Uwa 8 werurwe, bimaze kumenyerwa ku isi hose ko ari umunsi ngaruka mwaka wahariwe umwari n’umutegarugori. Uyu munsi umwari n’umutegarugori aho ari hose, azirikana ukuntu isi imutekerezaho, ikamuha agaciro, nawe akarushaho kwishakamo imbaraga zo gukomeza guharanira uburenganzira bwe,  dore ko mubice bimwe na bimwe by’isi ,hari  abagihohoterwa bakimwa uburenganzira bwabo ngo kuko ari igitsina gore.

Mumuco w’abanyarwanda murabizi mwese ko hari n’imyumvire yatumaga umwari n’umutegarugori ahezwa, agahozwa inyuma iyo mugikari.

Imwe mumyumvire ibigaragaza twavuga:

• Nta nkokokazi ibika isake ihari: Ubwo ngo nta jambo umwari cg umutegarugori agomba kuvugira mu ruhame
• Uruvuga umugore ruvuga ingongo y’umuhoro: Ubwo ngo ntacyemezo cy’umugore kigomba gushingirwaho, kigomba kwakirwa.
• umugore arabyina ntasimbuka:Ubwo ngo agomba guhora acecetse mubiganiro mpaka byubaka.

Muri ibibihe bya nonene, hari benshi baca intege abana b’abakobwa bababwira imvugo yuzuye imyumvire nkene,ngo DIPOLOME ( Diplôme ) y’umugore ni umugabo n’ibindi , nyamara mu muco wacu nanubundi batubwira NDABAGA, bakanatubwira ko ngo” UKURUSHA UMUGORE AKURUSHA URUGO RWIZA’ .

Ubundi ngo abagore ni ba” MBUMBURUGO, ni” BAMUTIMA W’UW’URUGO”. Ibi nabyo bikerekana ubushobozi n’ubutwari bw’umugore.

Muri AFERWAR – DUTERIMBERE rero, turakataje mugukomeza kwerekana ko umwari n’umutegarugori bashoboye, kandi bafite imbaraga z’umutima n’iz’umubiri nk’iza basaza babo , bafite ubwenge n’ibitekerezo bikomeye byubaka , byiza nk’ibya basaza babo.

Muri AFERWAR – DUTERIMBERE kandi dukomeje gushikama no kutagamburuzwa mu kwereka isi n’ibikomerezwa byayo , abo bose bafite ububasha kurusha abandi , ibibazo umwari n’umutegarugori b’impunzi z’abanyarwanda , cyane cyane abakiri mu mashyamba ya Repuburika iharanira demukarasi ya Congo , bakomeje guhura nabyo .

Abaherutse kubona vuba aha amashusho y’impunzi zabaga i MWESO ku imbuga nkoranya mbaga mwese mwiboneye uko inzirakarengane z’abana n’abagore zari zimerewe. Mwese murabizi ko FPR/RDF nyuma yo kunanirwa gucyura impunzi zo muri RDC kuruhembe rw’umuheto yafashe gahunda yo gukoresha imitwe y’aba mai mai bigometse kubutegetsi na zimwe mungabo za CONGO. Ubu rero barazihigira hasi kubura hejuru isi irebera.

AFERWAR – DUTERIMBERE, kuri uyu munsi wahariwe abari n’abategarugori irakomeza gutabariza izi nzirakarengane z’Abari n’Abategarugori, Abana n’abatishoboye ,cyane cyane abageze muzabukuru ( abasaza n’abakecuru ), isaba amashyirahamwe n’imiryango mpuzamahanga aharanira uburenganzira bw’ikiremwa muntu , kwita kukibazo cy’izingorwa ,hagakorwa ubuvugizi intambara zigahoshwa, hagashakwa ibisubizo mu mahoro nk’uko n’ahandi ku isi bagiye babikora.

Umwari n’umutegarugori uribusome ubu butumwa kandi azi neza ko afite ububasha bwo kuvuga rikijyana aho ari hose iyo mumahanga, agerageze ubu butumwa abugeze aho ashobora kubugeza, nibwo araba yizihije neza  umunsi w’Abari n’abategarugori.

Murakoze murakarama

Umunsi mukuru mwiza w’ ABARI N’ABATEGARUGORI ku impunzi z’Abanyarwanda muri rusange no ku Abari n’Abategarugori bo muri AFERWAR -DUTERIMBERE by’umwihariko.

MUKARUGOMWA  Thacienne

Umuyobozi w’ishyirahamwe ry’abari n’abategarugori b’impunzi z’abanyarwanda

AFERWAR – DUTERIMBERE .

Bacunguzi, Bacunguzikazi, Bari Bategarugori, mbanje kubasuhuza nimugire amahoro y’ IMANA RUREMA ikomeje kuturindira ubuzima mu mashyamba ya KONGO n’ahandi twatatanyirijwe hirya no hino ku isi.

Mbere yo gukomeza mureke mbisabire namwe munyemerere  , dukomeze umuco wo kujya dushimira IMANA, kuko ari yo mu butabera bwayo, izayobora abanyakuri bagendera mu kuri kwayo, igasenya abanyabinyoma n’ibinyoma byabo, maze mu karere kacu ntihazongere gucura imiborogo ukundi. (Dufatanye tuyihe amashyi n’impundu biyikwiriye).

