Umuntu wahanuye indege ya Perezida Yuvenali Habyarimana kandi azi neza adashidikanya ko icyo gikorwa cy’iterabwoba gikurikirwa ako kanya na jenoside y’abatutsi, hanyuma agafatanya n’Interahamwe kumaraho abatutsi, uwo muntu ni bwoko ki? Mbere yo kugigana n’icyo kibazo, reka duhere ku bindi bibazo bibiri bishobora kutworohereza kugisubiza.

Ikibazo cya mbere. Niba hari inyoni ireshya na rusake, ifite ibirokoroko n’ibikohwa nk’ibya rusake, iteretse amasunzu nk’aya rusake, ibika nka rusake, ipapaza amababa nka rusake mbere yo kwurira inkokokazi, ifite isura n’imyitwarire ya rusake, iyo nyoni ni bwoko ki? Yewe, iyo nyoni igomba kuba ari rusake byanze bikunze.

Ikibazo cya kabiri. Umuntu witwara nk’Interahamwe: akica abantu urubozo nta mpuhwe na busa, wokamwe no kwibona birenze urugero, kwirata, kwiyemera, ivanguramoko, uhiga bukware abatavugarumwe na we, witwara nk’aho amategeko y’igihugu atamureba, utagira icyaha na kimwe atinya, wigize igikoresho cya sekibi, waciye akagozi ka jenoside  ( Radio Inyabutatu: Indege ya Habyarimana yarashwe na Lt Frank Nziza na Caporal Eric Bizimana) agatiza Interahamwe umurindi wo kurimbura abatutsi mu gihe cya jenoside, uwo muntu ni muntu bwoko ki?

Umuntu utekereza nk’Interahamwe, akitwara bunyamaswa nkazo, ni Interahamwe ntibazakubeshye, ubwicanyi ntibugira ubwoko, ntibugira imipaka: yaba umusirikare w’ikirenga wambaye ku ntugu inyenyeri nyinshi za zahabu; yaba umugore w’igishongore ubengerana ubwiza nk’ikizubazuba; yaba umucuruzi ugendera mu bicu nka kagoma akarebana abantu iseseme kubera umurengwe; yaba umuririmbyi w’ikirangirire; yaba umusore w’igikurankota witwara nk’intare yo mw’ishyamba; yaba mameya mukuru uvuga ijambo rimwe gusa igikuba kigacika, isi ya bamwe igahagara nk’aho ayijanjaguye n’inyundo; yaba umwarimu rwagitinywa wa kaminuza, uhahamura abantu abakangisha ko ashobora kubarema akoresheje ibishishwa by’ibijumba, cyangwa ashobora gukora intwaro za kirimbuzi akoresheje inyabarasanya; yaba umukomando mu barinda Paul Kagame  ubamba abantu igicuri, akababaga bakiri bazima nta kinya akoresheje, kandi atigeze akandagiza ikirenge mw’ishuri ry’ubuvuzi, abasirikare bamubona bagatera amasaruti nk’aho ari we wahanze Gihanga; yaba umucamanza uvuga rikijyana, yakwitsamura imitima ikabomborana; yaba umwicanyi ruharwa wicaye muri Village Urugwiro woretse imbaga y’abanyarwanda n’abanyamahanga. Reka tubisubiremo: umuntu utekereza nk’Interahamwe, akitwara nk’Interahamwe ni interahamwe nta kabuza(P.KAGAME YARITAGUYE ABATURAGE BARI BAJE MW’ISOKO AFITE IBYISHIMO BIRENZE URUGERO), yaba inkandagirabitabo, inzirabwenge cyangwa afite izindi nyito.

Paul Kagame yitwikiriye ijoro, ahanura indege ya Perezida Habyarima, abagabo 12 bayirimo bose barapfa, aba atangije jenoside (Rwanda’s Untold Story Documentary on Vimeo); abuza abasirikare yari ayoboye gutabara abatutsi bicwaga bunyamwasa, ahubwo atiza interahamwe umurindi, arashega arasizora yanga ko amahanga atabara, aba aburijemo amasezerano y’amahoro ya Arusha yo yari amizero y’abatutsi n’abanyarwanda bose muri rusange. Yakoze ibyo byose azi neza ko nyina umubyara, umugore we, abana be, bashiki be, n’inkoramutima ze nta wari gutikirira muri uwo muriro yaramaze kwatsa(ANGE KAGAME YATONETSE ABAROKOTSE JENOSIDE N’ABANDI BENSHI ISE PAUL KAGAME YICIYE ABABYEYI ).

Yanditswe na Ben Barugahare

Nyuma y’aho umugabo witwa Fidel Gatsinzi agaragariye mu bitangazamakuru byo mu Rwanda avuga ko yari yarashimutiwe mu gihugu cya Uganda n’inzego z’iperereza za Gisirikare za Uganda (CMI) ngo ku kagambane ka Rugema Kayumba, ubwanditsi bwa The Rwandan bwegereye Rugema Kayumba agira icyo avuga ku bimuvugwaho.

Nabibutsa ko ibitangazamakuru byo mu Rwanda cyane cyane ibyegamiye kuri Leta iyobowe na FPR nta munsi w’ubusa ibyo bitangaza makuru bimara bidasohoye inkuru igaragaramo izina rya Rugema Kayumba.

Mushobora gukurikirana ikiganiro Rugema Kayumba yagiranye n’umunyamakuru wa The Rwanda hano hasi:

Yanditswe na Jean-Jacques Bigwabishinze

Uwo mwari uramutashye,
Wowe ugera iyo muri gereza;
N’ubwo itahe ari ubusa,
Uzansuhurize uwo mwari,
Uti «Bigwabishinze ngo mutahe,
N’umuturage warushye,
N’umutunzi uhuguzwa ibye,
N’urubyiruko rutabarika,
N’umuntu wese ufite umutima
Udashaka gutererana u Rwanda
Ruhekurwa n’abaruyoboye !»

Kagame yongeye kwigamba
Ko ari we wamushumurije inkiko
Ngo ba bashinjabinyoma
Bo mu nkiko z’u Rwanda
Biyita abashinjabyaha
Bamujyane jugujugu !

Numvise Kagame yivovota,
Avugana ivogonyo karahava;
Ko yiyita umukuru w’igihugu,
Akaba asheshe akanguhe,
N’imvi zuzuye umutwe,
Ni kuki avuga amahomvu,
Akaba asaziye ubusa ?

Numvise uwo mugabo
Yitotomba nk’intare,
Ashinyagurira abo afunze,
Ngo nibakarabe zibarye,
Bajye kuborera mu buroko,
Aho yabacaniye umuriro !

Akomeje kuba Kamegeri,
Arakaranga ku rutare
Abazira ibya politiki,
Bakorewe itekinika,
Bakabagerekaho urusyo
Ngo babone uko babasyonyora !

Uwo mwari uramutashye,
Wowe murinzi wa gereza;
Ntuzamwice urubozo,
Mu kurangiza inshingano zawe,
Uzubahirize uburenganzira
Bw’abajyanywe bunyago,
Bakajugunywa mu buroko !

