwa FPR n’abambari bayo. Ngira ngo muribuka ubwo FPR yahinduraga itegeko nshinga, mbere y’uko ritorwa, Tito Rutaremera yabwiye Abanyarwanda n’inteko ishinga amategeko  ko itegeko nshinga barihinduye ku buryo bwa gihanga bakaba bizeyeko rizamara imyaka 100 ridasubiwemo. None dore bagiye kongera kurihindura ku nshuro ya 4 hatarashira n’imyaka 10nk’uko  amakuru ya www.VOA.com  yabisohoye. Nta yindi mpamvu rero ni uko bashaka gutekinika amatora y’abadepite.

Twibuke itegeko nshinga ryari ryatowe n’abaturage muri Gicurasi 2003 rigatangira gukurikizwa ku ya 4/6/2003, ubu rigiye guhindurwa ku nshuro ya 4.

Reba iyi mbonerahamwe:

Kuba rero Prof Mbanda Kalisa yaratuye ko bagiye gutora abadepetite, bikaba bihuriranye n’itegeko rya Perezida wa Repubulika ryo Kongera guhindura itegeko nshinga (Ivugurura Rishya ry’itegeko Nshinga ry’u Rwanda), ni amayeri ya FPR yo kubeshya amahanga ko bafite démocratie ariko mu byukuri ntayo. Ni igitugu gikora mu Rwanda kandi icyo gitugu kirenze ukwemera kuko kigaragarira mu mikorere y’igisirikali cyamaze kwikubira ubutegetsi bwose, igisilikalri cyamaze kwereka umuturage ko umuyobozi wa gisiviri ntacyo avuze na gito. Ewe na Ministiri ubwe usanga ntacyo avuze imbere ya Kadogo.

Imvugo ngo: “inkunga yagaharitswe ntizabuza amatora y’abadepite kuba” ihishe byinshi.

Muribuka uburyo ikigega AGACIRO FOUND cyashyizwemo amafranga: ng’abo abantu ku giti cyabo, ng’ibyo ibigo bya leta, ng’izo za ministeri, ng’ayo amasosiyete, bahise baterura amafaranga bamena muri icyo kigega buri wese uko yifite. Muri bene buriya buryo hazamo na none abashyushyarugamba batumwe na FPR kugirango batere abantu ubwoba mu gutanga batitangiriye itama.

Mu gihe cy’amatora rero ho ntabwo bikorwa ku bushake cyangwa se ngo haboneke abashyushyarugamba gusa ahubwo FPR yicarira ba Nyakugorwa (abaturage) maze igategeka ko Mwarimu azatanga umushara wose, Diregiteri ku ntara atange umushahara w’amezi 2, Akarere gatange umubare uyu n’uyu, n’ibindi. Iriya mvugo rero y’umuyobozi wa komisiyo y’amatora ishobora kwerekana ko bamaze kugena ayo bazakata abakozi cyane cyane bahereye kuri Mwarimu! Ikibabaje kandi ni uko ayo baba bayakase ba Nyakugorwa atari ko agera ku bakoreshejwe mu matora (abashinzwe kuyiba): amenshiarasahurwa nk’uko bimenyerewe ko nta faranga FPR n’agatsiko kayiyoboye basiga inyuma; n’ubundi ba bakangurambaga bagahabwa urusenda kandi narwo ntibarubonere igihe.

UMWANZURO

·Niba mu Rwanda kuva kuri Perezida wa Repubulika, ukanyura ku Badepite, ukagera ku rwego rwo hasi, FPR ikoresha uburyo bwo kwiba amatora, kandi ikabutegurana ubuhanga (ubucakura) bumeze kuriya nkuko tumaze kubibona hejuru, biragaragara ko FPR izi neza ko abanyarwanda muri rusange batayibonamo. Ntabwo rero FPR ikwiye gukomeza kuyobora igihugu niba ikunda abanyarwanda cyangwa se niba nayo ubwayo yikunda kuko amaherezo ibyo ikora bizayigaruka.

·Niba abiyamamaza ku giti cyabo badashobora kubyemererwa atari uko babuze ubushobozi ahubwo ari uko FPR izi neza ko ibaretse abaturage bagahitamo mubwisanzure , abo biyamamaje ku giti cyabo aribo batsinda amatora, imyaka ikaba irenze 18 FPR iyobora igihugu ariko umuturage agakomeza kumererwa nabi, akabuzwa gutora uwo ashaka, biragaragarako FPR na SYSTEME YAYO YOSE ntacyo bimariye abanyarwanda, ko ahubwo FPR igizwe n’agatsiko kagamije gusahura igihugu no kwica abanyarwanda.

·Kuba icyitwa komisiyo y’igihugu gikorera ishyaka rimwe gusa kandi naryo mu buryo bw’ubumamyi, biragaragarako uRwanda rwa FPR rwazahaye kuko rutigeze rugira komisiyo y’amatora buri shyaka ryibonamo cyangwa ngo abantu ku giti cyabo bayibonemo.

·Iriya komisiyo y’amatora yarikwiye guhindura izina cyangwa ikavaho burundu kuko itigeze narimwe ihagararira amatora mu nyungu z’amashyaka yose ya politiki nk’uko itegeko nshinga ribiteganya.

Banyarwanda, Banyarwandakazi, mwese abari mu gihugu nabari hanze muri mu nkubiri yo kugeza démocratie nyayo mu Rwanda, démocratie idashingiye ku gitugu cya leta ya gisilikari, ngibyo ibibazo muzahura nabyo.

Ibi bigaterwa n’uko nta buyobozi bwa gisivili bukora, hakora ubuyobozi bwa gisilikali bwitwaje imbunda; umuyobozi wa gisivili wese aba ari gutinya imbunda, kudoderwa idosiye, gutinya ubucabiranya bwose bushobora gukorwa kugira ngo bamuteshe umutwe, agahitamo kuvuga “YEGO” no “GUSINYA” ibyo atumva, atemera, atazi, atanabonye. Ng’iyo politiki mwumva ya “humiliza ngutorere umudepite”.

 Vincent UWINEZA

Commissaire wa RDI Rwanda Rwiza

Ushinzwe ibihugu by’Afurika y’Amajyepfo.

Amakuru atugeraho aravuga ko Bosco Ntaganda yahisemo kwishyira mu maboko y’urukiko mpuzamahanga mpanabyaha ngo akize amagara ye!

Mu ntangiriro Leta y’u Rwanda mu ijwi rya Ministre w’ububanyi n’amahanga, Madame Louise Mushikiwabo yari yahakanye ko Bosco Ntaganda atari ku butaka bw’u Rwanda ariko nyuma yaje kwisubiraho yemeza akoresheje tweeter ko Ntaganda ari muri Ambasade y’abanyamerika i Kigali. Hari amakuru avuga ko igera muri Ambasade y’abanyamerika i Kigali ryatunguye benshi barimo Madame Mushikiwabo ndetse n’abo bakorana ku buryo Madame Mushikiwabo yarakajwe cyane n’uburyo yinyuraguyemo ahakana bikanatuma n’undi mu mukozi wa Leta y’u Rwanda, Bwana Olivier Nduhungirehe yipasa muremure akubahuka Bwana Lambert Mende, umuvugizi wa Leta ya Congo.

Amakuru dufite n’uko bamwe mu bayobozi ba Leta y’u Rwanda batunguwe cyane, ndetse bituma batanga ibisobanuro byatumye abantu bakomeza kuba mu rujijo, urugero n’urwa Bwana Tharcisse Karugarama, Ministre w’ubutabera w’u Rwanda washatse kumvikanisha ko ikibazo cya Ntaganda kitareba Leta y’u Rwanda ahubwo kireba Ntaganda ubwe na Leta y’Amerika. Abumvise uyu mugabo mu kiganiro na BBC Gahuza-Miryango, bibajije impamvu Karugarama ataterwaga isoni n’amagambo yavugaga, nyuma yo kunanirwa gusobanura ukuntu Ntaganda yageze muri Ambasade y’Amerika i Kigali ahubwo agakomeza gushaka gukomeza mu murongo wa Leta y’u Rwanda wo gushaka kwemeza ko abayobozi ba Congo ibyo barega u Rwanda byose baba babeshya aho yemeje ko nta kuntu abayobozi ba Congo bari i Kinshasa bashobora kumenya amakuru ku bibera mu majyaruguru ya Kivu.

Bosco Ntaganda yaba yarakoresheje amayeri akinjira mu Rwanda mbere y’uko ingabo z’u Rwanda zari muri Congo mu gace ka Kibumba zitaha mu Rwanda zikurikiwe n’iza M23 zishigikiye uruhande rwa Runiga.

Nyuma y’aho Bosco Ntaganda aboneye amakuru avuga ko abayobozi b’u Rwanda bafashe gahunda yo kumuhitana kugira ngo atazagwa mu maboko y’urukiko Mpuzamahanga Mpanabyaha akabavamo, yakoresheje amayeri yo kujijisha abicanyi ba DMI bari bahawe amategeko yo kumuhitana na Perezida Kagame na General Kabarebe kugirango bizitwe ko yaguye mu mirwano n’ingabo za Makenga. Mu gihe bamushakiraga mu nzira zigana i Masisi yinjiye mu Rwanda ku mayeri afashijwe n’abagogwe bene wabo.

Icyajijishije cyane DMI, ni uko Bosco Ntaganda yohereje bamwe mu bizerwa be kugirana ibiganiro n’inyeshyamba za FDLR ngo zimureke atambuke mu duce zigenzura nawe azihe akayabo k’amadolari 150.000, ariko FDLR yarabyanze kuko yizeraga ko ishobora kubona amadolari agera kuri 5.000.000 yashyizweho na Leta Zunze Ubumwe z’Amerika ku muntu uzafata cyangwa agatanga amakuru yari gutuma Ntaganda afatwa. Ayo makuru yageze kuri DMI bituma ikomeza kwizera ko Ntaganda azahunga agana muri Masisi aho yashoboraga kumwicira nta nkomyi.

Kuri Ntaganda nta yandi mahitamo yari afite uretse guhungira muri Ambasade y’igihugu gikomeye nka Amerika agasaba gushyikirizwa ICC, agahitamo ambasade yari azi ko Perezida Kagame atavugiramo, rero yirinze Ambasade z’ibihugu bidafite ingufu cyangwa by’inshuti magara na Perezida Kagame nk’uko inshuti ze zabimugiriyemo inama.

Ikibazo cyari gisigaye n’uburyo bwo kugera muri ambasade ya Leta Zunze Ubumwe z’Amerika i Kigali.

Mu gihe ibiganiro na FDLR byatumye DMI yibeshya ko Ntaganda ashaka kwerekeza i Gatoyi muri Masisi, Ntaganda we yinjiye mu Rwanda akoresheje inshuti ze zo mu bwoko bwe z’Abagogwe biganje mu gace k’umupaka w’u Rwanda na Congo aho bagiye bamuhererekanya akirinda guca mu nzira zigendwa n’abantu benshi akoresheje imodoka zijyana imyaka mu mujyi wa Kigali. Mu gihe abicanyi ba DMI bamushakiraga mu birunga, za Masisi ndetse n’i Gisenyi aho ingabo zari zimushyigikiye zarimo guhungira, Ntaganda we yari yarenze mu Kinigi yerekeza iya Kigali.

Bivugwa ko yageze i Kigali ku cyumweru ku mugoroba agacumbika ku muvandimwe  wari umutegereje, bugacya amugeza kuri ambasade y’Amerika, aho kuri ambasade ngo abakozi ba ambasade nabo baratunguwe cyane.

Ubu muri Leta y’u Rwanda, ubwoba ni bwose mu nzego zishinzwe umutekano, aho ubu abo Ntaganda yaciye mu rihumye ndetse n’abashobora gukekwa kumufasha bari mu mazi abira. Muri iyi minsi kandi biravugwa ko hari abarwanyi benshi ba M23 bashyigikiye Ntaganda binjiye ku butaka bw’u Rwanda ntibafatwe n’ubuyobozi ndetse bamwe muri bo bakaba bari mu baturage bagifite intwaro zabo. Hari n’amakuru avuga ko hari n’abarimo gusaba kuva mu nkambi bakajya kuba mu mitungo yabo basanzwe bafite mu Rwanda.

Ubwanditsi

Nyuma y’uko tumenye amakuru y’uko hari ishyaka ry’abanyarwanda rishya ryavutse, urubuga The Rwandan rwifuje kuganira abayobozi b’iryo shyaka, maze Dr. Gasana Anastase Perezida w’ishyaka Parti Rwandais des Moderes/Moderate Rwanda Party, PRM/MRP-ABASANGIZI, yemera gusubiza ibibazo by’umunyamakuru wacu Marc Matabaro, ku bijyanye n’ubuzima bwa politiki bwa Dr Gasna ndetse n’ibijyanye n’ishyaka Abasangizi ngo rikaba ari ishyaka rigamije gusangiza Abanyarwanda bose ibyiza by’igihugu cyabo.

Bwana Anastase Gasana, wafata umwanya ukibwira abanyarwanda muri make ndetse ukanabambwira muri make bamwe mu bo mwafatanije gushinga ishyaka ryanyu?

Nitwa Gasana Anastase ndi umunyarwanda wo mu bwoko bw’abahutu kuri data na mama, iwacu kavukire akaba ari ahahoze ari Komini Gikomero muri Kigali Ngali ubu habaye District ya Gasabo. Nize  i Sorbonne i Paris mu Bufaransa aho nakuye impamyabushobozi y’ikirenga (Doctorat/Doctorate) mu by’indimi (Lettres) na Licence mu by ’imibereho n’imibanire y’abantu muri sosiyete (Sociologie/Sociology).

