Turamenyesha inshuti za FDU- Inkingi n’inshuti za Madame Ingabire Victoire Ingabire Umuhoza by’umwihariko ko uyu munsi tariki ya 29 Mutarama 2016 ubuyobozi bwa gereza nkuru ya Kigali 1930 bwafashe icyemezo kigayitse cyo kumubuza uburenganzira bwe bwo gusurwa.

Ubundi Mme Ingabire Victoire yasurwaga buri wa gatanu nk’abandi bose bafungiwe hariya,gusa mu rwego rwo kumubangamira ubu buyobozi bwari bwarategetse ko abamusura batagomba kurenza batanu(5) kandi byari bimaze imyaka itanu bikurikizwa!

Gusa birashoboka ko kuba abanyarwanda batandukanye kandi baturutse mu bice byose by’igihugu baturuka mu ngeri zose,abasore n’inkumi ibikwerere n’amajigija ,abakambwe n’abakecuru batarigeze bacika intege mu kuza kumusura no kumwereka urukundo bamukunda bishoroa kuba aribyo byakomeje kubabaza Leta ya Kigali itifuza demukarasi mu gihugu cyacu none ubu ngo ntiyemerewe gusurwa!

Ntabwo nagiye mu ishyaka ritavugarumwe n’iriri ku butegetsi mu Rwanda kubera ko ndi ikihebe,kuko ntagira ubwoba, kubera ko nshaka kwicwa ,gushimutwa, gufungwa, gukubitwa, gutotezwa….nagiye mu ishyaka ritavuga rumwe n’ubutegetsi kubera ko hari ibyo nabonaga bitagenda neza nifuza ko byakosorwa,nagiye mu ishyaka ritavugarumwe n’ubutegetsi kubera ko nabonaga uburenganzira bwa muntu buhutanzwa kandi bukwiye kubungabungwa,nagiye mu ishyaka ritavugarumwe n’ubutegetsi buriho kugirango ibyanditse mu itegekonshinga ko buri munyarwanda wese yamerewe kujya mu mutwe wa politiki ashaka byubahirizwe!

Abambajije bati nonese wa mugabo we ko bazakwica? Ndabasubiza nti nonese bazanziza iki? Bati nonese niwowe waba ubaye uwa mbere wishwe urengana? Iyo bambwiye gutya ndabasubiza nti” none se arijye uzicwa ndengana,ari n’uzanyica ninde uzaba afite amakosa? Bati ni abazakwica bakurenganya. Ngaho namwe nimunyumvire!None se niba atarijye munyamafuti kuki mutamfasha ngo twamagane uwo muntu urenganya abandi? Bati ahhhaaaa!

Ngaho namwe banyarubuga nimumbwire, uwo muntu bavuga ngo uzanyica tuvuge ko natanyica nzabaho ubuziraherezo? Igisubizo ni oya ,kuko navutse nubundi umunsi umwe nzapfa! Nonese ubu ndeke gutekereza,ndeke kuvuga uko mbona ibintu bikwiye kugenda ngo nukugirango ntapfa?

Boniface Twagirimana

Amakuru agezweho kandi yizewe n’ay’ishimutwa ry’undi musheikh witwa Habimana Yassin wari Imamu (Umuyobozi ) w’Umusigiti wa Onatracom mu Biryogo ubwo bari mu nama mu musigiti wa Onatracom ku wa gatatu tariki ya 28/01/2016. Yabajije ifungwa ry’abasheikh n’icyo bafungiwe. Ubwo inama irangiye yarategerejwe ngo asarishe nimugoroba arabura. 

Ejo ku wa kane  hashimuswe uwitwa Hadji Yussuf ufite umudamu witwa mama Naziwa ucuruza kuri Onatracom imyenda y’abadamu. Yashimutiwe mu Biryogo ubwo yarimo agurira umwana we ibikoresho by’Ishuri. Ubwo Yari ari mu iduka haje imodoka havamo abagabo 2 bahita bamwinjiza mu modoka kugeza n’ubu nta muntu uzi aho ari. Turahungira he iki cyorezo cyateye mwo kabyaramwe ahaaaa!?

Umuyislamu w’i Kigali,30/01/2016

Twese tuzi indirimbo yakomeje guterwa n’abambari ba FPR-INKOTANYI, ngo u Rwanda rwageze ku iterambere ry’akataraboneka ku isi; ngo imiyoborere myiza ni agatangaza mu Rwanda rwa nyuma y 1994, ngo kandi nta mugayo ibyo byiza bidasanzwe u Rwanda rubikesha kuba ruyobowe n’Umulideri w’akataraboneka kandi ureba kure (Visionary Leader) ariwe Nyakubahwa Pahulo Kagame!

Iyo ntero kandi niyo yashyizwe imbere n’Intore za Rupiyefu muri uyu mwaka ushize kugira ngo zihindure Itegekonshinga (n’ubwo bibeshye bakarihindura nabi!) bityo Visionary Leader wabo ashobore kuzagwa ku butegetsi, kuko nyine ngo nta wundi washoboraga kuyobora igihugu ngo akigeze ku  » BYAGEZWEHO  » na Kagame !

Gusa rero icyakomeje gutangaza Abanyarwanda benshi n’abanyamahanga bazi neza u Rwanda ni uko ibyo « BYAGEZWEHO  » by’agahebuzo bo ntabyo babona mu Rwanda : guhera mu 1994 abakene bararushaho gutindahara, inzara iravuza ubuhuha mu giturage kandi ku buryo buhoraho, abigeze kuba abatunzi ubu babaye ingarisi; muri make abaturage bangana na 85% ntibazi neza icyo ijambo  » IBYAGEZWEHO BY’AGAHEBUZO » bya Pahulo KAGAME risobanura ! Ariko nyamara Intero ya Visionary Leader igakomeza kwikirizwa n’ibitangazamakuru ndetse n’Imiryango mpuzamahanga itari mike. Yewe byarushagaho kubera benshi urujijo iyo bitegerezaga ingufu zidasanzwe zishyirwa mu kwikiriza iyo ntero n’abahoze ari abategetsi b’ibihugu by’ibihangange nka BILL CLINTON wa Amerika , TONY BLAIR w’ Ubwongereza n’abandi. Birushaho kuba inshoberamahanga iyo hicotseho  » ubuhamya » bw’abavuga ko bakora umurimo w’Imana nka cya gihangange cy’Umupasiteri w’umunyamerika witwa Rick WARREN bitiranya gusingiza Imana no kuramya « the Rwandan Visionary Leader », kuko nyine baba bamutegerejeho amaronko atubutse mu gihe abana ba rubanda bicwa n’inzara na bwaki!

Burya koko ngo ikinyoma ntikiramba! Ubu noneho rero ibyari bihishwe byatangiye gushyirwa ahagaragara. Burya bwose imikorere ya FPR INKOTANYI yubakiye ku gucuruza IKINYOMA, kandi bigahombya u Rwanda nk’ igihugu ku buryo budasubirwaho.

Muri iyi minsi abategetsi ba Leta Zunze Ubumwe z’Amerika bashatse ko tumenye ibyerekeye Kontaro(Contract) yo GUCURUZA IKINYOMA Leta y’ u Rwanda yasinyanye na Sosiyete yigenga y’Abanyamerika yitwa W2 GROUP, Inc. Hari taliki 1/9/2009. Ku ruhande rwa Leta y’u Rwanda iyo Kontaro yasinywe na Ministiri Louise Mushikiwabo naho Sosiyeti isinyirwa na Edward ABELL.

Mbere yo kubabwira ingingo z’ingenzi zikubiye muri ayo masezerano yuje uburiganya, ubujura n’ubugambanyi, twatangajwe no gutahura ko Leta ya Paul Kagame yiyemeje kujya yishyura buri kwezi miliyoni zisaga 35 z’amafaranga y’u Rwanda (50 000$), ni ukuvuga igice cya miliyari buri mwaka kugirango iriya Sosiyeye ijye ivuga ibigwi by’ ibihimbano Leta Rwanda n ‘ umuyobozi wayo Paul Kagame! Ya mafaranga avuye mu misoro ya rubanda, ya mafaranga yamburwa abaturage agashyirwa mu bigega bitagira indiba ( Agaciro Fund ….) ngaho aho azimirira shenge !!! Mu kugura ishusho nziza idahuye n’ukuri kw’akarengane n’ibindi bibi byinshi bibera mu gihugu!