Uwo mwari uramutashye,
Wowe wuzuyemo ubumuntu,
Ntukangwe n’iterabwoba
Ry’inzego z’umutekano,
Ukajya gusura izo mfungwa,
Ukazigezaho amafunguro
N’amagambo azihumuriza !

Uwo mwari uramutashye,
Wowe ukorera Diyemayi;
Nibakohereza kuneka
No kwica abenegihugu
Bahungiye i Bugande,
Uzace i Kibungo,
Nugera mu mahanga
Uhace umuti wa mperezayo;
Ntuzahohotere impunzi
N’uwatorotse Inkotanyi !

Uwo mwari uramutashye,
Wowe musore w’umusirikare;
Niwoherezwa kurasa inzirakarengane,
Hagamijwe kwimika iterabwoba,
Uzasesere mu rugano,
Uhungire i Bugande;
Uzafate se iy’urufunzo,
Wambuke umupaka,
Haba ku Kanyaru,
Haba mu Rugezi,
Witandukanye n’ubutegetsi
Burangwa n’ubugizi bwa nabi!

Uwo mwari uramutashye,
Wowe ukomeye muri Leta
Itegeka igihugu gisirikare;
Ubutaha nujya mu butumwa,
Uzafate utwangushye,
Nugera mu mahanga
Uzasabeyo ubuhungiro,
Utabarize abasigaye mu gihugu,
Aho gusubira mu Rwanda,
Ngo utize umurindi
Ubutegetsi kabutindi
Buturagije imbunda !

Uwo mwari uramutashye,
Wowe mutegetsi muzima
Ukiri muri Leta y’agatsiko,
Ukaba witwikira ijoro,
Ukongorera uwo mwari,
Ukamurema agatima
Umubwira ko witeguye
Kwitandukanya n’igitugu !

Uwo mwari uramutashye,
Wowe wakoze amahano,
Ukaba ufite icyo wicuza,
Cungura umutimanama wawe,
Ujye ahirengeye ukome akamo,
Wamagane akarengane n’ingoyi !
Ntuzihutire gukora ikibi,
N’iyo wabitegekwa na Leta;
Kunda undi nk’uko wikunda,
Ntuzongere gucumura ukundi !

Witererana abari mu kangaratete,
Itandukanye n’akarengane,
Niba utaratije umupanga
Na «nta mpongano y’umwanzi»
Abajyaga mu marondo
Yo guhiga abavandimwe babo
Basangiye urwa Gihanga !

Niba ubwirwa ayo mahano
Akaguhahamura umutima,
Wikomera amashyi umwishongozi
Ubyinira ku mubyimba
Abo yagize imbohe
Abashinja ubugambanyi,
Ngo barakorana n’umwanzi,
Nk’ibyitso by’ingeri nshyashya !

Niba amahirwe akigusekera,
Ntuzi uko ejo hazaza hasa,
Wiba nka wa mugabo mbwa,
Ngo useke imbohe ukiriho;
Uwo mwari uramutashye,
Umwifurize ineza;
Numusura muri gereza
Ni YESU uzaba usuye,
Bizakubyarira agakiza
Ku munsi w’imperuka !

Uwo mwari uramutashye,
Umwifurize Noheli nziza;
Umwaka utaha uzamusekere,
Maze uzane no kunamura icumu,
Abazira akamama bose,
Bave ku ngoyi ibakanyaga
Yabaye intwaro y’iyi ngoma !

Uwo mwari uramutashye,
Uti «itabaza wacanye
Nturitwikirize ikitabashwa
Wariteretse ahirengeye
Ritubera nka Muhabura;
Umwijima wareyutse,
Urubyiruko rw’u Rwanda
Ntirugikeneye abarurandata,
Ruratera ikirenge mu cyawe,
Ngo rwuse ikivi wateruye !

Numvise ubwo bushinyaguzi,
N’amagambo ateye ishozi
Ava mu kanwa k’umukuru w’igihugu,
Agahinda karanshengura,
Nti «koko u Rwanda rwaragendesheje !»

Uwo mwari tumuri inyuma,
Ubu nta cyo nkirindiriye,
Ejo nzambara inkindi,
Nigabe mu birindiro,
Mutere ingabo mu bitugu;
Sinzongera kuba indorerezi
Ibintu bigeze iwa Ndabaga !

Uwo mwari uramutashye,
Uti «Bigwabishinze ntakihisha,
Yahagurukanye imizi n’imiganda,
Ivuzivuzi rya Kagame
Ryamukuye ku izima !»

 Gihembe, Impunzi z’Abanyekongo zirarebana ay’ingwe na Leta y’u Rwanda kubera kubangamirwa muri gahunda yo kujya muri Amerika

Nkuko mubizi USA yatangiye gahunda yo kwimurira impunzi zo mu nkambi ya Gihembe muri Amerika kugira ngo zihindurirwe imibereho kuko ziriho mu buzima bubi nta buvuzi bagira; uburezi busa naho ari ntabwo; imibereho ni mibi n’ibindi.

Ubwo iyi gahunda yo gutuzwa muri Amerika yari itangiye yaje imeze nko kubacungura; impunzi zose zirishima cyane igikorwa kigenda neza ariko Leta y’u Rwanda igakomeza gushaka uko ibihagarika kuko ariho ikura abana bajya mu gisirikare no mu gipolisi ariko HCR na USA bikahagoboka.

Ariko ubu noneho ibibazo birakomeye kuko umukozi w’urwego rw’Abinjira n’abasohoka (Immigration) Innocent Ngirabatware  (0788359442) ukorera mu nkambi ya Gihembe atumereye nabi yica dossier z’abagiye kujya muri Amerika. Ubu amarira ni yose.

UKO BYATANGIYE

Uyu Innocent Ngirabatware yaje asimbura uwitwa Enock, yatangiye imirimo tariki ya 24/02/2017. Agitangira akazi yaje avuga ko agiye guhangana n’impunzi aho yatangiye abangamira abasore bafite dossier yo kujya amerika. Yabona umusore wambaye neza akavuga ngo mbese iyo myenda yayikuyehe ko mu nkambi nta mafaranga bagira; waba ufite dossier akagushinja ibintu bitandukanye kugira ngo dossier yawe ipfe; rimwe akababeshyera ngo bafite amarangamuntu y’u Rwanda kandi ntayo bafite n’ibindi byinshi cyane.

Ikindi kibazo nuko nta muntu wemerewe gukorerwa adafite ikarita y’Indangamuntu kandi benshi ntibazibonye kubera urwego rushinzwe kuzitanga rw’u Rwanda rutazibahaye; hari n’abuzuza imyaka yo kuzibona ntibazihabwe; igihe cyo kugenda muri Amerika cyagera bakayibabaza kandi ntayo babahaye ubwo bikaba bipfuye utyo bigaragara ko ari umugambi mubisha wo kubavutsa aya mahirwe.

