Corneille Nyungura, umucuranzi w’icyamamare kw’isi akaba afite inkomoko mu Rwanda mu kiganiro cyahise ku ya 22 Werurwe 2014 kitwa On n’est pas couché aho Corneille yaganiraga kuri Album ye yise “Entre Nord et Sud”yirinze kugira uruhande afata ku bijyanye na Genocide yabaye mu Rwanda mu 1994.

Muri icyo kiganiro umwe mu bantu bari bitabiriye icyo kiganiro  yabajije Corneille niba atarashimishijwe n’uko Capitaine Pascal Simbikangwa yakatiwe imyaka 25 n’urukiko rwo mu Bufaransa, Corneille yasubije ko yirinda kugira uruhare abogamiraho kuko ngo ari imvange y’umuhutu n’umututsi.

Uwo mucuranzi kandi yongeyeho kandi ko yirinda kugira icyo atangaza ku bijyanye na Genocide kugira ngo impande 2 zihanganye mu Rwanda hatagira uruhare rubyitwaza mu bikorwa byarwo.

Corneille akimara kuvuga ayo magambo byahise bigaragara ko benshi mu bari aho bahise bumirwa kuko bari biteguye ko ahita agaragaza ibyishimo kuko benshi mu bari aho iyo bumvise Genocide bishyiramo ko ari uruhande rw’abahutu rwishe gusa ku buryo kumva ko hari abantu benshi bishwe na FPR bituma bagwa mu kantu. Kuba Corneille ataratoboye byashyize abantu mu kibazo bituma umunyamakuru ahita akomeza ikiganiro yivugira ibya album ya Corneille.

N’ubwo bwose benshi mu bari bazi umuryango wa Emile Nyungura, se wa Corneille, wari utuye ku Kicukiro bazi neza ko Emile Nyungura atari umututsi ahubwo yari umuhutu ndetse akaba n’inshuti ya Perezida Habyalimana n’ubwo yari mu ishyaka PSD ritavugaga rumwe n’ubutegetsi, Corneille mu byo avuga agaragaza ko se yari umututsi. Ntawabihakana ashikamye kuko ntawe urusha Corneille kumenya umuryango we ariko Emile Nyungura abamumenye bose bamuzi nk’umuhutu.

Ikindi benshi bibazaho n’ibijyanye n’urupfu rw’umuryango wa Emile Nyungura, kuko n’ubwo abaturanyi bawo ku Kicukiro bose bazi ko wishwe n’ingabo za FPR. Corneille we ahitamo kutagira uwo atunga urutoki ahubwo agahitamo kuguma hagati.

Benshi mu babikurikiranira hafi bemeza ko uburyo Corneille yahisemo yabuhisemo kugirango bitica umwuga we w’ubucuranzi kuko hari byinshi byemeza ko umuryango we wishwe na FPR bimwe mu byo baheraho n’ibi:

-Kuba Corneille kuva mu 1994 atarajya mu Rwanda habe na rimwe

-Kuba mu byo Corneille avuga ntaho ashinja uruhande rw’abahutu ubwicanyi kandi bizwi ko muri ibi bihe ari ikintu kigezweho ndetse cyari kumworohera ndetse ntikigire icyo gitwara umwuga we.

-Kuba akimara gupfusha ababyeyi n’abavandimwe be yarahisemo guhungira kwa Perezida wa MRND, Bwana Mathieu Ngirumpatse (ubu ufungiye Arusha) akamuhungisha mpaka i Goma muri Congo.

Abakurikiye ibyo Corneille yavuze muri kiriya kiganiro On n’est pas couché babonye ko Corneille yabaye nk’urimanganya ariko yagaragaje ubutwari bwo kutaba nyamujya iyo bijya akomeza umurongo yiyemeje.

Ubwanditsi 

The Rwandan

Nk’uko abanyarwanda benshi babizi igikorwa cy’umuganda cyatangijwe na Nyakwigendera Perezida Yuvenali Habyalimana mu gishanga cya Nyarugunga muri Komini Kanombe ku ya 2 Gashyantare 1974. Umuganda washyizweho n’itegeko teka rya Perezida wa Repubulika ryo ku itariki ya 2 Gashyantare 1974. Iyo tariki yakomeje kubahirizwa buri mwaka kugeza muri 1992.

Mu gihe cy’amashyaka menshi n’intambara yatangijwe na FPR mu 1990, mu byo FPR yigishaga yavugaga ko umuganda ari igikorwa cy’ubucakara, uburetwa n’agahato Perezida Habyalimana yazanye. Ariko mu minsi ya vuba FPR yashatse kwiyitirira uwo muganda kugeza aho ishaka kubeshya abatabizi n’amahanga ko ari yo yawuzanye kandi ahubwo yarawurwanyije yivuye inyuma.

Ni muri urwo rwego intore za Kagame muri Ottawa (Canada) zatekinitse umuganda wo kwigisha abazungu isuku! Nyuma yaza gahunda zo kureshya abanyarwanda  zirimo: Ngwino urebe, umushyikirano, ibihembo bififitse bya Kagame, imibare n’amaraporo bififitse byo kujijisha amahanga…,ubu noneho ikigezweho ni ugufasha abazungu!

Kagame Paul yafashije umwana wo mu gihugu cya Irland amamiliyoni yo kugurirwa akamashini k’insimburangingo z’uwo mwana, ibiri amambu Kagame akaba adasiba gusabiriza imfashanyo muri icyo gihugu! Intore zo muri Canada ziganye shebuja zijya gutekinika gahunda yo gukora umuganda wo kwigisha abazungu isuku!! Ibi byose birerekana ko politiki na gahunda za Kagame zicuramye!!

Ninde wakwigisha undi isuku ari abatuye Kigali n’abatuye Ottawa? Ari igihugu cya Irland n’u Rwanda n’ikihe giha ikindi imfashanyo? Ese Kagame Paul n’intore ze bazajya no kwigisha abazungu uko bazajya baniga abanyepolitiki bo muri ibyo bihugu batavuga rumwe n’abategetsi babo nk’uko bimeze mu Rwanda? Ese iyi tekiniki y’ibinyoma no gutekinika niyo izatuma Kagame n’ubutegetsi bwe bikundwa n’abanyarwanda?

Inkomamashyi za FPR Ottawa muri Canada zikomeje ingando zo kozwa ubwonko hagamijwe kuzikangurira gukomeza kwigisha amacakubiri mu bana b’u Rwanda binyujijwe muri gahunda ya “ndi umunyarwanda”. Izo ntore z’abicanyi ba FPR  ziri gutoza Urubyuruko rwiganjemo ubwoko bw’abatutsi  gusa kwitandukanya n’abahutu. Izo ntore za FPR muri Canada ziri kwiruka mu mazu y’abanyarwanda batuye muri icyo gihugu zibashishikariza kwitabira igikorwa cy’umuganda ariko mu by’ukuri ikihishe inyuma ari ukujyana abo banyarwanda muri gahunda ya “Ndi umunyarwanda”. Kuri uyu wa gatandatu taliki ya 29 werurwe 2014, izo ntore ziri kwamamaza muri Ottawa ko ziri gutegura ingando irimo n’umuganda muri uwo mujyi kandi  izo ntore zigatsindagira ko icyo gikorwa kigamije gahunda nziza.

Izo ntore zikomeje guhakirizwa Ku bazungu zibakwizamo ibinyoma by’umuganda muri Capital City ya Canada, izo ntore ngo zikaba ziri gushimashima abazungu zibabwira ko ngo zibazaniye umuganda wo kubaka Canada! Izo ngufu intore zigiye gukoresha zubaka Canada zabanje zikubaka Kigali n’u Rwanda bigasa na Canada? Izo ntore ngo zigiye kuzakora umuganda wo gusukura umujyi wa Ottawa kuwa gatandatu w’iki cyumweru mu duce tw’uwo mujyi twa Saint Patrick Avenue, King Edouard noneho ngo zikarangiriza muri Vanier.

Harahagazwe! Kubona aho intore za Kagame zigisha abanyacanada isuku mu gihe ruhurura z’I Kigali zirirwa zikwiza umunuko hose muri Kigali! “Ngo umwera uturutse i bukuru bucya wakwiriye hose”! Izi ntore zirimo zikurikiza urugero rw’umutware wazo Paul Kagame wafashije umwana wavukanye ubumuga muri Irland amafaranga ahwanye na miliyoni mirongo 47 z’amafaranga y’u Rwanda mu gihe abanyeshuri muri kaminuza y’u Rwanda bari kwicwa n’inzara! Gusa icyo twe CLUB RDI-Rwanda Rwiza Ottawa twababwira ni uko amacakubiri bari kuzana muri Canada ntacyo ashobora kugira icyo ageraho kuko intore zifite isura mbi Ku isi yose, Kuza koza imihanda ya Canada ntacyo bizatanga!

Club RDI Ottawa iraburira urubyiruko ruba muri Canada kutazanjya guhakwa, kandi ubukoroni bwaraciwe mu Rwanda bukaba bwaragaruwe na FPR ikaba itangiye no kubukwiza mu mahanaga. Hano muri Canada hari abakozi bashinzwe iyi mirimo y’isuku igiye kugirwa propaganda y’abicanyi ba Kagame, ikihishe inyuma y’iki gikorwa nta kindi uretse ubugome, inda nini n’amacakubiri.

Dukomeze twamaganire kure ibisahiranda by’intore za FPR kandi bimenye ko “Agatinze kazaza ari amenyo ya ruguru” amaherezo izi ntore zizabazwa ibikorwa bibi zikomeje gukorera abanyarwanda zigashaka kubihishira mu mahanga zitwaje umuganda washyizweho na MRND!

Bayavuge Latifah
Perezida  wa Club RDI-Rwanda Rwiza Ottawa
Email: clubottawa.rdi@gmail.com
Website: www.rdirwandarwiza.com

Click here to view the embedded video.

Nyuma y’itangazo ryashyizwe ahagaragara n’impuzamashyaka RNC, FDU-Inkingi na AMAHORO ryiswe:“RWANDA: RADIO IMPALA YARASHIMUSWE” ndetse n’amagambo yatangajwe na Bwana Sixbert Musangamfura kuri Radio BBC Gahuza-Miryango, aho abayobozi batatu b’ishyaka RDU bashinjwa gushimuta Radio IMPALA, bibaye ngombwa ko dutanga ibisobanuro ku bijyanye n’iyi Radio kugira ngo ukuri kujye ahagaragara.

Mbere na mbere abantu bagomba gusobanukirwa ko iyi Radio itigeze iba umutungo w’Impuzamashyaka  RNC-FDU-AMAHORO cyangwa wa Association Radio IMPALA asbl yashinzwe nyuma y’itangizwa ry’iyo Radio kugira ngo iyo Association ishobore gufata imikoreshereze ya Radio ariko ntabwo byashobotse.

Twavuga kandi ko umutungo wahereweho mu gushinga Radio kugeza ubu wavuye mu mpano yatanzwe n’umugiraneza utarashatse ko umwirondoro we ujya ahagaragara ntabwo rero Radio yavuye mu misanzu y’abarwanashyaka b’impuzamashyaka RNC-FDU-AMAHORO nk’uko bivugwa hirya no hino. Turasaba abayobozi b’impuzamashyaka RNC-FDU-AMAHORO ko basobanurira abayoboke babo uburyo bakoresheje imisanzu yabo yitiriwe gushinga Radio aho kwibasira abayobozi ba RDU babita abajura.

Twabamenyesha kandi ko inkunga yatanzwe n’uwo mugiraneza ntabwo yari igenewe Impuzamashyaka RNC-FDU-AMAHORO ahubwo yari igenewe guteza imbere ubwisanzure mu gutanga ibitekerezo biciye mu itangazamakuru mu Rwanda cyane cyane kugirango opposition nyarwanda ishobore kugira itangazamakuru riyivugira.

Twamaganiye kure inyerezwa ry’igice kimwe cy’inkunga yatanzwe n’uwo mugiraneza, ibyo bikaba byaratumye Radio IMPALA idakora neza, cyane cyane mu kubura abanyamakuru kuko abenshi bangaga gukora nk’abakorerabushake badahembwa.

Haragaragara kandi ukudashima n’ukwirengagiza ibyakozwe na Bwana KARURANGA Saleh kw’abayobozi b’Impuzamashyaka RNC-FDU-AMAHORO, kuko Bwana KARURANGA ari we wenyine wemeye gukora kuri Radio IMPALA nk’umukorerabushake adahembwa kuva yatangira kugeza uyu munsi hagamijwe gutanga urubuga ku bitekerezo bitandukanye ku banyarwanda.