Ngiyo rero ya ngeso ntindi isa n’iyahinduwe itegeko riyobora igihugu na services zose :  » gutanga ibyamirenge ngo ukunde wiraariire wiyerekana uko utari  ari nako ukina ku mubyimba rubanda udahwema kugaraguza agati kandi nyamara ariyo igutunze !

Muri make ibyo Leta ya Kagame yumvikanye n ‘ iriya Sosiyeti bikubiye muri izi ngingo zikurikira:

1. Ikinyoma kigomba gukwirakwiza kiri ukubiri , hari ibyerekeye Igihugu n’ibyerekeye Perezida Pahulo Kagame ubwe:

a)Kumvikanisha ko Igihugu cy’u Rwanda ari intangarugero ku isi hose mu byerekeye umutekano, imiyoborere myiza, ubumwe n’ubwigenge, gucunga umutungo w’igihugu neza, kurwanya ruswa, iterambere ry’akataraboneka mu bukungu, …

b) Gushyira ingufu nyinshi mu kubeshya hose ko Pahulo Kagame ari umuperezida w akataraboneka,ureba kure (Visionary Leader) uzi ubwenge bwinshi cyane birenze urugero kandi akaburusha n’abandi ba Perezida bose bo muri Afurika ababayeho n’abaza nyuma, utazi kwica abenegihugu, utavangura amoko, ukunda demokarasi n’iterambere ry’abaturage bose …

2.Abo ikinyoma kigenewe

a) Iriya Sosiyete yapataniye gucengera inzego zose zifata ibyemezo mu bihugu by’ibihangange nka Leta Zunze Ubumwe z’Amerika n’Ubwongereza n’iz’imiryango mpuzamahanga nk ‘Ubulayi Bwunze Ubumwe (EU) na LONI.

b) Kwigarurira ibitangazamakuru bikomeye cyane ku isi : Radiyo-Televiziyo nka Wall Street Journal, BBC Hard Talk; Ibinyamateka nka The New York Times, The Economist, The Financial Times; Imbuga za interneti(social media) nka Huffington Post , Washington Post, MSNBC,…no kubiha « inyoroshyo » kugira ngo bijye bikomeza bitambutse inkuru zibeshya amahanga ko nta kibazo kindi kikiri mu Rwanda uretse abasize bakoze jenoside bagenda basebya igihugu!

3. Inzira izakoreshwa(Stratégie ) mu kurushaho guha ikinyoma intebe

a)Kubaka inkuta (mûrs électroniques) zibasira Ibitangazamakuru bigaragaza ibibazo nyakuri biri mu Rwanda cyane cyane kugaba ibitero no kubangamira mu buryo bwose bushoboka Imbuga za interneti zikoreshwa n’abatavuga rumwe nubutegetsi (Za Leprophete.fr zumvireho!)

b) Gukwirakwiza amakuru atesha agaciro abanyamahanga babaye mu Rwanda n’abandi bose bazi amakuru y’impamo ku bibera mu Rwanda kandi bafite umurava wo gushaka kuyamenyekanisha!

UMWANZURO

Ngo Umutego w’ikinyoma ushibuka nyirawo akihahagaze ! Babandi bari barigize abacuruzi kabuhariwe n »ABARINZI » b  » IBYAGEZWEHO bya BARINGA  » bamenyereho ko nta kindi bakora uretse guhenera abazi guheengeeza : Umunyamerika wamubeshya rimwe na rimwe ariko agera aho akagutamaza !

Sinasoza ntabwiye « Visionary Leader w’ikibumbano » ko amahirwe asigaranye ari ukwemera kwicarana natwe, tukaganira nta buhendanyi , tukumvikana  igikwiye gukorwa kugira ngo igihugu gishobore kubogorwa amazi atararenga inkombe.

Reka twisabire abenegihugu bashyira mu gaciro ko bakwemera tugafatanya uru rugamba maze tukiha inshingano n’intego yo kugera ahantu hose Leta ya « Visionnary Leader « yageze ihacuruza ikinyoma cy’ITERAMBERE rya BARINGA, tukabagaragariza ukuri ku bibera mu Rwanda ari nako tubereka ibimenyetso bifatika by’uko babeshywe.

Ubutaha tuzabagezaho n’amasezerano yo gusahura u Rwanda « the Rwandan Visionnary Leader » yagiranye na  Tony BLAIR,  Bill CLINTON na Pasteur  Rick WARREN  . Muzumirwa !

Uwemera naze,

Padiri Thomas NAHIMANA, Umuyobozi w’Ishyaka ISHEMA n’Umukandida waryo mu matora ya Perezida wa Repubulika yo muri 2017.

BIRACYAZA. ….

Ngaho nawe isomere uko iyo Kontaro y urukozasoni iteye.  Kanda hasi aho :

Master service agreement

Banyarwanda nshuti zanjye n’amwe banyapolitiki cyane cyane abakorera hanze y’u Rwanda !

Maze kunva icyemezo cy’ishyaka ISHEMA cyo kujya gukorera politiki mu Rwanda n’umukandida waryo Padiri Thomas NAHIMANA mu matora ateganyijwe muri 2017 none hakaba hiyongereyeho ishyaka PDR IHUMURE riyobowe na bwana RUSESABAGINA na ryo ryiyemeje kujya gukorera mu Rwanda ndetse rikaba rizatangaho bwana RUSESABAGINA umukandida k’umwanya wa perezida mu matora yo muri 2017.

Njye mbona ko igihe cyagombye kuba iki ngo amashyaka yose ya politiki ndetse n’imiryango idaharanira inyungu za politiki bose bakorere hamwe bohereza benshi mu bayobozi n’abayoboke bayo kujya gutera ingabo aba bose bashaka impinduka mu Rwanda !

“Abishyize hamwe Imana irabasanga” kandi “Abishyize hamwe nta kibananira ” . Muhagarike rero gukomeza kurebana ku jisho ” Ngo reka ndebe ko koko bazajyayo !!!” Ahubwo nimwegerane igihe gisigaye ni gito ngo démocratie iboneke mu Rwanda . Mwita igihe ahubwo nimuvugane mukore gahunda nk’abajyana hanyuma mujye kotsa igitutu buriya butegetsi butinya DEMOKARASI , UKWISHYIRA UKWIZANA maze murebe ko butivanaho na mbere ya 2017 !

Nta kindi abanyarwanda barimo kwicwa n’inzara, barimo kurwara amavunja, barimo kuburirwa irengero cyangwa kuraswa ku manywa y’ihangu babategerejeho uretse kubarokora batarashira kuko ubwo bugome bwose bubakorerwa basigaye aribwo barya mu gitondo , bakabwiririrwa bakanaburarira !!!

Ibihe turimo hari abatabizi, cyangwa babyibeshyaho, kuko abenshi mu bahutu n’abatutsi, baba abakiri mu gihugu cyangwa abagihunze, bagiye bibeshyera ko impamvu badashyira hamwe, babiterwa n’uturere cyangwa indorerwamo z’amoko bireberamo. Impamvu nyamukuru ituma badashyira hamwe, ngo birukane abasazi babambuye uburenganzira bwabo mu gihugu cyabo, zishingiye ku BWOBA, umuco w’UBUKORONI, bamaze mo imyaka 400, bategekwa n’ingoma ya CYAMI. Uyu mucow’ubwoba n’ubukoroni utuma buri wese, mu by’ukuri, yaba umuhutu cyangwa umututsi, umukiga cyangwa umunyenduga, yikururiraho akaringiti ke, akibera «bize ngarame» ; ingaruka mbi zabyo zikaba ukudaha uburemere ibyiza byo kugira igihugucyawe wigengamo, igihugu cyiza twarazwe n’abasogokuruza.