Bamwe kugira ngo bakorerwe hari abatanze ruswa; hari uwatanze ruswa ya 400,000 Frws ; 1,500,000 n’abandi batandukanye kugira ngo bigure.

Mudufashe rwose mudukorere ubuvugizi turashize n’iyi ruswa;

Umusomyi wa The Rwandan Gihembe

IGICE CYA MBERE:Iriburiro

Banyarwanda dusangiye gakondo,
Iyi ni mpuruza mbatuye mwese ntarobanuye n’umwe, kuko uru rugamba mbakangurira rutureba twese;

Sinyobewe ko abwirwa benshi ngo beneyo aribo bumva,

Abo batumvirana nibo nkeneye cyane kugirango dufatanye uru rugendo twiyemeje gutangiza kumugaragaro rwo kujya kurasa Karinga ngo isandare uko yakabaye ni uko u Rwanda rutahe ituze abaruvuka bagubwe neza ntawe ukikanga baringa.

Ibi mbabwira si inzozi kuko nakabije igice kinini cyazo

Habura umusanzu wanyu ngo abahungu duhuje gahunda batange ubwisanzure mu rwatubyaye kuko baryamiye amajanja bategereje ijambo ry’abatanazi n’abacuzi b’ibigembe.

Igihe kiraduha amahirwe, ubwami bw’umwidishyi bwarashegeshwe bumeze nk’igiti gihagaze imizi yaramunzwe kera gitegereje umuyaga ngo uhuhe ubundi kive mubyimbo ituze ritahe mu mitima y’abanyarwanda.

Umwakagara nta ngabo agira, siwe ubyara bariya basore beza mureba, basobanukiwe y’uko ari ab’igihugu atari ab’umuntu nitwe bategereje ngo dukome imbarutso maze badusanganire dusangire iyo ntsinzi.

INGOMA IRI KUGITEME yabuze gitora, utaje ubu sinkurinda ndajyana n’abanyotewe itabaro.

Abaruvuka barambiwe umwidishyi, amahanga yaramuzinutswe, niturwinjira ntawe uzaturwanya yewe nta n’uzatungurwa kuko bose intero ni imwe bati:” UWADUHA INTWARI NGO IDUKIZA UYU MUBISHA?”

Kuki iyo ntwari itaba wowe? Kuki itaba jyewe cyangwa se twembi ngo tugarurire igihugu cyacu ijabo cyahoranye imahanga umwanzi ataragisiga icyasha?

URUGAMBA SI URUGAMBO

Igihe gitambutse kirahagije duhora twisubiramo buri gahe duhawe ijambo boshye Gatigisimu , twibeshya cyangwa se tubeshya abandi ko tugiye kubohora urwatubyaye byihuse, none amaso aheze mukirere.

Impamvu iduhejeje ishyanga ingana ururo; benshi muri twe bagoswe n’ubujiji bushingiye ku marangamutima, rubanda rubakurikiye buhumyi rukabataka bigashyira kera, abandi nabo bagatuza karuvati bakazifunga ibituza bakabirega bakiyumvamo ubuhangange bwa he burakajya, boshye ya hene bita Mutamu nayo igakimbagira.

Hari abakirota ingoma y’akazu k’iyo mumajyaruguru, ngo badatatira CDR,

Kuri bo ibyiza by’u Rwanda ntawundi byaremewe uretse izo njiji zemeza ko ntakabaye ku batutsi , ngo abishwe bose bari ibyitso,

Abandi bakarota ingoma yo mumayaga ya Nduga kwa PARMEHUTU ngo baterekere uwo umuzimu batazi ko yazimye kera.

Abatabarizwa aho hombi bakarota FPR ivuruguse ari nako bikirigita ku ntugu ngo aha bararata inkovu z’imiringa bambitswe na karinga kera bagisangira inkaba, itarabacira ishyanga.

Nterwa intimba n’inkirirahato z’abatutsi zizirika kuwabishe n’ubu akibatsemba urusorongo zimwibeshyamo umutabazi kandi nyabusa impuhwe yarazisize kagitumba umunsi yambuka umuyanja agashyirwa yikoze munda ngo akunde aramire ingoma, intero iba yego Mwidishyi agakomye kose arica atababariye n’iyonka kuko amagufa y’ababo arusha agaciro izo ngorwa zabuze umuhozi zibura n’umuhoza.

Mbabazwa n’inzirakarengane z’abahutu zanambiye abatutsi mugihe bahigwaga n’intagondwa ngo bicwe none ubu ziturwa inabi ngo ikivugo ni ndumunyarwanda aricyo gihamya icyaha n’utagira icyasha ngo ejo adahirahira aharanira ingoma maze karinga igahungabana.

Aba nibo bagizwe imbata na za ntagondwa ziyita ababo zibabuza amahwemo zibarangaza mu rugambo ari nako zibacuza utwabo zitwita umusanzu nyamara zaratsinzwe urugamba zihinduka imiyugiri, ziyunga n’uwazitsinze kuko basangiye ibanga.

Biyungiye gusahura i Congo bajijisha rubanda ngo ruhere kuri iyo ngoyi rutegereje gucungurwa.

Iryo ni ihurizo kuri bose ntibabasha kwicarana ngo bajye inama ikwiye barote u Rwanda rubereye twese ngo nyuma y’ingoma karinga tuzaturane dutuje.

Benshi mu batuye iburaya za Amerika n’ahandi baguye ahashashe nka nyirahuku bibagirwa gukinga urugamba baruhindura urugambo Mumyiyereko idatuza bo bita imyigaragambyo ngo barakangara Karinga bibereye ikantarange nyamara mwene Rutagambwa adahwema kubacuramo inkumbi;

Umwanzi yanze kunamura icumu, arica, abakambwe ataretse n’imicuko, inzuzi imigezi n’ibiyaga abihindura amarimbi,

Amabohero ntagira ingano ari azwi n’atazwi amenshi muri yo ni amabagiro, atari ay’ibitungwa kuko mwene muntu yasimbuye inyamaswa nayo itagira kivugira.

Arasenyera uwamukamiye ataretse n’uwamwimitse, Ingabo zarurasaniye arabamba iyo Munyuza atabanyujije murihumye abazimanira twa tuzi,

Araboha n’uwitsamuye yaba imfubyi cyangwa umupfakazi akandagaza umwari kukarubanda ngo aha atamukura kuntebe;

Inkiko arugariye ahejeje abaruvuka ishyanga, gakondo yacu igabijwe abanyamahanga ngo kuko bafite ifaranga rituma akina mumiyonga, no mumatongo y’abo yishe ngo hatagira mwene gihanga ukanga rutenderi agahungabanya karinga.

Abaturanyi abimye amahwemo; bayobewe niba nta ntwari ziba iwacu ngo zikangare uwo mutindi ituze rigaruke mukarere inzira zongere zigendwe duhahirane nka kera u Rwanda rutaragusha ishyana ngo ruvukishe iyo nkunguzi ituma duhora twikanga.