Ndangije ayo mashuli nagiye kwigisha muri Kaminuza y’u Rwanda, nza kuhava njya muri politiki yatumye nitabira politiki ishingiye ku mashyaka menshi  yatangiye mu Rwanda mu kwezi kwa karindwi 1991. Ubwo ishyaka rimwe rukumbi rya MRND buri munyarwnda wese yarimo ku gahato rimaze kuvaho, nihitiyemo kujya mw’ishyaka rya MDR mba n’umwe mu bagize Biro Politiki yaryo nuko naryo riza kunyohereza kuriserukira muri guverinoma nka Minisitiri w’Ububanyi n’Amahanga. Nyuma nabaye na Minisitiri muri Perezidansi ya Repubulika ushinzwe imikoranire y’inzego za Leta (Guverinoma, Inteko ishinga amategeko, Ubutabera), nyuma nza no kuba Ambasaderi w’u Rwanda mu muryango w’abibumbye (ONU/UN) i New York muri Leta Zunze Ubumwe za Amerika. Taliki ya 17/01/2003 nibwo nandikiye Leta ya FPR Inkotanyi  ko  nsezeye ku kazi kubera ko mbona  iyo Leta yagaragaje bihagije mu mikorere yayo ko  yubakiye kw’ivangurabwoko kandi ari byo narwanyaga kuva ninjira muri politiki ishingiye ku mashyaka menshi mu mwaka wa 1991.

Maze gusezera muri Leta ya FPR Inkotanyi, nasubiye mw’ishuli  muri gahunda y’imyaka ibiri ya Kaminuza yitwa Saint John’s University i New York aho nakuye impamyabumenyi ihanitse mu bya politiki bita MDGP(Master’s Degree in Government and Politics). Nyuma y’aho kugeza ubu nkora akazi k’ubwarimu muri Kaminuza za hano muri Amerika.

Mu buzima bwanjye bwose, bwaba ubuzima busanzwe bwaba n’ubwa politiki, naranzwe no kuba umuntu woroherana, ushyira mu gaciro, wihanganira abandi, wumva abandi yishyira mu kigwi cyabo, usabana n’amoko yose nta buryarya nta mbereka, urwanya akarengane uwo kaba gakorewe uwo ari we wese n’aho kaba gaturutse  aho ari ho hose, kandi uvugisha ukuri. Iyi mibereho yanjye n’ibitekerezo byanjye byo muri izo nzira nibyo byampuje na bagenzi banjye  twafatanije gushinga ishyaka PRM/MRP-ABASANGIZI aribo Bamara Prosper Visi –Perezida , Akishuli Abdallah Visi-Perezida ushinzwe ihuzabikorwa ry’ishyaka, n’abandi tutatangaje amazina yabo kubera impamvu zinyuranye. Twese twasanze dusangiye umurongo umwe wa politiki, dufite icyerekezo kimwe umuntu yakwerekezamo ejo hazaza h’igihugu cyacu, nuko twiyemeza gushyira hamwe imbara zacu n’ibyo bitekerezo byacu dusangiye,  dushinga Parti Rwandais des Moderes/Moderate Rwanda Party, MRP/PRM-ABASANGIZI, ishyaka rigamije gusangiza Abanyarwanda bose ibyiza by’igihugu cyabo nta n’umwe uhejwe.

Kuki muhisemo gushinga ishyaka; ni iki mugaya andi mashyaka? Ni akahe karusho muzanye?

Gushinga ishyaka rya politiki ntibivuga ko hari icyo ugaya andi mashyaka. Mushobora gusa kuba mudahuje ingengabitekerezo ya politiki, cyangwa mudahuje imigambi (objectives/objectifs), mudahuje ingamba(strategies) cyangwa se mutanahuje ibigomba gukorwa(actions) kugirango ishyaka rigere ku migambi yaryo.

Nusoma neza amahame ya politiki y’ishyaka ryacu PRM/MRP-ABASANGIZI uzasanga hari byinshi  ritandukaniyeho n’andi mashyaka yavutse uko ari makumyabiri arenga. Bimwe muri byo ni ibi bikurikira:

-PRM/MRP-ABASANGIZI ni ryo shyaka rya mbere ritangaje kandi rigahamya nta guca ku ruhande no kujijisha umurongo wa politiki ryubakiyeho w’ubworoherane (moderatism  political philosophy / philosophie politique du moderatism). Kimwe mu bituma amashyaka  asenyuka ni ukutagira ingengabitekerezo ya politiki ishyaka ryubakiyeho yakagombye gutuma abayoboke baryo  baritsimbararaho; gukuraho ubutegetsi bubi buri mu gihugu ntabwo ari umurongo wa politiki kuko bushobora gusimburwa n’ubundi bubi  nkabwo cyangwa se bunarushijeho kuba bubi nkuko byagenze muri 1994;

-PRM/MRP-ABASANGIZI ni ryo shyaka rya mbere ritangaje mu mahame yaryo ko umuntu, umunyarwanda,  ari we bukungu bwa mbere bw’igihugu; ko Leta yica abaturage bayo iba yiyambura ubukungu bwayo inabuvutsa igihugu cyose;

-Nitwe ba mbere twerekanye umurongo wa politiki y’ubukungu ibereye u Rwanda n’abanyarwanda ukurikije imibereho yabo n’umuco wabo: ukwishyira ukizana n’ubwisanzure mu by’ubukungu, ubucuruzi n’indi mirimo abantu bikorera ku giti cyabo nko mu buhinzi, mu bworozi, imyuga inyuranye, n’ibindi;

-Nitwe shyaka rya mbere mu Rwanda rishyize mu nzego zaryo urwego rw’igororamitima rishingiye kw’iyobokamana (Aumonerie/Chaplaincy) kuko iyobokamana ari ikintu gikomeye mu buzima bw’abantu, bityo rikaba rigomba kutugirira akamaro mu gukemura ibibazo igihugu cyacu gifite;

-Ni  ryo rya mbere rishyizeho Komisiyo yo gutegura ingando zizagenerwa abayobozi bakuru ba FPR Inkotanyi n’abahoze ari aba MRND, iyo komisiyo igategura imfashanyigisho itabogamye izifashishwa muri izo ngando;

-Ni twe shyaka rya mbere ritangaje ko mu Rwanda hagomba kujyaho Repubulika ya mbere y’u Rwanda (Premiere Republique Rwandaise/First Republic of Rwanda) kuko Repubulika ya mbere   y’u Rwanda kuva mu 1960 kugeza mu 1973 na Repubulika ya kabiri kuva 1973 kugeza 1994 zabaye zombi Repubulika mputu zakurikiwe na  Repubulika ya mbere ntutsi yagiyeho kuva 1994 kugeza ubu;

-Ni twe ba mbere twerekanye ko uruhare rwa sosiyete nyarwanda ubwayo, yose uko yakabaye, rugomba kuyibazwa nayo kuko ari yo yibarutse Abami 32 n’Abaperezida 6 bose uko ari 38 hakabura n’umwe wamera nka Nyerere wa Tanzania, Mandela  wa Afurika y’Epfo na MikhaIL Gorbachev wa Rusiya; bivuga ko iyi sosiyete yacu nyarwada ifite ikibazo!!!

-Ishyaka PRM/MRP-ABASANGIZI ni ryo shyaka rya mbere mu mahame yaryo rivuze ku gahurwe (alienation) hagati y’abahutu n’abatutsi, ububi bwako n’uko kavurwa;

-Ni twe shyaka rya mbere ritangaje mu mahame yaryo ko rishyigikiye abanyarwanda b’ubwoko butandukanye biyemeza kubakana ingo,  n’ababakomokaho (imvange) kugirango nabo bagire uruhare rugaragara n’ubwisanzure muri politiki y’igihugu cyabo aho guhora bigizwayo ngo si ba “hutu butwi” cyangwa se ngo si “ abatutsi b’umwimerere”;

-Ni twe ba mbere tuvuze mu mahame y’ishyaka ryacu ikibazo cy’abanyarwanda baba mu bwihisho buhoraho bubabyarira ipfunwe rya buri munsi kubera kuba barahinduje ubwoko kugirango babashe kubaho uko ubutegetsi bw’abatutsi n’ubw’abahutu bwagiye busimburana mu mateka y’u Rwanda kugeza ubu;

-Ni twe ba mbere tuvuze ko tutazita undi munyarwnda umwanzi w’igihugu, umubisha, kuko twamenye ko umwanzi w’igihugu cyacu w’ukuri ari kariya gahurwe(alienation) hagati y’abahutu n’abatutsi, ipfumwe(deprivation), ivangurabwoko, irondakarere, irondakazu, igitugu, ikinyoma, uburyarya, ubuhendanyi, imbereka, akarengane, urugomo, ubwibone, ubujiji, ubutindi, urwango, ubwihimure, ubwicanyi n’ubusahuzi bw’umutungo w’igihugu; ngabo abanzi b’u Rwanda batuma ruhora rwisenya ubwarwo;

-Ishyaka PRM/MRP-ABASANGIZI ni ryo shyaka rya mbere rishyize mu mahame yaryo ihame ry’uko rizajya rikora politiki ishingiye ku guhiganwa mu bitekerezo gusa, mu kinyabupfura no mu bwubahane,  kuko gutukana no gusebanya ari ikimenyetso cy’intege nke n’ubuswa muri politiki;

-Ni twe shyaka rya mbere ryatangaje ko rigiye gushyiraho Radio yitwa IJWI RY’UBWOROHERANE izajya yigisha abanyarwanda inabatoza umuco w’ubworoherane, ubwubahane, ubwihanaganirane, ubusabane, ubufatanye, ubuvandimwe, ubunyakuri, kuba inyangamugayo,  no gukorera mu mucyo;

-PRM/MRP-ABASANGIZI ni ryo shyaka rya mbere rigize igitekerezo cyo gutangiza umushinga wo gushyiraho umutwe w’ingabo, izina ryawo akaba ari URUKATSA ruzahuriza hamwe abanyarwanda bose,  abahutu, abatutsi, imvange, abari barahinduje ubwoko, bose bashyirwe hamwe mu kurengera igihugu no kurwana ku nyungu  z’abana b’u Rwanda bose nta vangura iryo ari ryo ryose rijemo nk’uko byabayeho kandi na n’ubu bikiriho mu Rwanda;

-Ishyaka PRM/MRP-ABASANGIZI ni ryo shyaka rya mbere ritanze igitekerezo cyo gushyiraho Leta yo kugangahura igihugu(Nation’s Healing Government), Leta yo guhoza Abanyarwanda bose amarira no kubavura ibikomere bibari mu mitima, mu mitekerereze no ku mibiri  batewe n’ubwicanyi ndengakamere bwabereye mu Rwanda no muri Repubulika iharanira Demokarasi ya Congo.

Hari aho muvuga ko mu minsi itaha muzashyiraho umutwe w’ingabo uzitwa URUKATSA. Kuki mwahisemo iri zina? Ese hari igihugu kibari inyuma? Hari abasilikare bazwi mwaba mufatanije muri icyo gikorwa?

URUKATSA ni izina ry’ingabo zabayeho mu mateka y’u Rwanda zatsinze izitwaga Abakotanyi ku rugamba kandi ku buryo budasubirwaho  (Abakotanyi nibo FPR yakomoyeho izina ry’Inkotanyi). Amateka y’iryo zina arambuye muzaryoherwa no kuyasoma mw’itangazo ryacu rizaba rishyiraho ku mugaragaro uriya mushinga w’ishami rya gisilikare.

Ntabwo dukeneye ko hagira igihugu kituba inyuma kugirango dutekereze kandi dukore umushinga nk’uyu kuko ibibazo by’u Rwanda bireba twe abanyarwanda ubwacu, akaba ari natwe tugomba kwishakamo umuti wo kubikemura. Ni twe rero tuzibohoza ingoyi zituboshye nk’abanyarwanda, akaba ari natwe tuzabohoza igihugu cyacu. Ntabwo ari abanyamahanga.

Abasilikare dufatanije muri uwo mushinga ni  ababaye mu bisilikare byose byabayeho mu mateka y’u Rwanda: ex-FAR Inzirabwoba, APR Inkotanyi, FDLR , RDF, n’abandi biyeje kwitandukanya n’ingengabitekerezo y’ubuhezanguni bw’abahutu n’ubw’abatutsi bakagana inzira y’ubworoherane n’imibanire myiza hagati y’amoko mu Rwanda.

Hari inyandiko yanditswe n’ikinyamakuru Afroamerica network muri Mutarama  uyu mwaka ivuga ko mwaba mukorana n’inzego z’iperereza za gisilikare mu Rwanda(DMI). Ibyo hari icyo mwabitubwiraho?

Uzasuzume ibya kiriya kinyamakuru uzasanga ari ikinyamakuru gicuruza ibihuha. Nta n’umuntu wiyubashye ukwiye gusoma bene kiriya kinyamakuru gitangaza inkuru z’impimbano zuzuye ibinyoma no gusebanya. Gihamya se bafite y’iyo nkuru batangaje ni iyihe? Ntayo. Ni abahezanguni b’intagondwa z’abahutu bazi ko kurwanya Leta y’agatsiko k’abatutsi iri i Kigali ari akarima kabo, kuko ngo ari ba “hutu butwi”, ko umuhutu nkanjye utari umuhezanguni nkabo cyangwa se umututsi dufatanije, nta mwanya dufite mu gukora politiki ku Rwanda.

Uko kutwigizayo, bo bavuga ko babiherewe uburenganzira na nde, hehe? Ni abantu bokamwe n’ ivangura(exclusion), nta naho bataniye n’izo za DMI na FPR bavuga kuko imikorere yabo bose ari imwe: umuhutu urwanyije FPR imuharabika ko ari interahamwe, umututsi utavuga rumwe nayo ikamuhimbira ko yibye Leta, ko ari igipinga. Umuhutu utari intagondwa cyangwa se umututsi utari umuhezanguni urwanyije FPR, intagondwa z’abahutu nka Afroamerica zikamuharabika ngo akorana na FPR na DMI kandi ari ibinyoma. Biragaragara rero ko Afroamerica ikina umukino wa politiki y’ikinyoma no guharabika abatavuga rumwe na FPR bityo  ikaba ahubwo ariyo ikorera DMI na FPR Inkotanyi.