Indwara y’ubwoba : N’ubwo abahutu n’abatutsi ubutegetsi bwa Kagame bwabagize ibikange, iyi ndwara irangwa cyane mu bahutu kurusha mu batutsi. Ubutegetsi bw’agahotoro bukorera ubu mu Rwanda, buhora bubajomba ibikwasi ko ari bo bamaze abatutsi kuva muri 59 kugeza kuri «finale» ya génocide yo muri 94. Abatutsi biyita ko barokotse imipanga y’abahutu muri 59, ubu bitoraguriye ingoma mu giteme, na bo bakoresheje indi mipanga, ntibahwema gutwerera iyi mipanga abahutu bose, n’uwavutse uyu munsi ; inyongezo yabo ikaba ko ngo bagifite ingengabitekerezo yo gutsemba abatutsi basigaye. Iyi nkeke abahutu bahozwaho ikaba ituma na bo ubwabo bikekamo abicanyi, kandi wenda nta n’inyoni bishe, ingaruka zabyo zikaba iz’uko ubutegetsi bw’abasazi bubagira ibikange, insina ngufi, abatindi nyakujya, kuko n’ufite ubwenge yize mu mashuri, atari ayo mu mihanda, iyo adafunzwe, atinya kubukoresha ahagaragara, kugirango atamenyekana ; amaburakindi akaba ari uko bajya kwihisha iyo mu byaro, mu bindi bihugu bya Afurika, n’ahandi mu rutumva ingoma : za Malawi, Mozambique, Zambiya, n’ahandi, aho abashoboye kwirwanaho mu bucuruzi, n’ubundi bakirwaye ya ndwara yitwa «BWOBA». Ayo bakoreye yose, biyushye akuya, bayagabana n’ubutegetsi bw’abasazi, bwabirukanye mu byabo, mu gihugu cyabo. Kugirango bigure, batanga ayo maturo atarangwamo umugisha wa Yezu, bakanatanga ibitambo Imana itigeze ibasaba (kugambanirana), kugira ngo bucye kabiri, batazakurikiranwa n’ingoma «yica», ikabacira imitwe iyo bayihungiye.

Umuco w’ubukoroni : Nubwo uyu muco urangwa cyane mu bahutu, kubera ko ari umwihariko wabo wo guhakwa ku batutsi, no mu batutsi b’ubu uwusangamo. Imyaka 400 abasogokuru n’abasogokuruza bacu bamaze mu bukoroni, yadusigiye icyasha gikomeye. Izi ngaruka mbi kuzitirira abahutu gusa, byaba ari ukwikunda gukabije. Ingoma ya gikoroni yagarutse ubu mu Rwanda, n’abatutsi badaturuka mu bwoko bw’abega, bagomba kuyihakwaho kugirango bagire icyo bayishituraho ; udashaka kuyikeza, aricwa cyangwa agakiza amagara ye. Ni nde wakwihandagaza, akavuga ko abatutsi bose ubu bamerewe neza mu gihugu, ngo kuko ingoma iriho ubu ari ingoma y’abatutsi ? Ari ibyo nta n’umwe wagahunze u Rwanda, dore ko umubare wabo hano mu burayi na Amerika, wenda kurenga kure uw’abahutu, baba abatarigeze baba mu gihugu kuva muri 94, n’abagerageje gukorana n’ubutegetsi bwa FPR, bukabamenesha bidaciye kabiri. Ni ya Nyakibi ngo itajya irara bushyitsi !

Indwara yabo bose : Nubwo bari mu kaga, akaga baterwa n’ingaruka mbi barazwe n’ubukoroni ba se na ba sekuru babayemo, kuri aka gasi k’i burayi na Amerika banitseho bose, ntibasubiza amaso inyuma ngo bashakire hamwe icyatuma basohoka mu bundi bukoroni bushya, bwiyambitse umwitero wa Repubulika. Indwara yabo bose ni iyo kudashyira hamwe ngo barwanye umwanzi wabo umwe rukumbi : ubukoroni bushya bw’i Kigali. Icyo bahuriyeho bose ni umuco mubi, ugayitse wo kutumvikana, kwikunda, ubugugu, ubwibone, ubusambo, gupfa ubusa, kwiyemera (abansuzugura bazamenya uwo ndi we), kutava ku izima, n’ubundi bupfapfa butaranze abakurambere bacu, batuboneye izuba.

Si bibi kwiga, kuko abiga kuri aka gasi k’uburayi na Amerika, turi benshi ; n’iyo twaba tugeze mu za bukuru ; kugura amazu na byo nta cyaha kirimo, kuko biri mu kwiteza imbere n’imiryango yacu ; gucuruza, guhinga, gushabika, kugira ibirori runaka, kuruhura ubwonko bwatokojwe n’abakoroni bombi, na byo nta cyaha mbibonamo. Ikibazo kirimo nuko ari byo byadutwaye uruhu n’uruhande, tukiyibagiza ko kwigwizaho ibyo byose bitaduhesha ubudahangarwa ku bicanyi b’ejo.

Ko umenya amazi atakiri magari nka ya yandi tuzi, kuko ubutegetsi bw’abakoroni bashya twahunze butigeze buhwema kudukurikirana n’iyo twabuhungiye, aho buca imitwe y’abo bushaka, abandi bukabateramo indwara z’ubwoba budashira, bw’uko nibatabuyoboka ku ngufu bizababyarira amazi nk’ibisusa ? Ukwiyibagiza cyangwa guterera iyo indangagaciro yacu yo kugira igihugu, uburyohe bwo kukibamo n’abacu,kugikoreramo ubukwe, kugishyingurwamo nta kiguzi usabwe nk’ab’ubu, kukigiramo ijambo, kucyumviramo misa ya mu gitondo cyangwa iya nimugoroba, kukiriramo ibyawe udakebaguza, kucyumvamo amahumbezi meza, ni ukutamenya iyo tuva n’iyotujya, ku mugani wa Kizito Mihigo, inzirakarengane yacu.

Turwanye muraramo. Ubutegetsi buriho ubu mu Rwanda, ndavuga ubutegetsi ruvumwa bwa FPR-inkotanyi, nta we utabwanga urunuka, yaba umuhutu cyangwa umututsi, umukiga cyangwa umunyenduga. Hari uwambaza ngo none niba aya moko yombi, abayagize bose banga ubutegetsi urunuka, kubera iki baburimo, ubasanga mu mirimo ya Leta n’ahandi, ndetse n’abaturage basanzwe, bene ngofero, bakaba bakiri mu gihugu ? Igisubizo cy’iki kibazo kiroroshye : no mu gihe cy’ingoma ya cyami, abakoraga uburetwa bari bahari ari benshi, uretse ko bitandukanye n’iby’ubu kuko bo bari abahutu gusa. Bakomezaga gucinya inkoro, kugirango biborohereze ukubaho, batamugajwe n’ibiboko. Uwahakwaga ku mwami, akanamwita Nyagasani, ntacyo yamutwaraga kindi, ndetse byaranatindaga akamugabira inka, n’iyo yabaga ari ibuguma, iri buhite imupfiraho. N’ubu ni ko bimeze mu butegetsi bw’umwami mushya w’u Rwanda, Pahulo Kagame. Ibigorofani bye bimwita «His excellence» ; utabimwise, aramunyaga, yamukekamo umwanzi w’igihugu, umwanzi we mu by’ukuri, agafungwa akandoyi iyo za Kami, cyangwa mu magereza ye, ubu yuzuye inzirakarengane zitazi inkiko.

Ibyitwa «girinka» yazanye mu gihugu, ni uburyo bushya bw’imitegekere y’ingoma ya cyami, uburyo bwo guhakisha inka abahutu ngo bayoboke neza ingoma ye, bajye banamwirahira, kuko uwaguhaye inka ugomba no kumwirahira. Kugirango gahunda ya «girinka» igere ku bahutu, ntibipfa kwikora gusa ; iyo nka barayihakirwa : kuba ingaruzwamuheto ku mukuru w’akagari, w’umudugudu, kubahingira badahembwa, kubakamira inka, dore ko ari bo batunze ; bimeze nko gukora shiku ya kera ; ibi ni nako byagendaga ku bitwaga abasurushefu; byitwaga gufata igihe : gukorera ubusa kugirango ubone icyo ushaka kugeraho. Urugero mfite ntiruri kure : ubwo nari maze kuba mukuru, Data yambwiye ko isambu abana be twese twakuriyemo, yayihakiwe ku musurushefu witwaga Ruzagiriza. Kugirango iyi sambu ayibone ngo yari yarakubiswe ibiboko nk’iby’akabwana. Ibi nemeza ko byari ukuri kuko umugongo we wari imirambi y’«inkovu z’ibihe», yabayemo. Izo nkoni yakubiswe nzigereranya n’izo na njye nakubitiwe mu gihome cy’abuzukuru b’abo bagiranabi. «Umugabo ubuze ukoagira, azingira amaboko mu maguru», Ben Rutabana ; na njye nti «ubuze uko agira, agwa neza», ariko izo nzigo zombi, sinkeka ko hari aho zagiye !