U Rwanda rurataka ruratabaza, rurashaka intwari zirurasanira zirengere abasigaye muri izo ngorwa, zisezerere ingoyi y’akandoyi ifuni na twa tuzi twaciye ibintu bigende nka nyomberi twibagirwe karinga.

U Rwanda rukeneye intwari zitwaje intwaro idatsimburwa ngo zize zitange ituze hose, uruvuka asubizwe ijambo abanyamakuru bisanzure maze demokarasi ishinge imizi umuhanga agaragazwe n’ububasha ahabwa n’impano yifitemo ni uko umuturage atore umunogeye adakoreshwa n’igitsure ngo aha adakubitwa agafuni cyangwa ngo aciribwe i mahanga.

Nsanze ubwo butwari ntakwiye kubushakira ahandi mugihe nanjye mbwiyumvamo kandi bwinshi dore ko nishingikirije izindi ntwari dufatanye urunana muri uru rugendo ziyemeje gutanga ubuzima bwazo, zigamije kuramira u Rwanda n’abaruvuka ngo ejo amaraso yazo atanyobwa n’imbwa , zihitamo gutara agahanga.

Izo ntwari nizo zantumye ngo nzibere ahirengeye bityo ijwi ndigeze aharenga abarengana babone agahenge.

Reka mvuge mu izina ry’izo ntwari mbamurikire ingamba zizadufasha muri urwo rugendo.

IGICE CYA KABIRI : Ingamba

UKO TUZARURWANA

I-Duhamagariye abantu bose muri rusange imitwe ya politiki ,amashyirahamwe ya sosiyete civile, abanyapolitiki ntawe turobanuye, baba abasanzwe bari mu mashyaka cyangwa se abarurwana kugiti cyabo, bifitemo ubushake bwo kubohora igihugu batitaye kumateka mabi aduteza amacakubiri, ngo badusange dufatanye Gushyiraho urwego rushya rufite ingufu zubakiye kugisirikari kifitemo amaraso mashyashya,ibitekerezo bishya n’umuvuduko ujyanye n’igihe kugirango umufa w’imbwebwe unyobwe ugishyushye.

Urwego twifuza gushyiraho rwiteguye gusimbura Leta ya FPR rugashyiraho leta y’inzibacyuho yaguye ihuriwemo n’amashyaka menshi ndetse n’abanyapolitiki bigenga ari nayo mpamvu hari ibyemezo ruzajya rufata byari bisanzwe ari umwihariko wa leta.

II-Duhamagariye urubyiruko rw’abanyarwanda rufite impamyabumenyi zo kurwego rwa kaminuza mubumenyi bw’ingeri zinyuranye kugirango rwifatanye na twe rutange umuganda warwo mu rwego rw’impuguke.

Tuzacyenera aba ingénieure benshi mu ikoranabuhanga rya informatique, télécomunication, électromechanique,mu mashanyarazi aba technicien b’ingeri zose ,abaganga n’abandi…
Tuzacyenera kandi abafite ubumenyi muri économie na finance, commerce & tradings, géopolitique ndetse na rélation international

III.Duhamagariye Ingabo z’igihugu za RDF , abapolisi b’igihugu babarizwa muri RNP, abacunga-gereza babarizwa muri RCS abanyerondo babarizwa muri DASSO ndetse n’abakora munzego z’iperereza kwifatanya natwe bitandukanya n’umunyagitugu Paul Kagame n’abambari be baze dufatanye ku rugamba rwo kubohora abanyarwanda.IV-

IKIBAZO CY’UMUTUNGO

Kugirango haboneke umutungo wo gushora mubikorwa byo kubohora igihugu:
Tuzashyira ku isoko impapuro z’agaciro (Bon de Trésor) zifite agaciro ka miliyoni icumi z’ama euro (10.000.000€) zishobora kuzongerwa bitewe n’ibizakenerwa nyuma yo kwigwa n’impuguke.

Mu gushyira ku isoko impapuro z’agaciro abanyarwanda, nibo bazahabwa amahirwe ya mbere yo kuzigura,

Amafaranga zizagurishwa azakoreshwa mubikorwa bya Révolution n’ibindi byuzuzanya bigamije guhirika ingoma y’igitugu.

Twibutse ko abanyarwanda nibatabyitabira tuzahamagarira abashoramali b’abanyamahanga kuzigura kandi bo twizeye ko bazitaba iyo mpuruza kuko abareba kure muri bo ari benshi.

Tuzashishikariza kandi abanyarwanda bose gutanga imisanzu kuko mugihe hataboneka ubushobozi bushingiye kumutungo ntacyakorwa.

IGICE CYA GATATU: Amashimwe

Hashyizweho ibihembo kubantu bose bazagira uruhare mu rugamba tugiye gutangiza kuburyo bukurikira

1- Abantu bose bazitabira imirimo ya gisirikare ku ikubitiro, nitumara gutsinda urugamba bazagenerwa amashimwe ateye atya:

Bazahabwa inguzanyo yo kubaka itagira inyungu kandi Leta ibishyurire 40% by’iyo nguzanyo.

Ikiciro cya mbere:

Kigizwe n’abasirikari bafite kuva ku ipeti rya Soldat/Pte kugeza kuri Adjudant Chef/ Warant officer Grade 1

Bazahabwa inguzanyo yo kubaka amacumbi Aciriritse afite agaciro kari hagati ya Miliyoni eshanu na miliyoni cumi n’ebyiri z’amafaranga y’amanyarwanda

Ikiciro cya kabiri

Kigizwe kuva kuri S/lieutenat /2lieutenant kugeza kuri Major
Bazahabwa inguzanyo yo kubaka amacumbi afite agaciro kari hagati ya Miliyoni cumi n’ebyiri na miliyoni cumi n’umunani z’amafaranga y’amanyarwanda

Ikiciro cya gatatu

Iki kiciro kigizwe n’abasirikari bafite kuva ku ipeti rya Lieutenant colonel kugera kuri Général Major

Bazahabwa inguzanyo yo kubaka amacumbi afite agaciro kari hagati ya Miliyoni cumi n’umunani na miliyoni makumyabiri n’ebyiri z’amafaranga y’amanyarwanda

Ikiciro cya Kane

Lieutenant Général kugera kuri Général

Bazahabwa inguzanyo yo kubaka amacumbi afite agaciro ka Miliyoni makumyabiri n’eshanu z’amafaranga y’amanyarwanda

Abazamugarira kurugamba Bazavuzwa na Leta kandi bakomeze guhembwa imishahara yabo kugeza ku iherezo ry’ubuzima bwabo.

Abazagwa kurugamba ishimwe ryabo rizahabwa abo mu miryango yabo babifitiye uburenganzira bahabwa n’amategeko.

Imfubyi n’abapfakazi kimwe n’ababyeyi b’abaguye kurugamba batishoboye bazafashwa na leta kugeza aho bigaragara ko batagikeneye ubwo bufasha.

Imfubyi n’abapfakazi b’ingabo zizagwa kurugamba zitagira aho zugamye zizubakirwa amacumbi na leta kubuntu.