Turamenyesha abanyarwanda ko n’ubwo inkunga yatanzwe n’umugiraneza yanyerejwe, twiyemeje gusigasira iki gikorwa cyagezweho kigamije gufasha abanyarwanda gutanga ibitekerezo byabo mu bwisanzure mu Rwanda. Tuboneyeho guhamagarira abanyarwanda bose, cyane cyane abo muri opposition badahabwa urubuga rwo gutanga  ibitekerezo byabo mu bitangazamakuru byo mu Rwanda, batera inkunga iyi Radio ndetse bakaboneraho gukoresha ubwo buryo babonye bwo gutanga ibitekerezo byabo bitandukanye mu guteza imbere umuryango nyarwanda.

Ku bwa RDU.

Dr MURAYI Paulin

Perezida

Bwana Evode Uwizeyimana umaze iminsi asubiye mu Rwanda avuye mu gihugu cya Canada yagizwe Visi Perezida wa Komisiyo y’u Rwanda yo kuvugurura Amategeko.

Mbere yo guhabwa uyu mwanya n’inama y’abaministre yateranye kuri uyu wa gatanu tariki ya 28 Werurwe 2014, Evode Uwizeyimana yari afite  ikiraka cya Ministre y’Ubutabera kirimo agatubutse ngo ubundi gisanzwe gikorwa n’abanyamahanga. We yivugira ko yapiganiwe akagitsindira kubera ubuhaga bwe, ngo kikaba cyagombaga kumara ameze 6 ndetse kikaba gishobora kongerwa.

Twabibutsa ko Me Evode Uwizeyimana, yafashije Bwana Faustin Twagiramungu mu kwiyamamaza mu matora ya Perezida wa Repubulika yo mu 2003, yavuye mu Rwanda mu mwaka w’2007, nyuma yo kuba umucamanza mu nkiko z’u Rwanda, yerekeza mu gihugu cya Canada.

Me Evode Uwizeyimana yakunze kuvugira ku maradiyo nka BBC na VOA, yitabajwe nk’impuguke mu mategeko akenshi anenga cyane amwe mu mategeko n’ibyemezo byafatwaga na Leta y’u Rwanda kugeza n’aho yagereranyaga imyitwarire yayo nk’iy’amabandi. Hari n’ibindi biganiro bitandukanye ndetse n’inyandiko Me Evode yagiye asohora mu bitangazamakuru bitandukanye byaba ibyandikwa n’abatavuga rumwe na Leta y’u Rwanda ndetse n’ibindi bitandukanye.

Nyuma yo guhura na Nyakwigendera Aloysia Inyumba mu gihugu cya Canada byateye ubwumvikane bucye mu ishyaka RDI Rwanda Rwiza yari abereye umuyoboke ndetse we n’uwitwa Alain Patrick Ndengera barisezeramo. Bidateye kabiri amakuru arasakara ko Me Evode yageze i Kigali.

Ugutaha kwa Me Evode kwateye benshi kwibaza ku buryo n’amagambo menshi yagiye avuga yahise agarukwaho cyane, ibyo bishobora kuba byarateye Evode ubwoba agahita atumiza ikitaraganya ikiganiro n’abanyamakuru aho yabaye nk’uwisobanura cyane cyane yemeza ko amradiyo yose yamuhamagaraga yamuhembaga. Ariko cyane cyane yahise yibasira abatavuga rumwe na Leta ndetse aboneraho no gusaba imbabazi ku magambo yavuze.

Me Evode Uwizeyimana tumwifurije akazi keza ndetse tunakangurira n’abandi bavugishwa n’inzara n’inyota y’imyanya kujya bavuga ikibazo bafite aho kwikinga inyuma ya opposition ngo barashaka demokarasi.

The Rwandan

Ubwanditsi

Ubwanditsi

Amakuru agera kuri The Rwandan aravuga ko Bwana Faustin Twagiramungu, wigeze kuba Ministre w’intebe mu Rwanda hagati ya 1994 na 1995, ubu akaba ari umukuru w’ishyaka RDI-Rwanda Rwiza ndetse n’impuzamashayaka CPC, aravuga uyu mugabo yasimbutse urupfu ubwo yari mu rugendo mu gihugu cya Tanzaniya.

Nk’uko ayo makuru akomeza abivuga ngo nyuma y’aho ibihugu byo mu karere cyane cyane Afrika y’Epfo na Tanzaniya byiyemeje guhagurukira M23 na Kagame. Inzego z’ubutasi za Perezida Kagame zabonye amakuru y’uko ibihugu byo mu karere byahawe amakuru mu buryo byakoresha ngo bitsinde umutwe wa M23 wari ufashijwe n’u Rwanda ku buryo bugaragara

Ayo makuru akaba yaratangwaga n’abahoze mu ngabo za FPR barangajwe imbere na ba Lt Gen Kayumba Nyamwasa na Colonel Patrick Karegeya. Nk’uko byatangajwe na BBC ngo mbere y’uko ingabo za Afrika y’Epfo na Tanzaniya zoherezwa muri Congo ngo habanje kubaho amanama menshi hagati y’abakuru bashinzwe iperereza mu bisirikare by’Afrika y’Epfo na Tanzaniya bayakorana na Colonel Patrick Karegeya. Ndetse ubu hakaba hari benshi bibaza niba Colonel Karegeya atarazize istindwa rya M23.

Si ibyo gusa kuko nyuma y’amagambo yavuzwe na Perezida Kikwete aho yagiraga inama Leta ya Kagame ngo igirane ibiganiro na opposition harimo na FDLR, bigakurikirwa n’ibitutsi n’iterabwoba ku ruhande rwa Kagame, ibihugu bya SADC cyane cyane Afrika y’epfo na Tanzaniya byiyemeje guhagurukira Kagame bigafasha opposition nyarwanda kwishyira hamwe ngo imurwanye, abo ibyo bihugu byifuzaga gukoresha ni ba Lt Gen Kayumba Nyamwasa ariko cyane cyane Colonel Patrick Karegeya na Bwana Faustin Twagiramungu.

Inzego z’iperereza za Kagame zabonye amakuru y’ibyo ibyo bihugu bitegura maze zipanga kwivugana Bwana Twagiramungu, Lt Gen Kayumba na Colonel Karegeya vuba na vuba kandi ku buryo bwihuse kugira ngo imigambi ya SADC iburiremo, abarwanya Kagame bashye ubwoba uretse ko hari n’amakuru avuga ko Kagame yabikoreye inzika n’ubugome cyane cyane ko ngo bivugwa ko yatewe umujinya w’umuranduranzuzi n’itsindwa rya M23. Niba benshi mwibuka ijambo Perezida Kagame yavuze ku bunani mwiyumviye aho yagabishaga avuga ko uyu mwaka dutangiye wa 2014 uzabamo ibintu byinshi bikomeye.

Ibyakurikiyeho murabizi Colonel Karegeya yarishwe mu minsi y’ubunani naho Lt Gen Kayumba aterwa iwe baramuhusha, undi wahushijwe n’ubwo bitagiye ahagaragara ni Bwana Twagiramungu. Mwanumvise kandi amagambo yakurikiye iyicwa rya Colonel Karegeya na n’ubu agikomeje gukoreshwa aho Perezida Kagame adasiba gukangurira abamushyigikiye kwica abo yita ko bagambanira u Rwanda.

Amakuru atugeraho avuga ko ubwo Bwana Twagiramungu yari mu rugendo muri Tanzaniya, inzego z’iperereza z’u Rwanda zari zapanze kumwivugana mu gihe yavaga ku kibuga agana aho yagombaga gucumbikirwa kuko mu nzira nta bamurinda yari afite. Ariko inzego z’iperereza za Tanzaniya zarabimenye zohereza abantu bazo bakira Bwana Twagiramungu akiva mu ndege bamucisha ahaca abanyacyubahiro ku kibuga cy’indege, bimura aho yagombaga gucumbika ndetse baranamurinda bikomeye cyane  mu gihe yavaga ku kibuga. Ibyo kumurinda bikaba byarakomeje mu gihe cyose yamaze gihugu cya Tanzaniya.

Umuntu akaba yasoza yibaza niba kuri Kagame umuti ari ukwivugana abanyarwanda n’abanyamahanga banze kumuyoboka cyangwa bagaragaje ko batemeranya na politiki ye y’igitugu.

Ubwanditsi

The Rwandan

Amakuru atangazwa n’ikinyamakuru Marianne mu nimero yacyo yo guhera tariki ya 28 Werurwe kugeza ku ya 3 Mata 2014, mu kiganiro icyo kinyamakuru cyagiranye na Major Jean Marie Micombero, yabwiye icyo kinyamakuru ko yamenye amakuru yose y’itegurwa ry’iraswa ry’indege ya Perezida Habyalimana ku ya 6 Mata 1994 nk’umwe mu basirikare bari bashinzwe iperereza muri Bataillon ya 3 ya APR yari iri mu nzu ya CND i Kigali.

Nk’uko Major Micombero yabitangarije ikinyamakuru Marianne ngo yahaye ubuhamya abacamanza b’abafaransa bakora iperereza ku ihanurwa ry’indege yari itwaye Perezida Habyalimana ari bo Nathalie Poux na Marc Trévidic ku ya 3 Nyakanga 2013 no ku ya 30 Mutarama 2014 n’ubwo bitigeze bijya ahagaragara mu bitangazamakuru.

Mu nkuru ndende iki kinyamakuru gitangaza uburyo Major Micombero yagisubiriyemo imyiteguro y’ihanurwa ry’indege ya Perezida Habyalimana n’abagize uruhare muri icyo gikorwa ndetse n’uburyo indege yagombaga kuraswa mu gitondo cyo kuya 6 Mata 1994 (igihe Perezida Habyalimana yerekezaga mu nama i Dar es Salaam) ariko bigasubikwa kuko hatabonaga neza kubera ibihu icyo gikorwa kikimurirwa ku mugoroba w’uwo munsi ubwo Perezida Habyalimana yari agarutse avuye muri Tanzaniya.

Muri icyo kiganiro Major Micombero agaruka ku muntu witwa James Mugabo wakoraga ku kibuga cy’indege i Kanombe wazanaga amakuru y’uburyo ikibuga cy’indege kirinzwe  n’ingendo z’indege za Perezida Habyalimana. Mu gitondo cya kare cyo ku ya 6 Mata 1994, Major Micombero yabonye uwo James Mugabo aje muri CND ari kuri moto ahita ajya kureba Charles Karamba (ubu ni General mu ngabo za RDF) wari ukuriye iperereza ry’ingabo za FPR zari muri CND. Karamba yahise afata icyombo (Radio y’itumanaho ya gisirikare) atangira kuvugira ku murongo wakoreshwaga na Bataillon ya 3 ya FPR yari muri CND atanga amabwiriza ku basirikare ko bagomba kwitegura intambara (stand-by). Icyo gihe ngo Micombero yahise afata imbunda ye yerekeza mu mwanya we mu myobo yari ikikije inzu ya CND mu kugenda nibwo yakuye na Andrew Kagame wategekaga Tiger Coy ya bataillon ya 3 ya FPR (ubu ni General muri RDF) wari inshuti ye ahita abwira Micombero ati: ”Birashoboka ko aya ari amaherezo y’IKINANI”.

Muri ako kanya ngo Micombero yabonye imodoka ya Toyota Stout 2200 isohoka muri CND. Ngo Micombero yari amaze iminsi abona urujya n’uruza rw’iyi modoka mu byumweru byabanjirije ihanurwa ry’indege ya Perezida Habyalimana. Iyo modoka ngo yitwazaga kujya kumena ibishingwe ahitwa ku Murindi wa Kanombe mu nzira z’i Masaka ariko hagamijwe kuneka no gushaka ahantu hiherereye ho kuzarasirwa za Missiles.

Muri icyo gitondo cyo ku ya 6 Mata 10994, ngo Micombero ntabwo yabonye abari muri iriya modoka ariko yari azi ko yatwarwaga n’umushoferi witwa Didier Mazimpaka ikaba yarimo abakoresha za Missiles ari bo Frank Nziza na Eric Nshimiyimana (uyu Eric Nshimiyimana, abatanze ubuhamya mbere nka Aloys Ruyenzi na Abdul Ruzibiza bibeshye ku izina rye bamwita Eric Hakizimana), uwitwa Potien Ntambara n’uwari uyoboye icyo gitero Lieutenant Karegeya bahimbaga ”Eveready”(iri zina yarihimbwe kubera amaso ye ngo yari ameze nk’ay’injangwe ishushanyije ku mabuye yakoreshwaga mu isitimu).