Hari amakuru avugwa na benshi ko Dr. Gasana wagize uruhare mu ishingwa ry’umutwe w’interahamwe wari urubyiruko rw’ishyaka MRND wagize uruhare mu marorerwa yo mu 1994, bikanaviramo abahutu bose kwitwa iryo zina n’intagondwa z’abatutsi. Ndetse n’ikimenyimenyi Dr James Kwizera Gasana wabaye Ministre w’ingabo mu Rwanda yanditse mu gitabo cye kitwa: “Rwanda: du parti-État à l’État-garnison” aya magambo: « C’est ainsi que Désiré Murenzi, alors Directeur de Petrorwanda, opérationnalise la stratégie de mise sur pied d’une ligue des jeunes prônée par Anastase Gasana, en créant les Interahamwe de sa propre initiative en dehors du parti. Un élément en plus est que A. Gasana qui ressent le poids politique de D. Murenzi au sein du Mrnd est de même origine que lui : il ne veut pas de l’initiative de Murenzi, de peur de renforcer son influence en préfecture Kigali. Il est ainsi un de ceux qui conseillent l’entourage de Habyarimana de récupérer les Interahamwe ». Ibi ubivugaho iki?

Ibyo na none ni ibinyoma, gusebanya no guharabika bikorwa n’interahamwe n’intagondwa z’abahutu zigamije kwiyerurutsa amabi zakoze ziyagereka ku bandi. Kw’italki ya 14 z’ukwezi kwa  gatanu 1992 jyewe Dr. Gasana Anastase nasohoye inyandiko mu gifaransa  y’amapaji  icumi nise “Dossier Interahamwe za Muvoma ou les irreductibles du MRND: Essai de deracinement du mal”(English). Iyi nyandiko nayishyikirije ubuyobozi bukuru bw’ishyaka ryanjye rya MDR n’andi mashyaka twari kumwe mu kurwanya ubutegetsi bubi bwa  MRND bwariho icyo gihe.

Nasabaga iki kinyamakuru kuzatangaza iyo nyandiko yanjye abasomyi bacyo bakayisoma kugirango bice ayo mazimwe uvuga ko avugwa na benshi. Nyuma ya jenoside Umuryango w’Abibumbye(ONU/UN)  mu gihe wakurikiranaga abakoze jenoside y’abatutsi n’abahutu bari baranze kuba  abahezanguni, waje kugwa kuri iriya nyandiko yanjye uyihindura mu cyongereza uyita “Interahamwe za Muvoma or the MRND party hardliners: Attempt to root out the evil”. Urukiko mpuzamahanga rwa ONU/UN rwa Arusha rwahise ruyigira inyandiko yarwo y’ibanze muri dossiers/files z’abaregwaga kuba barakoze jenoside mu Rwanda, noneho nabo bahana umugambi wo kumpararabika ngo nijye waremye interahamwe ari amayeli yo kugirango barebe uburyo baburizamo iriya nyandiko yanjye  yo kw’italiki ya 14/05/1992 yabashinjaga kuko harimo amazina yabo. Yisome urebe urahita usobanukirwa n’ikinyoma cyabo (bariya wita benshi).

Dr. Gasana mu nyandiko yanyu mwemeza ko habayeho ubwicanyi bwibasiye abahutu, haba mu Rwanda no muri Congo. Ese igihe wari Ministre w’Ububanyi n’Amahanga ndetse n’igihe wari uhagarariye u Rwanda muri ONU ni ko wabibonaga? Mu gihe wari ushishikajwe no guhigisha uruhindu abari bamaze kuva ku butegetsi, wakoze iki kugirango ubwicanyi bwakorwaga na FPR bumenyekane mu rwego mpuzamahanga n’ababukoraga bakurikiranwe?

Nari Minisitiri w’Ububanyi n’Amahanga nk’uko nawe ubyivugira. Sinari Minisitiri w’Ingabo, sinari Chef d’Eta Major sinari umukuru w’iperereza ryo hanze cyangwa se iryo mu gihugu imbere si nari n’umukuru wa Polisi cyangwa wa Jandarumeri, si nari Minisitiri w’Umutekano mu Gihugu. Ikibazo nk’iki umenya ahari giterwa n’uko abantu baba badasobanukiwe neza n’imikorere ya Guverinoma muri rusange! Mu mikorere ya Guverinoma, ibyo Minisitiri w’Ububanyi n’Amahanga atangariza amahanga abihabwa na Minisiteri zibishinzwe na services zizishamikiyeho. Na Ambasaderi muri ONU/UN nawe ni uko. Ntashobora kuba ari i New York ngo abe ari no mu mashyamba ya Congo! Byose abishyikirizwa na Minisiteri y’Ingabo n’izindi nzego ziyishamikiyeho kuko aba ari bo baba bari bene aho muri Congo uvuga. Mu mahame y’ishyaka ryacu turemeza koko ko habaye ubwicanyi  bw’abahutu mu Rwanda no muri Congo bwakozwe na FPR Inkotanyi kuko ibyo natangaje icyo gihe mbishyikirijwe na Minisiteri y’ingabo n’izindi nzego z’umutekano ziyishamkiyeho byari ibinyoma.

Abo uvuga, bakurikiranwe n’Urukiko mpuzamahanga rwa ONU/UN rufite ikicaro Arusha kandi byari ngombwa. Ntibakurikiranwe kuko bari bamaze kuva ku butegetsi nk’uko ubivuga. Bakurikiranwe kuko bari babuvuyeho bamaze no gukora jenoside y’abatutsi n’abahutu bari baranze kuba abahezanguni. Ikintu cyose kandi kigira igihe cyayo. Abantu bo muri FPR Inkotanyi bagize uruhare mu yindi jenoside y’abahutu, nabo bazagira igihe cyabo cyo gukurikiranwa. Niyo mpamvu ishyaka ryacu PRM/MRP-ABASANGIZI ryashyize mu mahame yaryo ko  hagomba kuzajyaho Komisiyo mpuzamahanga y’abahanga kabuhariwe mu gutahura ibyaha by’ubwicanyi bw’abantu benshi ababukoze bagerageje gusibanganyiriza ibimenyetso, kugirango bazabikurikiranirwe banabihanirwe. Ni nayo mpamvu ishyaka ryacu nanone ryashyize mu mahame yaryo ko u Rwanda rugomba kuba kimwe mu bihugu bigize Urukiko mpuzamahanga rushinzwe gukurikira no guhana abakoze ibyaha by’ubwicanyi bw’abantu benshi mu bihugu binyuranye kw’isi (International Criminal Court). FPR  yo yanze ko u Rwanda ruba kimwe mu bihugu biri muri ruriya rukiko kuko yanga ko abantu bayo bakurikiranwa kubera biriya byaha by’ubwicanyi bakoze.

Mu mpera za 1996 n’intangiriro za 1997, igihe abanyarwanda b’impunzi bicwaga banahigwa bukware mu mashyamba ya Congo, watangazaga mu mahanga yose ko nta mpunzi y’umunyarwanda isigaye muri Congo (dufite amajwi ya RFI, VOA, na BBC) ariko nyamara kugeza uyu munsi  hari abakiri muri Congo. Ese wagira icyo utubwira kuri ibi bintu?

Iki kibazo kirasa n’ikikibanziriza. Kukibaza biterwa no kudasobanukirwa uko Guverinoma ikora. Minisitiri w’ Ubanyi n’Amahanga atangariza amahanga ibyo ahawe na Minisiteri zibishinzwe ziri kuri terrain. Minisiteri y’Ububanyi n’Amahanga ntabwo ari Ministere de terrain. Ibyo natangaje icyo gihe si ibyo nabaga nihagarariyeho ubwanjye kandi nta n’ubwo nari mfite mu nshingano zanjye kubihagararaho. Abari bafite iyo nshingano aribo Minisiteri y’Ingabo, Etat Major, n’Inzego ziperereza ryo hanze nizo zanshyikirizaga ibyo nagombaga gutangaza kuri ariya maradio mpuzamahanga. Byaragaragaye rero ko Ibyo izo nzego z’umutekano zanshyikirije icyo gihe bitari ukuri.

Muri Rwanda Day 2011 yabereye i Chicago muri Leta Zunze Ubumwe za Amerika, Dr. Gasana wagaragaye mu baje kwakirana urugwiro Perezida Kagame , mwagaragaye iruhande rwa Nyakwigendera Inyumba mwahuje urugwiro. Ese hagati ya 2011 i Chicago n’uyu munsi hahindutse iki?

Iki ni ikibazo gishekeje cyane, kuko n’umuminisitiri uri muri guverinoma ya Kagame uyu munsi, ejo afite kuba yakwitandukanya nawe ndetse na FPR ye agashinga irye shyaka nkaswe jye umaze imyaka  cumi n’umwe mu buhungiro. Nyakwigendera Aloysia Inyumba yaranshatse nk’umuntu twabanye muri Guverinoma imyaka myinshi kandi dusangiye imyumvire imwe ku bibazo by’amoko mu Rwanda.

Namubwiye ko nsezera muri Leta ya FPR taliki ya 17/01/2003 nanditse ko ntazasubira gukorera Leta y’u Rwanda mu gihe izaba ikirangwamo ivangurabwoko kandi ari ryo narwanyije kuva najya muri politiki y’amashyaka menshi mu 1991, ko rero ntashobora kuza i Chicago. Aransubiza ati “ese washobora kuza ukabonana na Perezida” mukavugana kuri icyo kibazo cy’ivangurabwoko.

Nti nta kibazo, nti jye nemera ibiganiro n’imishyikirano, nti ariko ndongeraho n’ikindi kibazo kimwe aricyo IGITUGU (dictature/dictatorship). Arabinyemerera. Nti Perezida azaboneka ari ryari? Ati “hazaba ari kuwa gatandatu”. Mubwira ko nzaza umunsi umwe gusa ari wo uwo wa gatandatu. Hari hateganyijwe ko mbonana na Perezida Kagame nyuma y’ijambo rye ryo gusoza iminsi itatu iyo Rwanda day yari imaze. Nyuma ndi mu cyumba cyanjye muri Hoteli, Nyakwigendera Aloysia Inyumba yaje kundeba ababaye cyane  ambwira ko Perezida yanze ko tubonana ngo ntashaka kujya impaka nanjye kuri biriya bibazo(topics) uko ari bibiri (ivanguarabwoko n’igitugu mu Rwanda). Ubwo nanjye nahise njya gufata indege nditahira. Ni uko byagenze. Ubundi  basigara bacuruza ifoto yanjye; biriya byabo by’ubusuma muri politiki. Iyo foto yanjye basigaye bacuruza muri internet no mu binyamakuru binyuranye mwabonye ni iyafashwe mw’iramukanya rusange na Perezida Kagame aje kuvuga ijambo risoza Chicago Rwanda Day. Ni aho namuherutse.

Tugarutse kuri Nyakwigendera Minisitiri Inyumba, mu nyandiko yanyu muvuga ko Madame Inyumba yari umuntu w’intwari wifuzaga ko abanyarwanda bakemura ibibazo byabo. Ese niba atari ibanga mwagira icyo mutubwira kuri we n’ibiganiro mwagiranye, cyane cyane mu gihe cya Rwanda Day ya Chicago.

IGISUBIZO:  Nyakwigendera Aloysia Inyumba twagiranye ibiganiro i Washington, tugirana ibiganiro kuri telefoni, tugirana n’ibiganiro i Chicago. Twabanye muri Guverinoma kuva mu 1994 kugeza 1999 kandi dusangiye imyumvire imwe ku kibazo cy’amoko mu Rwanda nk’uko nabivuze haruguru. Aloysia yari umuntu ugira urugwiro cyane kandi akifuza guhuza abantu no gukemura ibibazo. Muri iyo myumvire  ye myiza ya kimuntu, yumvise ko mfite ikibazo cy’ivangurabwoko n’igitugu mu Rwanda yumva ko nshobora kukiganiraho na Perezida Kagame, abipanga atyo nanjye ndabimwemerera kuko nari muzi imico kandi mwizeye, ariko Prerezida Kagame we arabyanga. Naho ibyo naganiriye na Nyakwigendera Aloysia Inyumba ku bibazo bya politiki mbi zaranze amateka y’u Rwanda kugeza ubu, singombwa ko mbirondora hano. Nindamuka nanditse igitabo (Memoirs) kandi numva nzacyandika, ubwo ni ho mwazabisanga.

Mu gusoza, Dr. Gasana wabwira iki abanyarwanda. Ni ubuhe butumwa wabaha?

Mbona muri 1994 twarakojeje  umutwe ku ndiba y’isi na n’ubu akaba ariyo tukiri. Ahasigaye ni ukuvayo kandi tukavayo tuvuyeyo ubutazasubirayo. Ni cyo ishyaka  PRM/MRP-ABASANGIZI ryashyiriweho. Twe twemera ko mu gihe igihugu cyacu cyahuye n’ibibazo bidasanzwe bya kirimbuzi kirimbura imbaga y’abantu, ibyo bibazo bigomba no gushakirwa umuti udasanzwe. Abanyarwanda bapfa ko bamwe bakumira abandi ku butegetsi bw’igihugu cyabo basangiye. Niyo mpamvu twatanze igitekerezo cy’uko hakwiye kujyaho Leta yo kugangahura igihugu (Nation’s Healing Government), Leta yo guhoza no komora ibikomere byo ku mitima, mu mitwe no ku mibiri abanyarwanda bose basigiwe n’amarorerwa yabaye mu 1994 na nyuma y’aho. Tukaba twizeye rero ko iki gitekerezo, kimwe n’ibindi byinshi twatanze mu nyandiko y’amahame-remezo, abanyarwnda bagiye kubishyigikira bayoboka Parti Rwandais des Moderes/Moderate Rwanda Party, PRM/MRP-ABASANGIZI, ishyaka rigamije gusangiza Abanyarwnda bose ibyiza by’igihugu cyabo.