Abasirikari bazashaka gukomeza amashuri bazahabwa ubwo burenganzira ntamananiza kandi bishyurirwe na leta kugera bayarangije.

2.Abasirikari ba RDF n’abapolisi ba RNP na RCS bazadusanga bazagenerwa ishimwe kuburyo bukurikira:

a)Aba Général, ba ofisiye bakuru na ba ofisiye bato.

Bazagenerwa ishimwe ry’amafaranga y’amanyarwanda ari hagati ya Miliyoni umunani na Miliyoni makumyabiri z’amafaranga y’amanyarwanda,

Bazahabwa ubudahangarwa bwo kudakurikiranwa munkiko zaba izo mu Rwanda cyangwa se izo mu mahanga kubyaha baba barakoze mbere y’iyi nyandiko kandi bagume mu milimo ya gisirikari kubabishaka.

Abazashaka gukomeza amashuri leta izabafasha gukabya inzozi zabo

b) Soldat/Pte kugeza kuri Adjudant Chef/ Warant officer Grade1

Iki cyiciro kizagenerwa ishimwe ry’amafaranga y’amanyarwanda ari hagati ya Miliyoni eshatu kugera kuri Miliyoni umunani z’amafaranga y’amanyarwanda.

Abasirikari bo muri iki cyiciro bazaba bahisemo kudusanga bazahita bazamurwa muntera hakurikijwe ubumenyi bwabo ndetse n’uburambe bamaze mu milimo ya gisirikari.

Abadindijwe na APR ndetse na RDF bazarenganurwa bashyirwa kuntera ikwiranye n’uburambe, ubumenyi ndetse n’imvune bagize kandi bagume mu milimo ya gisirikari kubabishaka.

Uretse ayo mashimwe yavuzwe haruguru ,Abasirikari ba RDF bazatugana ku ikubitiro bazagira uburenganzira bwo guhabwa inguzanyo yo kubaka amacumbi kimwe na bagenzi babo.

Abazifuza gukomeza amashuri leta izabafasha gukabya inzozi zabo.

C) Ikiciro cy’abakora mu iperereza (Intellince agents)

Abantu bose bakora mu nzego z’iperereza nka NSS, DMI n’izindi tutarondoye zaba iza gisirikari,iza polisi cyangwa se iza gisivire baziyemeza gukorana natwe baduha amakuru yadufasha kurugamba,

Bazahabwa ishimwe riri hagati ya Miliyoni eshatu na miliyoni cumi n’eshanu z’amafaranga y’amanyarwanda bitewe n’uburemere ndetse n’akamaro k’amakuru bazaduha.

Bazaba kandi nabo bafite uburenganzira bwo guhabwa inguzanyo idasaba inyungu yo kubaka amacumbi afite agaciro kari hagati ya miliyoni eshanu na Miliyoni makumyabiri n’eshanu leta ikabishyuriraho 40% by’inguzanyo bazaba bafashe

Kuri iryo shimwe haziyongeraho kuzamurwa muntera mumapeti ya gisirikari cyangwa se ya gipolisi.

3. Abazitabira Imilimo ya gisivire n’iya Politiki ari aba Cadre

Abanyapolitiki bazadusanga tugafatanya uru rugamba nibo bazavamo abayobozi bazasimbura ubutegetsi tuzaba tumaze gusezerera.

Bazishingirwa na Leta bahabwe inguzanyo itagira inyungu yo gutuzwa (réinstallation/réintégration) iri hagati ya Miliyoni icumi na Miliyoni mirongo itatu z’amafaranga y’amanyarwanda

4.Abaterankunga

1. Abatanze imisanzu

Bazagenerwa ishimwe ry’ubutwari hakurikijwe icyo batanze hanashingiwe kubushobozi bari bafite batanga uwo musanzu.

Ishimwe bazahabwa rizajya ryitabwaho mugihe nabo haricyo bifuza kwitabazaho leta mumishinga yabo bwite.

2. Abafashe Impapuro z’agaciro:

Bazishyurwa amafaranga batanze hiyongereho inyungu zingana n’ 5% cyangwa indi izumvikanwaho n’abo bireba.

Bazagabanyirizwa imisoro ho 30% Kubikorwa byabo by’ubucuruzi mugihe kingana n’imyaka itanu;

3. Abazadutera inkunga bakoresheje ibihangano byabo nk’indirimbo n’imivugo, ibihangano byabo bizagenerwa ishimwe rikubye kabiri igiciro byabatwaye mu kubihimba no mu kubisohora.

4. Abazashyigikira iyi gahunda bakoresheje itangazamakuru,

ibinyamakuru byabo bizahabwa inkunga yo kwiyubaka kugirango birusheho gukora neza.

5.Abazadutiza ibikoresho mugihe cy’urugamba nk’imodoka cyangwa amacumbi bazahabwa indishyi zingana n’ubukode buhwanye n’igihe twakoresheje ibyo bikoresho cyangwa se bashumbushwe ibindi nkabyo.

IGICE CYA KANE: Nyuma y’urugamba

Abantu bazarenganurwa kabone n’iyo ntacyo bazaba baradufashije.

1.Amashyaka ya Politiki yose yaba ari hanze cyangwa ari mu gihugu azagira uburenganzira busesuye mu miyoborere y’igihugu mu buryo busaranganyijwe kandi bunogeye buri wese.
Hazabaho imishyikirano hagati y’amashyaka kugirango bategurire hamwe programu izayobora igihugu mugihe cy’inzibacuho ihwanye n’igihe kizagenwa n’ibyo ayo mashyaka azaba yumvikanyeho

2.Umuryango wa Nyakwigendera RWIGARA Assinapol uzasubizwa imitungo yose wambuwe. Uhabwe indishyi z’akababaro zingana n’agaciro k’inzu yabo yasenywe.

3. Ba nyir’inyubako yakoreragamo Top Towers Hotel bazahabwa indishyi z’akababaro zingana n’agaciro k’inzu yabo yasenywe.

4. Rujugiro Tribert azasubizwa inzu ye n’indi mitungo yambuwe muburiganya ntarubanza kandi ahabwe uburenganzira bwo kuregere indishyi kugihombo yatejwe n’akarengane yagiriwe.

5. Abandi baturage bambuwe ibyabo (amazu n’amasambu cyangwa ibibanza) kumaherere bazabisubizwa kandi bahabwe uburenganzira bwo kuregera indishyi.

6. Abambuwe ubutaka bagahabwa amafaranga y’intica ntikize babeshywa ko baguriwe bazagira uburenganzira bwo kurenganurwa basubizwe ubutaka bwabo cyangwa se bahabwe indishyi zingana n’akarengane bashyizwemo.

Ubutaka ntibuzongera kuba ubwa Leta buzaba ubw’umuturage

7. Abakuwe kumilimo barenganyijwe bazayisubizwaho cyangwa se leta ibashakire indi myanya ijyanye n’ubumenyi bwabo.

8. Imfungwa za Politike kimwe n’abandi bantu bafunzwe ntamadosiye ndetse n’abazira ubusa bose bazafungurwa ntayindi nteguza.