Ngo hari benshi bari baregeranyije amakuru ku hazarasirwa indege uretse abari muri iriya Toyota na Charles Kayonga wari uyoboye Bataillon ya 3 ya FPR, hari n’abandi nka Jacob Tumwine, Charles Karamba, Capitaine Hubert Kamugisha wari ukuriye abo bita aba Techniciens bari bashinzwe guteza akaduruvayo mu gihugu cyane cyane mu mujyi wa Kigali cyane cyane bigize Interahamwe (urubyiruko rw’ishyaka MRNDD), uretse abo na bamwe mu basirikare bandi bari bashinzwe iperereza muri CND bari bazi aho hantu indege yarasiwe i Masaka. Aho hantu umuntu aba areba neza neza indege yitegura kugwa ku kibuga cy’indege i Kanombe.

Amakuru y’iperereza yahabwaga Charles Karamba, cyangwa Charles Kayonga cyangwa Silas Udahemuka (ubu ni Colonel ashinzwe umutekano w’ikibuga cy’indege i Kanombe) ariko ni Charles Kayonga wenyine wahaga amakuru Paul Kagame ubwe. Buri mugoroba ngo Charles Kayonga yuriraga hejuru y’inzu ya CND akajya kuvuganira ku cyombo na Paul Kagame aho abandi batamwumva mu ibanga. Iyo atashoboraga kuvugana na Paul Kagame ubwe yavuganaga na James Kabarebe.

Micombero akomeza avuga ko yari afite amakuru ku myiteguro yo guhanura indege ya Perezida Habyalimana ibyumweru bike mbere y’uko biba. Ngo muri Werurwe 1994 yari yavuganye na Frank Nziza wari wazanye na Eric Nshimiyimana bavuye ku Mulindi wa Byumba ahari ubuyobozi bukuru bw’ingabo za FPR, ngo Frank Nziza yahishuriye Micombero ko we na Eric Nshimiyimana bazanye n’imbunda zabo! Ngo kuko Micombero yari azi ko Frank Nziza na Eric Nshimiyimana baba mu mutwe ushinzwe kurinda ubuyobozi bukuru bw’ingabo za FPR na za Missiles, Micombero yahise yumva ko bazanye na za missiles. Micombero kandi avuga ko yari afite amakuru yandi yakuraga kuri muramu we Eric Kibonge Ntazinda nawe wari wavuye ku Murindi ngo azatware ya Toyota Stout mu gihe cyo kujya i Masaka. Ngo Frank Nziza kubera ko yibwiraga ko Micombero afite amakuru yose yamwibwiriye ko yazanywe no guhanura indege ya Perezida Habyalimana. Ariko Eric Kibonge Ntazinda yaje gusimbuzwa Didier Mazimpaka kubera kwitwara nabi.

Micombero akomeza avuga ko igihe yabonaga ya Toyota igiye mu gitondo cyo ku ya 6 Mata 1994 yahise amenya ko igiye i Masaka ariko atazi neza neza ahantu missiles zizarasirwa. Ngo ni nyuma y’ifatwa rya Kigali intambara irangiye nibwo Frank Nziza wari inshuti ya Micombero yamweretse aho yarasiye missile. Ngo ni ahantu urenze akararo gato ahagana ibumoso ku muhanda ugana i Masaka. Ubu ngo iraswa ry’indege ya Perezida Habyalimana ryabaye ibanga rya gisirikare rikomeye mu gihe ngo mu myaka ishize icyo gikorwa cyo guhitana IKINANI abantu benshi bari bakizi cyaganirwaga ku mugaragaro ngo byatangiye kugirwa ibanga igihe umucamanza w’umufaransa Jean Louis Bruguière yari amaze gusohora inyandiko zo gufata bamwe mu basirikare ba FPR bakekwa kukigiramo uruhare.

Tugarutse ku gitondo cyo ku ya 6 Mata 1994 ngo hari habyutse hari ibihu byinshi ku buryo igikorwa cyo guhanura indege cyahagaritswe kuko abagomba kuyirasa batabonaga neza. Ngo Micombero yiyumviye Lieutenant Karegeya bitaga Eveready akoresheje icyombo avuga ko hari ibihu byinshi batabona neza maze Andrew Kagame wategekaga Tiger Coy ategeka ko bahagarika icyo gikorwa.

Nyuma yo guhagarika icyo gikorwa ngo Micombero yabonye ya Toyota igarutse muri CND ngo n’amategeko yo kwitegura imirwano yari yashyizweho akurwaho. Ngo Micombero yari ahibereye kimwe n’abandi basirikare bari bashinzwe ipererza igihe Lieutenant Karegeya ”Eveready” yasobanuriraga Charles Karamba impamvu igikorwa cyo guhanura indege cyahagaritswe.

James Mugabo wakoraga ku kibuga cy’indege yagarutse muri CND ari kuri moto nyuma gato y’igaruka rya ya Toyota bikiri mu gitondo.

Mu mugoroba ku ya 6 Mata 1994 ntabwo Micombero yabonye ya Toyota igenda kuko yari mu nama muri CND imbere na Jacob Tumwine baganira n’abasivile babazaniraga amakuru ku bijyanye n’umutekano muri Kigali. Ariko Jacob Tumwine wari ufite icyombo byagaragaraga ko umutima utari hamwe yarasohotse bumaze kwira maze Micombero ngo yumva ikintu gituritse cyane. Abasiviri bari muri CND bahise basabwa kugenda bakajya mu ngo zabo.

Ngo mu ijoro Micombero yahuye na Frank Nziza wamubwiye ko we yahushije ariko ku bw’amahirwe Eric we agahamya indege. Ngo ntabwo baganiriye byinshi kuko bikangaga ko baterwa. Muri iryo joro ngo bwa mbere Charles Kayonga yemereye abasirikare kumywa inzoga, icyo gihe Micombero ngo afata Heineken.

Muri iryo joro ngo Micombero yagiye kureba Andrew Kagame wari kumwe na Lt Karegeya ”Eveready” n’uwitwa Kitoko. Maze Lt Karegeya ”Eveready” ababwira ibyari bimaze kubera i Masaka, ngo bagiye ahagana munsi y’umusozi bahashinga ibirindiro mu gihe uwari utwaye ya Toyota, Didier Mazimpaka yakomezaga kugenda azenguruka ku muhanda. Abagomba kurasa za Missiles bagiye mu myanya bari bateguye, maze Nziza arashe arahusha ako kanya Eric we ahita arasa ahamya indege y’IKINANI. Ako kanya bahise bajya muri ya Toyota ihita ibasubiza muri CND.

Ni aho hantu i Masaka ku ya 25 Mata 1994 abaturage bari bagiye kuvoma basanze ibisigazwa bya za Missiles ebyiri zo mu bwoko bwa SAM 16 zakorewe mu Burusiya mu 1987. Imibare yari kuri icyo bisigazwa yatumye hashobora kuboneka amakuru agaragaza ko izo missiles zari mu zindi 40 zaguzwe n’igihugu cya Uganda.

Mushobora gusoma y’iyi nkuru y’ikinyamakuru Marianne mu rurimi rw’igifaransa hano>>>

Ubwanditsi

The Rwandan

Inkuru yavuzwe cyane mu binyamukuru no ku mbuga nkoranyambaga mu mpera z’iki cyumweru ijyanye n’urupfu rw’ubunyamaswa rwakorewe Bella(Imana imwakire mu bayo), umwana muto w’umuziranenge wishwe aciwe ijosi n’ukekwa ariwe Mpore Sylvere w’imyaka 31 wari umukozi wabo mu myaka isaga 14.

Aha nkaba nkomeje kwibaza aho u Rwanda rwerekeza mu gihe abantu bakomeje kwicana, ndetse bakabikorana ubugome buhambaye nkubwagaragaye mu myaka ya za ’90-’14aho abanyarwanda bagiye bicana impfu zigoye gusobanura, impfu zirenze ubunyamaswa.

Urupfu rw’uyu mwana rutumye mara iminsi mu gahinda, ntabwo nababajwe gusa n’uyu mwana ahubwo mbabajwe cyane n’uyu ukekwaho kumwica bene aka kageni, aho nibajije niba nta kibazo gikomeye afite mu mutwe, niba se atari umujinya w’umuranduranzuzi yaba yaratewe n’ababyeyi b’uyu mwana cg undi wese (nubwo ntashyigikiye icyo yakoze kabone nubwo yaba afite impamvu iyo ariyo yose) nkibaza kandi ku bugome bumaze iminsi bukorerwa abandi banyarwanda b’inzirakarengane, kuko nemera ko n’umunyabyaha ashyikirizwa urukiko, aha ndavuga ku mpfu zisa n’uru za vuba aho mwibuka abagabo bagiye bakatwa amajosi kubera ibikorwa bya politike aho Andre Kagwa Rwisereka yishwe aciwe umutwe, umusaza Semadwinga Denis agacibwa umutwe bakanamubaga nabi cyane, muribuka kandi undi nawe wanizwe ejobundi witwa Karegeya Patrick akanigwa n’abanyarwanda, doreko banabyiyemereye ku mugaragaro ndetse hakaza kugaragara igitangaza ku bantu aho nabashije guhuza ibi bikorwa bigayitse n’iki cyakorewe uyu muziranenge nkabona isano nini bifitanye.

Banyarwanda, banyarwanda kazi, Imana yaremye umuntu imuha icyubahiro n’uburenganzira bingana n’ibya mugenzi we, nta muntu waremwe arusha abandi uburenganzira, twese twaremwe mw’ishusho yayo. Ariko bimaze kugaragara ko abambari ba satatani bamaze kwigarurira igihugu kuburyo bigisha abantu ubugome ku manywa y’ihangu ndetse bakabwigishiriza mu Kiliziya, mu masengesho, imbere y’imbaga yiyita ko ikorera Imana ku manywa bise babireba, ibi byose bigakomerwa amashyi nkaho bikwiye.

Uwakoze ubwicanyi yaje gufatwa ari mu maboko ya polisi

Ntabwo ari ubwambere, sinubwakabiri cyangwa ubwanyuma abantu bicwa nabi bazira amaherere kandi bakicwa kubera ko twese turebera amabi aba ku bandi tukicecekera ngo twe ntibitureba, nyamara byakora kuri babandi tutakekaga ko bireba tugashyuha tugashyushya imitwe ngo byacitse, nkaho abandi bapfa bo atari abantu.

Ibi bintu mubona ntibisanzwe, ni uruhererekane rw’imivumo ituriho, dukururirwa n’amaraso y’inzirakarengane akomeje gutabaza asaba ubutabera. Dukwiye guhaguruka tukitandukanya n’ababi, tukamagana ubugizi bwa nabi hatabayeho gutegereza ko buhitana abana bacu, abaturanyi, inshuti, abavandimwe ba hafi natwe ubwacu, hakwiye gusobanurwa impamvu nyayo y’ubu bugome, ntabwo ari amafaranga dupfa atuma twicana, si amoko atuma.twicana si n’amasambu, kuko uyu mwana yishwe na musaza we, nubwo batavukana yishwe na musaza we, kuko babanaga, basangiraga, bari bahuriye kuribyose usibye ibibazo n’amateka mabi bamwe dufite dukomora ku burere, impanuka n’umurage mubi.

Ejo bundi niba mwibuka, Kagame yahagaze hariya atwumvisha ko twari dukwiriye kujya twica abo tutavuga rumwe nkuko yishe Karegeya wari umuvandimwe we amunigishije imigozi, bwe bakomye amashyi abandi rwose bagaragaza ko bashyigikiye ayo mahano, ariko biyibagiza ko umutegetsi mubi azanira ubwoko ayoboye, igihugu ayoboye umuvumo, kubw’ibikorwa bye bibi Imana yanga, none dore bamwe bamukomeraga amashyi nibo bari gucira urwa Pilato uyu musore muto ngo nabambwe?? Harya we buriya umugereranyije na Kagame mubona arinde wabambwa mbere? Ese kwica, guhotora, kunyuruza no gukata amajosi hari abo mubyemerera n’abo mutabyemerera?

Ibi bintu biteye gahinda, birababaje, bikwiye gutuma tureka ibindi byose turimo tukiyiriza tugasenga tukicuza ibyaha byacu twese hamwe mbere yo guca imanza zuzuye amaranga mutima.

Nsoze mbibutsa ko, ahatari ubutabera haba kwiheba, ahari kwiheba haba guhora, ahari guhora haba guhohotera inzirakarengane, kandi niba iyo nzira tuyishyigikiye dukomeze umutsi, tureke uburyarya maze sukomere Sylvere amashyi nkuko mwayakomeye Kagame, hari nubwo wasanga we afite.impamvu ikomeye kurusha Kagame ajya kuniga Karegeya, gusa bose bishe abavandimwe, babanye, basangiye akabisi n’agahiye, ba Gahini turera barimo kubyara umusaruro.