Kuri uyu munsi wa 08 Werurwe ngarukamwaka wahariwe umwari n’umutegarugori ku isi yose, ubu ukaba wizihizwa ku nshuro ya mirongo ine na kane (44) mu gihugu cyacu cy’u Rwanda,  ,utubere umwanya w’ibyishimo nubwo turi mu bibazo bitoroshye by’ubuhunzi duterwa n’umwanzi uhora aduhiga ku isi yose yifashishije abo yagize ibikoresho muri bamwe batwakiriye, ibyo bigatuma ubwisanzure  bw ‘umwari n’umutegarugori n’ibindi byiza dukesha uyu munsi bidashobora kugerwaho uko bikwiriye !

Bacunguzi, Bacunguzikazi, Bari, Bategarugori,  nta gucika intege, tugomba gukomera ku nshingano zacu twirinda icyatuma isura y’umunyarwandakazi yandura cyangwa isibangana, twirinda kwiheza mu bikorwa by ‘amajyambere ibyo ari byo byose kandi tuzirikana ko uruhare rwa buri wese ari ngombwa kugirango iki kivi twatangiye dushobore kucyusa  :”MUNYARWANDAKAZI URUHARE RWAWE !!! ”

Ibi tuzabigeraho rero twihatira kurwanya ubujiji bw ‘ubwoko bwose  kuko agaciro umuntu niwe ukiha kandi akagakorera ! Ntabwo ari  impano (Cadeau).

Bari, Bategarugori rero tube intwari nka Esther na Yudita twumva muri Bibiliya. Ibyiza dukesha uyu munsi waduhariwe ntihagire ikibikoma mu nkokora. Twirinde gucika intege cyangwa kuzica abandi  ahubwo uyu munsi udufashe kureba ahakiri amapfundo atuzitira apfundurwe maze haba mu buzima busanzwe bwo mu ngo zacu, haba no kuri uru rugamba dufatanyije twese  Umwari n’Umutegarugori tube ba NYAMBERE aho kuba ba NYIRANTIBINDEBA !

IMANA NYIRIMITSINDO iduhe umugisha kandi itwongerere imbaraga.

Harakabaho Urugaga rwacu FDLR n’Abayobozi barwo

Harakabaho Abacunguzi n’Abacunguzikazi

Harakabaho umunsi w ‘Abari n’Abategarugori.

Bikozwe kuwa 02 Werurwe 2019

Mme IZERIMANA VICTOIRE

KOMISERI WUNGIRIJE USHINZWE UMURYANGO N’ITERAMBERE RY’ABARI N’ABATEGARUGORI  Muri FDLR

(Sé)

Banyarwanda, Banyarwandakazi,

None tariki ya 5 Gashyantare 2019, tumaze kumenya ko Kagame yongeye gutanga impapuro zifata bamwe mu banyarwanda biyemeje kumurwanya. Iyo ngeso yayigize akamenyero dore ko yahereye muri 1996 none nyuma y’imyaka 22 aracyakomeje. Hari abo yahimbiye icyaha cya “jenoside” barafatwa, baratotezwa, hanyuma bizakugaragara ko ari abere, bararekurwa. Twatanga urugero kuri aba: Général Kabirigi, Général Ndidiriyimana, Ministre Bicamumpaka na Ministre Ntagerura n’abandi tutarondoye amazina. Ako karengane bagiriwe, kakabicira ubuzima, yo uRwanda rugendera ku mategeko, Paul Kagame yarakwiye kugahanirwa.
None dore arongeye ngo Kayumba Nyamwasa, Rusesabagina, na Sankara ngo nabo nibafatwe. Mwese muribuka ko Perezida Paul Kagame yashatse kwica Kayumba amuziza ko amurwanya, Imana ikinga akaboko, none ngo nibamuhambire bamumushyire amwiyicire. Rusesabagina, bivugwa ko yarokoye abatutsi ndetse akanabihemberwa ngo nawe ngo ni afatwe. Mbeseharya ari Rusesabagina warokoye abatutsi, na Kagame wabamariye kw’icumu hamwe n’abahutu, we azafatwa nande, giheki? Birumvikana ko atazahagarikwa n’udutsiko azahagarikwa na rubanda nidushyira hamwe. Nitwe rubanda tugomba kumuhagarika nk’abenegihugu. Ntawundi wabidukorera.

Ibi nibyo Sankara w’umucikacumu ahora asaba abanyarwanda bose. Yahunze ubwicanyi bw’Inkotanyi ziyobowe na Kagame, kubera ko yatinyutse kwamagana umuyobozi ufite ubushobozi buhanitse mu bwicanyi akorana ubugome butagira urugero. None kubera igikorwa cye cy’ingenzi cyogutinyuka kumwamagana ngo ni afatwe! Ngo n’abambwe! Ibi byose bisa no gushinyagura birimo n’ubugome burenze kamere, buranga umukuru w’igihugu cy’uRwanda. Ariko harya aho kwica “ba Gitera ntiyarakwiye kwica ikibibatera”!! Ntabwo ashobora guhinduka, mwese murabizi. Nitwe tugomba kumuhindura. Umunyarwanda wese aho ari mu gihugu ndetse no hanze, igihe Perezida Kagame azabishakira azamwica, cyangwa amufatishe. None se dukomeze turebere: “ngo njye ntibiz
angera ho”. Nyamara ruriye abandi rutakwibagiwe. Ingero muhora muzibona.