Murakoze.

Bosco Ntaganda wahungiye mu biro bihagarariye Amerika i Kigali kuri uyu wa mbere tariki ya 18 Werurwe 2013, azoherezwa i La Haye ku rukiko mpuzamahanga mpanabyaha mu gihe kitarenze iminsi 2, ibi byatangarijwe i Paris kuri uyu wa gatatu tariki ya 20 Werurwe 2013 n’umushinjacyaha mukuru w’urwo rukiko, Madame Fatou Bensouda.

Madame Bensouda kandi yakomeje avuga ko barimo gukorana hafi n’abashobora gufasha iryo yoherezwa ku buryo bwihuse, mu kiganiro n’abanyamakuru yemeje ko Ntaganda azaba ari i La Haye mu minsi 2.

Ngo nagera i La Haye azashyikirizwa bwa mbere umucamanza, abacamanza b’urukiko rwa ICC bazagena itariki yo kwemeza ibyo Ntaganda aregwa. Ngo akurikije uko urukiko rukora ngo bishobora gutwara nk’amezi atatu.

Intumwa z’urukiko mpuzamahanga mpanabyaha ubu zirerekeza mu Rwanda zije gutwara Ntaganda nk’uko byatangajwe kuri uyu wa gatatu tariki ya 20 Werurwe 2013 na Bwana Johnnie Carson, ushinzwe ibijyanye n’Afrika muri Minisiteri y’ububanyi n’amahanga y’Amerika, mu kiganiro yahaye abanyamakuru i Kigali mu Rwanda ariko akoresheje ikoranabuhanga kuko yari i Washington. Ariko uyu muyobozi w’Amerika avuga ko n’ubwo nta muntu urerekana ko adashimishijwe n’uko Ntaganda ari mu maboko ya Leta ya Amerika ariko ngo amasaha 48 aza gukurikira arakomeye.

Umuntu akibaza impamvu uyu munyamerika asa n’ufite impungenge dore ko yanasabye Leta y’u Rwanda nk’igihugu ngo cyabayemo Genocide kutaba imbogamizi kw’iyoherezwa rya Ntaganda i La Haye ngo bagafungura inzira imuganisha ku kibuga cy’indege. Dore ko iki gihugu cyakunze gushyirwa mu majwi kuba ari cyo cyamukoreshaga mu bikorwa bye birimo n’ibyo aregwa n’urukiko rwa ICC.

Izi mpungenge zishingiye kandi k’uko Leta y’u Rwanda itaremera ko izakorana n’intumwa za ICC zije gutwara Ntaganda ngo itange inzira iva ku nyubako y’ambasade y’Amerika igana ku kibuga cy’indege dore ko u Rwanda rutashyize umukono ku masezerano y’i Roma yashyizeho urukiko mpuzamahanga mpanabyaha.

Kuri Leta y’Amerika ngo ni intambwe mu rwego rw’ubutabera. Ngo kikaba n’ikimenyetso ku bandi bakuru b’inyeshyamba bo mu burasirazuba bwa Congo ku buryo byatuma hagaruka amahoro muri ako karere.

Marc Matabaro

Bavandimwe,

Mboherereje ibaruwa mu mugereka w’iyi email ibamenyesha ko amataliki y’inama mpuzamahanga ku mpunzi z’abanyarwanda yahindutse. Inama ikaba yarimuliwe mu kwezi gutaha kwa kane ku italiki ya 19 -20 i Bruseli mu Bubiligi. Impamvu ntayindi n’uko amikoro yari ateganijwe kugirango imilimo y’iyi nama igerweho atarabasha kuboneka, tukaba twihaye ukundi kwezi ko gukomeza gushakisha le minimum kugirango iyo nama ibe yaba. Komite mpuzabikorwa ikaba isaba buli muntu wese ko yakumva ko iki kibazo cy’impunzi z’abavandimwe bacukimureba kandi ko hatagize igihinduka kikaba cyazatera akababaro n’agahinda benshi muli twe, niduhaguruke dusabe abayoboke bacu, inshuti n’abavandimwe bashishikarire gutabara no gutabariza abavandimwe bacu.

Ntabwo ari byiza kwifuza ngo iyo biza kugenda gutya ibi ntibiba byarabaye. Ngirango twagombye kumva ko niba utari n’impunzi wabaye yo cyangwa se n’uwawe yabayeyo maze wibuke ubwo buzima dutegereje ku mpunzi mu mezi abili gusa ari imbere, umunsi HCR na Kigali bizashyira mu bikorwa ibyo biyemeje.

Sinabizeza ko iyi nama izabirangiza ariko nidufatanya n’imana ndakeka tudashobora kuburira byose izi mpunzi zihangayikishijwe n’aka karengane. Mwumvishe abanyarwanda ko bagombye kwishyura mu mwanya w’izi mpunzi maze batekereze ko hasigaye amazi abili gusa maze ubuzima bwazo bukaba buterewe mu kirere.

Buli muntu atange uko yifite. Ubishoboye ajye kuli website ya OPJDR (www.opjdr.org; Donation) maze atange uko yifite. Mboneyeho kandi no gushimira mu izina ry’impunzi na komite dufatanije gushimira abashoboye kugira icyo batanga kimwe n’abakomeje gukora amanwa n’ijoro ngo turebe uko twatabara abavandimwe bacu.

Mu izina rya Komite mpuzabikorwa
Pascal Kalinganire

Biramenyerewe ko ukwezi kwa kane ku Banyarwanda ndetse na bamwe mu banyamahanga  ari ibihe byo kwibuka génocide yabereye mu gihugu cyacu muri 1994. Nk’uko twabisobanuye umwaka ushize, twe muri FDU-INKIGI no mw’Ihuriro Nyarwanda RNC dusanga uburyo uko kwibuka kwari gusanzwe gukorwamo nta bwiyunge bishobora kuzazanira abanyarwanda.

Buri munyarwanda wahekuwe n’ayo mahano akeneye kubahwa mu kababaro ke.  Nk’amashyaka ya politique, ntabwo dushinzwe kwandika amateka. Niyo mpamvu icyemezo cyacu kigomba gufatwa mbere na mbere nk’igikorwa cya politique. Ufite igitekerezo kidahuye n’icyacu tuzamwubaha. Ariko nawe azatwubahe. Niyo nzira nziza ya démocratie, yemera  ukutavuga rumwe kuri byose.

Ubutegetsi bwa FPR n’umuryango IBUKA baragira bati twe dutangira icyunamo ku itariki ya 7 Mata, kuko aribwo génocide yatangiye. Ni uburenganzira bwabo. Kandi natwe tuzirikana abo Batutsi bazize ubwoko bwabo, tukaba twifatanyije nabo mu kababaro.

Bamwe mu Bahutu bakagira bati iryo ni ivangura. Bagatangira icyunamo ku itariki ya 6 Mata, umunsi indege ya nyakwigendera Habyarimana yahanuweho.Na bo ni uburenganzira bwabo. Ntawakwirengagiza koko ko hari n’Abahutu bahekuwe koko, haba  mbere , muri génocide na  nyuma yayo. Twe dusanga nabo bagomba kwibukwa kuko akababaro kabo nako gafite ishingiro.

Birumvikana ariko ko kwibuka ku matariki atandukanye  bitubaka  u Rwanda twifuza. Dusanga rero icyunamo kitagomba kuba umwanya wo gutanya abanyarwanda no gukomeretsa ibikomere, ahubwo ko kigomba kubafasha kwiyunga, buri muntu yumva akababaro k’undi. Niyo mpamvu dukomeje gushishikariza abanyarwanda kwibuka ku itariki yindi itari iya 6 Mata cyangwa iya 7 Mata. Bityo tukareka kuba ingwate z’amatariki. Tugahuzwa no kwibuka abacu, aho kurwanira amatariki.

Uyu mwaka tubararikiye guhura ku itariki ya 14 Mata mu gitambo cya misa kizabera i Bruxelles kuri adresse muzamenyeshwa. Icyo gitambo cya misa kizakurikirwa n’ikiganiro kizabera nacyo i Bruxelles ahantu muzamenyeshwa. Tuzakomeza kungurana ibitekerezo ku buryo buhamye bwo kwibuka no kubaka u Rwanda rubereye bose. Twongeye kwibutsa ko iyo tariki atari kamara. Haramutse habonetse indi yahuza abanyarwanda twayitabira.

Abayoboke ba FDU Inkingi n’Ihuriro Nyarwanda RNC batazashobora kwifatanyiriza n’abandi i Bruxelles basabwe na bo kuzahamagarira abandi banyarwanda n’inshuti zabo kwitabira mu karere barimo icyo gikorwa cy’imena mu kunga imitima y’abanyarwanda.

Umusanzu wa FDU INKINGI na RNC ni ukubaha urubuga, naho imbaraga zizava muri mwe. Turabararitse rero muzaze muri benshi.

RNC                                                                                                                      

Dr Rudasingwa Théogène  

FDU INKINGI                                                                     

Dr Nkiko Nsengimana

A.URUHARE RW’AMASHYAKA YA POLITIKI

Amashyaka ya politiki ni imwe mu ntwaro zikomeye zituma igihugu n’abagituye bashobora kugera k’uburyo bwihuse ku miyoborere myiza (bonne gouvernance), iterambere rirambye kandi kuri bose, ubutabera bwigenga, kubahiriza uburenganzira bwa muntu, umutekano w’abantu n’ibintu, uburezi bwiza kandi kuri bose, ubuzima buzira umuze ku batuye igihugu, kurwanya igitugu n’amacakubiri,…

Iyo witegereje amateka y’amashyaka mu Rwanda, usanga abanyarwanda benshi nta sura nziza bafitiye amashyaka, amashyaka arica, agasenya ibikorwa byakozwe, agashyamiranya abantu, abanyapolitiki bakabeshya rubanda bagamije inyungu zabo bwite n’ibindi.

Ibi bibazo byose nibyo bituma abaturage benshi cyane cyane abanyarwanda batifuza no kujya mu mashyaka, n’abayagiyemo cyangwa bamwe bayarimo usanga ari abacancuro, abandi nabo bashaka gukumira abandi muri politiki bakavuga ngo “la politique est l’art de mentir”, ngenekereje bivuga ngo ni “umwuga wo kubeshya”, bityo bigatuma abaturage badakunda politiki, abitwa ko basenga Imana bati “ kujya muri politiki n’icyaha, ndetse n’abayikora ni abanyabyaha kuko bazana ibice mu bantu”.

Iyo usesenguye neza “imikorere y’amashyaka n’abanyarwanda”, usanga abanyarwanda benshi barazinutswe politiki bayiharira bamwe bafatwa nk’ibyihebe (abiyahuzi) muri sosiyeti nyarwanda.

Njyewe uko mbibona, ntabwo umurimo wa politiki, utanga gahunda ngenderwaho mu gihugu, utegura uko abene gihugu bakwiye kubana mu mahoro, bagera ku iterambere rirambye, ugena politiki y’ububanyi n’amahanga n’ibindi, ukwiriye guharirwa ababeshyi, abicanyi, ibisambo, abanyamacakubiri, abariganya, abakumira abandi muri politiki  bagamije inyungu zabo gusa cyangwa izo akarere bakomokamo, iz’ amoko babarizwamo, idini babereye abayoboke,…

Urebye neza, ibihugu byagiye biyoborwa cyangwa biyobowe n’abantu bameze batyo nta mugisha ibyo bihugu bigira, amaraso ahora asimbura andi, ugize aravuga ibitagenda aricwa cyangwa agahimbirwa ibyaha bituma arangiriza ubuzima bwe bwose muri gereza. Ibi bikorwa kugira ngo abayobozi bacecekeshe abantu kandi bikomeze k’ubuyobozi. Abayobozi nkabo ikibaranga ni ugusahura umutungo w’igihugu, gucamo abaturage ibice, amacakubiri ashingiye ku moko n’uturere, gutoteza abaturage no kubatera ubwoba bikabaviramo ubuhunzi buhoraho, uburenganzira bw’ikiremwa muntu burakandamirwa, ubutabera butigenga, itangazamakuru ntirikorera mu bwisanzure, guhindura amategeko buri gihe uko bishakiye hagamijwe inyungu z’abari k’ubutegetsi, amatora atanyuze mu mucyo, ikinyoma gihabwa intebe n’ibindi.

Iyo witegereje neza imokorere y’amashyaka mu Rwanda kuva muri 1956 yatangira kubaho, amashyaka menshi yagiye ashingira ku moko, uturere, idini n’ibindi. Ibi byagiye bigira ingaruka ku mibanire y’abanyarwanda, twavuga nk’ubwicanyi bwakorewe abanyarwanda, kwikubira umutungo w’igihugu kuri bamwe, iterambere ridasaranganyijwe mu turere twose, kwikubira ubuyobozi n’ibindi.

Amashyaka ya politiki mu Rwanda, usanga abanyapolitiki akenshi batitaye ku bibazo abaturage bahura nabyo cyangwa igihugu gifite, ahubwo buririra ku ingaruka z’ibyo bibazo kugira ngo bigerere k’ubuyobozi (abatutsi bati twarakandamijwe dukwiye kwibohoza, abahutu bati turicwa buri munsi, twarahejwe mu buyobozi, nti twibuka abacu bapfuye, impfubyi n’abapfakazi bacu nti bitaweho kimwe n’abandi, dukeneye ubutabera butareba gusa ibice cy’abanyarwanda, ubusumbane mu gutanga akazi, n’ibindi), ibi bigahora bisimburana, tuzahora muri aka kavuyo kugeza ryari ?

Birababaje kuko abanyapolitiki benshi mu Rwanda, badakora gahunda ya sosiyeti (programme de société) zikemura ibibazo by’abanyarwanda zibageza k’ubuyobozi, n’iyo babugezeho bararuca bakinumira, batangira guharanira gusa inyungu zabo. Aha byumvikane neza, ni bake mu banyapolitiki bakora gahunda isobanutse bashyikiriza rubanda. Abanyarwanda bakeneye gahunda ishingiye ku bibazo nyakuru abanyarwanda duhura nabyo kandi ikaba itanga ibisubizo birambye kuri ibyo bibazo.