Mugabanye amarangamutima, mukoreshe ubwenge, mwimakaze UBUTABERA NO KWANGA IKIBI CYOSE.

Mugire amahoro.

Kanyarwanda

Mu kiganiro Padiri Thomas Nahimana yagiranye na Radio Impala ku bufatanye n’ikinyamakuru The Rwandan, yasobanuye ibijyanye n’ishyaka abereye umuyobozi ari ryo Ishema ry’u Rwanda, asobanura impamvu yatumye ajya muri politiki ndetse n’icyamumaze ubwoba ku buryo yumva we n’abataripfana b’ishyaka rye bazataha mu Rwanda ngo bitarenze tariki ya 28 Mutarama 2016 ubwo ngo bazaba bagiye kwitegura amatora ya Perezida wa Repubulika yo mu 2017.

Kuri Padiri Nahimana ngo abona Perezida Kagame atagomba kwiyamamaza kuko yarangije manda zemerwa n’itegeko nshinga ngo ahubwo uwo yiteguye guhangana nawe ni Jeannette Kagame bitangiye kunuganugwa ko aziyamamaza. Ngo Jeannette Kagame namutsinda biciye mu mucyo Padiri Nahimana yivugira ko azayoboka agafatanya n’abandi banyarwanda kubaka igihugu.

Icyo kiganiro ni kuri Radio Impala mushobora gukurikira Hano>>>

Ubwanditsi

The Rwandan

Bavandimwe nshuti Banyarwanda  na Banyacongo , nshuti z’Abanyarwanda n’iz’Abanyacongo ; Communauté Rwandaise ibatumiye mu muhango wo kwibuka inzirakarengane zahitanywe na génocide nyarwanda, n’ubundi bwicanyi ndengakamere bwabereye mu Rwanda ndetse no  muri Congo.

Uwo muhango uzabera

Eglise de la Madeleine,

Place de la Madeleine

Paris 8^ème

Ku itariki ya 12 Mata 2014. Misa ni saa munani z’amanywa.

Nyuma ya Misa, tuziyakirira muri salle yo kuri Eglise de la Madeleine.

Kuza kwifatanya natwe ni inkunga ikomeye, muzaze kudufasha kwibuka izo nzirakarengane.

Murakoze

Communauté Rwandaise

Contact :07 51 50 77 22, 06 12 63 70 08, 06 20 83 25 28

Transports : Metro Madeleine : lignes 8, 12, 14, sortie ‘Place de l’Eglise’

Radiyo Impala yakurikiranye imyigaragambyo yabereye i Bruxelles ku italiki 02/04/2014. Ni mwiyumvire ni kuli Radiyo yanyu, Radiyo Impala

Umuhanzi w’umunyarwanda Kizito Mihigo nyuma yo gushyirwaho igitutu ndetse hakabaho no kwifatirwa ku gahanga na bamwe  kubera indirimbo ye yise: Igisonanuro cy’urupfu. Ubu iyo ndirimbo ntabwo ikigaragara ku rubuga rwa Kizito Mihigo.

Iyi ndirimbo ikimara gusohoka yavuzwe byinshi cyane cyane ko yasabaga abanyarwanda kwibuka abanyarwanda bose bapfuye badatoranije,  Muri iyo ndirimbo harimo amagambo agira ati:“…nta rupfu rwiza rubaho yaba jenoside cyangwa intambara, uwishwe n’ abihorera, uwazize impanuka…abo bavandimwe aho bicaye baradusabira…” ”…jenoside yangize imfubyi ariko ntikanyibagize abandi bantu nabo bababaye bazize urugomo rutiswe jenoside, abo bavandimwe nabo ni abantu ndabasabira…” byumvikane ko hari abafite icyo bishinja iyo ndirimbo yakorogoshoye dore ko byari bivuzwe n’umuhanzi uzwi kandi badashobora gupfa gushinja ko abogamiye kuri politiki y’abatavuga rumwe na Leta ya FPR.

Mu butumwa Bwana Kizito Mihigo arasa nk’uhumuriza ndetse akisegura ku baba barababajwe n’iriya ndirimbo aho agira ati:

“Naho indirimbo ya Gikristu, Igisobanuro cy’urupfu, nasohoye mu kwezi gushize, ntabwo izacurangwa, bitewe nuko bamwe bangaragarije ko ishobora gukomeretsa ibikomere byabo, abandi bakagaragaza ubushake bwo kuyikoresha ku nyungu zabo mu mpaka za ngoturwane. Niba hari umuntu rero wakomerekejwe n’indirimbo yanjye IGISOBANURO CY’URUPFU, cyangwa se izindi ndirimbo nahimbye, musabye imbabazi n’umutima wanjye wose kandi, nk’uko bisanzwe, nzahora nakira inama z’abantu bose bifuza ko ibihangano byanjye byakomeza kandi bikarushaho gufasha abanyarwanda bose, ndetse n’isi yose. Icyo mba ngamije iyo ndirimba indirimbo zanjye, cyane cyane izishingiye ku kwemera, ni ugufasha abantu gukira ibikomere, kubatoza gukundana, gukunda Imana, gukunda igihugu no kwiyunga. Ariko nanjye ndi umuntu, njya nibeshya cyangwa ngakora amakosa. Niyo mpamvu nsabye imbabazi abantu bumvise ko indirimbo yanjye yaba yabakomerekeje ku buryo ubwo ari bwo bwose.

Sinarangiza ntibukije abantu bose bazasoma ubu butumwa, ko Jenoside yakorewe abatutsi atari igikoresho cyo gukinisha, cyangwa guharanira inyungu zabo. Amateka n’ubwo yaba ari mabi, tujye tuyubaha, tuyavuge uko yabaye. Jenoside yakorewe abatutsi, ari nayo yonyine yabaye mu Rwanda, niwo musaraba w’u Rwanda. Uruhare rwa buri wese rero rurakenewe kugira ngo igihugu cyacu gikomeze kigaragaze ko nyuma y’umusaraba, hariho izuka.

“Umuntu utema imizi y’igiti, aba agamije kwica imbuto zacyo. Umuntu upfobya amateka, aba agamije kwica ejo hazaza.”

Igitangaje muri ibi byose n’ukuntu umuntu wumva ko yapfushije yababaye yakumva ko undi nawe wapfushije adafite akababaro cyangwa adafite uburenganzira bwo kukagira. Rero iyo umuntu asesenguye abashyize igitutu cyane kuri Kizito Mihigo si abiciwe kuko nta nyungu baba bafite mu kubabazwa n’uko bagombye kuzirikana abandi bapfuye ahubwo abafite icyo bishinja bishe nibo bafite ikibazo kuko n’ubundi ubwicanyi bwakozwe na FPR impamvu buhakanwa nta yindi mpamvu aretse gutinya ubutabera bw’ababugizemo uruhare maze bakikinga inyuma ya Jenoside ngo badahanwa bitwaza akababaro k’abandi kandi bizwi na bose ko ntacyo bibabwiye ahubwo bagombaga kumena amagi kugira ngo barye umureti.

Mushobora kumva iriya ndirimbo igisobanuro cy’urupfu hano hasi:

Ubwanditsi

The Rwandan

Click here to view the embedded video.

Amakuru aturuka mu Rwanda aravuga ko polisi y’u Rwanda mu itangazo yashyize ahagaragara yatagaje ko yongeye guta muri yombi Dr Christophe Mpozayo, usanzwe ukora mu Nteko nshingamategeko y’umuryango w’Afrika y’Uburasirizuba (EAC).

Muri iryo tangazo polisi y’u Rwanda mu ijwi ry’umuvugizi wa Polisi, ACP Damas Gatare   iragira iti: “Twongeye guta muri yombi Dr Christophe Mpozayo kubera kugerageza kwangisha abaturage ubuyobozi abinyujije mu nyandiko igamije kubangamira ubusugire bw’igihugu.”

Polisi ivuga ko uyu mugabo watawe muri yombi kuwa Gatatu atari ubwa mbere afatwa. Mu Gushyingo umwaka ushize Dr Mpozayo ngo yatawe muri yombi azira gutunga intwaro ku buryo butemewe n’amategeko no gusebanya.

Itangazo rya Polisi y’Igihugu ritahise rigaragaza ibihuha Mpozayo yabibye, rivuga ko afungiye kuri Sitasiyo ya Polisi i Remera mu gihe iperereza rikomeje. Itangazo rinavuga ko iperereza riri kureba niba uyu mugabo ntaho ahuriye n’imitwe y’iterabwoba.

Ku ruhande rw’umuryango wa Dr Christophe Mpozayo, umuvandimwe we witwa Fidèle Mulindahabi, mu kiganiro yahaye Radio Ijwi ry’Amerika yatangaje ko Dr Mpozayo yatawe muri yombi ku mugoroba wo ku wa gatatu tariki 2 Mata 2014 afatiwe ku Kimironko.

Nk’uko uwo muvandimwe wa Dr Mpozayo yabisobanuye ngo ubusanzwe yari afungiye muri Gereza ya Gasabo, akaba yari yarekuwe uwo munsi agafatwa na Polisi agiye gufata imyenda ye aho yari yarayisize. Ngo yafashwe n’abapolisi benshi bari bayobowe na Superintendent Rurangwa, bamweretse ndetse bamusomera urupapuro rwo kumufata ariko banga kurumuha. Bamufashe bamubwira ko yakoze icyaha cyo guteza imidugararo muri rubanda bamujyana kuri Station ya polisi ya Remera.

Nyuma umuvandimwe we yashatse abavoka bo kumuburanira, polisi ibonye ba avoka baje yahise ifata Dr Mpozayo imujyana kwa komiseri mukuru wa polisi ahari abapolisi benshi bo hejuru baje kumuhata ibibazo barimo na komiseri wa polisi y’u Rwanda Emmanuel Gasana bita Rurayi.

Uku gufatwa kwa Dr Mpozayo kuje gukurikira icyemezo cy’urukiko rw’ibanze rwa Kacyiru cyo ku wa mbere tariki ya 31 Werurwe 2014 kivuga ko Dr Christophe Mpozayo agizwe umwere ku byaha byose yari akurikiranyweho, ngo ikurikiranwa ry’uyu mugabo ryaba rituruka ku isakwa ryakozwe na polisi muri mudasobwa ya Dr Mpozayo ngo bagasoma ubutumwa yandikirana n’abantu batandukanye ngo ubwo butumwa nibwo ngo ubushinjacyaha bwakuragamo ibyo burega uyu mugabo ariko ibi yari yabitsindiye mu rukiko.

Benshi mu bumvise aya makuru bumiwe bibaza ukuntu umuntu ashobora gutabwa muri yombi kandi aribwo agisohoka muri gereza urukiko rumaze kumugira umwere. Ikindi gitangaje kinerekana ko iki kibazo gishobora kuba gihishe ibindi bitashyizwe ahagaragara ni ihurura ry’abapolisi bo mu rwego rwo hejuru barimo na komiseri mukuru Gasana Rurayi ubwe!

Ubwanditsi

The Rwandan

CPC irashimira by’agahebuzo Abanyarwanda batuye mu Bubiligi n’abo mu bihugu by’abaturanyi (Ubudage, Ubufaransa, Ubuholandi ndetse na Luxembourg), kuba baraje ari benshi i Buruseli tariki ya 2 Mata 2014, bazinduwe no kwamagana nta bwoba, ubwicanyi, kuniga demokrasi n’ibindi bikorwa ruvumwa bijyanye n’imiyoborere ya « kinyeshyamba » bya Perezida Kagame wari waje mu nama aho i Buruseli.

Ni ngombwa gukurira ingofero abantu bose bagize uruhare mw’itegurwa ry’iyo myigaragambyo, hamwe n’abayitabiriye, ari abakozi bigomwe imirimo bashinzwe, bagasaba impushya, ari urubyiruko rwasibye amashuri, ndetse n’abasaza n’abakecuru basindagiye bakaza kwamagana Perezida Kagame.