IGIHE NI IKI

Ndabwira cyane urubyiruko nkabwira kandi abigize abatesi, bumva ko ngo ubwicanyi bwa Kagame yatangiye mu ntambara yateje igihugu kuva muri 1990, ko ngo igihe butarabageraho ko ngo ari amahoro. Umuntu wivugiye muri 2013 ko yakwica Perezida Kikwete wa Tanzaniya yabuzwa niki kwica abo ayobora niba ubwabo batamuhagaritse! Mbese nudatabara harikiri kare ,abo uzi bose bagashira, nibikugeraho uziyambaza nde? 

Abanyarwanda nibareke guhinda imishyitsi mu gihugu cyabo. Impapuro Kagame atanga zo gufata abamurwanya bashaka ko ibintu bihinduka ntacyo zimaze. Ahubwo niziduhe ingufu zo gukaza umurego. Nitwe tugomba kuzitesha agaciro. Igihe kirageze cyo kuva mu maganya y’ubutitsa, no kwifata mapfubyi, mukarangwa n’ubumwe buzatuma twigobotara ingoma y’agatsiko yaduhinduye Ingaruwzamuheto mu gihugu cyacu cy’uRwanda. 

Nimube “Abasankara” b’abasangirangendo bo kubaka uRwanda rwa twese.

Faustin Twagiramungu

Yanditswe na Ben Barugahare

Amakuru agera kuri The Rwandan ava ku mupaka w’u Rwanda na Uganda aravuga ko uturaro dutoya abaturage b’abanyarwanda bakoreshaga binjira mu gihugu cya Uganda twose twasenywe n’abashinzwe umutekano mu Rwanda.

Gusenya utu turaro ngo birakorwa hagamijwe kubuza abaturage b’abanyarwanda kujya guhaha no guca inshuro muri Uganda dore ko abo baturage bivugira ko inzara ibarembeje.

Ayo makuru akomeza avuga ko uretse no kubuza abanyarwanda kujya muri Uganda baciye ku mipaka izwi n’utuyira duto duca mu giturage tujya muri Uganda twashyizwemo abashinzwe umutekano bagamije kubuza abaturage kujya muri Uganda.

Abatuye hafi y’umupaka bavuga ko hari abapolisi benshi bafunze utuyira twose twinjira muri Uganda, ndetse mu duce tumwe na tumwe ni abasirikare bambariye urugamba babuza abaturage kwambuka.

Hari abaturage benshi bambutse hakurya mu gihugu cya Uganda baciye mu tuyira twa kinyarwanda ubu batinye gusubira mu Rwanda batinya abashinzwe umutekano mu Rwanda ko babakubita cyangwa bakabafunga.

Umwe mu baturage waganiriye n’abanyamakuru mu gace ka Gatuna ku ruhande rwa Uganda, yavuze ko yambutse agiye gupagasa no kugura ibiribwa igihe cyo gutaha kigeze abura uko yambuka kubera ko uturaro basanzwe bambukiraho twasenywe n’abashinzwe umutekano mu Rwanda kandi agatinya kuba yagirirwa nabi n’abo bashinzwe umutekano.

Undi muturage ngo nawe yahisemo kuba yigumiye muri Uganda bitewe n’uburyo yabonye ari hakurya ukuntu abari baje muri Uganda basubiye mu Rwanda barimo bakubitwa n’abashinzwe umutekano mu Rwanda babatse n’ibiryo bari bahashye bakamenamo peteroli!

Aba baturage bakaba bakomeje gusaba Imana ngo iki kibazo kirangire basubire mu buzima bw’imigenderanire bari basanzwe bafitanye n’igihugu cya Uganda.

Ku bijyanye n’ubukungu ubu ifaranga ry’u Rwanda ririmo kugwa cyane kuko ubu idorali rya Amerika ririmo kuvunjwa amafaranga y’u Rwanda agera kuri 910.

Kino kiganiro cyerekeye icyuka kibi kirangwa hagati y’u Rwanda na Uganda, cyaje kongerwa n’icyemezo cyafashwe na leta y’u Rwanda ku wa 27 z’ukwezi kwa kabiri cyo kubuza amakamyo atwara ibintu guca ku mupaka wa Gatuna. Yabwiwe ko yakoresha umupaka wa Kagitumba.

Nyuma, Ministre w’ububanyi n’amahanga w’u Rwanda, Richard Sezibera, yaburiye Abanyarwanda ko bareka kujya muri Uganda kubera umutekano wabo. Yareze leta ya Uganda ko ihohotera Abanyarwanda basanzwe batuye muri icyo gihugu, ko Uganda icumbikiye abitwaje ibirwanisho bahungabanya umutekano w’u Rwanda, kandi ko iyo leta igirira nabi abacuruzi b’abanyarwanda bari muri Uganda, ibyo icyo gihugu kirabyamaganira kure. Abaturage, cyane cyane Abanyarwanda bagerageza kwinjira muri Uganda bahura n’ibibazo. Ingaruka zatangiye kwigaragaza ndetse no murwa mukuru w’u Rwanda, Kigali.

Yanditswe na Marc Matabaro

Amakuru agera kuri The Rwandan ava i Kigali aravuga ko Bwana Anselme Mutuyimana wari umuvugizi w’ishyaka FDU-Inkingi mu Rwanda yishwe.

Nk’uko ayo makuru akomeza abivuga ngo abaturage batuye hafi ya Gishwati nibo babonye umurambo we muri iki gitondo cyo ku wa gatandatu tariki ya 09 Werurwe 2019.