Ibiranga abanyapolitiki benshi baba abakorera politiki mu Rwanda cyangwa hanze yarwo b’abanyarwanda usanga abenshi barangwa n’ubuhezanguni (abanyamoko cyangwa bamunzwe no kuba abanyakarere runaka), ukwikunda, umwiryane( nta bwuzuzanye, nta n’urukundo hagati yabo bagirana), guhuzagurika ndetse bamwe muri bo usanga barigize abacamanza mbere y’uko ubutabera bavuga ko baharanira bujyaho, kwicana, inzangano zihoraho, gusebanya, gucamo ibice abanyarwanda, amashyaka ashingiye ku gice runaka , ku moko runaka, gutukana, kugayana, si nabana n’uyu, si nakorana n’aba, abandi bati hakwiriye abanyapolitiki bashya (nouvelle génération), abo bandi se ubashyizehe ko ubambura uburenganzira bwabo busesuye bwo gukora politiki, abandi bati nzakorana n’abize gusa, abakene ntabwo twakorana,  abandi se bo babaye abande? … usanga aho kwiga ibibazo bikomereye abanyarwanda, barangariye mu bibazo bidafite ishingiro. Mu by’ukuri abanyapolitiki nk’aba ntacyo bamarira abanyarwanda.

Biteye agahinda kumva umuntu yiyita umunyapolitiki wize cyane akagerekaho gushinga ishyaka runaka ariko yajya kuri radio cyangwa mu nyandiko ze yandika ukumva aravuze ngo si nakorana na kanaka, si nakorana n’abakomoka aha, runaka yakoranye n’aba sinakorana nawe, agatsiko k’abari k’ubuyobozi ni akaha bityo abantu bose bakomoka aho bagomba kurwanywa, ako gatsiko kakirukanwa, abantu bose bahunze  ni abicanyi.

Iyo usesenguye uyu munyapolitiki yagize iturufu ako gatsiko ashaka kwirenza,  yo kugira ngo agire abamujya inyuma benshi kuko hari abantu babaye batishimiye ubuyobozi buriho, agamije gusa kugera k’ubuyobozi, kandi birashoboka ko abakomoka aho bose atari babi nk’abo we yita ko ari babi, politiki nk’izo n’izo kuvangura kandi ntizitanga ibisubizo ku bibazo abanyarwanda dufite, nti wakemura ikibazo utera ikindi, politiki igira abo iheza n’iyo kwamaganwa. Abanyapolitiki nk’abo ni abo kwamaganwa hakiri kare, ejo batazaturoha mu ruzi turwita ikime.

Muri kino gihe haharawe imvugo igira iti “ génération nshya y’abanyapolitiki mu Rwanda”, nibyo koko birakwiye ko haboneka amaraso mashya muri politiki ariko na none nta munyarwanda ukwiye guhezwa muri politiki ngo ibe iturufu. Ibi ababikora bafite icyo bagamije, bazi ibyo bavuga, kugera k’ubuyobozi bitabaruhije babanje kwegezayo abo babona ko bababangamiye, banyuze ku kiraro cyo huheza abandi kandi nabo bazi neza ko abo barwanya bafite uburenganzira busesuye bwo gukora politiki mu gihugu cyabo. Aya ni amacakubiri, akwiye kwamaganwa, politiki iheza abandi ikwiye kwamaganwa aho iva ikagera, abantu dukwiye kugira umuco wo kwemera guhangana mu bitekerezo byubaka.

Umunyapolitiki nk’uyu ni uwo gukomeza kurangaza abantu, mu by’ukuri nta gahunda aba afite, nta n’impamvu yo kumutaho igihe umukurikira, twirinde kuba ba rusahurira mu nduru, twirinde amaranga mutima ngo dutwarwe n’ibitadufitiye akamaro, dukwiye kurenga agahinda n’umubabaro duterwa n’ubuyobozi bwa  FPR- INKOTANYI ni abo bafatanyije, duharanira impiduka nziza kuri bene kanyarwanda bose.

Abanyarwanda dukwiye kuba maso ku bantu nk’abo, amateka akwiriye kutwigisha byinshi, FPR – INKOTANYI yaje ivuga ko izanye demokarasi, ivuga ko bagiye guca ubuhunzi, gucunga umutekano w’igihugu, uw’abantu n’ibintu,…ariko iyo urebye ibyo ikora ubu bihabanye kure n’intego zayo ndetse n’icyo yita gahunda yayo, biteye agahinda. Hari igihe mu Rwanda twigeze tuba muri pilitiki y’ubumwe n’amahoro ariko nti byabujije ko hariho ikibazo cy’uturere ndetse gikomeye n’ikibazo cy’impunzi ubuyobozi bwariho icyo gihe bwirengagizaga nti bubikemure, none ingaruka zabyo nitwe abaturage duhura nazo kandi n’abo bari k’ubuyobozi zitabaretse.

Niyo mpamvu, abanyarwanda tudakwiriye gukomeza gushukwa n’abanyapolitiki batazi ikibazo abanyarwanda dufite, badafite gahunda ya sosiyeti isobanutse kandi itagira uwo iheza, itanahungabanya abandi, hakenewe gahunda yo guhuza abantu ngo babane mu mahoro kandi u Rwanda rube urugo rwa bose. Gahunda zabo banyapolitiki n’izo guhangana gusa, nta cyerekezo zitanga cy’ejo hazaza.

Nakwibutsa abanyarwanda ko umunyapolitiki aho ava akagera arangwa n’ibi bikurikira:

1. 1.      Umunyapolitiki wese aharanira inyungu  (intérêts)

Umunyapolitiki iyo ava akagera aharanira inyungu ze, iyo atazibona arabireka. Umunyapolitiki aharanira inyungu z’ubwoko bubiri, ize ku giti cye cyangwa iza politiki. Nta muntu n’umwe ukora politiki adafite icyo agamije haba umuntu ku giti cye cyangwa k’umutwe wa politiki abarizwamo. Ibi bishatse kuvuga ko icyerekezo cyose umunyapolitiki atanga kiba kigamije kugera kuri za nyungu z’ubwoko bubiri twavuze haruguru. Iyo yahisemo nabi rero yoreka imbaga y’abamukurikiye.

Urugero natanga, biragoye kumvikana ukuntu Colonel KANYARENGWE Alex na Theoneste LIZINDE bo mu majyaruguru bifatanyije na FPR-INKOTANYI yaje irasa, yica abaturage, ihereye mu Turere tw’iwabo (amajyaruguru) bagambiriye gukuraho Nyakwigendera Prezida Juvenal HABYALIMANA, ukomoka mu majyaruguru. Biragaragara ko hari inyungu z’abantu ku giti cyabo n’iza politiki zari zigamijwe n’ubwo FPR itatumye bazigeraho ikazibavutsa, icyo gihe ntibari bitaye ku ngaruka ubwo bufatanye buzagira ku banyarwanda muri rusange.

1. 2.       Umunyapolitiki ntabwo agira inshuti ihoraho (pas d’ami eternel en politique)

Iyo umunyapolitiki abona ko inyungu yari agukeneyemo azibonye arakureka, agashaka izindi nshuti afitemo inyungu, abanyarwanda twigire ku byabaye, byakumvikana gute ko Prezida KAGAME Paul yacana umubano na Faustin KAYUMBA NYAMWASA na bagenzi be tutibagiwe n’abandi banyapolitiki bari bakomeye muri FRP-INKOTANYI barimo na Prezida BIZIMUNGU Pasteur, bafatanye igihugu byitwa ko bose baharanira uburenganzira bwabo, ariko Prezida  KAGAME Paul abonye ko aho kugira ngo ababonemo inyungu ahubwo babangamiye ize ahitamo kubakuaraho, bamwe arabangaza bava mu rwababyaye barahunga, ndetse benshi muri ngo « ni ibigarasha, n’umwanda ukwiye kujugunywa,… ».

Banyarwanda, iyo umunyapolitiki akurambiwe arakujugunya, akakureka.

Ni muri urwo rwego dukeneye demokarasi isesuye itari « responsable ya MRND cyangwa iyo gutekinika yazanywe na FPR mu Rwanda », kugira ngo abo banyapolitike nabo bahore badukeneye kuko bazaba badutezeho inyungu (Amajwi atuma bagera k’ubuyobozi), bamaze kutwereka gahunda (programme ou plan d’action) nziza abanyarwanda koko bakeneye icyemura ibibazo bafite, iyo umunyapolitiki mandat ye irangiye yarabeshye abaturage, ubutaha batora undi ufite gahunda nziza kandi iboneye.

1. 3.      Umunyapolitiki ntabwo agira umwanzi uhoraho (pas d’ennemi éternel en politique)

Muri politiki, uwahoze ari umwanzi ejo hashize, none ashobora guhinduka inshuti magara kuko basangiye inyungu bombi bahuriyeho. Reba nawe wasobanura ute uko Général Paul RWARAKABIJE na bagenzi be bari gukorana na FPR – INKOTANYI aribo ejo barwanaga ndetse bikaviramo abaturage benshi ba i Gisenyi na Ruhengeri.

Bwana Pierre Célestin RWIGEMA wahoze ari Minisitiri w’intebe, ejo hashize yashijwaga na Leta ya Kigali jenoside, none FPR irarebye isanga imukeneye, imufitemo inyungu, imukuraho jenoside none ubu yaragarutse ari gukorana na FPR – INKOTANYI, kuko bose bakeneranye kandi babifitemo inyungu. Ibi bishatse kuvuga ko nta mwanzi uhoraho muri politiki.

Banyarwanda, dukwiye kwitonda tugashishoza tukareba iyo tuvuye, aho turi n’iyo tujya, dukwiye gukurikira umunyapolitiki ufite gahunda ya sosiyeti isobanutse.

UMWANZURO

Abafilipi 2:1-4 havuga ngo « Ni uko niba hariho gukomezwa muri Kristo, kandi niba hariho guhumurizwa kuzanwa n’urukundo, niba hariho no gusangira Umwuka, niba hariho imbabazi n’impuhwe musohoreshe umunezero wanjye guhumuriza imitima mu rukundo, mwibwira kumwe muhuje imitima. Nti mukagire icyo mukorera kwirema ibice cyangwa kwifata uko mutari, ahubwo mwicishe bugufi mu mitima, umuntu wese yibwire ko mugenzi we amuruta. Umuntu wese muri mwe areke kwizirikana ubwe gusa, ah’ubwo azirikane n’abandi ».

Abanyarwanda turasabwa kugira urukundo, umuntu agakunda mugenzi we nk’uko yikunda, kugira imbabazi n’impuhwe. Niba twifuza kugira u Rwanda rwiza rubereye bose imbabazi ni ngombwa, kugira ubutabera bukora neza, kwamagana politiki zituremamo ibice, kwicisha bugufi no kubahana, kuvugisha ukuri no kwigira ku mateka.

Abanyarwanda turasabwa kandi kuba umuntu umwe tukavuga n’ijwi rirenga twamagana ingoma y’igitugu ya FPR – INKOTANYI n’amashyaka bafatanyije, kugira ngo icyiza gisimbure ikibi kuko bigaragara ko Leta ya Kigali yananiwe kandi itifuza kuba yakwikosora.

Amashyaka n’abanyarwanda barasabwa kwishyira hamwe mu ihuriro (coalition) bagahuza ingufu, bagahuza inama n’umugambi, bakarenga ibibatanya bagashaka ibibahuza. Iryo huriro ryaba rifite gahunda yo kubaka u Rwanda n’abanyarwanda, aho umututsi abona inyungu ze kandi zitanga umutekano kuri we, kubye no kube, umuhutu bikaba uko, kimwe n’umutwa ndetse n’abandi biyemeje kuba abanyarwanda bose bakazibona, k’uburyo buri munyarwanda yabona icyizere cyo kubaho ejo hazaza.

Amashyaka yose yifuza ko ibintu bihinduka mu Rwanda yahurira muri iryo huriro ariko bitabujije ko buri shyaka rikomeza gahunda yaryo, aho kwirirwa ku ma radio babeshya, basebanya, si nakorana na naka, si nashyikirana na kanaka, ibyo babivemo duharanire inyungu z’abanyarwanda bose.

DUHARANIRE KUBAHO

Tubifashijwemo n’Imana  no k’ubushake bw’abanyarwanda bose, abanyarwanda dukeneye Leta ibungabunga abanyarwanda n’u Rwanda, ihanga akazi ku baturarwanda bose, iharanira imibereho myiza kuri bose nta vangura, iterambere rirambye kandi risaranganyijwe, no guharanira gushaka ibisubizo biturutse ku baturage bose b’u Rwanda by’ibibazo bahuye nabyo no kwimakaza umuco w’amahoro,  iterambere, ukwishyira ukizana kuri buri wese, na demokarasi.

Duhaguruke rero duhuze ingufu duharanire kubaho kandi twitegurire u Rwanda rwiza rubereye bose.

Mu nkuru yacu itaha tuzabagezaho uruhare rwa amadini kugira ngo u Rwanda rube rwiza kuri bose.

Mugire amahoro y’Imana

Isaac MUKESHIMANA

E-mail: isamuke5@gmail.com

Amakuru atugezeho mu kanya aravuga ko imodoka zitwaye General Bosco Ntaganda zari zivuye kuri Ambasade y’Amerika ku Kacyiru zerekeza ku kibuga i Kanombe aho indege y’urukiko mpuzamahanga mpanabyaha itegerereje Ntaganda ngo ihite imujyana i La Haye mu Buhorandi kuri gereza y’urwo rukiko.

Amakuru arambuye mu kanya

Ubwanditsi

Click here to view the embedded video.