Birakwiye kandi kongera gukangurira amahanga ikibazo cy’u Rwanda, nayo akaboneraho kwamagana ingoma ya FPR-Kagame kubera impamvu zikurikira :

• Imiyoborere ishingiye ku moko, nk’uko igaragazwa n’imvugo «génocide tutsi» yasimbuye “génocide rwandais”,
• Ipyinagazwa ry’Abanyarwanda b’Abahutu, Prezida Kagame yita «abajenosideri» avuga ko akorana nabo,
• Ubugome n’ubwicanyi Prezida Kagame yagize intego yo kurimbura ababangamiye imigambi ye mibisha cyangwa abatavuga rumwe n’ubutegetsi bwe, haba mu gihugu, haba no hanze yacyo. Aha twakwibutsa bimwe mu byaha simusiga bihama Prezida Kagame :

1. Iyicwa rya Perezida Habyarimana w’u Rwanda na Perezida Ntaryamira w’u Burundi,
2. Iyicwa ry’Abepisikopi 4, n’abapadiri batagira ingano biciwe mu Rwanda hose,
3. Iyicwa ry’abavanywe mu byabo n’intambara barenga 8’000 baguye i Kibeho,
4. Itsembatsemba ry’ibihumbi amagana by’impunzi z’Abahutu ziciwe mu mashyamba ya Kongo, n’amamiliyoni y’Abanyekongo bazize intambara z’urudaca Kagame ateza mu gihugu cyabo,
5. Kwicira hanze y’igihugu abatemera politike ye nka Ministre Seth Sendashonga warasiwe i Nairobi, na Colonel Karegeya wanigiwe mw’ihoteli muri Afurika yepfo,
6. Guhiga «bukware» abamushinja ibyaha aregwa, guteranya Abanyarwanda n’Abatanzaniya avuga ko azica umukuru w’igihugu cyabo, n’ibindi bikorwa by’ubugizi bwa nabi ndengakamere bitarondoreka.

• Gufunga abanyapolitike nka INGABIRE Victoire, MUSHAYIDI Déo, NIYITEGEKA Théoneste, NTAGANDA Bernard, n’abandi, bose bazira ko banenze politike ye n’imiyoborere ye mibi ishingiye ku gasuzuguro n’akarengane k’Abenegihugu.

Imyigaragambyo y’i Buruseli yo kwamagana Perezida Kagame yerekanye ibintu bibiri by’ingenzi :

1. Abanyarwanda bari kugenda bashiruka ubwoba, ntibagikangwa n’iterabwoba rya Leta ya FPR-Kagame itarahwemye kubakangisha gufungwa no gutukwa bitwa abicanyi, abajenosideri n’Interahamwe, kubera ko ari Abahutu, cyangwa bitwa abajura n’abagambanyi iyo ari Abatutsi. Bamaze kubona ko umwicanyi atari we ucira abandi urubanza, no gusobanukirwa ko abadafite aho bahuriye n’amahano yo muri 1994 bose ari abere, cyane cyane nk’abana bari bafite munsi y’imyaka 10, ubu bakaba ari abagabo n’abagore b’imyaka hafi 30.
2. Ikindi nuko muri ibi bihe, abanyarwanda benshi bamaze kwicengezamo ko byihutirwa kugera ku ntego yo gushyira hamwe imbaraga zose ziharanira impinduka mu Rwanda. Hari umuririmbyikazi wateye indirimbo agira ati : « Ese none twaza mwajyahe ?

Nanjye ngire nti : «Ese none twashyira hamwe Kagame yajya he ? ». Kandi nyamara ngo agatinze kazaza ni amenyo ya ruguru. Nyiramatwi yumve kandi ambere umugabo !

Muragahora mushimwa. Ubumwe butera imbaraga, imbaraga zigatera intsinzi.

Bikorewe i Buruseli, tariki ya 3 Mata 2014.

Mwi’izina ry’Impuzamashyaka CPC
Perezida Twagiramungu Faustin

Umuhanzi w’umuhanga Kizito Mihigo amaze iminsi ashyizwe mu majwi no mu ngorane yisobanura hato na hato ku ndirimbo ye yise

“Igisobanuro cy’Urupfu”
Nyuma yo kwisobanura mu kinyamakuru igihe, akomeje kwisobanura hirya no hino azizwa ubuvanganzo bwe.

Kizito Mihigo natangiye kumukurikira mu mwaka wa 2004, muri 2005 ntangira kujya njya mu misa yateguriraga abanyarwanda mu ntangiriro za buri mwaka ku ya mbere Mutarama, mu rwego rwo gushimira Imana umwaka urangiye no kuyiragiza mu mwaka utangiye.

Maze kubona ubuhanga n’ubushishozi buvanze no gukunda Imana n’igihugu cye u Rwanda, niyemeje kujya iteka njya muri icyo gitambo cya missa Kizito Mihigo yaduteguriraga akanakizihiza.

Ibyo bitambo bya misa ibyinshi byaberaga muri kiriziya y’ amaraso matagatifu ya Kristu
(Eglise du Précieux Sang) iri muri komine ya Uccle mu Mujyi wa Bruxelles.

Kizito muri ibyo bitambo bya misa yahuzaga abanyarwanda, abahutu n’abatutsi bose bazinduwe no gushima no gusaba Imana.

Icyakunze kugaragara cyane muri ibyo bitaramo, ni uko abahezanguni bo mu moko yose batamwibonagamo hakaba n’abihandagazaga bakemeza ko batajya mu misa ye kuko hajyayo abahutu benshi!

Byakomeje bityo kugeza ubwo Kizito Mihigo aririmbye mu cyunamo i Bruxelles ku ya 07 Mata 2007 mu ndirimbo ye yise”Ndibutse” noneho benshi batangira kumwibonamo no kumukunda cyane cyane na benshi mubatarajyaga mu misa ze batangira kumukunda no gukunda ibihangano bye kugeza atashye mu Rwanda mu mwaka wa 2010.

Muri iyi myaka yose Kizito nk’umuhanzi cyane cyane w’indirimbo zisingiza Imana yakomeje kugaragaza urukundo n’ubworoherane ku banyarwanda bose kandi biganisha k’ubwunvikane, k’ubwiyunge no k’ubumwe.
Bigaragarira cyane mu ndirimbo ze ”Iteme” “Inuma” “Arc en ciel”

Kizito Mihigo mu buhanga bwe, yaje no gushaka kuvugurura ibihangano bye, abyerekeza k’ubuzima busanzwe bwa buri munsi ariko atibagiwe n’Imana rurema. Nibwo yahimbye indilimbo nka ”Turi abana b’uRwanda” , ”Intare yampaye agaciro”.

Kizito Mihigo kandi mu guhimba indilimbo kuri genocide yakorewe abatutsi ntiyagarukiye kuri “Ndibutse” ahubwo kuva aho agereye mu rwanda, yerekanye ubuhanga mu ndilimbo ze nka: ”Twanze gutoberwa amateka”, “Umujinya mwiza”, “Ibyishimo bibi”

None muri uyu mwaka yatugejejeho iyo yise “Igisobanuro cy’urupfu”

Izi ndilimbo za Kizito Mihigo, nsesenguye uko abanyarwanda bazibona; nazigabanyamo ibice bitatu.

1.indirimbo Abatutsi bibonamo.

Hari indirimbo abatutsi bibonamo kurusha izindi ahanini kuko ziririmba akababaro bagize muri genocide, izindi zigaha ibisingizo FPR.

Urugero: ”Twanze gutobetwa Amateka” ”Ndibutse” ”Turi abana b’uRwanda” ”Intare yampaye agaciro”

Ariko kandi iyo uzisesenguye neza nta kubogama, nta kibazo zagombye gutera.

2.Indirimbo Abahutu bibonamo

Usanga ahanini indirimbo za Kizito abahutu bibonamo kurusha izindi ari izivuga ubwiyunge n’ubumwe, kubabarira no kubabarirwa cyangwa se zerekana ko nabo bapfuye bishwe kandi nabo bagomba kwibukwa no gusabirwa ku Imana.

Urugero: ”Inuma” ”Igisobanuro cy’urupfu”
Usesenguye izo ndirimbo usanga Kizito avuga ukuri nta mugambi wo gushimisha cyangwa kubabaza kanaka.

3.indirimbo mberabyombi

Urugero natanga ni nk’indirimbo ”Iteme” na Arc en ciel” abanyarwanda bose bibonamo kubera ziririmba ibyo abanyarwanda muri rusange bahuye nabyo kandi zikaba ziduhuza n’Imana.

Kizito Mihigo ni umuhanzi wo mu rwego rwo hejuru umaze kugaragaza ubuhanga n’ubwigenge(indépendance) mu bihimbano bye, atitaye ku maranga-mutima y’ubwoko ubwo aribwo bwose, ahubwo agamije kuvugisha ukuri no kutwereka inzira iganisha ku Imana.

Twari dukwiye kumuha urubuga ntitumuburabuze mu buhanzi bwe, tukamureka agakomeza agahanga kuko nitwunva ibyo atwigisha nta maranga-mutima tubishyizemo, nta kabuza bizadufasha kugera ku bwiyunge no kubabarirana bya nyabyo kandi biherekejwe n’imigisha y’Imana.

Ku bwanjye Kizito ndamushimira mbikuye ku mutima k’ubuhanga n’inyigisho nsanga mu ndirimbo ze,
Ku bukirisitu n’ubushishozi ku cyerekezo cy’ubuzima.

Nkaboneraho gusaba abamwunva n’abamukunda bose kumushyigikira mu mpano Imana yamwihereye twitandukanya no kumuvugira ibyo atashatse kuvuga cyangwa kumuhata kuvuga ibyo twe dushaka kwunva.

Umuhutu niyumva ”Twanze gutoberwa amateka”

Click here to view the embedded video.

ntibikamutere ikibazo kuko nyine ni amateka yacu, yaba mabi yaba meza.

Umututsi niyunva ”Igisobanuro cy’urupfu”

ntakabigireho ikibazo kuko nta cyaha gihanagura ikindi n’ukuri ntikukice umutumirano.

Afite impano Imana yamwihereye kandi izagirira akamaro abanyarwanda muri rusange nitumwemerera akabisohoza uko abyiyunvamo.

Kizito Imana igukomeze kandi ikurinde, Inakwongerere ubuhanga n’ubushishozi mubyo ukora byose.

Gallican Gasana

Urubanza uwitwa Ndemezo Appolinaire utuye mu murenge wa Shangasha mu karere ka Gicumbi yatsinzemo uwitwa Rubayiza John wahoze ari umupolisi wa komini ya Rushaki mu mwaka w’1997 nyuma yo kumurasa akamuca akaguru, ruri mu nzira zo kurangizwa nyuma yo kumara igihe kinini rumeze nk’urwahagaze.

Ndemezo avuga ko yarashwe na Rubayiza wahoze ari umupolisi wa komini warindaga umuyobozi w’icyahoze ari akarere ka Rushaki akamuca ukuguru urukiko rugategeka ko agomba kwishyurwa amafaranga agera kuri miliyoni n’ibihumbi 500 nk’uko bigaragazwa n’umwanzuro w’urubanza wo ku wa 26 Werurwe 2007, ariko kuva icyo gihe kugeza ubu ngo ntarahabwa ayo mafaranga.

Ndemezo akomeza avuga ko yakomeje kubaza ikibazo cye inzego zitandukanye ariko ntakibonere igisubizo. Zimwe mu nzira yakoresheje amaze kuyoberwa ngo ni ukugera aho umukuru w’igihugu agiye gusura kugira ngo akimubwire.

Gusa ngo ubu buryo na bwo ntibwamushobokeye, kuko ngo mu mpera z’umwaka w’2012 ubwo Perezida Paul Kagame yasuraga Akarere ka Gicumbi yagiye nk’uri butange ikibazo ariko ageze ahari hateganyirijwe kubariza ibibazo abayobozi bari aho babaza abashaka kubaza ibibazo bafite kugira babinononsore, maze we n’abandi bagera kuri batanu bakingiranwa mu ishuri ryari hafi aho babakingurira perezida amaze gutaha.

Mvuyekure Alexandre, Umuyobozi w’Akarere ka Gicumbi, mu kiganiro yagiranye na IGIHE yavuze ko ikibazo cya Ndemezo akizi ariko gufungwa kwe atigeze abimenya.

Mvuyekure avuga ko Ndemezo yumva yakwishyurwa n’akarere kandi nta ruhare kagize mu bibazo yagize, kuko uwabikoze ari umuntu ku giti cye. Aha rero ngo ntibishoboka ahubwo akarere katangiye gahunda yo kumenya uwamurashe aho aherereye n’imitungo afite, hagamijwe kureba uburyo yakwishyurwa nubwo kugeza ubu nta makuru y’aho aherereye bafite.

Ubwo yabazwaga iki kibazo, Minisitiri w’Intebe Dr Habumuremyi Pierre Damien yavuze ko guverinoma ayoboye igiye kugikurikirana kikazakemuka bidatinze.