Nk’uko The Rwandan yabitangarijwe na Visi Perezida wa kabiri wa FDU-Inkingi, Bwana Justin Bahunga, ngo Nyakwigendera Anselme Mutuyimana yari yakoreye urugendo iwabo mu karere ka Rutsiro mu ntara y’Uburengerazuba aho yari yagiye gusura mushiki we ndetse na Se wari urwaye. Ku munsi w’ejo ku wa gatanu tariki ya 8 Werurwe 2019 akaba yari yavuganye na Bwana Justin Bahunga ahagana nyuma ya saa sita. Bikaba bikekwa ko yishwe mu masaha ya nimugoroba cyangwa mu ijoro ryo ku wa gataun rishyira ku wa gatandatu.

Amakuru The Rwandan yashoboye kubona avuga ko abaturage begereye Gishwati bashoboye kubona umurambo we bavuga ko nta gikomere yari afite ashobora kuba yishwe anizwe bakanemeza ko hari imodoka y’ivatiri y’umweru babonye mu ijoro ryakeye hafi y’aho umurambo wasanzwe.

Ku ruhande rwa Leta y’u Rwanda n’inzego zishinzwe umutekano ntakiratangazwa kuri uru rupfu. Umurambo wa Nyakwigendera ukaba wajyanywe mu buruhukiro bw’ibitaro bya Gisenyi.

Mu Rwanda haravugwa urupfu rw’umuvugizi w’ishyaka FDU Inkingi, Anselme Mutuyimana, bitaramenyekana icyamuhitanye. Birakekwa ko yaba yishwe anizwe.

Abavandimwe ba Bwana Anselme Mutuyimana bemeje aya makuru bavuze ko umurambo we bawusanze ku ishyamba rya Gishwati mu karere ka Rutsiro. Bavuze ko bamenye amakuru y’urupfu rwe mu ma saa yine zo mu gitondo kuri uyu wa Gatandatu.

Bwana Augustin Tubanambazi Mukuru wa Nyakwigendera yabwiye Ijwi ry’Amerika ko umurambo we bawusanze ufite amaraso mu kanwa ngo bigaragara ko yaba yishwe anizwe.

Mu butumwa bugufi yoherereje Ijwi ry’Amerika kuri telephone bwana Modeste Mbabazi umuvugizi w’urwego rw’ubugenzacyaha yavuze ko abagenzacyaha mu karere ka Rutsiro bageze ahatoraguwe umurambo bahafata amakuru agamije kumenya icyateye urupfu.

Umuvugizi w’ubugenzacyaha yavuze ko kugeza ubu iperereza ryahise ritangira ariko ko ntawe uratabwa muri yombi akekwaho kugira uruhare muri uru rupfu. Umurambo wa Nyakwigendera watwawe mu bitaro bya Gisenyi ngo hasuzumwe icyamuhitanye.

Bwana Anselm Mutuyimana apfuye yari afite imyaka 30 y’amavuko. Mu mwaka wa 2018 ni bwo yari agisohoka muri gereza arangije igihano cy’igifungo cy’imyaka 6 nyuma yo kumuhamya ibyaha byo kwangisha rubanda ubutegetsi buriho.

Umuvugizi wa FDU Inkingi Anselme Mutuyimana yiyongereye ku wundi murwanashyaka w’ishyaka FDU Inkingi na we mu 2017 umurambo we wasanzwe mu karere ka Bugesera.

Umuyobozi wa FDU Inkingi madamu Victoire Ingabire yavuze ko atarabona amakuru ahagije ku rupfu rwa bwana Mutuyimana kugira ngo abashe kuba yagira icyo atangaza.

Hari amakuru avuga ko aho basanze umurambo we abashumba bari baragiye bahabonye imodoka y’ivatiri y’ibara ry’umweru yahagaragaye ku mugoroba wo kuri uyu wa Gatanu.

Ikigo cy’ubushakashatsi n’ubusensenguzi “Institut Seth Sendashonga” kinenga ichasha cyashyizweho na Reta y’u Rwanda ko cyaba giteza amacakubiri mu banyarwanda.

Mu mpera z’ukwezikwa kabiri 2019.Guverinoma y’u Rwanda yamaganye ibiganiro-mpaka abagize icyo kigo bateguye bagombaga gukoresha i Buruseli mu Bubiligi.

Itangazo-baruwa Komisiyo y’Igihugu yo Kurwanya Jenoside (CNLG) yasohoye, ryashyize ku rutonde abantu 7 yemeza ko bagombaga gufata ijambo muri ibyo biganiro.

Komiziyo yita ibyo biganiro: ibyo guhakana, n’urubuga rw’abahakanyi. By’umwihariko, Komisiyo ishinja abitwa Filip Reyntjens Faustin Twagiramungu Jean Baptiste Nkuliyingoma, Johan Swinnen, Gustave Mbonyumutwa na Dr. Innocent Biruka kuba basangiye ibitekerezo mu guhakana no guharanira gutokoza ukwibuka kw’abarokotse no gusibanganya ibimenyetso bya jenoside iheruka yo mu kinyejana cya 20.

Itangazo rya CNLG rivuga ko abo bantu bagamije kugerageza kwimika indi jenoside itarabayeho bitekerereza ubwabo. Iyo, ngo bagashaka kuvuga ko yakorewe abo mu bwoko bw’Abahutu. Iryo tangazo rivuga kuri bane muri bo, buri wese rimunenga ukwe.