Inama isumba izindi : Nubwo agahinda k’inkoko kamenywa n’inkike yatoyemo, ntawe ukwiye guheranwa n’agahinda ke, ngo yihanukire avuge ko byamucikiyeho. Bene Gihanga twese dufite icyo duhuriyeho, gikomeye, nubwo twakirengagiza kubera ubugoryi bwacu : gukunda u Rwanda. Ukwirukana ingoma mbi ya cyami iganje ubungubu, yaruduciyemo, birasaba ubufatanye bwacu twese, abahutu n’abatutsi, abakiga n’abanyenduga, kuko iyi ngoma nta n’umwe wera wirabura, itibasiye, muri iki gihe. Ukuyirukana burundu ntabwo ari ukubinyuza mu matora cyangwa mu bundi bupfayongo. Kayibanda na Mbonyumutwa, iyo batirukana CYAMI wa kera, n’ubu aba akiganje, agikubita ibiboko, akona abo ashatse. Izi ntwari zombi tuzazishakamo, wenda tuzite amazina ajyanye n’imyumvire y’amateka yacu, atandukanye. Icy’ibanze nuko intwari nshya ziboneka ; niba zitabonetse, ingoma iganje izatwicira gushira.

Ukwirukana ingoma ya cyami y’ubu ni ugukora mu mufuka itagira ubwiko ; ni ugukoraimishinga ifatika ; ni ugutanga imisanzu mu mashyaka n’amashyirahamwe akora neza. Iyo miryango yombi igomba kugira aho ibarizwa, hatari mu byumba byacu. Abayikorera bakaba bari aho, bazwi neza, bakanahembwa, kuko ntawe ukora adahembwa. Kuki hano i burayi cyangwa muri Amerika, aho bamwe twirirwa duta igihe, hatashyirwa ibiro bya «oppozisiyo nyarwanda» ? Ikibazo si ubwinshi bw’amashyaka cyangwa ubw’amashyirahamwe; ikibazo ni imyumvire yacu, n’icyo dushaka. Icyo dushaka ni ugutaha, tukava muri aya manjwe, gutaha tutamanitse amaboko kugirango abamotsi b’umwami uganje bazayatere ikamba uko bishakiye, cyangwa twibeshya ko ngo tuzataha binyuze mu matora. Nta bitambo tugishaka gutanga muri aya matora, kuko Imana ntiyigeze ibidusaba.

Amiel Nkuliza,

Sweden.

(Uyu ugaragara hano kw’ifoto ni Bwana Muhamed Mugemangango warashwe na Polisi y’u Rwanda ivuga ko yashatse gutoroka!)

Tariki 24 Mutarama 2016 Police y’u Rwanda ivuga ko yarashe umugabo Muhamed Mugemangango agerageza gucika Police, uyu yashinjwaga gushakisha abasore bo kujya mu mutwe wa Islamic State iba muri Syria na Iraq, mu kiganiro Police y’u Rwanda yahaye abanyamakuru kuri uyu wa gatandatu ivuga aho iperereza rigeze, bavuze ko hari abantu banyarwanda bakoranaga nawe, bamwe ngo barafashwe abandi baratoroka bajya hanze bakibimenya.

ACP Theos Bagede umuyobozi w’ishami rishinzwe iperereza ku byaha rya Police y’u Rwanda CID mu kiganiro n’abanyamakuru kuri uyu wa gatandatu

Assistant Commissioner of Police Theos Badege, Umuyobozi w’ishami rishinzwe gukurikirana ibyaha muri Police y’u Rwanda yabwiye abanyamakuru ko mu iperereza bakoze kugeza ubu bamenye ko umugambi w’uriya mugabo warashwe n’abo bakoranaga utari uwo guhungabanya umutekano w’u Rwanda ahubwo gushakisha urubyiruko rwo kujyana mu mutwe wa Islamic State.

ACP Badege avuga ko amakuru y’ibanze kuri Mugemangango n’ibikorwa bye bayahawe mbere na mbere n’abaturage bamuzi batashiraga amakenga ibikorwa yakoraga. Police ngo ihita itangira iperereza.

Uyu mugabo ngo basanze afitanye imikoranire n’imitwe imwe n’imwe yiyitirira idini ya Islam igakora iterabwoba.

Police ngo yasanze kandi uyu mugabo w’imyaka 39 wakoraga mu kigo cya Rwanda Education Board (REB) hari abandi bantu b’abanyarwanda bakoranaga nawe muri iki gikorwa cyo gushaka urubyiruko rwo gushora muri Islamic State.

Gushishikariza urubyiruko kujya mu mutwe wa Islamic State ngo babikoraga batunganya inyigisho zabyo, bakazandika, bakazishyira kuri za CDs no ku mbuga nkoranyambaga bandikira urwo rubyiruko bifuzaga kujyana.

ACP Badege yavuze ko bamwe muri aba bantu bakoranaga nawe bafashwe ndetse ngo baza gushyikirizwa ubutabera vuba, abandi ngo bakibimenya bahise batoroka bava mu gihugu.

ACP Badege ati “N’aba batorotse turi gukorana na Interpol ngo bazafatirwe aho batorokeye hose kuko bashakishwa n’ubutabera ku byaha bifitanye isano n’iterabwoba.”

Police y’u Rwanda ivuga ko ngo nta mpungenge ziriho ku mutekano w’u Rwanda ku bijyanye n’iterabwoba n’imitwe aba bakoranaga nayo kuko ngo umugambi wabo ntabwo warebaga u Rwanda.

ACP Bagede yongeye gushimangira ko Muhamed Mugemangango yarashwe ubwo Police yari imusabye ko bajyana iwe gushakayo ibindi bimenyetso bigenza icyaha yaregwaga maze aho kugira ngo bagere yo asimbuka imodoka ngo atoroke.

Badege akavuga ko igikorwa yakoze nacyo ngo bakibonye nk’ubwiyahuzi bitari ugutoroka gusa kuko yari azi neza ko ashobora kuraswa agerageza guhunga umupolisi umushinzwe muri ako kanya.

ACP Badege yasubije abanyamakuru ko kuba uyu mugabo yararashwe bitatuma abo yakoranaga nabo mu Rwanda bihumura kuko ngo abenshi nabo baratahuwe, abatarafashwe barahunze kandi bari gukurikiranwa.

ACP Badege ati “Nta mutwe w’iterabwoba uba hano mu Rwanda, imbaraga zikoreshwa mu kurwanya umutwe nka FDLR nizo zinakoreshwa mu kurwanya ibikorwa byose by’iterabwoba.”

Umusirikare warashe bagenzi be bane muri CentrAfrique yaba yarakoranaga n’aba

ACP Denis Basabose wari muri iki kiganiro

ACP Theos Badege uyobora CID yavuze ko bafite amakuru ko umusirikare w’umunyarwanda warashe bagenzi be bane akabica nawe akaraswa, ngo yakoranaga n’aba.

Gusa ngo Police igeze kwa Mugemangango Muhamed basanze umuryango we utakibarizwa mu Rwanda ku buryo ngo ari umugambi yaba yari amaze igihe acura.

ACP Denis Basabose wari muri iki kiganiro yavuze ko umugambi aba bantu bari bafite wapfuye ugitangira kwiyubaka. Akavuga ko ibi babigezeho by’umwihariko ku bufatanye n’abaturage ari nabo bashimira cyane uruhare bagize mu gutanga amakuru agamije kurwanya ikibi.

ACP Basabose ati “Tuzafatanya n’ibindi bihugu mu kurwanya iterabwoba, tuzagenda mu gihugu hose dufatanye n’abayobozi ba Islam mu Rwanda tuganira n’abaturage cyane cyane Urubyiruko kugira ngo birinde bene ibyo bishuko.”

Polisi y’u Rwanda ivuga ko Muhamed yihitaga ko ari umuIslam , ariko baje gusanga afite indi myemerere y’ubuhezanguni bukomeye cyane ku buryo ngo byageze aho araswa agaragaza imyitwarire y’ubuhezanguni bukomeye mu gihe yari ajyanywe iwe ngo harebwe ibindi bimenyetso agashaka guhunga.

Police ivuga ko iperereza kuri ibi byaha rigikomeje.

Abafashwe bashinjwa ibyaha nk’ibi mu mategeko y’u Rwanda bahanishwa igifungo kiri kuva ku myaka 15 kugeza kuri 20.