9. Hazafungurwa anketi kubantu bose bishwe cyangwa se baburiwe irengero bigaragara ko leta ya FPR yabigizemo uruhare.

10. Umutekano n’imibereho by’abacitse ku icumu rya jenoside yakorewe abatutsi bizarushaho kwitabwaho kandi bakurwe mubwigunge n’ubwoba bashyizwemo na FPR ndetse n’interahamwe.

Imiryango ibavuganira izahabwa ubwigenge busesuye kuburyo itazongera gukoreshwa cyangwa kuvugirwamo na leta.

11. Abahutu biciwe ababo n’ingabo za FPR bazahabwa uburenganzira bwo kwibuka no kuririra ababo ndetse no kurenganurwa mubutabera.

Hazashyirwaho akanama k’igihugu kihariye kaziga kukibazo cy’inyito y’ubwicanyi bwakorewe abahutu mu Rwanda no Muri Zaire.

12. Hazashyirwaho urwego rwa leta rwihariye rwita kumibereho y’abatwa kuko nabo bagezweho n’amahano yagwiriye u Rwanda n’ubwo batagira kivugira.

Urwo rwego ruzaba rushinzwe ibi bikurikira:

a)Kwubakira abatwa amazu ya Kijyambere kandi begere abandi baturage,

b)Gushyira abana babo mu mashuri kugeza ku rwego rwa kaminuza

c) Kwigisha imyuga ijyanye n’igihe abatwa batagize amahirwe yo kwiga

d)Guteze imbere umwuga w’ububumbyi biciye munganda za Kijyambere no kubashakira amasoko,

e) Gukangurira abatwa kujya munzego z’igihugu zifata ibyemezo nko munteko ishinga amategeko no kugira uruhare mu miyoborere y’igihugu muri rusange

13. Abahoze ari abanyapolitiki mugihe cya MRND n’abahoze ari ingabo z’igihugu (FAR) bashyizwe ku rutonde rw’abashakishwa n’ubutabera kubera impamvu za Politiki bose Bazarukurwaho kandi bakangurirwe kugira uruhare mu miyoborere y’igihugu

14. Abanyapolitiki bose bakorana na leta ya FPR baziyemeza kutuyoboka bazahabwa ikaze kandi bagire uburenganzira mu miyoborere y’igihugu

15. Umutwe wa Politiki wa FPR niwemera kwitandukanya n’umunyagitugu Paul Kagame n’abandi bicanyi bafatanya gusahura igihugu, nawo uzahabwa uburenganzira bwo kugira uruhare mu miyoborere y’igihugu. Nuhitamo kunangira uzasenywa nk’uko bashenye ishyaka rya MDR

16. Nyuma yo gusubiza abaturage uburenganzira bwabo nta mfungwa za politiki zizabaho.
Twibutse ko murwego rwo guhangana na ba Rutemeyeze (opportuniste), abazitabira imirimo ya gisirikari ndetse n’imirimo ya politiki ,igihe cyo kubagenera ishimwe nikigera hazajya hitabwaho n’igihe bitabiriye urugamba bityo bahabwe ishimwe rihwanye n’igihe baziye ndetse n’umuganda batanze;

Kubw’umwihariko w’abasirikari hazitabwaho n’imyitwarire yabo mu rwego rwa discipline.
Umusirikari uzishora mubikorwa by’ubusahuzi, iby’urugomo,ubujura,ubwicanyi,guhohotera abaturage,ruswa n’ibindi byaha bihanwa n’amategeko azashyikirizwa inkiko kandi yamburwe uburenganzira bwo guhabwa amashimwe yose yavuzwe haruguru.

Abasirikare bacu bagomba Kugira imyitwarire irangwa n’ubudakemwa mu myitwarire yabo ya buri munsi bubahiriza amahame y’uburenganzira bw’ikiremwa muntu.

Amabwiriza ya discipline arareba kandi n’aba cadre ndetse n’abayoboke bacu.

UMWANZURO

Nafashe icyemezo cyo gutanga iyi mpuruza nyuma yo kungurana ibitekerezo mugihe kingana n’imyaka itanu na zimwe muntwari ziteguye kwitangira igihugu kurugamba rw’umuheto, kuko izindi nzira zananiranye,

Narashishoje nsanga ko ntawundi muntu uhari ufite ubushake cyangwa ubushobozi bwo gufata ibyemezo bikakaye nk’ibi ndetse no kubishyira mubikorwa kuko nagenzuye nkabona opozisiyo nyarwanda yarabuze umu leader nyawe uzi icyo u Rwanda rukeneye akanamenya no gukoresha igihe gikwiriye.

Mugusoza ndabamenyesha ko Ibisobanuro birambuye nzajya mbitanga mbinyujije kuri Radio cyangwa kuri youtube.

Mbifurije mwese ikaze kuri uru rugamba.

Niba iyi gahunda ikunyuze nyandikira kuri: amacumu.acanye@gmail.com
Cyangwa umpamagare kuri téléphone no kuri watsapp kuri iyi nomero 0033758106102

Abantu bampamagara cyangwa se banyandikira bagomba kuba bafite impamvu ifatika ibateye kumpamagara bagomba gutangira banyibwira, bakavuga barasa kuntego ndetse n’umusanzu bumva bashobora.

Bitangajwe kuwa 26 Ukuboza 2017

AKISHULI ABDALLAH
The Freedom Fighter

Amakuru yizewe aturuka mu nzego z’ubutasi ndetse no muri bamwe mu bakorera urwego rw’Igihugu rushinzwe imfungwa n’abagororwa RCS aratumenyesha ko nyuma yitoroka rya NTAMUHANGA CASSIER byababaje cyane Kagame n’agatsiko ke bafata icyemezo cyo kuzica mu buryo bw’amayeri akomeye imfungwa za politique cyane cyane iziregwa gukorana na RNC, FDU INKINGI, FDLR.

Umwe mu bantu bakorana hafi n’inzego z’iperereza utarifuje ko dutangaza amazina ye kubera impamvu z’umutekano we yatubwiye ko ubu bateguye amayeri yo kwimura imfungwa zose ziregwa ibyaha bishingiye kuri politique zibarizwa muri gereza ya Mpanga iri i Nyanza, bikitwa ko zerekeje mu yandi magereza ariko zagera mu nzira zikagwa mu gico cy’abakomando ba DMI bagahita batera ibisasu bya roquettes imodoka izitwaye ubundi zose zikagwa aho, uyu mugambi ukazitirirwa imitwe yabagizi ba nabi.

Iki cyemezo kandi kije gikurikira amagambo aherutse gutangazwa na komiseri Mpezamihigo Thomas ubwo yari muri gereza ya Mpanga, aho yavuze ko mu bihe bya vuba azerekana imirambo y’imfungwa zishaka gutoroka, kugeza ubu iyi gereza ikaba ifungiyemo imfungwa zirenga 7500 harimo iziregwa guhungabanya umudendezo wa FPR na Kagame zigera kuri 497.