Source:Igihe.com

Amakuru agera ku rubuga The Rwandan ava mu turere dutandukanye tw’u Rwanda aravuga ko abantu barangije amashuri cyangwa uwo ariwe wese wifuza akazi abanza kwemera kurahira muri FPR kugira ngo agahabwe.

Twashoboye kubona ubuhamya bw’umwe mubo byabayeho witwa Jean Baptiste Icyitonderwa akaba ari umurwanashyaka w’ishyaka PS Imberakuri, yadusobanuriye muri make uburyo leta yirirwa ibeshya abantu cyane cyane abanyamahanga ivuga ko igendera ku mategeko, bikarangirira mu mvugo gusa ntibishyirwe mu bikorwa.

Ngo inzego ziriho ni iz’umurimbo, izo uwo murwanashyaka yamenyesheje ikibazo cye zose ntacyo zabikozeho, ibyo bikagaragara ko leta ari iya bamwe atari iy’ubumwe nk’uko bivugwa.

Ikindi n’uko FPR irimo gukora mobilization ishaka gusenya ishyaka PS Imberakuri isaba abayoboke ba PS Imberakuri kurahira muri FPR bakabona kubaha akazi. Naho ubundi ngo ntako bazabona.

Ngo ikibabaje cyane n’uko byateye ubwumvikane buke mu miryango aho FPR isa n’aho abo bantu badashaka kujya muri FPR yabateje imiryango yabo ngo ibange naho ubundi ngo bari bamenyereye kwihangana ngo ntacyo byari bibatwaye cyane.

Ubu kubera kubura akazi umuntu w’ingaragu aracyacumbitse ku babyeyi, barimo bamwirukana mu rugo, udafite akazi kandi nta kindi yari bwakore kijyanye n’imibereho ye bwite, benshi ngo batangiye ibikorwa cyabo bya politiki biga muri kaminuza none ubu babahimishije kubima akazi.

ESE ITEGEKO NSHINGA RYA REPUBULIKA Y’U RWANDA RIVUGA IKI KURI IKI KIBAZO ?

Ingingo ya 9 : IBYEREKEYE AMAHAME REMEZO

Leta y’u Rwanda yiyemeje kugendera ku mahame remezo akurikira no gutuma yubahirizwa :

1. Kurwanya ingengabitekerezo ya jenoside n’ibyo igaragariramo byose ;

2. Kurandurana n’imizi amacakubiri ashingiye ku bwoko, akarere n’ibindi no gushyira imbere ubumwe bw’abanyarwanda;

3. Gusaranganya ubutegetsi nta bwikanyize ;

4. Kubaka Leta igendera ku mategeko n’ubutegetsi bwa demokarasi ishingiye ku bitekerezo bya politiki binyuranye, uburinganire bw’abanyarwanda bose n’ubw’abagore n’abagabo, ibyo bigashimangirwa n’uko abagore bagira nibura mirongo itatu ku ijana by’imyanya mu nzego zifatirwamo ibyemezo;

5. Kubaka Leta iharanira imibereho myiza y’abaturage no gushyiraho uburyo bukwiye kugirango bagire amahirwe angana mu mibereho yabo ;

6. Gushaka buri gihe umuti w’ibibazo mu nzira y’ibiganiro n’ubwumvikane busesuye.

IBYEREKEYE IMITWE YA POLITIKI

Ingingo ya 52:Imitwe ya politiki myinshi iremewe.

Imitwe ya politiki yujuje ibyangombwa bisabwa n’amategeko, yemerewe gushingwa no gukora mu bwisanzure; igomba kubahiriza itegeko nshinga n’andi mategeko ndetse n’amahame ya demokarasi, kandi ntihungabanye ubumwe bw’abanyarwanda, ubusugire n’umutekano by’igihugu.

Imitwe ya polItiki igira uruhare mu kwigisha abenegihugu gukora politiki igendera kuri demokarasi, gutora no gutorwa, ikanakora ku buryo abagore n’abagabo bagira amahirwe angana mu myanya n’imirimo itorerwa ya leta.

Inzego z’ubuyobozi bw’imitwe ya politiki zigira icyicaro ku rwego rw’igihugu. Itegeko rigenga imitwe ya politiki rigena icyicaro cy’ubuyobozi bwazo kuzindi nzego z’imitegekere y’igihugu.

Ingingo ya 53:

Abanyarwanda bafite uburenganzira bwo kujya mu mitwe ya politiki bihitiyemo cyangwa ubwo kutayijyamo.
Nta munyarwanda ushobora gukorerwa ivangura ku mpamvu z’uko ari mu mutwe uyu n’uyu cyangwa ko nta mutwe wa politiki arimo.

Ingingo ya 59: IMIRIMO ITABANGIKANYWA NO KUJYA MU MITWE YA POLITIKI

Abacamanza, abashinjacyaha, abasirikare, abapolisi n’abakozi bo mu rwego rushinzwe iperereza n’umutekano ntibemerewe kujya mu mitwe ya politiki.

Ingingo ya 126: IBYEREKEYE UBUYOBOZI BW’IBIKORWA BYA LETA

Abakozi ba Leta bahabwa akazi , bashyirwa mu myanya, bazamurwa mu ntera hakurikijwe ihame ry’uko abenegihugu bose bangana, nta kugendera ku marangamutima, nta kubogama kandi binyuze mu mucyo hashingiwe ku bushobozi n’ubudakemwa bw’abasaba akazi b’inyangamugayo b’ibitsina byombi.

Leta yishingira ukutabogama kw’abayobozi b’ibikorwa bya leta, ukw’ingabo z’u Rwanda, ukw’abapolisi b’u Rwanda n’ukw’urwego rw’igihugu rushinzwe iperereza n’umutekano. Bose bagomba buri gihe kutagira aho babogamira no gukorera abaturage nta vangura.

Inyandiko Bwana Jean Baptiste Icyitonderwa yandikiye ubuyobozi asaba kurenganurwa:

gusaba kurenganurwa

gusaba kurenganurwa 2

REVOLUSIYO NYARWANDA NDAYIKOZAHO IMITWE Y’INTOKI; IBIFARU, N’AMAFARANGA MENSHI AGATSIKO KIGWIJEHO BIZABA IMFABUSA IMBERE Y’ABANEGIHUGU BARANGAJWE IMBERE NA ‘NOUVELLE GENERATION’ Y’ABANYAPOLITIKE. IBARUWA YA KABIRI KU BANYARWANDA BOSE.

Banyarwandakazi, Banyarwanda aho muri hose haba mu gihugu no hanze yacyo, mwese ndabasuhuje mugire Urukundo n’Amahoro!

Mu Ibaruwa yanjye ya mbere nabandikiye umwaka ushize mu mu ntangiriro z’ukwezi k’Ukwakira nabagejejeho ibibazo by’ingutu igihugu cyatubyaye aricyo u Rwanda kimaze imyaka kivurugutamo. Nabagejejeho kandi n’impamvu zingenzi zikomeye zituma ubutegetsi buriho bugomba guhinduka byihuse (reba http://www.leprophete.fr/2012/10/13/amakosa-n-ibyaha-by-agatsiko-ntibigomba-kugerekwa-ku-banyarwanda-twese-jmv-minani/#permalink cyangwa ujye kuri
http://www.therwandan.com/ki/ntabwo-amakosa-yagatsiko-gato-yakagombye-kwitirirwa-u-rwanda-rwose-j-m-v-minani/ )
Muri iyo baruwa ya mbere nabagejejeho ndetse ibibazo byinshi mbasaba ko twatekerezaho tukishakamo umuti nk’Abanyarwanda. Muri ibyo bibazo nakwibutsa nk’ibi bikurikira:
• Ni ryari Abahutu bazashyirwa mu nzego zo hejuru z’umutekano n’igisirikare kitwa iki gihugu?
• Ni ryari Abahutu bishwe na FPR-Inkotanyi bazibukwa nk’uko Abatutsi bazize amahano ya jenoside bibukwa?
• Ni ryari abababuze ababo n’abacitse kw’icumu (victims and survivors) bo mu bwoko bw’Abahutu bazabona ubutabera ku mahano yabereye hirya no hino mu Rwanda no muri Kongo (DRC)?
• Ni ryari Abanyapolitiki bo muri ‘opposition’ bafunze bazafungurwa bagakora politiki uko babyifuza?
• Ni ryari ubutegetsi buriho buzarekeraho guhohotera Abenegihugu babasenyera amazu, babahatira guhinga ibyo badashaka?
• Ni ryari Leta ya Gen. P. Kagame izareka gukurikirana mu mahanga impunzi n’abanyapolitike batavuga rumwe nayo ishaka kubica mu buryo ubwaribwo bwose?
• Liste ni ndende kandi ibibazo ntibigarukira ku Benegihugu bo mu bwoko bw’Abahutu gusa kuko na bamwe mu Benegihugu b’Abatutsi batorohewe na gato ariko nk’uko nabyerekanye iyo bigeze ku Bahutu ndetse n’Abatwa biba agahomamunwa.

Niyo mpamvu NATEJE UBWEGA, nkatanga IMPURUZA ku Banyarwanda n’Abanyarwandakazi aho muva mukagera ngo dukosore ibintu amazi atararenga inkombe. Ndabashimira ibitekerezo mwangejejeho nyuma y’ibaruwa ya mbere.

Banyarwandakazi, Banyarwanda nkunda,

Nabasezeranyije kuzabagezaho ibaruwa yindi ikubiyemo uburyo twakwikura mu kibazo. Mbere yo kubagezaho zimwe mu nzira zakoreshwa ariko reka mbanze mbabwire iyi nkuru nziza. Nyuma y’uko mbandikiye ibaruwa ya mbere njye nabo dufatanyije twashinze Ishyaka/Umutwe wa Politiki witwa ISANGANO-ARRDC ABENEGIHUGU (Isangano ry’Abanyarwanda bagamije impinduka za Revolusiyo na Demokarasi/ Alliance of Rwandans for Revolution and Democratic Change/ Alliance des Rwandais pour la Revolution et le Changement Démocratique). Gusa muri iyi baruwa icyanzinduye ntabwo ari Icengezamatwara ry’Ishyaka kuko bizagira undi umwanya wabyo. Icyo nshyize imbere ni ukwerekana inzira ntekereza njye nk’Umwenegihugu zadufasha twese ngo twikure mu bibazo.

INZIRA YA MBERE (isumba zose): URWANDA RUKENEYE REVOLISIYO YIMBITSE (real revolution/deep transformation).

Icyo nita ‘Revolusiyo Nyarwanda yimbitse’ ni impinduramatwara n’impinduramitekerereze mu buzima hafi ya bwose bw’igihugu. Iyi ‘Revolusiyo Nyarwanda yimbitse’ ibumbiye hamwe ‘strategies’ nyinshi zirimo za ‘manifestations pacifiques’, Itangazamakuru, ‘mobilization’, mukuzamura ‘mentalités’ (imyumvire y’Abenegihugu) n’ibindi ntarondora hano. Ubwo rero ni bumwe mu buryo (tools/strategies) buzifashishwa mu kotsa igitutu ubutegetsi bw’Agatsiko.

Reka muri make ntange ibisobanuro bya ‘Revolusiyo Nyarwanda yimbitse’. Iyi Revolusiyo izaba ibaye iya kabiri mu mateka y’u Rwanda izakorwa mu mahoro. Iyi Revolusiyo isumba kure za ‘manifestations’ cyangwa za Revolusiyo z’akanya gato nk’izo twabonye mu Barabu kuko zitageze ku ndunduro nubu bakaba bakivuruguta mu bibazo. Iyi Revolusiyo kandi isumbye Revolusiyo ya mbere ababyeyi bacu, bakuru bacu naba sogokuru bakoze mu mwaka w’1959. Iyi Revolusiyo izakenera kubakira ku byiza by’iyo yayibanjirije ariko hagakosorwa n’ibitaragenze neza ndetse ABANYARWANDA hafi ya twese iyi Revolusiyo mvuga tugomba kuyigiramo uruhare. Nta wuzitwaza rero ko atayimenye!

Iyi ‘Revolusiyo Nyarwanda yimbitse’ nyigereranya nuko u Rwanda rukeneye kwiyuburura rugata uruhu rw’ikinyoma, amacakubiri, ubwicanyi, ubukene n’ibindi byaruranze igihe kinini. IYI REVOLUTION YIMBITSE NI INZIRA-NGARI IBUMBYE IZINDI NZIRA ZIGAMBIRIYE KUGERA KURI DEMOKARASI NYAYO AHO ABENEGIHUGU BITORERA ABAYOBOZI BISHAKIYE KUGIRANGO BABAFASHE KUGERA KU MAHORO N’UMUTEKANO NYABYO NO GUKEMURA IBIBAZO BY’UBUKENE, UBUTABERA N’IBINDI.