Source:

Daddy SADIKI RUBANGURA
UMUSEKE.RW

“ Kandi nubona twatangiye gusezera abo twabanye uzamenye ko kagoma yiyemeje gufata ikirere”

Perezida wa Repubulika aduhaye igisubizo cyiza kitwemerera kuganira twahita duterura utwangushye tugataha. Guhera taliki ya 28 Mutarama 2016 Délégation yacu iri STANDBY. Niko Kongere ya bigennye. Bitagenze bityo, nubona twatangiye gukora Meetings zo gusezera abo twabanye mu mahanga (i Buruseli, i Paris, i Londres, Oslo, Washington DC, Ottawa na Canberra ) uzamenye ko Kagoma yiyemeje gufata ikirere. Rendez-vous i Kanombe!

IKIGANIRO UMUNYAMAKURU MADAMU MUKAKIBIBI SAIDATI WA MONTJALINEWS YAGIRANYE NA PADIRI THOMAS NAHIMANA, UMUYOBOZI W’ISHYAKA ISHEMA RY’U RWANDA AKABA N ‘ UMUKANDIDA WARYO MU MATORA YA PEREZIDA WA REPUBULIKA YO MU MWAKA WA 2017.

SAIDATI: Kuwa 28 Mutarama 2016 mwasohoye Itangazo mwifuriza Abanyarwanda umunsi Mukuru wa Demukarasi. Ni kuri uwo munsi kandi mwari mwarabijeje ko muzaba mwatashye mu Rwanda gukorera politiki muri mu gihugu . Uwo munsi ni nawo mwibuka isabukuru y’ishingwa ry’ishyaka Ishema Party . Kuba mutarubahirije gahunda musanga mutaratengushye Abanyarwanda bamwe bari babatezeho demokarasi muvuga ko mu Rwanda itaharangwa?

Umunyamakuru Saidati Mukakibibi

PADIRI THOMAS : Mbanje kugusuhuza kandi ngushimira n’iki gitekerezo cyiza cyo kuntumira ngo tuganire. Ku kibazo umbaza rero ndangira ngo ntangarize Abanyarwanda ko tutabatengushye kandi ko tudateze no kubatenguha. Gusa ndabibutsa ko gukorera politiki mu Rwanda muri iki gihe, uri muri Opozisiyo, ari ibintu bisaba ubwitonzi n’ubushishozi bwinshi.
Kuri njyewe , gufata indege iva i Paris yerekeza i Kigali ku italiki nziza ya 28 Mutarama 2016 ntibyari ikibazo gikomeye. Gusa hagati aho urwego rusumba izindi rw’Ishyaka ISHEMA ry’u Rwanda rwitwa KONGERE, rwateraniye I Buruseli mu Bubirigi kuva taliki ya 15 kugeza ku ya 17 Mutarama 2016, rwarashishoje rusanga hari intambwe y’ingenzi igomba kubanza kugeragezwa: ni UKUGANIRA n’ubutegetsi bw’u Rwanda buriho muri iki gihe. Icyo kiganiro dusaba ntikigamije gusaba uruhushya rwo kujya guharanira uburenganzira bwacu mu gihugu cyatwibarutse; ntikigamije kandi gusaba imyanya mu butegetsi. Icyo kigamije rero ni iki? Sinshobora guhagurukana ikipe y’Abanyapolitiki ivuye hanze y’igihugu ngo yinjire mu Rwanda nk’aho icyo gihugu kitagira Abayobozi! N’ubwo hari byinshi tunenga imikorere ya Leta iriho, nibura twemera kandi tukihatira kubaha abafite inshingano yo kuyobora igihugu muri iki gihe. Tugize amahirwe bakwerekana ubushake bwo kwemera tukaganira. Tuzi neza ko Abanyarwanda benshi babyakira neza kandi bikaba bishobora kugirira igihugu cyacu akamaro gakomeye. Ndabizi neza ko byagira akamaro. Ubwo rero ngarutse ku kibazo, gutaha kuri iriya tariki byanze bikunze si byo by’ingenzi dore ko n’ ubundi tumaze imyaka myinshi hanze. Nkanjye maze imyaka 10 mu buhungiro. Bibaye ngombwa ko ntegereza ukundi kwezi kumwe cyangwa abiri ariko ibintu bikarushaho gutanga amahoro, ninde waba ahahombeye uretse umwanzi w’Abanyarwanda!

SAIDATI: Taliki ya 29 Mutarama 2016 Ishyaka Ishema Party ryasohoye irindi tangazo rigaragaza ibyo yise amasezerano yo gukwirakwiza ikinyoma kuri vision 2020, kuki mwategereje kurisohora nyuma yuko mutabashije kuza mu Rwanda ntabwo bwaba ari uburyo bwo kurangaza abanyarwanda n’amahanga ngo bareke kubabaza ahubwo ikinyoma cyanyu cy’uko mutatashye ku minsi mwitangarije ubwanyu?

PADIRI THOMAS: NK’uko tumaze kubisobanura haruguru uwavuga ko turi mu kinyoma ni uko yaba atazi cyangwa se yirengagiza nkana imikorere y’amashyaka n’amahuriro ya politiki. Urwego rwa Kongere y’ishyaka ni rwo rwonyine rwari rwaragennye italiki ya 28 Mutarama 2016 nk’ umunsi wo kujya gukorera politiki mu Rwanda. Mu gihe urwo rwego nanone rusanze hari ibikenewe bigomba kubanza gushyirwa mu buryo kugira ngo ISHYAKA ISHEMA ry’u Rwanda ribashe kuzuza neza inshingano ryihaye yo gufasha Abanyarwanda kugera kuri demokarasi isesuye binyuze MU NZIRA Y’AMAHORO ISHINGIYE KU BIGANIRO, kandi rukabitangariza rubanda, ikinyoma cyaba ari ikihe? Naho ku byerekeye gutangaza inkuru igaragaza uko Viziyo 2020 Ishyaka rya FPR ryubakiyeho igihugu ari BARINGA ishingiye ku KINYOMA kandi hakerekanwa n’ibimenyetso bifatika, ni igikorwa kiri mu nshingano zisanzwe z’Ishyaka ryose rya Opozisiyo. Bishatse kuvuga ngo Ishyaka ISHEMA ntabwo ryahagaritse ibikorwa byaryo bisanzwe ngo ni uko ryitegura kujya gukorera politiki mu Rwanda. Nirigera no mu Rwanda rizakomeza guhugura abenegihugu ryerekana aho ibya rubanda bipfira n’ uko ibitagenda neza byakosorwa. Ntaho rero iriya nkuru yaba igamije kurangaza no kujijisha rubanda. N’izindi nkayo ziracyaza .

SAIDATI: Bimaze kugaragara ko amashyaka akorera hanze y’u Rwanda aho kugira ngo yuzuzanye yitana bamwana ibyo tukabishingira ku bimaze iminsi bitambuka muterana amagambo na Plate Forme y’ amashyaka 5 . Mwadusobanurira Impamvu zabyo n’ikibitera ku ruhande rwanyu? Ese mubona ibyo byaha Abanyarwanda ikihe cyizere cy’ubumwe n’ubwiyunge mu gihe mutabashije kwiyunga kandi mwese mu ntego murangaje imbere ari uguhuza Abanyarwanda?