Barwanashyaka ba FDU-Inkingi,

Hashize imyaka 2 kuva igihe twateraniye mu nama yarimo abagize Inama Mpuzabikorwa (Comité de Coordination) n’abahagaraliye za CPL kw’itariki 26 Gashyantare 2011, nyuma y’aho bamwe muri bagenzi bacu biyemeje guhitamo indi nzira bakitandukanya natwe. Kuva icyo gihe, uretse za mitingi n’imyigaragambyo, ntitwashoboye kongera guhura mu nama yo muri urwo rwego.

Kuva Intwari yacu Madamu Victoire Ingabire Umuhoza yashorwa mu manza zishingiye kuri politiki agafungwa, agacirwa urubanza, ntiturashobora kwongera guhura mu nama nkuru nk’iyo ngo tumwerekere hamwe twese ko tumukinze ingabo mu bitugu.

Kuva aho dutangarije amategeko atugenga, tariki ya 3 Kamena 2012, za CPL ziracyiyubaka, ariko akarusho ni uko twashoboye gushyiraho ikarita y’umurwanashyaka. Abarwanashyaka bashobora kandi kwishyiriraho ababahagaraliye aho bari. Igihe kirageze ngo duhure dushimangire inzego dukoreramo, tuzisakazemo demokarasi ndetse n’umurwanashyaka ahabwe uruhare rwuzuye rwo gutanga umuganda we no gufata ibyemezo by’ishyaka.

Igihe kirageze kugira ngo tuganire ku cyerekezo cy’ishyaka, dufate icyemezo kidakuka cyo kugaragariza abanyarwanda n’amahanga ko Intwari yacu Victoire Ingabire, yemeye ubutumwa bukomeye twayihaye bwo gutangiza ishyaka mu gihugu no kwiyamamariza umwanya wa Prezida wa Republika, ariyo itubereye kw’isonga, ko ntawe ufite uburenganzira bwo kwiyitirira kumusimbura kandi afungiye impamvu za politiki akaba anazira ko ari n’umuyobozi mukuru wa FDU-Inkingi. Ibi bigomba kujyana n’ingamba tugomba gufata no gushyiraho umuyoboro uzatuma dutsinda urugamba rwa demokarasi twiyemeje.

Mu gihe amashyaka amwe yakoreraga hanze yafashe icyemezo cyo kujya gukorera nayo politiki mu Rwanda, mugihe andi avuka uko bucyeye n’uko bwije, dukeneye kunoza umurongo tuzagenderaho mu mikoranire yacu n’ayo.

Kubera izo mpamvu, nkurikije ingingo za 10, 11 na 13 z’Amabwiriza  ngengamikorere y’abarwanashyaka ba FDU-INKINGI baba mu mahanga nejejwe no kubatumira mu Nama Nkuru Mpuzamahanga (Congrès international), izaba tariki ya 5 Gicurasi 2013 - (5.5.2013)  – i Bruxelles.

Adresi y’aho inama izabera muzahamenyeshwa mu minsi iri imbere

Ku murongo w’ibizasuzumwa mu nama, hari ingingo ebyiri :

1. Icyerekezo cy’ishyaka, ingamba n’imikorere bijyanye (mesures d’accompagnement).

2. Gukorana n’andi mashyaka.

Kugira ngo dutegure iyo nama neza, nabasabaga abayobora CPL ko :

• Aho bishoboka, mwandika abarwanashyaka kandi bagahabwa amakarita yabo;

• Aho bishoboka, hatorwe abagize inzego z’ibanze, abatowe bazahagararira abandi muri iyo nama hakurikijwe amabwirizangengamikorere yavuzwe hejuru; http://www.fdu-rwanda.com/RW/kinyarwanda-amabwiriza-ngengamikorere-yabarwanashyaka-ba-fdu-inkingi-baba-mu-mahanga/

 Turizera ko tuzajya impaka zubaka muri demokarasi ntawe uniganwa ijambo, bikazatuma tugera ku myanzuro izatuma dutera intambwe mu guharanira ko abanyarwanda basubirana uburenganzira bwabo bavukijwe n’ingoma y’igitugu iganje mu Rwanda.

Twese hamwe tuzatsinda.

Bikorewe i Lausanne kuri 21 Werurwe 2013.

Nkiko Nsengimana

Umuyobozi wa Komite Mpuzabikorwa wa FDU Inkingi

Bimenyeshejwe :

-          Komite Nshingwabikorwa y’agateganyo (CEP)

-          Komite Mpuzabikorwa (CC)

Invitation_Congrès_interna tional_des_FDU_5.5.2013

Click here to view the embedded video.

Nk’uko tutahwemye kugaragaza ko leta ya Kigali hari gahunda itura ku baturage batabanje kuzigishwaho inama kandi izo gahunda zikabagiraho ingaruka,ni muri urwo rwego ubu hirya no hino mu gihugu cyane cyane abaturage batuye ahantu hahanamye ndetse no muhitwako hari ibishanga nko mu mugi wa Kigali mu murenge wa Gitega,umurenge wa Kimisagara yo mu karere ka Nyarugenge,umurenge wa Kimihurura,umurenge wa Gatsata yo mu karere ka Gasabo ndetse no mu bindi bice by’umugi wa Kigali bakomeje guhatirwa kwimuka aho batuye n’inzego z’ibanze.Ibi byagaraye ubwo ubuyobozi bw’imirenge bubicishije mu nyandiko ndetse no mu manama atanduka ubuyobozi bw’utugali bwagiranye n’abaturage bwamenyesheje abaturage ko bahawe iminsi mirongo icyenda(90) yo kuba barangije kuva aho batuye bakajya gushaka ahandi batura ndetse bategeka n’abasanzwe bakodesha(abapangayi) ko batemerewe kongera gukodesha amazu yaho hantu.

Ishyaka PS Imberakuri ritewe impungenge n’uburyo iki gikorwa kirimo gutegurwa,kuko ubwacyo nk’igikorwa nyirizina cyo kwimura abaturage ahantu habi hashobora guteza impanuka mu gihe runaka ntabwo ari kibi,ikibazo ni uburyo aba baturage bategetswe kwimurwa ntiberekwe ahandi bazerekeza gutura,ikibabaje kandi ni uburyo aba bayobozi aribo bazengurutse baka umusoro ku bukode bw’amazu,amazu bamaze kubwira abapangayi ko batangomba kongera gukodesha.
Ibi bije nyuma yaho ubuyobozi bw’umugi wa Kigali butangarije ko 45% by’abatuye mu mugi wa Kigali bari munsi y’umurongo w’ubukene,bukaba buzi neza ko aba 45% abenshi aribo baba ahantu nkahariya buri kwimura abaturage nta ngurane butanze.Aha umuntu akaba yakwibaza buryo ki umuturage azabura idorari rimwe(1$) ku munsi rimutunga maze akabona amafaranga amwimura?

Nubwo amategeko atemerera abantu batuye mu bishanga guhabwa ingurane,ariko leta yakagombye kumenya ko mbere y’uko aya mategeko ajyaho aba baturage batuye mu bishanga nka Kosovu ya Kimihurura bari basanzwe bahatuye,abashyizeho amategeko bakagombye no kuba bararebye ingaruka aya mategeko azagira ku baturage maze bakazikumira hakiri kare.

Bamwe mubo ishyaka ry’Imberakuri ryegereye baritangarijeko badafite n’ubushobozi bwo kugura na shitingi,bibaza kandi nanone baramutse babonye izo shitingi aho bazishinga,aha naho twabibutsa ko shitingi ari imwe muri nyakatsi kandi uRwanda rwaciye nyakatsi.

Ishyaka ry’Imberakuri rikomeje gusaba inzego z’ibanze guha umutuzo abaturage kuko akenshi nizo zirirwa zitubwira ko abanyarwanda bishoboye kugirango zikunde zishimishe abayobozi bo mu nzego zo hejuru,ari naho haturuka ibi bibazo byose.

Ishyaka PS Imberakuri rikaba risaba leya ya Kigali kugirana ibiganiro n’abaturage barebwa n’iki kibazo maze bakerekwa ahantu bagomba gutura nabwo habanje kwigaho neza hato bitazamera nk’abajyanwe gutuzwa ku Ruyenzi none ubu naho hakaba hatemerewe guturwa,mu gihe amazi atari yarenga inkombe kuko ngirango abayobozi ba Kigali bakagombye kureba uko abaturage ba Kimihurura bataye umuyobozi mu nama maze bakareba uko abaturage bakomeje kwakira iki kibazo kibibasiye.

PS Imberakuri

Bosco Ntaganda yagejejwe bwa mbere imbere y’abacamanza b’urukiko mpuzamahanga mpanabyaha kuri uyu wa kabiri tariki ya 26 Werurwe 2013 i La Haye mu gihugu cy’u Buhorandi.

Bosco Ntaganda yahakanye ibyo aregwa byose abwira urukiko ko ari umwere, kuri uwo munsi wa mbere w’urubanza wari ugamije kugaragaza umwirindoro wa Bosco Ntaganda.

Ntaganda akurikiramywe kubera impapuro 2 zo kumufata zatanzwe n’urukiko mpuzamahanga mpanabyaha rumwe mu 2006 urundi mu 2012, urwo rukiko rumurega ibyaha by’intambara n’ibyaha byibasiye inyokomuntu byakorewe muri Ituli hagati ya 2002 na 2003.

«Namenyeshejwe ibyaha ndegwa ariko simbyemera» ayo ni amagambo yatangajwe na Bosco Ntaganda mu rukiko. Ariko umucamanza w’urukiko mpuzamahanga Mpanabyaha Ekaterina Trendafilova  yamuciye mu ijambo amusobanurira ko impamvu urukiko rwateranye uwo munsi atari  ukumenya niba Ntaganda yarakoze ibyaha cyangwa atarabikoze. Ahubwo ngo hagamijwe kumenya umwirondoro we.

Ntaganda wari wambaye ikositimu y’umukara wogoshe umusatsi yawumazeho yibwiye urukiko muri aya magambo:«Nitwa Bosco Ntaganda, mfite amazina abiri gusa, amazina nahawe n’ababyeyi banjye. Nk’uko mubizi, nabaye umusirikare muri Congo, navukiye mu Rwanda nkurira muri Congo. Ndi umunyekongo». Icyatangaje benshi n’uko Bosco Ntaganda yasabye kuburana mu Kinyarwanda ngo nirwo rurimi yumva neza ngo n’agafaransa gake.

Mu gihe urukiko rwateranaga i saa tanu ku isaha yo mu Buhorandi, umucamanza yagenzuye niba uregwa yamenyeshejwe ibyo aregwa n’uburenganzira ahabwa n’amasezerano y’i Roma yashyizeho urwo rukiko.

Abacamanza b’urugereko rw’ibanze bagennye ko tariki ya 23 Nzeri 2013 ari ho urukiko ruzaterana rukemeza ibyaha rurega Ntaganda.

Twabibutsa ko Bosco Ntaganda yagejejwe i La Haye ku cyicaro cy’urukiko mpuzamahanga mpanabyaha ku ya 22 Werurwe 2013 avanywe mu Rwanda, aho yari yishyikirije cyangwa yashyikirijwe ambasade y’Amerika i Kigali agasaba kujyanwa ku rukiko mpuzamahanga mpanabyaha rwari rumaze igihe rumushaka. Ibi byabaye nyuma y’aho ingabo zari zishyigikiye Bosco Ntaganda na Jean Marie Runiga zitsindiwe n’izishyigikiye Sultani Makenga mu ntambara yari ishyamiranyije ibice bitumvikana muri M23. Ariko uburyo Ntaganda yageze muri Ambasade y’Amerika i Kigali byo biracyari urujijo kandi hari benshi bahamya ko urwo rujijo ari ryo pfundo ry’uburyo Ntaganda azitwara mu rubanze rwe.

Marc Matabaro

Click here to view the embedded video.

Tariki ya 25 Werurwe 2013 ku kicaro cy’urukiko rw’ikirenga habereye urubanza rwa politiki rw’ubujurire ubushinjacyaha bw’uRwanda buregamo umuyobozi w’ishyaka FDU-Inkingi Mme Victoire Ingabire Umuhoza. Urubanza rugitangira abareganwa na Madamu Ingabire aribo Major Vital Uwumuremyi, Lieutenant Colonel Habiyaremye Noel na Lieutenant Colonel Tharcisse Nditurende bamenyesheje urukiko ko bifuza kurekurwa bakajya bitaba urukiko bari hanze kuko igihano bari barakatiwe n’urukiko rukuru cyarangiye.

Urubanza rukaba rwaranzwe n’ibikorwa by’iterabwoba bikabije kuko kuva mu ma saa mbiri n’iminota 15 abapolisi bari bakwiriye mu bice bitandukanye byegereye inzira zijya ku cyicaro cy’urukiko rw’ikirenga aho abapolisi bafataga umuntu uwo ariwe wese wakekwaga kuba aje mu rubanza ku buryo umubare w’abatawe muri yombi  utaramenyekana bitewe no kuba bagiye bafatirwa mu bice bitandukanye.  Mu batawe muri yombi harimo n’Umunyamabanga Mukuru w’ishyaka FDU-Inkingi, Bwana Sibonama Sylvain, wafashwe agiye gusobanuza impamvu abarwanashyaka barimo kuvutswa uburenganzira bwabo bwo gukurikirana urubanza kandi nta rwego na rumwe rubifitiye uburenganzira rwigeze rutangaza ko urubanza rw’Umuyobozi Mukuru wa FDU-Inkingi ruzajya rubera mu muhezo.Ubu amakuru tumaze kumenya ni uko Bwana Sibomana Sylvain ashobora no kuhatakariza ubuzima kuko yakorewe iyicarubozo kuburyo ubu atabasha  kuva aho ari adateruwe. Twabashije kumenya ko n’indi mpirimbanyi ya demukarasi, Bwana Shyirambere Dominique, nawe yatawe muri yombi azira kuba nawe yari mu bitabiriye kuza muri urwo rubanza. Abandi bafashwe bagiye bafungirwa ku ma sitasiyo ya polisi atandukanye.