Ubusanzwe gereza za Mageragere, Rubavu, Mpanga akaba arizo zibarizwamo imfungwa za politique tunasaba imiryango y’abafite ababo babarizwa muri izi gereza baregwa ibyaha twavuze haruguru kubakurikiranira hafi cyane mu gihe bahawe amakuru y’uko bimuriwe mu yandi magereza.

Kuva NTAMUHANGA yatoroka gereza ya Mpanga imfungwa ziregwa kurwanya ubutegetsi bwa Kagame zikaba zarashyizwe ku nkeke ikomeye no kwangirwa gusurwa n’imiryango yazo.

Umusomyi wa The Rwandan 

Kuri uyu wa mbere ni bwo ubutegetsi bwafatiye icyemezo cyo guhanisha amande y’ibihumbi 500 by’amafaranga buri umwe mu bacuruzi b’ibirayi bubaziza kubigurisha mu buryo buhabanye n’amategeko. Buravuga ko bagombye kubanza kubinyuza mu isoko rya Nzove hateganyijwe ngo babahe icyangombwa .

Abacuruzi bo baravuga ko bari bamenyereye kubinyuza ku Giti cy’inyoni mu mujyi wa Kigali. Umwali Clementine Icyitegetse yabwiye Ijwi ry’Amerika ko amabwiriza ubutegetsi bubashinja kwica batayamenyeshejwe.

Abacuruza ibirayi barabikura mu majyaruguru no mu burengerazuba bw’u Rwanda babyerekeza mu bindi bice by’igihugu cyane mujyi wa Kigali. Kuri uyu wa Mbere ni bwo igipolisi cyahagaritse imodoka 15 z’ibirayi kugeza n’ubu ziracyafungiwe kuri stasiyo polisi I Nyarugenge. Ni ikibazo cyahuruje inzego z’ubutegetsi n’izishinzwe umutekano cyakunze kurangwamo n’inama zabereye mu muhezo.

Nyuma y’izo nama, minisiteri y’inganda n’ubucuruzi yafashe umwanzuro wo guhanisha buri mucuruzi ibihumbi 500 by’amafaranga ibashinja kwigomeka ku byemezo bya leta. Abaciwe ibyo bihano ariko bo barasanga bikabije bati ni iyicarubozo.

Aba bacuruzi bararira ayo kwarika kubera icyo bita amananiza batazi icyo ashingiyeho mu gihe n’umuhinzi w’ibirayi muri rusange amarira ari yose. Umuhinzi w’ibirayi mu turere twa Musanze na Burera mu cyumweru gishize ikiro cy’ibirayi cyaranguraga amafaranga 75 kandi ni ihame ko agomba kubigurishiriza mu makoperative y’abahinzi.

Koperative z’abahinzi na zo zishyiraho ibiciro ziranguza abacuruzi ku buryo ubu ibirayi mu mujyi wa Kigali biri kuri 250. Kugeza ubu umuhinzi we akomeza gutakamba ko asa n’ukorera abacuruzi. Arafatira ku mvune ahura na zo kugira ahinga ibirayi, imbuto y’ibirayi ikiro kitajya munsi y’amafaranga 400, amafumbire ashyiramo na bwo abanje kwaka inguzanyo mu bigo by’imari n’ibindi. Hari impungenge ko amabanki ashobora kuzateza utwabo mu cyamunara nibananirwa kwishyura.

Umunyamakuru w’Ijwi ry’Amerika Eric Bagiruwubusa ni we wakurikiranye iyi nkuru.

Ngo bakimara kwica Fred Rwigema, ngo Kagame yakurikijeho abasikare bose bari ibyegera bya hafi ya General Major Rwigema.

Ubwo ngo Prezida Kagame afashe ubuyobozi bwa FPR/inkotanyi, ngo icyo yakoze gusa ni ugusiga u Rwanda amaraso na génocide.

Mu kiganiro kirambuye uyu Barahinyura yagiranye n’Ikondera Libre kuya 21/12/2017 , asobanura uko yinjiye muri FPR / Inkotanyi, dore ko yari anayisanzemo undi muhutu Kanyarengwe, bakomokaga mu karere kamwe k’amajyaruguru.

Ariko ngo ibyo yabonyemo ni agahomamunwa.

Urugero ati : kubona mpaguruka i Kampala kuya 30/09/1990, yaba Rwigema wankuye i wanjye mu budage, yaba Inyumba Aloysie twavuganaga buri gihe, na Rutaremara nemeraga , ngo yewe na Kanyarengwe, nta n’umwe wigeze ambwira ko bazatera u Rwanda, nkabimenya ngeze iwanjye mu budage?

Uyu Barahinyura Shyirambere Yohani wayobotse FPR/INKOTANYI akanayibera umuyobozi w’itumanaho n’itangazamakuru, yemeza ko FPR ya none atari yo yabayemo; n’ubwo n’iyo yari yiyeguriye atayimazemo igihe, kuko mu mwaka umwe yari ayisezeyemo, hari kuya 17/05/1991.

Ikondera libre, 28/12/2017

Yanditswe na Frank Steven Ruta

Impamvu Nzamwita Vincent De Gaulle yakuye kandidatire mu bahatanira kuyobora Ferwafa

Perezida wa Ferwafa, Nzamwita Vincent De Gaulle, yakuye kandidatire ye mu bahatanira kuyobora Ishyirahamwe ry’umupira w’amaguru mu Rwanda (Ferwafa), avuga ko abikoze ku mpamvu ze bwite.

Nyamara abakurikiranira hafi ibibera mu ishyirahamwe ry’umupira w’amaguru mu Rwanda FERWAFA ndetse n’umupira w’amaguru muri rusange bari biteze ko Nzamwita Vincent De Gaulle akuramo ake karenge nyuma y’aho amakuru akwirakwiye mu bantu no ku mbuga nkoranyambaga avuga ko ashobora kumara igihe atagaragara mu mupira w’amaguru nyuma yo kurarana muri hoteli n’abayobozi barenga 30 mbere y’amatora y’umuyobozi wa Ferwafa ateganyijwe kuri uyu wa gatandatu tariki ya 30 Ukuboza 2017.

Amakuru yatangajwe n’ikinyamakuru RuhagoYacu, yavugaga ko Nzamwita Vincent De Gaulle yari amaze iminsi hari ibyo yumvikanye n’abo ashaka ko bazamutora agira ibyo abemerera kugira ngo na we bazamuhe amajwi mu matora yo kuri uyu wa gatandatu nk’uko yari yabikoze mbere yo gutorerwa uyu mwanya mu myaka ine ishize

Ibi RuhagoYacu yari yirinze kubitangaza mbere yo kubona gihamya ya nyayo, byaje kwemezwa kuri iyi tariki ya 29 Ukuboza 2017, ubwo uyu muyobozi wa Ferwafa uri kwiyamamariza kuguma muri uyu mwanya yararanaga n’abayobozi b’amakipe atandukanye muri Hilltop Hotel i Remera, kugira ngo akomeze kwizera ko nta n’umwe uri bwisubire mu matora ateganyijwe kuri uyu munsi.