PADIRI THOMAS : Kugira amashyaka menshi atavuga rumwe si umuvumo ahubwo ni umugisha. Guha urubuga abatavuga rumwe niho haturutse ingufu zikomeye zatumye ibihugu by i Bulayi n ‘Amerika bigera ku mahoro n’iterambere rirambye baryoshyemo muri iki gihe. Guterana amagambo ubwabyo si ikibazo ahubwo ni inshingano ku mashyaka ya politiki! Abatemerewe gutekereza nibo bonyine badashobora guterana amagambo, mbese nk’uko bigendekera abaturage bayobowe n’ingoma y’igitugu n’iterabwoba. Ahubwo icyo dukwiye kwinengaho nk’abanyapolitiki b’abanyarwanda ni ukudaterana amagambo bihagije. Impamvu zibitera ni nyinshi ariko reka tuvugemo ebyiri z’ingenzi. Iya mbere ni ukubura URUBUGA rukwiye,iya kabiri ibitera ni uko benshi muri twe batagize amahirwe yo guhabwa uburere bubemerera KUGANIRA mu mutuzo no KUJYA IMPAKA (DEBAT) n’abo batabona ibintu kimwe! Abafaransa babivuze neza ngo kujya impaka bitanga urumuri : ” Du débat jaillit la lumière”. Niba ukuvuguruje wese ugomba kumufata nk’umwanzi ndetse byarimba ukabatura intwaro ivusha amaraso ukamutsinda aho, urabyumva ko politiki y’abanyarwanda ari aho ikunze gupfira. Abakora politiki bakaba mbarwa kuko ikibuga ikinirwamo cyahinduwe isura kikaba ari ” très dangereux “. Ushaka kumva impamvu twiyemeza gukora politiki duharanira kurengera inyungu rusange ariko twahindukira tugasanga abo mu miryango yacu n’abayoboke b’amashyaka yacu bakegeswe amajosi, yahera aho ! !! Ibi rero nibyo twebwe abo muri “Nouvelle Génération ” twifuza guhindura, politiki ikaba inzira itagendwa n’abajura n’abicanyi gusa, ahubwo abarusha abandi umutima muzima kandi bashoboye kurengera inyungu za rubunda akaba aribo bagirirwa icyizere bagashingwa kuyobora igihugu, binyuze mu matora adafifitse. Rubanda iramutse ibyiyemeje byagerwaho. Naho kubaka ubumwe n’ubwiyunge bw ‘abanyarwanda si ukubarundira bose mu kizu kimwe baboshye amaguru n’amaboko ngo ni ukugira ngo hatagira ugirira undi nabi. Toza Abanyarwanda kubana no kubahana mu budasa bwabo.
Bareke bishyire hamwe bagendeye ku bibahuza byubaka. Icy’ ingenzi ni uko Leta yubahiriza inshingano yayo yo gukiranura mu butabera abatandukiriye bakajya kubangamira uburenganzira bw ‘abandi. Naho ubundi Idéologie y’ubumwe n’ubwiyunge itambutswa n’INKOTANYI muri iki gihe ntawe utabona ko irimo akabazo, ikwiye kuvugururwa mu maguru mashya.

SAIDATI: Akenshi Abataripfana iyo bafashe ijambo bavuga ko politiki y’imiyoborere y’igihugu , amajyambere n’ imibereho myiza yubakiye ku makabyankuru. Igishya muri plan d’action yanyu muzanye ku byo munenga ni ikihe kizatuma abaturage babagirira icyizere?

PADIRI THOMAS : Nibyo koko dukunze kwemeza ko Iterambere riririmbwa muri iki gihe ririmo amakabyankuru menshi ndetse n’ibinyoma bitari bike. Niba ushaka kumenya koko niba rubanda yaravanywe mu bukene nk’uko biririmbwa, jya iwanyu mu giturage, uzenguruke igihugu cyose, mu Ntara zose, mu Turere twose, mu Mirenge yose, mu Tugari twose no mu Midugudu yose, urebe uko abaturage babayeho: ntutangazwe n’ubwinshi bw’ahahoze ari abakire ubu bashubijwe ku isuka; witegereze uko Mwalimu afashwe nabi; ntiwibagirwe kubarura abamaze imyaka irenga 20 akadobo karabumiye ku mutwe; witegereze ubwinshi bw’urubyiruko rwandagaye rutagira icyo rukora; usozereze mu ma gereza uratangazwa n ‘ umubare w’amaboko yakagombye kubaka igihugu ahashyinguye. Uteranye imibare, ukomereze ku ijanisha, wirebere ukuntu abaturage bagera kuri 85% batazi icyo ijambo ITERAMBERE risobanura kuko bo babayeho mu bukene n’ubutindi! Uko twe tubibona, Ishyaka rya FPR riri ku butegetsi ryahisemo kwemeza isi ko u Rwanda ari abaherwe b’i Kigali gusa! !! Igishya gikomeye Abataripfana tuzanye , tugerageje kubivuga muri make : ni uko dushaka kubaka iterambere ritibagirwa n’umuturage wo hasi mu Kagari!Umushinga wacu ukubiye mu nyandiko twise “MES 30 PROPOSITIONS” njye nk’umukandida w’ishyaka ISHEMA nzageza kuri rubanda igihe cyo kwiyamamaza nikigera. Mbere na mbere turashaka kuzashingira byose mu kuvugurura ISHURI, uburezi bugahabwa IREME. Bityo ruriya rubyiruko (Nouvelle Génération )rwandagaye kandi ruremerewe n’ubushomeri rukigishwa imyuga igezweho ndetse rugahabwa ubushobozi buhanitse bwabakingurira n’imiryango ku isoko mpuzamahanga ry’umurimo. Abana bacu bakaba bakoroherezwa kujya gukora akazi mu bihugu bindi by ‘Afurika ndetse n ‘ Ibulayi, Amerika na Aziya bityo bagatunga imiryango yabo yasigaye mu gihugu ndetse bakagira uruhare mu mushinga iteza imbere Urwababaye. Aho gushyira ingufu mu guteza intambara z’urudaca mu bihugu duturanye tuzagirana imishyikirano n’ ibihugu byose byo mu Karere k’Ibiyaga Bigari kugira ngo Abana bacu baharonke imirimo ibafitiye akamaro. Tuzafungura imiryango ya za Gereza, kugira ngo bose bahabwe andi mahirwe yo kugira uruhare mu kubaka U Rwanda rwa twese. Abacuruzi bazahabwa ubwisanzure, “Monopoles zififitse ” zikurweho. Tuzubaka demokarasi y’umwimerere yitwa “Demokarasi y’Impanga ” izatanga umuti ukenewe w’ikibazo cy’ubusumbane n’umwiryane hagati y’amoko cyane cyane hagati y’Abatutsi n’Abahutu. Tuzaca Iterabwoba, Abanyarwanda bose bishyire kandi bizane mu Rwababyaye, batozwe umuco wo kuganira no kuvuga ikibari ku mutima badakebaguzwa.

SAIDATI : Mu Itangazo mwashyize ahagaragara ku wa 28 Mutarama 2016 mugira muti “ntidushaka kuza mu Rwanda nk’abagabye igitero” ! Ko muri abanyarwanda kuki mwumva ko ikipe y’abantu batarenze 10 yaza ari igitero kandi mutashye iwanyu ari uburenganzira bwanyu?

PADIRI THOMAS: Ni koko iyo umuntu umwe atashye mu gihugu cye ntabwo akenera kubitangaza mu binyamakuru . Gusa nk’uko ubivuga, twe tuzaza turi IKIPE itaje kwitemberera mu Rwanda. Tuzaza turi Abanyapolitiki baje bafite intego yo kwimenyekanisha ku Banyarwanda, tuganira nabo, twumva ibyifuzo byabo, tubabwira kandi natwe umushinga mwiza tubafitiye.
Gusa rero tuzi ko iyo gahunda yacu n’iyo yaba nziza ite atari yo yonyine iri mu gihugu. By’umwihariko hari abari ku butegetsi batubona nk’abakeba, kandi ibyo ubwabyo si icyaha niyo kamere ya politiki. Abo nibo tugomba kugerageza kuganira , abo nibo tugomba kubanza kwimenyekanishaho bwa mbere. Nibo dushaka kwitwararikaho kuko twabonye nyine uko bakiriye abatubanjirije! Aho Victoire Ingabire ari turahazi. Uko byagendekeye Faustin Twagiramungu ntitubiyobewe. Mu rugero byaduturukaho turashaka kwirinda guta igihe mu mahane atari ngombwa. Ngiyo impamvu dushaka kubanza kuganira nabo.

SAIDATI : Ikibazo cyanjye cya nyuma, mwagaragaje ko muri gukora imishyikirano na Leta y’u Rwanda kugirango mutahe ntawe mubangamiye. Niba atari ibanga ni iki mwasabaga? Niba se mwaravuganye, ni iki mutumvikanyeho cyababereye inzitizi kikababuza gutaha kuwa 28 Mutarama 2016?

PADIRI THOMAS : Muri Kongere yacu twafashe icyemezo cyo kwandikira no koherereza Perezida wa Repubulika ibaruwa. Icyakora twayitanze dutinze kuko uwitwa Olivier NDUHUNGIREHE, Ambasaderi mushya w’u Rwanda i Buruseli mu BUBILIGI yadutengushye cyane. Yabanje kudushuka ko ashobora kuzayitugereza kuri Nyakubahwa Perezida wa Repubulika, nyuma amaze kudutesha icyumweru cyose biza kugaragara ko aryama ahindukira, bityo tumaze kubona ko atari umugabo ukwiye kwizerwa duhitamo gutuma Yakobo KABARE, Ambasaderi w ‘ u Rwanda i Paris mu Bufaransa, ubu tukaba twizera ko ubutumwa bwacu yabusohoje. Mu gihe rero tugitegereje igisubizo cya Perezida wa Repubulika, ntabwo dushobora kumenyesha itangazamakuru ibyo twamwandikiye. Si umuco mwiza.