Isomwa ry’urubanza ku nzitizi zatanzwe n’abashinjwana na Mme Victoire Ingabire basaba kurekurwa rikaba rizaba tariki ya 28 Werurwe 2013, naho urubanza rukazakomeza ku matariki ya 16, 17 18, 22, 23, 24, 29 n’iya 30 Mata 2013.

FDU-Inkingi
Boniface Twagirimana
Umuyobozi wungirije w’agateganyo

(Kigali, tariki ya 26 Werurwe 2013).-Amakuru atugezeho mu kanya aravuga ko ku Kimironko haturikiye igisasu ahagana hagati y’isoko n’aho abagenzi bategera imodoka (Gare). Ku gahanda hafi y’ahahagarara amapikipiki n’amavatiri bitwara abagenzi. Ibyo ngo bikaba byabaye muri ako gace umuriro w’amashyanyarazi wagiye.

Amakuru atangazwa n’igipolisi cy’u Rwanda mu ijwi ry’umuvugizi wacyo, Supt Theos Badege, aravuga ko icyo gisasu cyaturitse isaa moya z’umugoroba ziburaho iminota mike, cyahitanye umuntu umwe (umukobwa izina rye ritaramenyekana) hagakomereka abantu bagera ku 8. Polisi n’abasirikare ngo bahise bahagera. Ngo abantu babiri bakekwa kuba bagize uruhare mu iterwa ry’icyo gisasu batawe muri yombi.

Hari hashize igihe hatavugwa iterwa ry’ibisasu mu Rwanda, dore ko mu myaka ishize hagiye haterwa ibisasu byinshi polisi ikabyitirira abatavuga rumwe n’ubutegetsi bahungiye hanze y’igihugu barimo Lt Gen Kayumba Nyamwasa ariko abo byitirirwa barabihakanye.

Icyakomeje gutangaza abantu n’ukuntu mu maperereza yagiye akorwa na polisi n’izindi nzego hatigeze hagaragazwa abafashwe n’ibimenyetso bifatika ku buryo budasubirwaho ku bihishe inyuma y’iterwa ry’ibi bisasu.

Umuntu akaba atabura kwibaza icyo abasirikare birirwa bazenguruka igihugu cyose, uruhuri rw’inzego zishinzwe umutekano n’iperereza bimaze n’amafaranga y’umutekano acibwa abaturage mu gihe umutekano wabo udashobora kurindwa bihagije

Ubwanditsi

Mme ministre Mukantabana Séraphine ushinzwe impunzi n’ibiza, azi neza ko nta munyarwanda w’impunzi utifuza gutaha ngo abe mu Rwanda rwamubyaye. Ni byo Mme ministre yabaye impunzi arazizi kuko yabaye n’umwe mu baziyoboraga iyo yari muri Kongo Brazzaville.Yigeze ndetse gushaka gufatanya n’abandi guharanira ko impunzi zataha zemye zigira ijambo mu gihugu cyazo, nyuma aza kunanirwa ahitamo gutahuka agakomera amashyi ingoma y’igitugu yahejeje impunzi ishyanga. Ni byo koko ubuze ay’i buryo akama ay’i bumoso!

Ibyo yavuze kuri radio ijwi ry’amerika tariki ya 10/3/2013 byateye kwibaza.

1.Yemeza ko abadatahuka ari uko ababo bari mu gihugu babatera ubwoba ngo nibataha bazafungwa kugira ngo bagumane imitungo yabo nta nkomyi. Aha umuntu yakwibaza niba ushobora gukangisha umuntu mukuru ikidateye ubwoba akabugira. Ahubwo bababwiza ukuri ku biba mu Rwanda nareke kubabeshyera ngo ni imitungo baba batsimbarayeho. Ikibazo ahubwo ni ubuyobozi bubi buryanisha abanyarwanda aho kuba umubyeyi wa bose; amahoro n’umutekano avuga iyo biba biriho mu Rwanda impunzi zatashye. Arashaka kumvikanisha ko washyira umwana imbere y’intare ukamubwira ngo ntizamurya!

Mme Mukantabana atahutse ava i Brazzaville

2.Arongera agahamya ko abahunga ubu babigira nkana kugira ngo bajye kwishakira akazi n’imibereho hanze! Arashyinyagura, akabeshya akanabeshyera abahunga. Nta wakwifuza kujya kuba ishyanga nta mpamvu.

Ahubwo yirengagiza nkana impamvu nyazo zituma impunzi zidatahuka:

-Kubura amahoro no kwishyira ukizana mu Rwanda utagombye gupfukamira Paul Kagame nkuko yabikoze .

-Politike ikenesha abaturage.

-Kwikubira umutungo w’igihugu kw’agatsiko kari ku butegetsi.

-Guhimbira abantu ibyaha no gutoteza uwo ari we wese uvuze ibitagenda.

-Kubeshya rubanda ngo nta moko ariho mu gihugu kugira ngo hatoneshwe bamwe abandi batsikamiwe.

-Itotezwa n’irigiswa ry’abanyamakuru barebera bakanavugira rubanda,n’ibindi…

Mme ministre aribuka Kagame ari i Murambi ku Gikongoro mu gihe cy’icyunamo aho yivugiye ubwe ko yababajwe n’uko imbaga y’abahutu yamucikiye muri Kongo adashoboye kubica.

Ni byo koko umwanya yarawubonye, na we ubwe yivugiye ko byamutunguye ariko amenye ko ntacyo azarusha abamubanjirije nka Bizimungu Pasteur, Sendashonga Seth, Kanyarengwe Alexis, Habyarimana Emmanuel,…

Mu gusoza, inama twagira Mme ministre, ni ukubwira abamuhaye akazi ko icyatuma impunzi zitahuka ari uko bakwemera hakabaho ihuriro ridaheza ry’ibitekerezo byubaka ku kaga kagwiriye abanyarwanda (abahutu, abatutsi n’abatwa), ababigizemo uruhare bose bagashyikirizwa ubutabera maze amahoro akagaruka mu Rwanda no mu karere .

La Forge Fils Bazeye

Umuvugizi wa FDLR

Banyarubuga,
Amakuru dukesha umuvandimwe w’umwe  mu barwanyi ba M23 bari mu gihugu cyacu Kagame yahinduye akarima ke, aratubwira ko  ubu hari AMARIRA N’IMIBOROGO birenze ukwemera mu babyeyi  b’abanyarwanda baturutse iyo za Masisi na Rutchuru kubera umubare utagira ingano w’abana babo baguye mu mirwano iherutse gushyamiranya ingabo zari zishyigikiye Runiga na Ntaganda ku ruhande rumwe, n’izarizishyigikiye Makenga ku rundi ruhande.

Bijya gutangira (Mana yanjye weeee!), Baje mu gicuku…..! Bosco Ntaganda yumvishije abasirikare bari ku ruhande rwa Jean Marie Runiga ko Sultani Makenga yariye ruswa ivuye kwa Kabila, ngo ku buryo basigaye bakorana ku mugaragaro. Nibwo rero Ntaganda na Runiga (bari kumwe n’uwitwa Zimulinda na Baudouin Ngaruye n’abandi ba officiers) bohereje igitero “simusiga” aho Makenga n’ingabo zimurinda bari bashinze ibirindiroahitwa mu Cyanzu kugirango zimwivugane.

Icyo gitero ngo cyari gikomeye cyane kuburyo Makenga yagombye gusaba umusada (kwitabaza)  ba  Lieutenant Colonel Yusuf Mboneza (akaba murumuna wa Rurankunda = Laurent Nkunda), Colonel  Manzi, Colonel  Gakufi,  n’abandi.  Iyo mirwano yagejeje mu rukerera abarwanira  “Pastoro” Jean Marie Runiga Lugerero na Bosco Ntaganda baneshejwe  n’abari ku ruhande rwa Sultani Makenga (alias Ruzindaza).  Biravugwa ndetse ko n’ubwo ku ruhande rwa General Makenga haguye abantu benshi, ngo mu bari baje boherejwe na Ntaganda na Runiga NTA N’UMWE WASUBIYE YO.

Ubwo ngo habayeho imishyikirano yo kumvikanisha abo bavandimwe bari bamaze gusubiranamo, ari nabwo u Rwanda rwabyivanzemo, rushaka kumvisha uruhande rwa Runiga na Ntaganda  ko  abari kumwe na Makenga batitaye ku nyungu z’u Rwanda, ko ari abanyekongo b’abanyejomba, naho abandi bakaba ari abana b’impunzi z’abanyarwanda (abatutsi b’umwimerere) bagiye gutura iyo za Masisi.

Havutse ikibazo ariko kubera ko n’ubwo abari ku ruhande rwa Makenga bari bake mu mubare (peu en nombre), nibo bari bafite ububiko bw’ibikoresho byose (amabombes n’intwaro za rutura). Generali Kabarebe na Kayonga bumvishije Ntaganda na Runiga ko icyo atari ikibazo, ko bazabagezaho ibikoresho bakeneye bidatinze ariko bagakubita iyo mbwa ngo ni Makenga. Aha niho abaturage baturiye umupaka wa Kabuhanga bavuga ko biboneye amakamyo ya gisirikare y’u Rwanda agera kuri 6 yavuye  mu Rwanda  agemuye ibikoresho bya gisirikare muri biriya byumweru byabaye mo imirwano.

Ubwo rero rwahise rwabikana. Twavuze ko  abasirikare bari ku ruhande rwa Ntaganda na Runiga barutaga ubwinshi abari ku Ruhande rwa Makenga, ndetse ngo n’abarwanyi b’intwari nk’abo ba Baudouin Ngaruye, ariko Makenga yabarushije kuba yari afite ibikoresho. Byageze aho ndetse abana (mwumve abasirikare) bari ku ruhande rwa Ntaganda bashaka gutoroka ngo basange abavandimwe babo bari kumwe na Makenga, ariko Ntaganda  kubera ubugome bwe (Isura ye nziza ntikagire uwo ishuka, kuko na Lusifero bavuga ko  asa na marayika w’umucyo), umwana  batahuragaho bene ibyo bitekerezo iyo atahitaga yicwa, yashyirwaga muri armes d’appui (imbunda z’imisada), ni ukuvuga mu ngabo ziri inyuma zapuiya abari imbere zikoresheje imbunda nini, ku buryo ama officiers ayoboye urugaba iyo yabonaga bene abo bana batohereza amabombes muri bene wabo, bahitaga babarasa.

Nguko uko abana bagiye bohereza ibisasu bya rutura ku birindiro bazi ko birimo barumuna cyangwa bakuru babo, bene nyina wabo, babyara babo cyangwa ba se wabo naba nyirarume.

Byaje kurangira rero hapfuye ABASIRIKARE BATABARIKA KU MPANDE ZOMBI. BAVUGA KO HAGUYEMO ABA OFFICIERS SUPERIEURS (NI UKUVUGA KUVA KURI MAJOR GUSUBIZA HEJURU) BARENGA 12,  ABAPFUYE BARENGA 200, INKOMERE ZITAGIRA INGANO. Ku buryo na murumuna wa Laurent Nkunda w’umu Lieutenant Colonel witwa Mboneza, wari ku ruhande rwa Makenga yakomeretse bikomeye. Na Makenga nawe ubwe ngo yaba yarakomeretse byoroheje.

Bamaze kubona basumbirijwe, Runiga, Ngaruye, Zimurinda  n’abandi ba officiers bari kumwe nabo bahise bategeka ko abo bari kumwe bose bakizwa n’amaguru bakerekeza iyo bateye baturuka, ni ukuvuga mu Rwanda. Hagati aho ariko “umubingwa Ntaganda” wari wemereye Kabarebe na Kayonga ko Makenga “nta mutamiro umurimo”, yabonye ko bimucikiyeho atangira kwibaza uko ari bubyifatemo.

Kimwe na Napoleon, buri murwanyi wese agira Waterloo ye!  Ngaruye, Zimurinda na Runiga barebye Ntaganda bati tubigire dute ko tuneshejwe kandi twari twaremereye  bene Kagame ko tuzanesha Makenga. Hagati aho Bosco Ntaganda we yari arimo kwibaza umubare w’abana amaze kumarisha ku mpande zombi. Kuko uko urugamba rwagendaga rukomera niko ababyeyi n’abavandimwe b’abo bana bamenyeshwaga rwihishwa n’abandi ko abana babo baguye ku rugamba cyangwa bakomeretse bikomeye, bagashakisha abo ba Ntaganda (kuko niwe wari uzwi cyane) bati mwahagaritse ibyo byorezo, ariko we akabumvisha ko bagomba kunesha umwanzi wabo Makenga, umunyejomba uri kumwe n’umuhutu Kazarama, bifatanije n’abanyekongo (ingabo za Congo).

AHO NTAGANDA ABONEYE KO ATAZAKIRA UMUJINYA W’ABABYEYI YAMARISHIRIJE ABANA, KANDI ADASHOBORA GUHINGUKA IMBERE YA  GROUPE KKK (KAGAME, KABAREBE, KAYONGA), NTAGANDA YAHISE AFATA STRATEGIE YO KWISHYIKIRIZA  URUKIKO MPUZAMAHANGA MPANABYAHA, KUKO NIHO HONYINE YARI ASIGARANYE UMUTEKANO WE.

Uko Ntaganda yageze kuri Ambassade y’Abanyamerika byafata indi message.  Gusa ikizwi neza n’uko yabanje kujijisha abeshya ko ashaka guhungira  mu mashyamba ya Congo, naho umubingwa ahubwo yifatiye inzira ya Mukamira, Kabaya, Ngororero, Gitarama. Ageze i Kigali ahita yishyikiriza Ambassade y’abanyamerika. Ibyo byose byatunguye Kabarebe, Kayonga, na Kagame wari uri kwitemberera iyo za Mexico.