Umunyamakuru w’Ijwi ry’Amerika Geoffrey Mutagoma yavuganye na bwana Jean Baptiste Nkuliyingoma, umwe muri abo bantu bashyizwe ku rutonde, kandi wabaye minisitiri w’intangazamakuru w’u Rwanda nyuma ya jenoside.

Yanditswe na Marc Matabaro

Nyuma y’amagambo yavuzwe na Perezida Kagame mu mwiherero wa 16 w’abayobozi b’igihugu cy’u Rwanda urimo kubera mu kigo cya gisirikare i Gabiro, Perezida Museveni wa Uganda ntabwo yatinze mu makoni nawe yahise amusubiza.

Perezida Yoweri Museveni ubwo yavugiraga ahitwa Mukono yabaye nk’usubiriza Perezida Kagame mu ndumane, ubwo yizezaga abanya Uganda n’abashoramari amahoro n’umutekano.

Museveni kandi yihanangirije abashaka guhungabanya umutekano wa Uganda avuga ko bazahura n’ingorane zikomeye.

Yagize ate: “Abo bashaka guhungabanya umutekano w’igihugu cyacu ntabwo bazi ingufu zacu. Ingufu zacu ni nyinshi. Twahagurutse ntibarokoka. ”

Ibi bikaba byafatwa nk’igisubizo kigenewe ibyatangajwe na Perezida Kagame ubwo yibasiraga igihugu cya Uganda agishinja gufasha abarwanya ubutegetsi bwe.

Mu ijambo Perezida Kagame yavuza yabaya nk’uca amarenga asa nk’ubwira Perezida Museveni aho yagize ati:

“Amwe mu masomo nize nuko ntafite ububasha ku byo umuntu antekerezaho n’ibyo ategura kungirira ariko hari icyo mfiteho ububasha, ni ibibera hano mu gihugu cyanjye. Ushobora kunyica, ukandasa ibyo birashoboka ariko hari ikintu kidashoboka kandi nibyo nifuza ko bitanaba ku gihugu cyacu. Nta n’umwe wampfukamisha kuko gupfukama biva ku mahitamo yawe. Sinifuza ko igihugu cyacu cyapfukamira uwo ari we wese. Bagabo namwe bagore b’igihugu cyanjye ntimuzemere ibyo. Ntidukwiriye ibyo.”

Ibi bije kandi mu gihe umujyanama wa Perezida Kagame mu bijyanye n’umutekano, Gen Kabarebe atangarije amagambo ashimagiza ubutwari Perezida Kagame agira ati :

“Ibintu byo kurwana intambara mu mateka ye, Perezida Kagame nta mateka yo gutsindwa urugamba afite, ikindi mu myumvire ye gutsindwa ntabwo bijya bibamo, nta kintu kitwa gutsindwa kiba mu myumvire ye, tunarebe no mu zindi ntambara buri gihe yarateguraga akagupangira intambara akaguha gahunda kandi akaba azi ko ugomba gutsinda.Ibyo gutsindwa ntibijya biba mu myumvire ye ntabwo yemera gutsindwa, n’aba bose mujya mwumva ko barwanya u Rwanda hirya no hino, uwakwiha kumurwanya ndamubabarira kuko njye mbizi, kuvuga ngo yatsindwa ni ukwibeshya nta na hamwe yatsindwa.”

Abakurikiranira ibibera mu karere k’ibiyaga bigari hafi ndetse banasesengura politiki mpuzamahanga bemeza ko abategetsi iyo batangiye guterana amagambo gutya akenshi biba biterwa no kutiyizera ndetse umuntu akaba atatinya no kubyita ubwoba.

Mu isesengura umuntu wese utekereza yakora bigaragarira buri wese ko u Rwanda rutahagarara imbere ya Uganda mu ntambara yeruye ariko rushobora gukoresha ba maneko barwo mu guteza umutekano muke muri Uganda bakora ibikorwa by’ubwicanyi n’urugomo byatuma abaturage ba Uganda basubiranamo bagata icyizere kuri Perezida Museveni ndetse bakanamushinja gukora ibyo bikorwa.

Hari benshi bibaza nk’ingaruka zikomeye zabaho nk’abanyapolitiki bakomeye nka Bobi Wine, Kizza Besigye n’abandi baramutse bishwe bikagerakwa kuri Perezida Museveni mu by’ukuri byakozwe na Leta ya Kigali.

Yanditswe na Jean Serge Mandela

Seminari yo ku Rwesero yaba yaratumye ako gace ka Giti ku nkombe za Muhazi kamenyekana ubwo abaseleziyiyani bahakunze bakahubaka iseminali muli 1957.

Seminali yareze benshi bakoze mu nzego zinyuranye z’igihugu bamwe balimo nyakwigendera Komanda Laurent Nsengiyumva (aliwe wakoze umushinga  w’ishami rya G5 mu gisirikali cya ba Forces armées rwandaises) inkotanyi zahitanye i Ndera na nyakwigendera Musenyeri Thadeo Nsengiyumva yazamuwe kuli urwo rwego avuye kuba umuyobozi wa seminali.

Burugumesitiri wa Giti yaba yarahawe ishimwe ngo ku Rwesero ngo nta jenoside yahageze; aliko se?

Ba padiri Mudashimwa Gaspard bali abarezi b’abaseminali na bagenzi be baratikiye.  Ese ababahitanye baba bararyojwe ayo mabi? Ese baba barashyinguwe?