SAIDATI :-Nk’umunyapolitiki uteganya kuza mu Karere uratekereza iki ku bibera i Burundi ?

PADIRI THOMAS: Ibibera i Burundi birababaje cyane. Iyo ubonye inzu y’umuturanyi ifashwe n’inkogi ibyiza wamutabara aho kumutererana cyangwa kumusonga kuko bitabaye ibyo bwacya hagafatwa iyawe. Niba koko Leta y’u Rwanda ifite uruhare mu kurema , gutoza, no gushyigikira imitwe ihungabanya umutekano mu Burundi nk’uko bivugwa mu ma raporo atandukanye biragayitse ndetse bikwiye guhagarara mu maguru mashya.

SAIDATI : Mu gusoza ni ubuhe butumwa mwaha abazasoma Mont Jali News? Ese murateganya kuza mu Rwanda ryari ko umwana ujya iwabo ntawumutangira mwese ko muri abanyarwanda?

PADIRI THOMAS:Uzambwirire Abanyarwanda uti ABATARIPFANA ni abana beza cyane, bafite ibitekerezo byiza, bafite ubwenge n’ubushake bwo gutanga umuganda wabo mu kubaka igihugu cy’amahoro giha amahirwe angana abana bacyo bose. Gusa uzanabambwirire ubateguze hakiri kare ko Abataripfana bafite akageso : ” Aho kuryamira ukuri bahitamo kuryamira ubugi bw’intorezo “! Uzabatubwirire ko tuje tutari abantu bafunze imitwe, icyo tugamije si ukubaka Itsinda ry’abashotoranyi, ikituzinduye ni ugukora Opozisiyo yubaka kandi ishishikajwe no kurengera inyungu rusange z’Abanyarwanda bose nta vangura (Opposition ouverte et constructive ).

SAIDATI : MURAKOZE.

10 Gashyantare 2014, Inteko ishinga amategeko y’u Rwanda, yatoye itegeko ryemeza ko imitungo idafite ba nyirayo izajya icungwa na Leta kugeza igihe beneyo babonekeye bakayisubizwa bemeje ko ari iyabo.

Iri tegeko rikaba rimaze gusohoka muri gazete ya Leta muri iyi minsi ishize mwarisanga hano>>>

Radio Itahuka yaganiriye na Dr Charles Kambanda umuhanga mu mategeko asobanura uko icyo kibazo giteye

Ikiganiro cyose mwacyumva hano >>>

Perezida wa Repubulika aduhaye igisubizo cyiza kitwemerera kuganira twahita duterura utwangushye tugataha. Guhera taliki 28 Mutarama 2016 Delegation iri STANDBY.Niko Kongere ya bigennye. Bitagenze bityo, nubona twatangiye gukora Meetings zo gusezera abo twabanye mu mahanga (i Buruseli, Paris, i Londres, Oslo, Washington DC, Ottawa na Canberra ) uzamenye ko yiyemeje gufata ikirere. Rendez-vous i Kanombe.

Ikiganiro cyose cya Radio Itahuka hano>>>

Amateka y’Urwanda avugwa uko ari? Umunsi w’intwari ukorwa mu buryo bufasha ubumwe n’ubwiyunge bw’abanyarwanda?

Abatumirwa:

Boniface Benzinge umujyanama wa Kigeli V Ndahindurwa,

Amb. Anastase Gasana wigeze no kuba Minisitiri w’ububanyi n’amahanga,

Ngarambe Joseph uretse kuba impuguke mu by’ubukungu ni n’umwe mu bantu bazi ibya politiki y’Urwanda kuva kera,

Didas Gasana na we nk’umunyamakuru usesengura, utaryamira ukuri kandi akemenya amagambo yo kukuvugamo ari mu batumirwa muri iki kiganiro kiyoborwa na Serge Ndayizeye kuri radio Ijwi Ihuriro Nyarwanda.

Uretse abo batumirwa n’abandi batelefonnye batanga ibibazo n’ibitekerezo.

Hari ibyo bamwe tutari tuzi twumviye muri iki kiganiro cyangwa bikanaduha inzira yo kuzarushaho gushakisha ukuri ku Mateka.

Ikiganiro cyose mushobora kucyumva hano >>>>

Madamu Uzamukunda Marie Claire yaburiwe irengero ku cyumweru taliki ya 24 Mutarama 2016, ubwo yari avuye iwe i Gicumbi yerekeza ku kazi ke ku bitaro by’i Rwamagana aho akora nka Administratrice . Yafatiwe Nyabugogo azimira atyo, kugeza na n’ubu .Abaturage bahangayikishijwe cyane n’iri rigiswa ritunguranye n’uburyo Polisi igaragaza ubushake buke mu gukurikirana irengero ry’uyu mutegarugori.

Abaturage bemeza ko uyu mudamu bafataga nk’indakemwa mu mico no mu myifatire yahaguruste iwe ku cyumweru mu gitondo nk’uko bisanzwe ari muzima, nta kibazo afite. Bamwe mu baturage bafite ubwoba ko ibi byaba bifitanye isano n’irigiswa ry’abantu rimaze iminsi rikomeje kuvugwa hirya no hino mu gihugu ndetse bikaviramwo bamwe kuraswa mu buryo budafututse mbere y’uko bagezwa imbere y’ubucamanza.

Umwe mu bakoranaga na Madame Uzamukunda Marie Claire utashatse ko tuvuga izina rye kubera umutekano we, yadutangarije uko abona iki kibazo muri aya magambo: « ndahamya rwose ko irigiswa ry’uyu mutegarugori rifitanye isano rya hafi n’umwanya w’akazi yari amaze igihe gito ahawe ». Uyu mukozi bakoranaga yakomeje agira ati:  « Madamu Uzamukunda akimara guhabwa uyu mwanya, yatangiye kwibasirwa n’iterabwoba ry’umusirikare mukuru ufitanye relation z’ubuhabara n’ umudamu wari usanzwe akora aka kazi ariko  akaba yari yaragaragaje ubushobozi buke mu mirimo ye bigatuma agatakaza » . Uyu mukozi w’ibitaro yatugejeho inkuru iteye ubwoba yabwiwe na Madamu Uzamukunda ubwe! Ngo umunsi umwe , uyu mugore wari utakaje umwanya  ariko akaba ihabara rya Afande yasanze Madame Uzamukunda mu biro amubwira n’agasuzuguro kenshi ngo :  » Umuntu nkawe ntiyakagombye kuba yicaye mu mwanya nk’uyu ngo  yibwireko azawutindaho igihe kirekire »!  Yoshoje ubuhamya bwe agira ati : « Kuri njye,  aho niho ruzingiye . Ngayo nguko »!

1)Ibyabaye ni ibikorwa by’ubujura byakozwe n’abo twakwita ingegera zazahajwe n’urumogi n’utuyoga bita agashinguracumu tugura 200 hamwe na suruduwire za 250!

2)Kuba batemye abantu ni uko babikoreye mu gace karimo ingo nyinshi abantu bakicaye ku buryo icyatumye batiba ni uko aho bajyaga basangaga batararyama! Abahuruye babatemaga,babateraga amacupa,amabuye cyangwa bakabakubita ferabeto!

3)Bateshejwe i Ndera mu kagari ka Kibenga mu ma saa yine -saa tanu gutyo zijoro bambutse igishanga bagana mu kagari ka Rudashya i Gasogi aho bita kwa Kimeza ku ikoni.

4)Aha ku ikoni ni mu mahuriro y’umuhanda uva ku Murindi wa Kanombe ujya Gikomero unyuze kuri ESTH Gasogi n’umuhanda uva Rudashya ugana Cyaruzinge unyuze kuri College de l’Espoir de Gasogi, ikigo cya Afandi Andre Muhirwa wahoze ayobora Police i Burasirazuba!

5)Muri aya mahuriro y’imihanda hakunze kuba hahagaze aba GP iyo Kagame ari mu rugendo (Zone de protection presidentielle).

6)Centre ya Mulindi ibaho Mayibobo nyinshi ni ho abasirikare bava muri Camp Kanombe batari aba GP baba bahagaze, ba bandi bashinzwe kuragiza abaturage imbunda. Centre yakoreweho operation n’izo ngegera iri muri metero 250 uvuye ku gasoko ko ku Mulindi no hafi ya Gereza ya gisirikare yuzuyeho Military!