Igiteye agahinda kuri iki gihe rero, n’uko ababyeyi b’abana baguye ku rugamba, ubu barimo kurira ayo kwarika, kandi nta burenganzira bafite bwo kugaragaza agahinda kabo, kuko Leta y’u Rwanda yahita ibarega guhungabanya umutekano cyangwa gukwirakwiza INGENGABITEKEREZO YA GENOCIDE. Ntabwo bemerewe gukora ikiriyo. Abana babo abenshi bariwe n’imbwa ku gasozi iyo za Kibumba.

Ahasigaye umuntu yakwibaza ati nyuma y’ayo mahano ajya gusa n’ayabereye ku Rucunshu igihe cya Kabare, Kanjogera na Ruhinankiko, ni igiki kigiye gukurukiraho?

Ariko se ubundi, bariya babyeyi bakomoka za Masisi n’ahandi muri Congo, ko tuzi ko abenshi bafite abana babo mu nzego z’ubuyobozi zo hejuru mu Rwanda, abana babo bakaba barimo kwiga muri za Kaminuza zinyuranye zo mu Rwanda, harya ubundi barinda bohereza abana babo mw’ibangiro ryo muri Congo ko n’ubundi bayivuyemo bayireba, harya ngo ni ibyo bikuyu (amaranchi) basize za Masisi bashaka gukomeza  gutunga  hejuru y’ubutunzi baboneye mu Rwanda.

Mu magambo make rero, ntakindi cyatumye Ntaganda  yishyikiriza urukiko rwa La Haye, uretse gushaka kwihisha umujinya w’ababyeyi b’abanyarwanda yari amaze kumarishiriza abana ku rugamba rudafite icyo rurwanira, uretse ibyubahiro, ubwibone, na Nanga agasuzuguro.

Karoli.
DHR

Ku mugoroba wo ku wa kabiri taliki ya 26 werurwe 2013, inzego z’ubutasi za Perezida Kagame zongeye gukora igikorwa cya bunyamaswa zajyaga zikora mu myaka ishize, ari cyo cyo gutera abaturage ibisasu, zigamije kwiteza umutekano mucye, ibi mu rwego rwo guhahamura abaturage hamwe n’amahanga.

Icyo gikorwa kikaba cyarakorewe kuri gare ya Kimironko mu ma saa 18:47, ahantu harangwa n’urujya n’uruza rw’abantu, barimo n’abashinzwe umutekano, gihitana umuntu umwe, abandi bagera kuri cumi na babiri barakomereka ku buryo bukabije.

Itohoza ryakozwe n’Umuvugizi rikaba ryemeza ko icyo gikorwa gitindi cyakozwe n’ingabo zishinzwe kurinda umugi wa Kigali, by’umwihariko zibarizwa muri «Special Force Brigade». Icyo gikorwa cy’ubugome kikaba kandi cyari kiyobowe na Major Willis Kabutura, umwe mu bicanyi batojwe n’urwego rw’ubutasi rwa gisirikare (DMI), akaba yarakunze kwamamara cyane mu mwaka wa 2010 ubwo yakoreshwaga ibindi bikorwa by’ubwicanyi na Gen Jack Nziza, ku mabwiriza ya perezida Kagame, akaza gihindurirwa akazi, nyuma yo kwamamara na none mu bindi bikorwa by’ubwicanyi yagiye akorera abanyarwanda ku nshuro zitandukanye.

Nkuko bamwe muri za maneko za Kagame babidutangarije, ariko bakaba batarashatse ko dushyira ahagaragara amazina yabo kubera impamvu z’umutekano wabo, uku gutega abaturage ibisasu byakozwe n’ingabo za «Special Force Brigade», zibitegetswe n’urwego ruyobowe za maneko za Kagame, ari rwo NSS, ndetse icyo gikorwa kikaba cyari kizwi n’urwego rw’ubutasi rubarizwa muri Polisi y’igihugu (Special Intelligence), ahakunze kwitwa kwa Gacinya.

Maneko za Polisi y’igihugu ziyobowe n’umwicanyi ruharwa, ACP Kalisa Faustin, na we wageze muri Polisi aturutse muri DMI, zarebereye icyo gikorwa cyo kwica, cyanakomerekeje abaturage bagera kuri cumi na babiri kugirango hato kitaza kuvamo inkwakuzi y’umusirikare cyangwa y’umupolisi waba utari azi ayo mabwiriza yari yatanzwe, akaba wenda yari gufata bagenzi be bari bateye icyo gisasu.

Umwe mu bo twavuganye yabidutangarije muri aya magambo : “Birababaje kubona abashinzwe umutekano bagenzi bacu ari bo batera ibisasu abaturage dushinzwe kurinda. Kuva muri 2010 twibazaga ko gutera abaturage ibisasu byakorwaga kugirango abaturage baterwe ubwoba, bityo ntihazagire usakuza perezida Kagame amaze kwiba amatora. Ikindi twibazaga nuko twiruhukije nyuma y’aho Lt Col Karangwa aviriye muri DMI, dore ko ari we wari uyoboye ibikorwa nk’ibi byo gutera abaturage ibisasu byagiye bihitana benshi kuva mu kwezi kwa gatatu 2010 kugeza amatora y’umukuru w’igihugu arangiye. None birongeye. Icyo tuzi cyo nuko ibi nta kindi bigamije uretse kugirango inzego z’umutekano zacu ziteze umutekano mucye, zigamije kwitirira ibyo bikorwa by’ubwicanyi abatavuga rumwe n’ubutegetsi bwa Kagame no kubona impamvu  zo kuvogera ubutaka bwa Kongo, zitwaje ko zirimo guhiga FDLR, ariko ukuri nuko ari uburyo perezida Kagame yabonye bwo kwitwaza yereka amahanga ko u Rwanda rufite umutekano mucye, ruwutewe n’umutwe witwara gisirikare ufite ibirindiro muri Kongo, ibi bikaba nta kindi bigamije uretse kubona urundi rwitwazo rwo gukomeza gusahura umutungo kamere wa Kongo yitwikiriye   umutwe wa M23 no kubona urwitwazo rwo gukomeza kuniga ukwishyira ukizana kwa buri munyarwanda no kwimakaza igitugu hakoreshwa iturufu y’umutekano mucye kugirango bafunge abatavuga rumwe na perezida Kagame no kubuza amashyaka ya politiki atari mu kibaba cya FPR kwiyandikisha kugirango agire uruhare muri politiki y’igihugu cyabo”.

Undi twavuganye yaratangaye cyane aduseka, tumubajije abihishe inyuma yo gutera kiriya gisasu cyahitanye umuturage kikanakomeretsa abagera kuri cumi na babiri, maze abivuga muri aya magambo : “Mwazatubarije izo njiji ngo ni maneko za Kagame impamvu hahora haterwa ibisasu abaturage ntibiterwe ku bigo byabo bararamo cyangwa kwa Kagame, dore ko iteka umwanzi ashakisha aho ibirindiro bya gisirikare cyangwa bya polisi biba biherereye kugirango abice ingufu; muzongere mutubarize ubuyobozi bwa polisi nimba butari muri icyo gikorwa cy’ubwicanyi, dore ko bwavuze ko hakomeretse abantu barindwi kandi ari cumi na babiri“.

Nyuma y’ayo magambo y’umwe muri maneko za Kagame, warakajwe cyane n’icyo gikorwa cy’ubwicanyi kibasira inzirakarengane z’abasiviri gikozwe na bagenzi be, twanyarukiye ku bitaro bya Kibagabaga aho izo ndembe zahise zijyanwa zikimara gukomereka, dusanga ari abantu cumi na babiri bakomeretse bikabije, icyo gisasu kikaba cyaranahitanye umukobwa w’imyaka cumi n’umwe.

Ibi bikaba bibaye mu gihe umugi wa Kigali uza ku isonga mu yindi migi irinzwe cyane, ugereranyije n’indi migi yo mu bihugu byo mu karere, dore ko umugi wa Kigali ufite abasirikare benshi bakorera inzego z’umutekano zitandukanye zibarizwa mu mugj wa Kigali no mu nkengero zawo, ndetse na polisi, ukongeraho n’urwego rw’inkeragutabara, ku buryo bigoranye kubeshya abanyarwanda ko hari umuntu ushobora guhirahira akora igikorwa cy’ubwicanyi nk’icyo atarafatwa, mbere yuko gikorwa.

Gasasira, Sweden.

Ibi byatangarijwe i Bruxelles mu Bubiligi n’amashyaka RDI Rwanda Rwiza na PDP-Imanzi. Ayo mashyaka ya politiki atavuga rumwe na Leta y’u Rwanda yamenyesheje kuri uyu wa kane tariki ya 28 Werurwe 2013 mu kiganiro n’abanyamakuru ko agiye gukorera politiki mu Rwanda.

Twabibutsa ko ibi atari inkuru nshya kuko hamaze iminsi hari amakuru ndetse n’ibiganiro bitandukanye by’abayobozi b’ayo mashyaka basobanura intego bafite muri iyo gahunda y’amashyaka yabo yo kujya gukorera mu Rwanda.

Nk’uko byakunze kugarukwaho na Bwana Faustin Twagiramungu, wigeze kuba Ministre w’Intebe ubu akaba ari umukuru w’ishyaka RDI Rwanda Rwiza na Bwana Gérard Karangwa Semushi, umukuru wungirije w’ishyaka PDP-Imanzi, ngo ikigamijwe n’ukujya gusaba Leta y’u Rwanda iyobowe kuva mu 1994 mu buryo bw’igitugu cya gisirikare na Perezida Kagame n’ishyaka rye rya FPR gufungura urubuga rwa politiki mu Rwanda. Ngo n’ubwo ubwo butegetsi bwiyorobeka bugakomeza gukinga igihu mu maso y’amahanga.

Abayobozi b’ayo mashyaka yishyize hamwe muri iki gikorwa cyo gukorera politiki mu Rwanda bongeye kwemeza ko batazarenza itariki ya 30 Kamena 2013 bataragera mu Rwanda.

Kuri Karangwa Semushi ngo ntabwo wafatanya n’umuntu inzira mudafite ibibahuje. Ngo ayo mashyaka ahuriye kuri byinshi ku buryo iki gikorwa kitari icya buri shyaka ukwaryo ahubwo bagihuriyeho. Intego ya mbere y’ibanze ngo yihutirwa ni ugushakira abanyarwanda n’abo bayobozi ba PDP na RDI barimo ndetse ngo n’abayobozi b’u Rwanda urubuga rwo kwisanzura muri politiki na demokarasi, ngo nyuma ayo mashyaka azamurikira abanyarwanda imigabo n’imigambi yayo.

N’ubwo bwose aba bayobozi bavuga ko biyemeje gukora politiki mu Rwanda ntawakwiyibagiza ko hari abanyapolitiki benshi bafunze bazira ibitekerezo byabo banarimo umukuru w’ishyaka PDP Imanzi, Bwana Déogratias Mushayidi wakatiwe gufungwa burundu.

Muri icyo kiganiro n’abanyamakuru i Bruxelles, ari Bwana Karangwa Semushi, ari Bwana Twagiramungu bashimangiye ko abanyarwanda babategereje ku bwinshi. Ariko ngo ayo mashyaka ngo ntajyanywe no guhangana, intambara cyangwa kugira uwo yikiza nk’uko byagarutsweho na Bwana Karangwa Semushi wanongeyeho ko iki ari cyo gihe cyiza cyo kujya gukorera politiki mu Rwanda mu gihe amahanga ahanze ijisho Leta y’u Rwanda dore ko amaze iminsi anayifatiye ibihano kubera gutera inkunga umutwe wa M23 urwanya Leta ya Congo.

Ku bijyanye niba koko ayo mashyaka azajya koko gukorera mu Rwanda atari amashyengo, Bwana Twagiramungu yasubije abanyamakuru ko nta kizabuza ko bazagenda mu kwezi kwa Kamena 2013 ko bidasubirwaho.

Ikindi kibazo kibajijweho ngo ni urwikekwe rwa bamwe bibaza impamvu ayo mashyaka 2 ariyo yonyine ahisemo kujya gukorera mu gihugu asize andi hanze arenga 20, abantu bakaba batabura kwibaza niba ntacyo PDP na RDI baba baravuganye na FPR. Bwana Twagiramungu kuri iyi ngingo yasubije ko hari abavuga ko bazahindura ibintu bari mu mahanga ariko ngo Bwana Twagiramungu we abona bidashoboka ngo ibyiza babareka bo biyemeje banafite ubushake bwo kujya guhindura ibintu bari mu Rwanda, basaba banabwiriza ubutegetsi buriho ko ibintu byahinduka abantu batagombye kwirirwa barwana.

Abakurikiranira hafi ibijyanye n’amashyaka ya politiki atavuga rumwe na Leta y’u Rwanda akorera hanze y’u Rwanda, bavuga ko ari ishyaka RDI ari PDP adafite abayoboke benshi mu banyarwanda baba hanze ndetse hari n’abavuga ko kubera imikoranire ya Bwana Twagiramungu na FPR mu bihe byashize benshi muri bo bamushyiraho akababaro kabo ku buryo nta cyizere bumva bamufitiye. Bwana Twagiramungu ariko nk’umuntu wabeshywe na FPR agatandukana nayo yagerageje kenshi gukora iyo bwabaga ngo yerekane ko afitiye gahunda nzima abanyarwanda ariko ntabwo impuruza ye yitabiriwe na benshi mu banyarwanda baba hanze. Hari benshi babona ko agiye gushakishiriza amahirwe ye ya politiki mu banyarwanda bari mu gihugu, wenda bo bapfa kumva ubwo bwitange bwo kuza mu gihugu bakamwumva dore ko akarengane n’akababaro kataboroheye kandi amahitamo bafite akaba ari make. Ese abatoye Bwana Twagiramungu muri 2003 bazongera kumugirira icyizere? Ese PDP-Imanzi nta bukangurambaga bwa Bwana Mushayidi izashobora gutinyura abanyarwanda?

Tubitege amaso!

Marc Matabaro