Naho musenyeli Thadeo Nsengiyumva azibukwa ko ku Rwesero yahinduye isura ya seminali uretse gutera umupira wa basket n’abaseminali  yubakishije ikibuga cyahiganwaga n’icyo ku Mpala mu bwiza.

Yatoje abaseminali gufatanya na diosezi mu kwihaza bahinga umuceli. Aho abereye umushuma wa diyosezi ya Kabgayi ali mubafashe iya mbere akangurira urubyiruko kubana no kworohererana no kwitegura kwakira bagenzi babo bali gutahuka bikurikijwe amasezerano y’amahoro ya  Arusha. Gusa yituwe urufaya rw’amasasu i Gakurazo ababikoze bagororerwa kuzamurwa mu ntera.

Ku munsi twibukaho umulinzi wa seminali Dominiko Savio, abo bose tubazirikane mu mashengesho yacu y’uyu munsi cyangwa se mu bundi buryo buboneye.

Santus Dominicus Savio ora pro nobis.

Yanditswe na Kayinamura Lambert

Ushobora kwibaza aho aba bagabo batatu bahuriye. Ariko ushishoje neza wahabona.

Muri iyi weekend turangije, niho Bwana MUTUYIMANA Anselme yishwe ahotowe. Yishwe anizwe nka Karegeya. Urupfu rwahuriranye na saga ya Uganda, n’ Umwiherero. Nyamara rurakomeye.

Mu ijambo yavuze atangiza umwiherero wa 2019, Kagame yiyemereye ukuri kwari gusanzwe kuzwi na benshi ndetse intore ziguhakana zikuzi, ko ariwe wishe Bwana SENDASHONGA. Yabivuze amaze kwikoma Bwana MUSEVENI. Ngicyo ikita rusange gihuza abo bagabo batatu. Uwa mbere yishwe muri 1998, undi yicwa muri 2019, undi ntaricwa. Nyirubwite agenda yiyemerera ko ariwe kaboko kabica gahoro gahoro mbere yo gushyikirizwa ubutabera. Nyuma yo kwivuga ibigwi ko ari we wishe Karegeya, yivuze ibindi ko ariwe wamenye amaraso ya Seti Sendashonga, byose akomerwa yombi n’abatinya gupfa nabo basura mu ma pantalons i Gabiro.

Kuri Kagame gukemura ikibazo ufitanye n’umuntu uwo ari we wese binyura mu nzira eshatu : 1. KWICA, 2. KWICA, 3. KWICA. Sendashonga amubajije impamvu yica abantu agifata ingoma ati nkakwica. Museveni amubujije gukomeza kohereza intasi ze muri Uganda kwica no gushimuta impunzi ati nakwica. Mutuyimana avuze ati hari ibitagenda muri rubanda ati uragapfa upfuye.

Urutonde rw’abantu bamaze kuzira ubwo bwicanyi bwa Kagame rumaze kuba rurerure: Habyarimana, Ntaryamira, Kabila, Kabera, Lizinde, Sendashonga, Rwisereka, Karegeya, Rwigara, Ingabire, Twagirimana…….. ….., Ubariyemo abaturage basanzwe bishwe bakicwa na n’ubu bwakwira bugacya. Yemwe n’abishe Sendashonga yarabishe. Umuntu wica akica n’abo atuma kwica! KWICA KWICA KWICA niyo ntero imuba mu mutwe. Nyamara arihanukira akavuga nta soni ngo batubeshyera ko turi abicanyi, akongera akivamo nk’inompfu ati kwica Sendashonga simbyicuza. Mu ijambo rimwe! Mbega ubuswa!

Intore zikajyaho zigahakana zikiva inyuma, nawe ati ariko mwakabaye mubikora ari mwe, zigacurira! Mbega ubucucu!

Leta ya Kagame ishingiye ku kumena amaraso gusa. Kuva yajya ku butegetsi. Niyo mpamvu abantu mu Rwanda duhorana ubwoba. Guhera ku bayobozi kugera ku bayoborwa ubwoba bwaratumaze. Aravuga tugatitira, yemwe n imahanga ubwo bwoba bwarahageze. Hari abatinya ngo azabasangayo. Koko hari abo yasanzeyo. Ubu yiharaje guca umutwe opposition mu Rwanda yica ibyegera by’ umuyobozi wa FDU, Ingabire ngo we, n’abandi batekereza nkawe mu gihugu baceceke. Ese Diane ko adakoma ni amahoro?

Nyamara witegereje neza usanga amaraso amaze kumubana menshi mu mutwe. N’ubwo akomeje gucura inkumbi z’inzirakarengane, inzira zo kwica zigenda zimubana nke kuko abenshi mu Rwanda no mu mahanga bamaze kumumenya. Iyo bitaba ibyo Nkurunziza ntaba agihumeka. Museveni yabanje kugira ngo ni blague ariko amaze kubona izuba! Na bariya bayobozi n’ aba Pasteurs nka ba Rutayisire bakoma mu mashyi iyo avuze kwica kandi bibujijwe mu mategeko y’Imana, si ukumushyigikira kundi nabo baba batinya kwicwa.

Yaba Nkurunziza cyangwa Museveni uwo yabona mbere yamucura inkumbi. Icyo agamije ni kimwe : Kuguma ku butegetsi ku kiguzi icyo ari cyo cyose akiyerekana ko ariwe mutegetsi ushoboye wenyine imbere ya ba mpatsibihugu. Muzitegereze iyo abari imbere ukuntu aba yigeze gentil gideon! Niyo mpamvu yavuze ati aho kugira ngo mfukame nzava imyuna. Nyamara apfukamishije yombi already.