6)Uko ibisambo byakoze operation mu ma saa cyenda z’ijoro:
Baje ari nka 5 bafite ferabeto ikunje ukuntu bicisha ingufuri na serire y’urugi! Bateye ku nzu y’ubucuruzi y’umusirikare ifite imiryango ine ikodeshwa 50000frw n’abacuruzi. Si we ukoreramo aho bakinguye ni kwa John iruhande rwo kwa Manuel! Nta muzamu kuko ni butike nto rwose! Igisambo kimwe kinjiye gishaka iboro n’amafaranga ibindi bikora uburinzi mu tuyira twaturukamo abari buhurure!Akenshi biba hamwe ariko bakazibira amarembo y’ingo byegeranye haturuka abari buhurure!Iyo ubiroshyemo wa wundi winjiye atarasohoka barakumena. Baba bafite amabuye cyangwa amakaziye bavanye muri butike yo gukuramo amacupa yo gutera abaje kubafata!

8)Aho kwa Kimeza kuri butike ya John abatabaye babateye amacupa bariruka,bafata utuboro duke bakuye muri butike barigendera.

9)Militari yahageze bayikwepera mu rutoki bashoka igishanga kiri hagati ya Rusororo na Rudashya itora ubusurira! Mu kimwaro n’ibikabyo byinshi hahuruye abasirikare n’abapolisi igitero batunenga abaturage b’inzirakarengane ngo bacumbikiye abacengezi barashorera barafunga.

10)Turasaba abayobozi guhagarika ibikorwa by’urugomo bagirira abaturage babahondagura babicaza mu mavumbi kandi biviriye mu mihate!Ubwirwa cyane ni Gitifu wa Rudashya wari uri guhondagura abaturage bavuye mu mihate yabo bagana Rudashya kuri uyu mugoroba! Turasaba Leta ko yahimba imirimo izi nsoresore zigahagarika kwiheba zinywa ibiyobyabwenge.Turasaba abashinzwe umutekano guhagarika imvugo ihahamura abaturage ngo hari abagamije kubica kuko bigaragara ko batazi gusesengura!

Uko twakurikiranye iki kibazo twanzuye ko ari ibikorwa by’ubugegera bikorwa n’abahoze ari Mayibobo ku Mulindi bari batunzwe n’urusimbi bararubabuza bajya mu byo kwiba, uje kubatesha bakamutema! Batandukanye n’agaco k’amabandi kayoborwaga na Sergent Demobe Burahimu ubu ufunze kuko ko katatemaga ahubwo katoboraga amazu na Boutique kakiba ariko katica!

Abayobora amarondo ni icyuka! Inkeragutabara ni icyuka! DASSO ni icyuka! Police ni icyuka!Military ni icyuka!GP ni icyukaaaaaa!

Turamenyesha Abanyarwanda ko bimwe mu byatumye aba basore babura ibyiringiro ari ukubuzwa amahwemo na Police babafungira kwa Kabuga hafi ya bose bakaba barandujwe sida binyuze mu kibuno nyuma yo gufatwa ku ngufu iyo babafunze! Amahirwe ni uko ahatewe n’abakomeretse bahuruye ari abahutu naho ubundi bari kuvuga ko ari genocide igarutse iyo hagira umututsi ubikomerekeramo.

SINGIRANKABO E.
I Kigali.

Ihuriro Nyarwanda ryamaganye byimazeyo ibikorwa by’ Iterabwoba Leta iyobowe na Prezida Kagame ikomeje gukorera abaturage, rinashimira na Leta z’ Unze ubumwe z’ Amerika (USA) kwamagana iyo mikorere ya Leta y’ u Rwanda idahwitse.

Hashize iminsi mu Rwanda havugwa ubugizi bwa nabi budasanzwe, n’ imfu za hato na hato. Mu ijoro rishyira kuwa 2 Gashyantare 2016, abaturage ba Ndera baraye batewe n’ abantu bitwaje intwaro za gakondo ndetse n’ amatoroshi akoreshwa n’ Inzego zishinzwe umutekano. Kugeza ubu haravugwa abantu icyenda bakomerekejwe n’ icyo gitero. Inzego z’ Umutekano ntizivuga rumwe kuri iki gitero aho Ingabo zivuga ko u Rwanda rwatewe n’ Umwanzi kubera ubuhanga ibyo bitero bwakoranwe, naho Polisi ikavuga ko ari ibisambo.

Ku italiki ya 25 Mutarama, nabwo inkuru y’ Inca mugongo yamenyekanye ko umunyamakuru Mahoro Giovanni wakoreraga Radio Salus yapfuye urupfu rutunguranye, nubwo benshi bemeza ko yahawe uburozi. Ibyo byakurikiwe n’ Ishimutwa ry’ abantu benshi biganjemo abo mu idini rya Islam, kugeza uyu munsi bafungiye ahantu hatazwi.

Ku itariki ya 24, uwo munsi umunyamakuru Mahoro yapfuye nibwo Polisi yatangaje ko yishe Mugemangango Muhamed ubwo yashakaga gutoroka. Listi y’ Abakomeje kuraswa muri ubwo buryo mu rwego rwo gushaka kuzimanganya bibimenyetso ni benshi, muribuka ko muw’ 2014 aribwo uwahoze ari Executif(Gitifu wa Cyuve) Nsengimana Alfred ariko yishwe kandi arikumapingu. Mu w’ 2015 naho Assumani Muhuzamiryango yarashwe muri ubwo buryo i Musanze. Dr. Gasakure wari umuganga wa Prezida Kagame nawe niko yapfuye ubwo yari mumaboko ya Polisi i Remera…listi ni ndende. Muri Audio Ihuriro Nyarwanda, RNC (Radio Itahuka) ifitiye kopi, umuvugizi wa Polisi ACP Twahirwa yavuze ko ntabimenyetso Polisi ifite by’ uko Mugemangango yakoranaga n’ Intagondwa za ki islam, nubwo aricyo cyaha yaregwaga.

Nyuma yuko abatari bacye twakomeje gutabariza abo ba Islam, Polisi iravuga ko noneho yabonye ibimenyetso ko Mugemangango yakoranaga n’ imitwe y’ Iterabwoba ndetse ko nabo bakoranaga bafashwe ariko kugeza uyu munsi bakaba batarashyikirizwa inkiko mugihe giteganyijwe n’ Itegeko Nshinga.

Ihuriro Nyarwanda, RNC kandi rifite amakuru ko ibi ari bicye bigaragazwa ariko iri terabwoba rikorerwa benshi ndetse izitwa inzego z’ Umutekano ziri mumugambi wo gukwirakwiza ibi bikorwa mugihugu hose. Twamaganye ibi bikorwa by’ Iterabwoba tunakangurura abanyarwanda kumenya iyi mikorere y’ Inzego z’ Umutekano yo kwihisha mubikorwa by’ ubugizi bwa nabi kugirango ibone uko ibagenzurira mu kiganza.

Leta z’ Unze ubumwe z’ amerika (USA) ikaba yavuze ko iyi mikorere isanzwe igaragara mubanyagitugu. Bwana Kirby, umuvugizi wa Ministeri Ishinzwe ububanyi n’ Amahanga yasobanuye ko “mu bihugu bitari bike byo ku isi abategetsi bitwaza ibikorwa by’iterabwoba mu kumvisha no kubuza abanyagihugu gutangaza ibitekerezo byabo”.

Twongeye kwibutsa abanyarwanda ndetse na Leta y’ u Rwanda ko Ihuriro Nyarwanda. RNC ritazatezuka kumugambi ryiyemeje wo guharanira ko ubugizi bwa nabi bunyuze mu isura iyo ariyo yose bwacika burundu maze abanyarwanda bakagira ubwisanzure, bakitorera inzego z’ Ubuyobozi burengera inyungu z’ Umuturage.

Jean Paul Turayishimye
Umuvugizi w’ Ihuriro Nyarwanda
jpturayishimye@yahoo.com
Cell: 15083358771

Itangazo rya leta y’u Burundi biciye mwishyaka CNDD-FDD ririkoma Kagame mu buryo bukomeye kandi mu by’ukuri mu buryo bwumvikana aho arimo gukoresha iturufu ya génocide nkuko ayikoresha mu Rwanda.

CNDD-FDD irabisobanura neza ishize amanga nta bwoba.

Mwiyumvire ir’itangazo riryoheye amatwi aho bita Kagame Paul ko arumukoroni nokuba yaragize abanyarwanda bamwe ingwate.
Musabwe gukwirakwiza aka kantu murakoze.