Nkuko RuhagoYacu yabitangarijwe na bamwe mu baraye muri iyi Hoteli, ku ikubitiro, abayobozi b’amakipe bagera kuri 40 ni bo byari biteganyijwe ko bararanamo n’umukandida wabo, gusa biza kurangira abagera kuri 31 ari bo barayemo aho bishyuriwe ibyumba ku majoro ya tariki ya 29 na 30 Ukuboza, bikaba biteganyijwe ko bazasohokamo kuri iki cyumweru tariki ya 31 Ukuboza 2017.

Ibi Nzamwita Vincent De Gaulle yakoze, bikaba ubusanzwe bihabanye n’ingingo ya 8 n’iya 11 y’amabwiriza agenga amatora ya komite nyobozi ya ya Ferwafa, aho zivuga ko ibikorwa byose bijyanye no kwiyamamaza birangirana na tariki ya 29 Ukuboza saa sita z’ijoro ko gukora ibikorwa nk’ibi ubwo bifatwa nko kwica amatora ndetse bikaba byakurizamo umukandida gukurwa ku rutonde.

Umwe mu baganiriye na RuhagoYacu dukesha iyi nkuru uva mu ishyirahamwe ry’umupira w’amaguru ku isi FIFA, yavuze ko biramutse bikozwe byafatwa nka ruswa bikaba byatuma umuyobozi wa Ferwafa afatirwa ibihano birimo kumuhagarika imyaka yagera kuri itatu mu mupira w’amaguru.

Yagize ati: “Sinavuga ku bihano mu gihe nta gihamya (yo kurarana muri hoteli) ihari. Gusa mu gihe biramutse bigaragaye ko umukandida wiyamamaza kuyobora urwego rw’umupira w’amaguru yararanye n’abamutora ku munsi w’itora, byarangira afatiwe ibihano birimo no guhagarikwa igihe kiri hagati y’imyaka ibiri n’itanu”.

Impamvu Rwemalika Félicité yabuze amajwi ya ngombwa kandi yiyamamaje wenyine

Inteko Rusange idasanzwe yo gushaka usimbura Nzamwita Vincent de Gaulle ku buyobozi bwa Ferwafa, yateranye kuri uyu wa Gatandatu, muri 52 batoye umukandida rukumbi Rwemalika Félicité yagize 13, imfabusa ziba 39.

Rwemalika Félicité yari umukandida rukumbi wiyamamariza kuyobora Ferwafa nyuma yaho Nzamwita Vincent de Daulle akuyemo kandidatire ye ku munota wa nyuma.

Kugira ngo umuntu atorerwe kuyobora ishyirahamwe ry’umupira w’amaguru mu Rwanda, nibura umukandida yasabwaga kugira kimwe cya kabiri cy’amajwi. Ibi bisobanuye ko kuko abatora bari 52, byasabaga ko agira 27 ariko Rwemalika yagize 13.

Umwe mu bakurikiranira hafi iby’umupira w’amaguru mu Rwanda yatangarije The Rwandan ko impamvu abatora benshi banze gutora uyu mutegerugori ari uko bari bararangije kurya ruswa ya Nzamwita Vincent de Gaulle ndetse bananga no kwiteranya dore ko bizwi na bose ko Nzamwita Vincent de Gaulle ashyigikiwe n’abayobozi bakuru b’igihugu ari nabo bamushyize kuri uriya mwanya ndetse bakaba barakomeje kumukingira ikibaba muri iyi myaka yose n’ubwo abakunzi b’umupira w’amaguru mu Rwanda bakomeje kwijujuta bikaba iby’ubusa.

Hari n’izindi mpamvu zikomeye zatumye abayobozi bakuru b’igihugu batifuza ko Rwemalika Félicité atorwa kuko abamuzi bavuga ko atizewe ibukuru ku buryo yashyira inyungu z’ubutegetsi imbere y’inyungu z’umupira w’amaguru mu Rwanda nk’uko Nzamwita Vincent de Gaulle yabikoraga.

Uretse kuba Rwemalika Félicité ari umuntu wihagazeho avuka mu muryango wihagazeho kandi ukomeye kandi tutavuga ko wizewe cyangwa wisanga cyane mu butegetsi buriho.

Rwemalika Félicité ni mushiki wa Major Dr Peter Bayingana wapfuye mu Ukwakira 1990, umwe bivugwa ko yabwiye Perezida Kagame ati:”you are physically and mentally unfit, how can you lead people?”.

Urupfu rwa Major Dr Peter Bayingana na Mugenzi we Major Chris Bunyenyezi n’ubwo rukirimo urujijo bwose ariko nta rujijo ruri mu kubona ko Kagame atajyaga imbizi na Major Dr Bayingana ndetse n’urupfu rwe ruri mu byamufashije kuba yicaye mu Rugwiro.

Uretse kuba Rwemalika Félicité yafatwa nk’umurakare utabigaragaza, kuvukana byonyine na Major Dr Bayingana byatuma atabona uriya mwanya dore ko umuryango wa Bayingana utarebwa nabi gusa na Perezida Kagame ahubwo na James Musoni, umwe mu bikomerezwa mu butegetsi bwa FPR afitanye amateka maremare n’umuryango wa Bayingana twavuga ko adateye na gato ishema James Musoni n’umuryango we.

Nabibutsa ko ikintu gikomeye nka FERWAFA kigomba kuyoborwa n’umuntu wizewe kuko umupira w’amaguru ari kimwe mu bintu bihuruza imbaga binarimo akamiya gatubutse ku buryo FPR yakora ikosa ryo kuyishyira mu maboko y’umuntu utizewe neza.

Umupira w’amaguru mu Rwanda ndetse n’amadini ni bimwe mu bintu bike bisigaye mu Rwanda abantu benshi bafite uburenganzira bwo kwihitiramo ibyo bajyamo, bafana cyangwa bagaragarizamo ibyishimo batajijisha bizeye ko batabizira.

Rero gukurikiranira hafi ibibera mu mupira w’amaguru cyane cyane amakipe n’abafana bikaba ari ikintu cya ngombwa ku butegetsi nk’ubwa FPR buhora bwikanga igihise cyose dore ko byagaragaye ko benshi mu banyarwanda nta rutangira bimarira umujinya bafitiye FPR ndetse bakanagaragariza ibyishimo mu gufana amakipe ahanganye na APR(ifatwa nk’ikipe y’ubutegetsi) cyane cyane Rayon Sport.

Hashingiye ku ngingo ya 28 igenga amatora ya Perezida wa FERWAFA, Komite Nyobozi ya Ferwafa igomba gukomeza imirimo yayo kugeza ubwo hazaba indi Nteko Rusange ya Ferwafa ari nayo izatorerwamo Perezida mushya.

Biravugwa ko Komite Nyobozi ya FERWAFA izahurira hamwe mu minsi mike ikagena itariki nshya izaberaho Inteko Rusange idasanzwe ya Ferwafa.