Kagame amahanga amaze kumumenya. Amaraso amaze kumubana menshi mu mutwe no mu biganza. Agwije abanzi indani, mu Majyaruguru, mu Majyepfo, n i Burengerazuba. Imipaka irafunze. Inzara iranuma mu rwagasabo, ubwoba urwikekwe ubukene, bimaze kurenga inkombe mu bana b’u Rwanda. No mu gatsiko indani harimo akantu.

Abarwanya ubutegetsi barabura akantu gato gusa, gusunika bigahirima.

Yanditswe na Kagwigwi Ndamukunda Nsaba

FDU-Inkingi ni ishyaka ryahisemo inzira y’amahoro rigataha ngo rikorere politiki mu gihugu rikomeje kwerekwa na FPR ko iyo nzira idashoboka.

Uretse umukuru w’iri shyaka Madame Ingabire Victoire wafunzwe imyaka 8 y’akamama agafungurwa kubera igitutu cy’amahanga, kuri uyu wa gatanu umuvugizi w’iri shyaka yarishwe umurambo we ujugunywa muri Gishwati. Si uwo gusa kuko hari undi munyamuryango witwaga Habarugira wiciwe i Ngoma. Hari kandi Vice Prezida w’iri shyaka Bwana Twagirimana Boniface washimuswe n’ubu bikaba bitazwi niba yaba akiri muzima. Hari kandi na Madame Illuminée Iragena wari umubitsi w’iri shyaka nawe washimuswe kugeza ubu hakaba na gakuru ke. Ndetse n’abayoboke ba FDU bafunzwe.

Ibi bikomeje kugaragaza isura nyayo ya FPR ishyaka ryiyerurutsa ribwira abanyaporitiki batavuga rumwe naryo bakorera hanze ngo mu Rwanda ni amahoro batashye iyo politiki bakayikorera mu gihugu!

Ibi kandi mu karere no ku rwego Mpuzamahanga bikomeje kwereka amahanga ko ubutegetsi buriho mu Rwanda ari ubutegetsi budashobora kwemera gufungura urubuga rwa politiki aho amashyaka anyuranye yereka abaturage ibitekerezo n’umurongo wayo hanyuma abaturage bakihitiramo ishyaka ribabereye.

FPR ITINYA IKI?

Wakwibaza uti ko uri ishyaka ryigamba ko ryateje imbere abaturage, ko ryubatse igihugu, ko ryunze abanyarwanda, ko ubu abanyarwanda barikunda ku buryo baritora 99℅ ritinyira iki guhatana n’andi mashyaka yemeye guhatana mu nzira y’amahoro? Twibuke ko ubwo Padiri Nahimana yashakaga gutaha FPR yamutinye ikamwangira kwinjira mu gihugu!

Ibi ni nk’umunyeshuri wigamba ko ari umuhanga ariko agatinya ibizamini! Ibi bigaragaza kandi ko FPR izi neza ko abanyarwanda batayikunda igatinya ko ibahaye ubwisanzure ngo bahitemo ishyaka ribayobora FPR yahita itakaza ubutegetsi.

Uko biri kose abanyarwanda benshi tunyotewe n’impinduka kandi uko byagenda kose igomba kugerwaho.

Muraho neza, ndi umucungagereza kuri Gereza ya Huye, ubu noneho ikibazo gihari ni icya amapingu menshi afunga amaguru n’amaboko yabitswe n’abafungwa imbere mu gipangu bakaba bayabitse mu bintu byabo aho ubu bavuga ko uwo bazayashyikiriza nta wundi ari Ministre w’ubutabera n’ushinzwe uburenganzira bwa muntu ndetse na transparency International, kuko abo bafungwa bashaka kwerekana iyicarubozo bagiye bakorerwa inshuro nyinshi aho hagiye hanaba imyigaragambyo inshuro nyinshi ariko n’umukuru ushinzwe amagereza yabyumva ntagire icyo ahindura ku iyicarubozo Umuyobozi wa Gereza ya Huye James Mugisha akorera izo mfungwa z’urubyiruko afata nk’aho ari aduyi (Umwanzi) ku gihugu cy’u Rwanda kandi atari byo.

Ikibazo uko cyaje ubu hano kuri Gereza umufungwa wese ufite icyo atumvikanaho cyangwa acyapfa na mugenzi we ahita ajya kumubeshyera kwa Director ko afite telephone ubwo James Mugisha na IO (ushinzwe iperereza) Marcel barafata bagakubita hafi gupfa, ubwo bafashe urubyiruko rugera kuri 90 barahondagura bamaze kubagira intere babashyira mu gakasho gato aho barimo bagerekerenije umwe ageretse hejuru y’undi kandi buri wese afunze amapingu ku maguru n’amaboko.

Mugisha ntiyigeze abakatira uko bisanzwe ya minsi 30 isanzwe izwi yababwiye ko bazagumamo imyaka yose bakatiwe n’urukiko, ubwo abo basore babonye ko bagiye gupfira icyarimwe bafata amapingu barayifungurira bafungura twa kasho barasohoka basubira mu buryamo bwabo aho bagiye kurwarira izo nkoni amapingu bayabika mu bikapu byabo.