Muti ese iyi revolusiyo yamara nk’igihe kingana iki?

Iyo ndebye imbere, niyumvira ko iyi ‘Revolution’ Nyarwanda yimbitse yose yose yamara hagati y’imyaka ibiri n’itanu Gusa ibikorwa byo gukuraho ubutegetsi bw’Agatiko byo bigomba kuza mbere kandi ntibimare igihe kinini. Niyo mpamvu igikorwa cyo gukuraho Agatsiko ka P. Kagame cyo kizamara hagati y’iminsi 10 na 30. Nyuma ibitekerezo bya Revolusiyo bizagerwaho n’abenegihugu bikazakomeza ndetse bihuzwa n’ibihe bigezweho mu myaka myinshi iri imbere.

Muti ese iyi Revolusiyo izakenera ingufu za gisirikare?

Igisubizo ni yego. Kw’isi hose uwo muzaganira nawe uwo ariwe wese yaba umuntu usanzwe, umunyapolitike, umudiplomate, umucuruzi n’undi uwo ariwe wese azakubwira ko imbaraga za gisirikare zo kwirengera ari ngombwa na cyane cyane mu bihugu nko muri Afurika.

Kubera ko mu gihe Abenegihugu bazaba bahagurutse basaba ubutegetsi bw’Agatsiko kuvaho, birashoboka ko Agatsiko kazakora ku bifaru, za muzinga na kajugujugu kagatangira kubarasa. Aha rero niho hakenerwa Ingufu za gisirikare zo kurengera Abenegihugu kuko Abenegihugu nta ntwaro bagira. Ndagirango nsubirizeho n’abibaza icyo ntekereza ku Gisirikare cy’abatavuga rumwe n’ubutegetsi. Iki gisirikare ni ngombwa rwose. Ariko, byumvikane neza: iki gisirikare ni icyo kurinda Abenegihugu n’Abanyapolitike igihe ubutegetsi bw’Agatsiko buzaba burashe Abenegihugu barangajwe imbere n’Abanyapolitike bashaka impinduka. Iki gisirikare kigomba guhita gikoma mu nkokora imbaraga z’Agatsiko gashaka gukomeza guhotora Abanyarwanda. Abatinya kuvuga iri jambo ry’Igisirikare nibatinyuke kuko twe abarenganywa mu gihugu cyagombye kuba icya twese ntawe tugomba gusaba uruhushya bwo kurengera uburenganzira bwacu bw’ibanze n’ubwo gutabara abacu. Ntawe kandi tugomba gupfukamira yaba Abanyamerika, Abanyaburayi cyangwa Loni cyangwa igihugu icyo aricyo cyose muri Afurika kuko impamvu zo kwirengera no kwigobotora ingoma y’ikinyoma ya FPR zirumvikana kandi ni nyinshi. Ariko rero bisaba ubwitonzi n’ubushishozi bihagije kuko Igisirikare kijyana na ‘evolution de mentalités’ mu benegihugu na ‘idéologie’ nziza. Kandi umusirikare udafite ‘idéologie’ nzima ntamenya aho arasa yerekeza, haba igihe arasa abo ashinzwe kurinda (abanyarwanda bose muri rusange), cyangwa akaba yarasa abo bafatanyije urugamba ndetse ashobora no kurasa abashefu be. Uwo murongo rero wa ‘idéologie’ nziza niwo ubanziriza byose kandi utangwa n’Abanyapolitike beza birumvikana bakunda Abenegihugu kandi bafite impano zo kuyobora imbaga. Niyo mpamvu iyo politike idakozwe neza nubwo waba ufite igisirikare cy’inzobere byose birangirira mu mivu y’amaraso nk’uko FPR-Inkotanyi yafashe igihugu isimbuka imirambo kandi twe ibyo nibyo dushaka gukosora. Niyo mpamvu iki gisirikare ataricyo cyagombye gufata iyambere mu gushora intambara kuri Kagame kuko mushishoje neza mwasanga ari ukumuha impamvu zo gukomeza kugundira ubutegetsi no kwica abanyarwanda yitwaje intambara.

Ndagirango mare impungenge abibaza ko iyi ‘Revolusiyo Nyarwanda yimbitse’ itashoboka. Ndazibamara nshingiye ku busesenguzi bw’ingufu ishyaka rya FPR ryaba rifite mu Benegihugu. Kugirango menye izo ngufu byabaye ngombwa ko ninjira muri FPR mu myaka ya 2002-2003 nkiri muri Kaminuza. Muzi ikintu bita gutekinika? Kenshi Mayor Kirabo w’umujyi wa Kigali (aho nari ntuye) yasabaga Imirenge gutanga raporo zigaragaza abanyamuryango ba FPR abinjiye vuba barahijwe, abasanzwemo n’abakera. Ndibuka umunsi umwe natanze imibare nyayo yabo nari mfite ku maliste yanjye, ariko icyo gihe amaterefoni yaracicikanye, igikuba kiracika ngo abanyamuryango ni bake. Ndababaza nti se wakwandika za baringa. Nti none se mbigenze nte? Baransubiza ngo nintekinike mfate liste z’abaturage bose batuye mu Kagari tubandike ngo naho ubundi Mayor ntitwamukira. Nuko Mayor yohererezwa amaliste atekinitse maze nawe atekinika abo hejuru mu Cyama iyo kwa Kagame. Bicinya icyara ngo bafite abanyamuryango! Mutekereze ko nko mu Murenge wose ugizwe n’imidugudu irenga nka 12, utuwe n’abaturage hejuru y’imyaka 18 tuvuge babarirwa hagati ya 20 000 na 25 000, iyo twabaruraga by’ukuri nta n’abanyamuryango 1500 twabonaga. Ucishirije mu ijanisha AbaFPR b’ukuri mu Rwanda bari hagati ya 5-7%. Imbaraga FPR ifite zishingiye ku gitugu, ku mafaranga menshi inyunyuza mu Benegihugu, mu bucuruzi bwose yihariye, mu mabuye yiba muri DR-Congo no mu bitwaro bya gisirikare Kagame yirunzeho. Naho mu Benegihugu nta ngufu ihafite. Ubibona ukundi azaze tubijyeho impaka. Muri bariya 5-7% nabo hari bamwe bari mu FPR kubera ubwoba cyangwa babona nta yandi mahitamo. Mpereye kuri ibi rero mbona ko Abanyarwanda nibagenda bashira ubwoba ibitekerezo by’Impinduka bibageraho, habaho ‘evolution des mentalités’. ibyo rero bizoroha kugera ku ntego za Revolusiyo isa naho ibimenyetso byayo bimwe byatangiye. Nubwo guhindura nabariya 5-7% byadutwara imbaraga nyinshi ariko nabyo birakenewe kuko nta munyarwanda utarebwa n’izi mpinduka ariko ntibizadukereze niba akabaye icwende katoga.

Munyihanganire nkoreshe uyu mwanya mbonye nsabe imbabazi abantu nashishikarije kwinjiza muri FPR bakayiyoboka kugeza na nuyu munsi. Ndabasaba imbabazi kandi mbikuye ku mutima. Abo ninjijemo bambabarire kuko kwinjira no kwinjiza mu muryango wahemukiye abanyarwanda n’abaturanyi ubwabyo si byiza. Iminsi nabikozemo ntayandi mahitamo yari ahari kuko bamwe byabagabanyirije itotezwa, abandi babona akazi hirya no hino mu Mirenge no mu Turere bituma bucya kabiri kuri bo n’imiryango yabo. Nubwo bamwe babonye ako kazi ariko ntibikwiye kubibagiza ko igihe cyo kwigobotora Agatsiko kadutsikamiye igihe kirekire ari iki ngiki.

Ese hakenewe iki ngo Revolusiyo itangire bya nyabyo?

Kugirango REVOLUSIYO itangirane ingufu hari ibintu bike by’igenzi bikenewe: 1)IMPIRIMBANYI NYAZO (LEADERS) ZITAGAMBANIRANA. 2)Hakenewe kandi n’Abanyagihugu benshi biyemeza gushyigikira abaLeaders babo bakemera guhindura imitekerereze (iyo ni revolusiyo mu mitekerereze, kandi iyi yo yaranatangiye). Dushyize imbaraga hamwe twakomera (Ensemble nous sommes forts/Together we are strong). 3) Hakenewe ko Abatavuga rumwe na Leta iriho mu Rwanda bashyiraho Ikipe Nkuru y’Igihugu cyangwa IHURIRO icyo nakwita ‘Front Commun des Partis d’Opposition’. Aha naho haracyarimo imbogamizi ndetse abanyapolitiki bagomba gushakira umuti byihuse. Muri izo mbogamizi navuga:
• inyota y’imyanya ikomeye muri Leta n’ibyuhariro by’ikirenga kuri bamwe mu banyapolitiki,
• amacakubiri ashingiye ku moko n’uturere,
• gucibwamo ibice no kugambanirana,
• ubwoba n’ihahamuka n’ibindi.

Izi mbogamizi zigomba kubonerwa umuti byihuse. Uwo muti nta wundi usibye guhura ku banyapolitiki bagize opposition ndetse tutibagiwe n’abagize sosiyete sivile, bakicarana, bakavuga ukuri, hakabaho gusabana imbabazi hagamijwe gushyira imbere inyungu rusange z’Abenegihugu bo mu gihugu no hanze yacyo batsikamiwe n’Agatsiko. Ikindi gikenewe ni ugushira amanga bakamenya ko bari ku rugamba kandi ko aho rukomeye ariho bakenewe. Ibi bishatse kuvuga ko ku bijyanye n’abantu bo FPR yohereza bo gusenya ibikorwa by’ubumwe bwa Opposition, abanyapolitiki bagomba gutahura abashaka kubacamo ibice bakabashyira ku mugaragaro nta guhubuka no kubeshyera abadafite aho bahuriye na FPR. Uru narwo ni urugamba kandi Abanyapolitiki ba Opposition ntibagomba kurutinya.

Muti byangenda bite nyuma yuko ‘opposition’ imaze gushyiraho ‘structures’ zihamye ihuriyeho?

Igikorwa cya mbere : Kuvana ku butegetsi Agatsiko ka Kagame.

Kimwe mu ngaruka nziza revolusiyo niramuka izatugezaho ikimara gutangira ni uguhirika ingoma y’Agatsiko ka P. Kagame. Inzira z’amahoro byanyuramo ni eshatu: Kwegura ku bushake, Kweguzwa na ‘Parlement’, cyangwa kweguzwa ku ngufu z’Abenegihugu. Kagame adukundiye, kandi nawe akunda umuryango we n’Abanyarwanda yari akwiye kwegura ku bushake no mu mahoro cyangwa akweguzwa bwangu n’Abenegihugu.Biti ihi se yanze kwegura k’ubushake bwe, Abenegihugu nibahaguruke bashire ubwoba basabe Kagame n’agatsiko gusubiza ubutegetsi mu maboko y’ABANEGIHUGU mu mahoro. Abenegihugu nibabishyiramo agatege iminsi hagati ya 10 na 30 irahagije ngo tuvudukane Kagame nagatsiko ke bave ku butegetsi.

Ingaruka nziza ziki gikorwa: Perezida azasimburwa uko biteganyijwe mu ngingo ya 107 mu Itegeko-Nshinga u Rwanda rugenderaho ubu. Hategurwe amatora mu menzi 6 Amashyaka ya ‘opposition’ yangiwe kwandika azandikwa ageze ku banyarwanda icyerekezo yifuza kwerekezamo u Rwanda. Revolusiyo ntizaba irangiriye aho izakomeza mu buzima bwose bw’igihugu hagamijwe ingaruka nziza z’amahoro, iterambere n’ibindi.
Ikitonderwa: Hashobora kubaho agatsiko gato mu barinda Perezida gashobora guteza akaduruvayo. Bibaye nabyo byashakirwa igisubizo kihuse.

Ngarutse gitekerezo cyo kwegura kubushake cyangwa ‘Parlement’ ikamweguza bibaye byaba ari igitangaza kiaye. Ariko Abenegihugu batekereza ko bishoboka ni nko kurota nkurikije amakuru agezweho ubu ko P. Kagame ari gukora ibishoboka ngo azahindure Itegeko-Nshinga ataranagera mu cya kabiri cya ‘mandat’ y’imyaka irindwi. Ubwo rero bikumvikana neza ko uburyo busigaye ari ubwo kweguzwa n’Ingufu z’Abenegihugu barangajwe imbere na ‘Nouvelle Génération’ y’Abanyapolitike ba ‘Opposition’.

Iyi nzira ya Revolusiyo yo guhindura ibintu mu mahoro irashoboka ndetse yabonekamo ibitambo bike ariko irasaba ko haboneka bamwe muri twe bagira ubutwari budasanzwe bakatujya imbere bagategura neza n’ubushishozi bwinshi gahunda na ‘strategies’ za ‘Revolution’ y’Abanyarwanda. ABANEGIHUGU bakeneye gushira ubwoba bakisubiza icyubahiro, ishema n’ubutegetsi bwabo. ABENEGIHGU bakagena imitegekere y’igihugu cyabo biciye mu matora anyuze mu mucyo amashyaka menshi atandukanye yagizemo uruhare.

INZIRA YA KABIRI: INGUFU ZA GISIRIKARE

Hari benshi mu banyarwarwanda babona ko uyu ariwo muti wakemura ibintu vuba vuba. Bamwe ndetse bakanatekereza kuri kudeta ya gisirikare ko yo yakemura ibintu mu kanya gato. Ariko iyi nzira ifite ibintu byinshi byinshi byo kwitondera kuko bimwe bishobora gushyira ibintu irudubi aho kuzana impinduka ikenewe cyangwa ikimika umunyagitugu uruta uwo dufite ubu. Bamwe batekereza ku mutwe uzaturuka hanze ugatangiza imirwano nkuko FPR yabigenje ikagera ku butegetsi. Iyi nzira nta byinshi nyivugaho kuko nta bumenyi bwinshi mfite mu gisirikare gusa abanyarwanda baba bayitekerezaho bagomba kwibaza ibibazo byinshi kandi bakagira intumbero yo gusimbuza ikibi cyose cyakozwa bakagisimbuza ikiza kuko ibyo FPR yatuzaniye n’intambara yayo guhera 1990 twarabibonye. Njyewe igisirikare nakwibonamo ni ikiri inyuma y’Abenegihugu kigamije kubarengera igihe abambari b’Agatsiko bazaba bashatse kwica no gufunga Abanegihugu n’Abanyapolitike b’impinduka. Indi nagira abatekereza iyi nzira ni uko basesengurana ubushishozi ibibera mu Karere k’ibiyaga bigari bakibaza ku zindi mpamvu zituma Kagame n’agatsiko ke bakomeza gufasha umutwe wa M23 ndetse bashing n’indi mitwe yo muri Kongo. Hari benshi bavuga ko usibye gusahura umutungo wa Kongo no kwica impunzi z’Abanyarwanda zasigaye yo, ko Gen. Kagame ahubwo ari no gutegura aho azahungira mu mashyamba ya Kongo umunsi bizaba byamukomeranye abanyarwanda bamuvudukanye. Kagame n’agatsiko ke baramutse bahunze u Rwanda bagashinga ibirindiro mu mashyamba ya Kongo kuzahabakura byazatwara imbarga nyinshi n’igihe kirekire kuko muzi neza ko Kagame n’Agatsiko ke bafite imitungo y’ikirenga kandi birunzeho n’ibitwaro bitagira ingano bakwifashisha mu guhungabanya umutekano mu Karere kose. Ariko ngirango amafaranga n’ibitwaro bigira aho bigarukira kuko ingero ni nyinshi z’abamurushaga amadorari menshi nka ba Sadam Hussein, Osama Bin Laden, Muhamar Kadafi, Mubarak n’abandi. Aho bari ngirango arahazi.

INZIRA YA GATATU: UBUTABERA

Hakoreshejwe Ubutabera Mpuzamahanga ndetse no gusaba ko habaho ‘Tribunal International pour la RD-Congo’ bamwe mu bagize agatsiko bagomba kugezwa imbere y’inkiko mpuzamahanga.

Hari n’intambwe zamaze guterwa n’amwe mu mashyaka ya opposition n’amashyirahamwe y’abanyarwanda n’abanyekongo yatanze ikirego mu Rukiko mpuzamahanga Mpanabyaha (ICC) ndetse nkeka hari n’Abanyarwanda basabye Urukiko Mpanabyaha rw’Arusha (ICTR) gufungura dosiye ya P. kagame n’ibyegera byo. izo ntambwe zose nizo gushimirwa. Nubwo iyi nzira nayo ishoboka ariko ntabwo yazana vuba impinduka twifuza mu Rwanda rwacu no mu Karere kuko nta kizere kigaragara ko Abagize Agatsiko bose (cyangwa bamwe) bazafatwa vuba kuko bafite ubutegetsi (power) mu Rwanda n’ibihangange bibakingira ikibaba. Ikindi nababwira ni uko kwihuta cyangwa gutinda kwa ‘système judiciaire’ mpuzamahanga ntabwo bituruka ku bushake bwacu nk’abanyarwanda. Kandi mwibuke ko bimwe mu byaha byakozwe bimaze imyaka inakabakaba 20 (nubwo bidasaza) ntacyo ubwo butabera mpuzamahanga bwabikozeho bityo Kagame n’agatsiko bazakomeza kugundira intebe z’ubutegetsi bicayeho kuko bazi ko ariyo mahirwe ya nyuma bafite.
Gusa iyi nzira nayo Abayitangiye ntibacike intege, burya ngo inzira zose ngo zihurira (zigera) i Roma bayikomeze kandi bakomeze bafatanye na ba ‘Victims & Survivors’ b’Abanyekongo n’Abarundi. Abatangiye iyi nzira batekereze kandi ku mbogamizi zihari cyane cyane bimwe mu bikomerezwa by’abantu n’ibihugu bikomeza gukingira ikibaba uruhande rwa FPR-Inkotanyi ngo rutabazwa amabi yose rwakoze. Icyo nabunganiraho nuko tugize amahirwe imirwano yo muri Kongo igahosha cyaba ari igihe kiza cyo gusaba ko habaho urukiko rwihariye Mpanabyaha rwa Kongo. Byashyirwamo ingufu nyinshi maze ‘Victims & Survivors’ b’Abanyarwanda, Abanyekongo n’Abarundi bagahagurukira rimwe bagaharanira ko habaho ubutabera buboneke kuri bose. Ariko mu gihe cyose imitwe ya gisirikare ivuka buri munsi muri Kongo (kandi muzi abayir inyuma) bizagorana kuri ‘UN Security Council’ itora umwanzuro w’urukiko mpanabyaha muri Kongo.

INZIRA YA KANE: IBIGANIRO

Iyi nzira yo guhindura ibintu mu mahoro binyuze mu nzira y’ibiganiro byahuza abari ku butegetsi n’abari muri opposition bimaze imyaka n’imyaniko abatavugarumwe na Leta bifuza ibiganiro hagamijwe kwirinda ko ibintu byazagera iwa Ndabaga. Abari ku butegetsi bakomeje gusuzugura abataburiho bafunga abanyapolitiki, abandi nabo bakomeje guhezwa ishyanga.

Iyi nzira ariko yibazwaho byinshi. Ese niba Kagame n’agatsiko ke baregwa ko bajejeta amaraso ku ntoki, abashaka ibiganiro no kugabana ubutegetsi nawe bajya batekereza ko kwaba ari ugusangira n’uwahekuye Abanyarwanda benshi. Njyewe kubwanjye iyi nzira yo kugabana ubutegetsi n’ababuriho ubu nyemera kuri ‘conditions’ z’uko habanza kubaho KUBWIZANYA UKURI ku ruhare rwa buri gice n’abantu ku giti cyabo bagize uruhare mu mahano yose yasheshe amaraso y’ABENEGIHUGU batuvuyemo. Nyuma abanyarwanda bakemeza niba habaho imbabazi zihariye cyangwa imbabazi rusange binyuze muri ‘Commission Verité et Réconciliation’ cyangwa Abanyarwanda bakemeza ko Ubutabera bukora akazi kabwo. Ariko mu gihe intambwe yo kubwizanya ukuri, gusaba imbabazi, no kwiyunga by’ukuri bitarashoboka twaba dusa n’umwubatsi wa rupigapiga uhoma icyondo kw’isima. Iyi nzira rero birumvikana ko nta mahirwe ifite kuko ntitwaganira n’Abajejeta amaraso mu ntoki batabanje gusaba imbabazi abanyarwanda ngo nbazibahe.

INZIRA YA GATANU: AMATORA

Iyi nzira y’amatora niyo inyuze muri demokarasi ndetse nta nubwo twakabaye dutekereza guhindura ubutegetsi iyo u Rwanda ruba rugendera muri demokarasi. Murabizi neza ko Agatsiko ka P. Kagame kadashobora kwemera amatora aseseye. Imyaka 18 irashize mwarabibonye. Iyi nzira rwose ku butegetsi bwa P. Kagame nimukureyo amaso ntishoboka.

UMWANZURO

Banyarwandakazi, Banyarwanda nkunda

Nkuze kuvuga nti ‘Gukunda igihugu cyawe ntibivuga gukunda ubutegetsi buriho, iyo Leta iriho ikora neza irakundwa, Leta yaba ikora nabi ABENEGIHUGU bakiyemeza kuyikuraho byihuse’. Ubona mbeshya azambeshyuze. Ntabwo tuzakangwa n’uko P.Kagame n’Agatsiko ke bagwije amamiriyoni n’amamiriyoni y’amadorari, ntabwo tuzakangwa n’ibifaru na Kajugujugu z’intambara birunzeho. Twe nk’Abenegihugu twifitemo imbaraga P. Kagame n’Agatsiko gatsikamiye u Rwanda badafite. Kagame yiturushya rero natugirire bwangu yegure we ubwe ahe abanyarwanda umwanya wo gusubiza ibintu ku murongo. Hari abanyarwanda batari bake batorwamo Umukuru w’u Rwanda uberanye n’ibihe tugezemo. Twifitemo abanyapolitiki bashya ba ‘New Gereration’ bafitiye urukundo abanyarwanda kandi bafite ubushobozi bwo kuyobora igihugu neza cyane mu mahoro, n’iterambere risaranganyijwe riruta kure iryo P. Kagame avuga ko yagejeje ku Rwanda. Abanyapolitiki ba ‘New Gereration’ mu mu moko yose uko muyazi Abahutu, Abatutsi n’Abatwa bashobora gufasha abanyarwanda kubwizanya ukuri no kubabarirana ku makuba yose yagwiririye u Rwanda. Gen P. Kagame natubere umugabo yegure rwose kuko kumweguza kungufu z’Abenegeihugu bishobora kusiga ibitambo bitari bike by’inzirakarengane.

Yemwe abashyigikiye P. Kagame mu kwiyongeza indi myaka niyo arimo atarayirangiza. Bantu mwibeshya, mukibwira ko Kagame ariwe kamara, nababwira ngo murakina n’umuriro. Nimuve muri ayo ahubwo mutange umuganda ukomeye ku rwababyaye mugire inama Kagame yo kwegura. Guhinduka ni ubutwari! Ni mwoye kwizirika ku muntu Abanegihugu benshi batigeze bagirira ikizere ndetse n’amahanga yose yari yarabeshye akaba amaze gutahura ibinyoma bye. Ndazi neza ko bamwe bavuga ngo turagosorera mu rucaca cyangwa ko turi Abanyamagambo gusa. Ngiyi Revolusiyo iraje kandi yaratangiye mu bitekerezo nta kizayisubiza inyuma.

Banyarwandakazi, Banyarwanda nkunda,
Uko ibintu bigenda birushaho gukomera no gutinda niko n’inzira zo guhindura ibintu zigenda zikomera kandi zishobora kugira ibitambo byinshi tutifuza kuko amaraso y’abanyarwanda yamenetse ni menshi cyane. Nk’uko mwabibonye inzira ya mbere njyewe niyo nshyize imbere. Gusa nayo isaba gukoranwa ubushishozi nta guhubuka kandi ikanonosorwa neza ariko ibintu bikihutishwa. Dushyire hamwe, twe guha igihe abaducamo ibice bashingiye ku turere amoko n’ibindi. Twirinde umutego wo kureba imyanya ya Leta tudafite. Ikigambiriwe ni uguhindura ibintu dushyira imbaraga hamwe kuko umunani ujya inama uruta ijana rirasana ! Tubigiremo uruhare twese, dukorere hamwe dushize UBWOBA. Kuyavuga siko kuyarangiza reka mbe mpiniye aha.

Harakabaho ‘La Nouvelle Génération’ ishaka impinduka!
Harakabaho u Rwanda rwa Twese rutavangura ruha abana barwo amahirwe angana!
Harakabaho u Rwanda ruhumeka amahoro nyayo ruyobowe muri Demokarasi na Repubulika!

Mugire Urukundo n’Amahoro kandi mwese mbaragije Imana

Jean Marie V. MINANI.