Mugisha ubu yirirwa atuma abafungwa bayobora iby’umutekano imbere ngo bahendahende izo mfungwa zimuhe amapingu ye abasore bati ntayo twaguha tutarerekana iyicarubozo wadukoreye, ikindi bati  amapingu twarayaguze ubwo hari umucungagereza twahaye amafranga yatugiriye impuhwe ngo ayadukureho ariko Marcel agahita ayasubizaho, ubu rero ikibazo kikaba kiri kuri Director ubitse amapingu y’igihugu mu bikapu by’imfungwa, aririrwa atuma guhendahenda abafungwa yahemukiye.

Birababaje aho umuyobozi akora ibishoboka byose NGO ku munsi hapfe abantu benshi cyane, aho abari kwicwa n’inzara bamubwira umubare w’abapfuye batandatu ku munsi agasubiza ngo nibake, kandi urebye muri dosiye z’urwo rubyiruko bafungiye utwaha tworoheje aho ejo bari kuba batashe basubiye gukorera igihugu.

Izo telephone bazira baravuga bati ntazo twagiye kugura mu maduka i Butare ni James Mugisha na Marcel bazoherezamo aho agaterephone gato kagura ibihumbi icyenda imbere muri gereza abafungwa bayigura ibihumbi mirongo irindwi.

The Rwandan nitabarize Director abone amapingu y’igihugu, ariko bizagorana kuyamuha kuko ntibizeye uwariwe wese uzaza yiyita umuyobozi kuko Mugisha yigeze kuzana abapolice babiri bambaye sivile biyita ba pastor ngo baje gutanga Bibles kandi ntazo bafite ahubwo bagirango bamufasha gusohora umugororwa witwa Arafati yagirango ajye kurenganya hanze ahondagura we na Marcel.

Mubwire Ministre w’ubutabera, Johnston Busingye aze ajye gufata ayo mapingu anabwire imfungwa gahunda ya Mugisha.

Umusomyi wa The Rwandan

Huye

Yanditswe na Ben Barugahare

Mu ijambo yagejeje ku bantu benshi bari bitabiriye umuhango wo gutanga igihe cyamwitiriwe cy’umwaka wa 2019, Madame Victoire Ingabire akoresheje ikoranabuhanga yabatangarije ko “atitwa Victoire ku busa ko kandi atajya yemera gutsindwa”

Muri uwo muhango wabereye i Bruxelles mu Bubiligi kuri uyu wa gatandatu tariki ya 9 Werurwe 2019 ubwo hatangwaga ku nshuro ya 8 igihembo cy’amahoro na Demokarasi kitiriwe Victoire Ingabire (Prix Victoire Ingabire Umuhoza pour la Démocratie et la Paix) gitangwa n’ishyirahamwe Réseau international des femmes pour la Démocratie et la Paix (RifDP) Madame Victoire Ingabire we wari mu Rwanda, mu ijambo rye yabanje kumenyesha abari bateraniye i Bruxelles urupfu rwa Bwana Anselme Mutuyimana, wari Umuvugizi wa FDU-Inkingi mu Rwanda witabye Imana kuri uyu wa gatanu tariki ya 8 Werurwe 2019, ahita asaba ko abantu bahaguruka bagafata umunota umwe wo kwibuka Nyakwigendera.

Mu ijambo rye Victoire Ingabire yatangiye avuga ko yari yabanje kwibaza ku ijambo yari kuvuga muri uriya muhango ariko atekereza ko ibo atavuga abishe Bwana Anselme Mutuyimana bari kuba batsinze, yakomeje avuga kuri Nyakwigendera Anselme wishwe afite imyaka 30 gusa kandi ngo wafunzwe imyaka 6 uzira politiki akaba yarafunguwe amezi 2 gusa mbere y’uko Victoire Ingabire nawe arekurwa.

Madame Victoire Ingabire yakomeje avuga ko atitwa Victoire ku busa ko atajya yemera gutsindwa kandi icyiza kizatsinda ikibi.

Mu ijambo rye yakomeje ashimira abateguye iki gikorwa n’abacyitabiriye, avuga ko atabona amagambo yo gushimira byimazeyo abagize iki gitekerezo bakanagishyira mu bikorwa.

Yashimiye kandi abahawe igihembo cyamwitiriwe kuko abona ko kuba baragihawe ari uko abagitanga basanze bagikwiye.

Avuga ku munsi w’abategarugori yatangaje ko abagore bagombye kurenga urwego rwo gusaba uburenganzira nk’abagore gusa ahubwo bagasaba uburenganzira bwabo nk’ibiremwamuntu.

Igihembo kitiriwe Victoire Ingabire cy’umwaka wa 2019 cyahawe abantu batatu ari bo:

-Abraham Kiplagat Mutai, umunyakenya uzwi cyane mu gukoresha imbuga nkoranyambaga. Wamenyekanye cyane ku Banyarwanda asaba ifungurwa ry’infungwa za politiki mu Rwanda.

-Robin Philpot, Umunyamakuru n’umwanditsi ukomoka mu gihugu cya Canada wanditse ibitabo byinshi ku Rwanda no ku karere k’ibiyaga bigari.

-Padiri Jean-Pierre Mbelu, ukomoka muri Repubulika Iharanira Demokarasi ya Congo, akaba umumwanditsi n’umusesenguzi muri politiki, akaba yarananditse ibitabo byinshi kuri politiki yo mu karere no mu gihugu cya Congo akomokamo.

Mushobora kumva ijambo ryose hasi mu surimi rw’igifaransa: