Umucamanza w’Urwego rwasigariyeho Inkiko Mpuzamahanga Mpanabyaha, IRMCT, William H. Sekule, yanze ubusabe bw’Ubushinjacyaha bwasabaga ko Kabuga Félicien yakoherezwa kuburanira mu Buholandi, aho koherezwa i Arusha nk’uko impapuro zashyizweho zisaba ko afatwa zibigaragaza.

Radio Ijwi ry’Amerika yitabaje umunyamategeko Me Innocent Twagiramungu asobanura impamvu y’iki cyemezo n’icyo umucamanza yashingiyeho:

.

.

Mbese koko ni genocide yakorewe abatutsi gusa cyangwa hagomba kongerwamo n’abahutu n’abandi bose bishwe n’urundi ruhande muri kiriya gihe?

Mbese hagomba kwibukwa abatutsi gusa cyangwa hagomba kwibukwa bose?

Hashize iminsi bimwe mu bihugu by’ibihangange kw’isi bitangiye gukemanga ku nyito yiswe genocide yakorewe abatutsi aho buri mwaka hibukwa gusa abatutsi gusa bishwe mu mwaka w’i 1994 ariko abahutu bishwe muri icyo gihe ntibibukwe, bimwe muri ibyo bihugu ni leta zunze ubumwe z’Amerika n’igihugu cy’u Bwongereza.

Leta y’u Rwanda ikomeje kuvugako iyi Genocide yo mu 1994 igomba kwitwa genocide yakorewe abatutsi gusa mu Rwanda naho leta zunze ubumwe z’Amerika hamwe n’u Bwongereza bo bashaka ko humvikanamo n’abahutu n’abandi bishwe bazira kudashyigikira genocide yakorwaga.

Leta zunze ubumwe z’Amerika zigaragaza impungenge ziterwa n’uko buri mwaka havugwa gusa ngo ni genocide yakorewe abatutsi mu Rwanda hirengagijwe uburemere iyi Genocide yagize ku bwoko bw’abahutu n’abandi bantu, ku bw’Amerika hishwe n’abahutu n’abandi bantu benshi baziraga kwanga kwifatanya n’abashyiraga genocide muri ibyo bikorwa ngo ku buryo kutabaha agaciro no kutabibuka byerekana kudaha isura nyayo uru rupapuro rwirabura mu mateka, Amerika ivuga ko ishyigikiye ukwibuka genocide yakorewe mu Rwanda ariko bitavugako hakwiye guhindurwa ukuri kw’uko iyi genocide yakozwemo, Amerika kandi irasaba ibindi bihugu ko byashyigikira ko amateka y’uko genocide zose zabaye kw’isi atazigera na rimwe agorekwa cyangwa ngo ahindurwe, Amerika iti habomba kwibukwa uwahitanywe n’uwarokotse ubwo bwicanyi uwo ariwe wese no kugaragaza ukuri kw’uko byagenze ngo bikaba igihamya cy’uko koko aya mahano atazasubira ukundi, Amerika kandi irasaba ibihugu byose gushyigikira inzego zasigiwe inshingano zo kurangiza imanza mpanabyaha harimo no gushakisha abanyarwanda 8 bagize uruhare muri iyi genocide ariko batarashyikirizwa imanza.

Leta zunze ubumwe bw’Amerika zikomeza kugaragaza kandi zishyizemo ingufu ko zitishimiye uko ibiganiro byo guhitamo imvugo ivugako genocide yakorewe abatutsi gusa mu mwaka w’i 1994 byagenze ziti ntabwo zumva kandi ntizishimiye uburyo ibi biganiro byakozwemo, leta zunze ubumwe z’Amerika zikomeza zivuga ko zishyigikiye ukwibuka kwa buri mwaka ariko hakibukwa bose atari abatutsi gusa, ziti kandi zizakora ibishoboka byose aya mahano ntazongere kuba.

https://usun.usmission.gov/explanation-of-position-on-the-un-general-assembly-resolution-on-the-rwandan-genocide/

Igihugu cy’Ubwongereza nacyo gisa nk’ikitajya kure y’ibyo Amerika ivuga, ariko cyo gifata umwanzuro ntasubirwaho gisaba ko inyito ya genocide yabaye mu Rwanda mu mwaka wa 1994 igomba guhindurwa ntiyitwe genocide yakorewe abatutsi gusa ahubwo hagashakishwa indi nyito yatuma abahutu n’abandi bose bishwe muri kiriya gihe bazira kutayishyigikira bose bibonamo, ubwami bw’abongereza buvuga ko n’abahutu n’abandi bose bishwe bakwiye kutibagirana, ikindi kandi ngo kibateye impungenge ngo n’uburyo n’inzira byo kwemeza inyito y’iyi genocide bikorwamo, abongereza bo ngo bagasanga ko hari icyuho mu kwumvikanisha uyu mwanzuro ku nyito ya genocide, bati cyakora ubwongereza bwibuka amakuba yabaye muri Mata mu mwaka wa 1994 buti kandi bwiyemeje ko ubugome nk’ubu butazasubira gusubira ukundi.

U Rwanda narwo ruti rusanga impungenge ubwongereza n’Amerika bigaragaza atashingiro bifite ruti ibi bihugu byifuza guhindura uko amateka yagenze bati ariko bigasaba ibihabamye n’ibyo, uhagarariye u Rwanda mu muryango w’abibumbye avuga ko ibi bihugu bishaka kugoreka amateka ati bikanirengagiza imyanzuro y’akanama ka ONU gashinzwe umutekano kw’isi ati n’ububasha bw’urukiko mpuzamahanga mpanabyaha rwashyiriweho u Rwanda ruti kandi ibi bihugu byombi byemera, aha u Rwanda rwongera kwibutsa ubusobanuro bwa gonecide yo mu Rwanda nk’uko byemejwe n’umuryango w’abibumbye mu mwaka wa 1946, kwica abantu b’itsinda rimwe, gukomeretsa bikabije imibiri cyangwa ibitekerezo by’abantu ubaziza ibitekerezo by’itsinda rimwe, gushyira abantu b’itsinda rimwe mu buzima bubi hagamijwe ko barimbuka bose cyangwa igice cyabo, no gushyira abo bantu mu buryo bubabuza kubyara cyangwa kwambura iryo tsinda abana babo bagahabwa irindi tsinda ridafite aho bahuriye, u Rwanda ruti ibi byose aba ari genocide, u Rwanda ruti kandi urukiko mpanabyaha rwashyiriweho u Rwanda rwemeje ko hagati y’itariki ya 6 z’ukwezi kwa kane na tariki ya 17 z’ukwezi kwa karindwi mu 1994 habaye genocide yakorewe abatutsi. U Rwanda rurongera rukavuga ko mu rwego rwo gushaka ubwiyunge nyabwo tariki 13 z’ukwezi kwa kane rwashyizeho umunsi wo kwibuka abandi bose bishwe n’ubwo batari mu bahigwaga.

Aha hari byinshi umuntu yakwibaza ku nyifato y’u Rwanda na bamwe mu bahoze muri leta ya FPR bakaza guhunga bakisanga mu mashyaka ya opposition akorera mu buhungiro.

Kimwe mu bidatuma amashyaka ya opposition y’abanyarwanda atajya hamwe ngo akorane nI uko kugeza ubu atumvikana kuri iki kibazo cya Genocide, aho benshi mu bahoze muri leta ya FPR/RPF usanga bumva ibintu kimwe na leta bahunze ku kibazo cya genocide yabaye mu Rwanda mu mwaka wa 1994.

Kenshi iyo ubajije abatutsi bahoze muri FPR ukababaza niba bemera ko n’abahutu baba barakorewe Genocide bagusubiza ko ibi bigomba kubanza bikemezwa n’umuryango w’abibumye, ukongera ukababaza uti mbese abanyamahanga nibo bazaza kubikwemeza cyangwa wowe ubwawe wakagombye kuba uzi ukuri kw’ibyabaye mbere y’uko ayo mahanga aza kubikwemeza. Iyi mvugo iyo urebye usanga ntaho itandukaniye n’imvugo ya FPR kuko kugeza ubu ibihugu by’ibihangange kw’isi aribyo Amerika n’Ubwongereza biri gusaba u Rwanda kwemera ko hajya hibukwa bose yaba abatutsi n’abahutu ndetse n’inyito ya Genocide igahinduka u Rwanda narwo turi oya ahubwo ONU ibyo yemeje nibyo nyine ntibihinduka aha umuntu akibaza niba koko nk’abanyarwanda bo batazi ibyabaye mu Rwanda mbere y’uko basaba abanyamahanga kubyemeza. Iyi ni ya mvugo usanga benshi mu bahoze muri leta ya RPF/FPR usanga bahuriyeho na leta bahunze aha ukibaza nibyo baba barahunze , ibi kandi bikaba ipfundo rikomeye rituma amashyaka ya opposition atabasha kwumvikana ngo abe yanakorana kuko ntibyumvikana ukuntu abantu bakorana mu gihe batumvikana ku bwicanyi bwabaye mu Rwanda muri 1994 n’uburyo bwibuka bose kandi bakibukira hamwe, iyi ni inyifato igayitse bahuriyeho na leta y’u Rwanda yo gushaka kuvangura abapfu kandi bose barishwe mu gihe kimwe kandi bose bazira ibibazo bya politike bimwe.

Mu gihe cya genocide FPR yaririmo yica abahutu ibaziza ko ari abahutu kandi igamije kubarimbura icyo gihe ku rundi ruhande naho Interahamwe nazo zicaga abatutsi zibaziza gusa ko ari abatutsi zishaka kubarimbura, aha niho Amerika n’Ubwongereza bumaze gusobanukirwa n’ubwo butadomaho agatoki neza bukaba buri gusaba ko inyito ya genocide yakorewe abatutsi igomba kwaguka hakongerwamo n’abahutu n’abandi bose bishwe muri kiriya gihe, u Rwanda narwo ruti oya ntibishoboka, mbese icyihishe inyuma y’ibi ni ikihe? Mbese si ugutinya ko abagize uruhare muri ubu bwicanyi bose cyane cyane abishe abahutu n’abandi bose nabo bazatangira guhanwa kandi ko biyizi ko bari muri FPR cyangwa bayihozemo?
Gusa icyo umuntu yashimira Imana ni uko ukuri kuri kugenda kwigaragaza kandi bidatinze ukuri nyakuri kuzatsinda.

Impirimbanyi za democracy aho ziri hose kw’isi zikwiye kwongera ingufu mu kwerekana no kuvuga neza uko ibya Genocide byagenze kandi zikerekana ko leta y’U Rwanda ihisha byinshi mu kwanga ko n’abahutu nabo bibukwa, iki gikorwa ntibagomba kukirekera abanyamahanga ahubwo ni ishingano zabo bagomba guhaguruka bakerakana ukuri kuko ingaruka zo guceceka ngo bizakorwa n’Amerika n’Ubwongereza ni mbi cyane.

Murakoze

Straton Nahimana

Amakuru y’uko Deniza Bucumi Nkurunziza, umufasha w’umukuru w’igihugu cy’Uburundi yagiye kwivuza hanze yatangiye kunugwanugwa mw’ijoro ryo ku munsi wa gatatu. Radiyo Ijwi ry’Amerika irayamenya ariko ibanza kwitonda kugira ngo ibanze ikore iperereza neza.

Kuri uyu wa kane, icyari igihuha kiratinda kiba inkuru yo kwizerwa, ariko n’ubwo nyine Radiyo Ijwi ry’Amerika iritonda gato kugira ngo jongeren gushishoza neza. Amakuru Radiyo VOA imaze kubona ava mu bitaro, Aga Khan, bya kaminuza i Nairobi muri Kenya yemeza ko Deniza Bucumi ubu ari ho arwariye.

Na Radiyo na Televiziyo Citizen ikorera muri Kenya yabitangaje mu gitondo ko kuri uyu wa gatanu tariki ya 29 Gicurasi 2020.

Deniza Bucumi arwariye mu gice kirimo abantu bafite indwara zo guhumeka nabi “Troubles respiratoires” mu gifaransa. Biranugwanugwa ko yaba yaranduye icyorezo wa Corona ariko ni amakuru ataremezwa na muganga wo muri ibyo bitaro.

N’ubuzima bwe ntibizwi neza uko bwaba bwifashe, ko yaba arembye cyangwa atari byo. Ariko ku munsi w’amatora aheruka, Deniza Bucumi yagaragaye kw’ifoto ari gutora i Ngozi, mu maso yijimye, nk’umuntu biboneka ko arwaye.

Gusa ikinyamakuru The Citizen cyemeje ko mu bantu batatu barindira umutekano umufasha wa Perezida Nkurunziza bajyanye, umwe muri bo byamenyekanye ko yanduye icyorezo cya Covid-19.

Aho muri Kenya, hari bimwe mu binyamakuru byibaza uburyo icyo gihugu cyemeye kwakira abantu baba bafite ibimenyetso by’indwara ya Corona kandi harasohotse itegeko ko abantu nk’abo batemerewe kwinjira mu gihugu.

Deniza Nkurunziza yageze muri Kenya gute?

Amakuru aturuka ku kibuga cy’indege cya Bujumbura, kandi Ijwi ry’Amerika yagenzuye bihagije, avuga ko indege yatwaye Deniza Bucumi Nkurunziza yahagurutse isaha 5 n’iminota 25 z’ijoro bucya haba ku wa kane. Yajyanye n’umuganga we n’umuforomo.

Yatwawe n’indege y’Umuryango Nyafrika utanga ubufasha mu byerekeye ubuzima bw’abantu (AMREF). Abegereye ibiro by’umukuru w’igihugu mu Burundi baremeza badakekeranya aya makuru. Gusa ntibatomora impamvu yuriye iyo ndege mw’ijoro.

Imbere y’aho gato, amakuru yizewe yemezaga ko amatara yabanje kuzima ku kibuga cy’indege. Ibi, n’ababa mu gice ikibuga cy’indege kirimo barabyemeza.

Deniza Nkurunziza n’abo bajyanye baba bataranditswe mu bitabo by’abasohoka n’abinjira ku kibuga cy’indege nk’uko abahaye amakuru VOA babyemeza, ariko mu bitabo byabo by’inzira (Passport) ho hatewemo amakashe. Ibi n’ikinyamakuru SOS Medias gikorera mu Burundi kirabyemeza.

Ibyo biri uko mu gihe i Gitega, ku murwa mukuru wa politike w’Uburundi, kuva kuri uyu wa kane, hatangiye igikorane cy’iminsi itatu cyatunganijwe n’umutwe wa politiki uri ku butegetsi Cndd-Fdd.

Ibikorane nk’byo Deniza Bucumi akunda kubyitabira ndetse akabiyobora, agafata n’umwanya wo kuvuga ijambo ry’Imana iruhande rwa Perezida Nkurunziza.

Yamara kuri iyi nshuro Deniza Bucumi ntiyari ahari. No ku rutonde rw’abazavuga ijambo ry’Imana, Ijwi ry’Amerika yaboneye ikopi, ntawuriho. Mu Burundi hamaze kumenyekana abantu 42 banduye icyorezo cya Corona, umwe muri bo yaritabye Imana.

N’ubwo biri uko, hari amakuru amaze igihe avugwa cyane ko haba hari abantu bamaze iminsi bitaba Imana bazize icyorezo cya corona. Yamara Radiyo Ijwi ry’Amerika ntirashobora kuyemeza ku buryo ntasubirwaho, kubera ko abategetsi b’Uburundi batitaba telefone zabo, iyo iyo Radio ibahamagaye.

Inkuru yateguwe n’umunyamakuru w’Ijwi ry’Amerika Pierre Claver Niyonkuru

Abana ba Félicien Kabuga bavuga ko afunze mu buryo bumwima uburenganzira bwe nk’umuntu ufite ubuzima bumeze nabi cyane ukeneye kwitwaho byihariye.

Mu itangazo basohoye ku munsi w’ejo ku wa gatanu tariki 29 Gicurasi 2020, bavuga ko nk’umuntu ufite ibyo ashinjwa, se yamye yifuza kwitaba ubutabera ngo yisobanure, ariko atari mu rukiko mpuzamahanga mpanabyaha rwashyiriweho u Rwanda rw’Arusha (TPIR/ICTR) bavuga ko “kuva rwashyirwaho rutahwemye kugaragaza kubogama”.

Abana ba Kabuga bavuga ko kuva mu myaka micye ishize, se w’imyaka 87 y’amavuko arwaye indwara zitandukanye nk’indwara y’isukari (diabète), gutera k’umutima mu buryo bwihuse cyane (hypertension) ndetse n’indwara yo kwibagirwa kubera izabukuru. 

Bavuga kandi ko mu mwaka ushize yabazwe mu nda, bityo ko “akeneye kwitabwaho no gukurikiranwa bya buri kanya, nk’umuntu wese ugeze mu zabukuru w’intege nke ukeneye gufashwa”. 

Abana ba Kabuga bavuga ko usibye ibyo, se nta Gifaransa nta n’Icyongereza azi. Ko kuba ari muri gereza, adashobora kwivugira no kwigenza kandi ari mu kato, ari ukumutererana. 

Bavuga ko uko ubuzima bwe bumeze “ntaho bihuriye na busa n’uburyo afunzemo”, kandi ko batangajwe no kubona ubucamanza bwanga gukoresha ibizamini byo kwa muganga ngo buhinyuze ibyo bavuga by’uburwayi bwa se, n’ubwo abunganizi be mu mategeko bari babisabye. 

Bavuga kandi ko kuva Kabuga yatabwa muri yombi ku itariki ya 16 Gicurasi 2020, ku wa kane ku itariki ya 28 Gicurasi 2020 ari bwo bemerewe kuvugana na we kuri tefelone gusa, n’ubwo umushinjacyaha mukuru yari yatanze uruhushya ku itariki ya 20 Gicurasi 2020 ko bemerewe kumusura. 

Ubufaransa buri kwivuguruza? 

Bavuga ko mu gihe cyose amaze yitaba urukiko, babonye ko ubuzima bwe burushaho kumera nabi, ko yatakaje ibiro ndetse ko mu mivugire ye humvikanamo urujijo. 

Bongeraho ko kimwe n’undi mwana wese uhangayikishijwe n’ubuzima bwa se cyangwa bwa nyina, bafite ubwoba ko uku gufungwa kwa se muri ubwo buryo bishobora kumuviramo urupfu, ko ari yo mpamvu bari basabye ko akurikiranwa adafunze. 

Abana ba Kabuga bavuga ko Ubufaransa buzwi nk’igihugu kigendera ku mahame yo kubahiriza uburenganzira bwa muntu, umuntu yaba akurikiranywe n’ubutabera cyangwa yidegembya.

Ariko bakavuga ko kugumisha se muri gereza, mu buryo ubuzima bwe bumeze kuri ubu, “bimwima uburenganzira bwe bw’ibanze”. 

Mu rukiko bigeze he? 

Bwana Kabuga ashinjwa ibyaha birimo gucura umugambi wa jenoside. Mu iburanisha ryo ku wa gatatu tariki 27 Gicurasi 2020, abunganizi be bahanganye n’ingingo itegeka ubutabera bw’Ubufaransa gushyikiriza abafashwe bisabwe n’ubutabera mpuzamahanga, aha bikaba bivuze koherezwa gufungwa n’urwego rwasigaye rurangiza imirimo yasizwe n’urukiko rw’Arusha (ICTR). 

Basabye ko yarekurwa agakurikiranwa adafunzwe akajya kuba kuri umwe mu bana be, batanga urugero ko yakwambikwa icyuma ku kaguru cyo gukurikirana umuntu n’ikoranabuhanga (electronic ankle tag).

Ubusabe bwo kumurekura urukiko rwarabwanze, umucamanza yavuze ko “nubwo adafite ubushobozi bwo gucika yirutse, ariko babonye ko afite ubwo gukoresha inyandiko mpimbano akihisha”.

Urukiko rwatangaje ko ku wa gatatu utaha tariki 03/06/2020 ruzatangaza umwanzuro.

Mu kiganiro yagiranye n’umunyamakuru Venuste Nshimiyimana wa Radion Ijwi ry’Amerika, Angelique Kabuga (umukobwa wa Félicien Kabuga) aravuga ko ubuzima bwa Se buri mu kaga aho afungiye muri Prison de la Santé mu mujyi wa Paris.

Ikiganiro cyose mwacyumva hano hasi:

.

.

Minisiteri y’Ubuzima yatangaje ko umurwayi witabye Imana ari umushoferi w’imyaka 65 wari utuye mu gihugu cy’abaturanyi, wahisemo gutaha mu Rwanda nyuma yo kuremba.

Yakomeje igira iti “Yitaweho n’abaganga mu kigo cyagenewe kuvura Coronavirus. Ariko yaje gupfa azize kwangirika imyanya y’ubuhumekero.”

Ni byiza kwitoza kugenda mu bwoko bwose bw’inzira no kutazongwa n’uburebure bw’inzira. Ni byiza kumenya ko amayira yose atagendwa kimwe, ko buri yose igira ingendo iyibasha

Banyarwandakazi, banyarwanda,

Tumaze iminsi micye tuganira, tugaragaza ko imwe mu mpamvu z’amakimbirane n’ibyago ku Rwanda ari uko abana b’igihugu bose badahabwa ijambo, bakavangurwamo abahonyorwa n’abahonyora, abicwa n’abica, abashonjeshwa n’abahazwa, abacirwa hanze n’abemerewe kuba mu gihugu. Ibi byabangamiye Urwanda ku gihe cy’abami, birubangamira ku ngoma ya parmehutu, birubangamira no ku ngoma ebyiri zasimburanye nyuma ya parmehutu. Biteye ubwoba. 

Mu bihe bya nyuma ya jenoside ho, abanyarwanda bahunze bahura n’akaga gakomeye kubera akagambane kavugwa hagati ya leta n’umuryango wa loni ushinzwe impunzi, ku ruhande rumwe, n’akagambane hagati ya leta na bamwe mu bakorera inzego zishinzwe impunzi mu bihugu n’izindi nzego za leta zo mu bihugu bimwe na bimwe byo hanze, ku rundi ruhande. Abari mu gihugu bo ibyabo birazwi nta wakwirirwa abisubiramo ahangaha. Icyo abantu bose bikanga kandi batinya ko cyazabaho ni uguturika no gusandara kw’igihugu, niba nta gihindutse ngo abantu bibwire cyangwa se bumve abababwira. Birabe ibyuya ntibibe amaraso!

Iyo dutinze kuri ibi bihe bya nyuma, dusanga bamwe mu banyarwanda babuze kivugira ari abatutsi bahoze mu Rwanda imbere, abakunze kwitwa Abacikacumu cyangwa se abaresikape. Birumvikana ko ataribo bonyine. Kuba ba nyamucye kwabo, kuba indembe z’ingaruka za jenoside, no kutumva ibyago barimo mu bwinshi no mu bukana bwabyo, byabimishije amahirwe yo kuvugirwa. Kandi no kwivugira barabitinya kugeza ubu. Hanze y’igihugu, abenshi batinya gutabariza abarokotse, ku buryo bamwe mu baresikape iyo bateye akamo, aho gusubizwa baterwa umugongo n’abo ubwoba bwagize imbata, barimo abaresikape nkabo, mu gihe abayobozi b’igihugu bo bahitamo kugira abo batera ubwoba muri bo, aho gukemura ikibazo kiba kivugwa kandi bitagombye kubananira. Mu gihugu, induru yo gutaka kw’abarokotse izimirira mu gihuru cya politiki z’itekinika, iz’ubuhendabana, n’iz’iterabwoba. Abayobozi ntibaha agaciro amarira y’abarokotse jeonoside, ahubwo bakomeza kubicamo ab’ingenzi, ntibanabone ko baba birahuriraho amakara yaka. Ntituvuze ko ba nyamwinshi badamaraye mu Rwanda. Oya, nabo baragowe. Yewe twanavuga ko u Rwanda ari kimwe mu bihugu bicyeya usanga nyamwinshi akandamijwe ku buryo bugaragarira buri wese. Niba nyamwinshi twumva ko ari umuhutu, turitegereza tugasanga hari abantu ku giti cyabo (André Kazigaba, Siméon na radio ye, …) n’amahuriro ya sosiyete civil ndetse n’amashyaka amwe n’amwe, bashishikazwa no kubavugira batarya iminwa bakavuga ibyo abahutu bakorewe, bakamagana ibyo bakorerwa ubu, ndetse bagashishikariza abahutu gukanguka no kwigira. Hari na padiri Nahimana ndetse na Ministri w’intebe Twagiramungu, n’abandi,  bakangurira abahutu kwanga guhonyorerwa munsi y’urukweto, ari nako babwira bose  amagorwa abareskape barimo kandi bashobora kuzagumamo niba batagerageje kwirwanaho ngo bamagane kandi bigobotore ababaniga, babanje kwitandukanya na ba sekibi amayira akigendwa. Icyiza kirimo ni uko abenshi mu bakora ibyo nta wundi baba bifuriza kubohwa no kuba umucakara iwabo. Iyo twongeye kwitegereza, tuvuge tugarutse ku bacikacumu, dusanga abatutsi bahoze mu Rwanda, bo nta shyaka rya politiki mu gihugu no mu buhunzi ribavugira by’umwihariko. Turebeye muri sosiyete civil ho, twashima cyane nka Bwana Matata n’abo bafatanyije muri centre CLIIR. Aho abandi bitinyatinya, Matata yateye akamu kuva cyera mbere y’umwaka w’2000 kugeza n’ubu, atabariza abacitse ku icumu, yamagana iyicwa n’ihohoterwa ry’abatokotse jenoside. Nagira ngo mushimire by’umwihariko kandi mbikuye ku mutima, nshimire n’abo bafatanyije bose, n’undi wese wakoze cyangwa ukora nkawe. Ibyo yabikoze kandi n’ubu aracyabikora atarebye ingaruka yagirwaho n’iterabwoba ry’abahonyora kandi bahonyoye abarokotse jenoside kuva cyera. Kuvugiriza induru abica abacikacumu no gusakuza ngo ab’isi yose bumve ibyago abarokotse jenoside barimo n’ibibi bakorerwa, Matata abikora nta undi yibagiwe mu banyarwanda b’ayandi moko. Iki ni ikintu cyagombye kwereka abatutsi b’intagondwa ko umunyarwanda ubabajwe wese yagombye gutuma bahaguruka bakamagana akarengane ke, baba bahuje ubwoko nawe cyangwa se batabuhuje. Ni isomo rikomeye. Hari abo wumva mu matamatama ngo ”uriya muhutu aba atuvugira adushakaho iki?”, yewe ntibanabimushimire. Biteye agahinda. Nibige isomo. Bene abo ninabo bakoreshwa mu kwibasira abatutsi basakuza bagashyigikira abahutu mu kababaro no mu gutaka kwabo! Nyamara abo bagore n’abagabo, abo basore n’inkumi, abo bitangira kwamagana ko amateka yahonyorwa, ko abanyarwand bakomeza gusebwa nk’ibigori, baba ari abo gushimwa! Abo bacikacumu baba ibikoresho byo kugira nabi, bakwiye kwisubiraho aho kwigira abafatanyacyaha mu byo bakora cyamgwa mu byo banga gukora. Bazi kwamagana no kugaragaza urwango runuka ku bahutu babiciye, bamwe bakarenza bakarwanga n’abahutu bose barimo abatarabiciye! Nyamara byagera ku batutsi babiciye, banabashinyaguriye mu magambo adakwiye gusohoka mu kanwa k’umuntu utari agashitani, bakaba bigize ibubu ibiragi, ibipfamatwe, bakabya bakarenza bakanavuga ko abl bicanyi b’abashinyaguzi ari beza, atari intsembabatutsi, yewe bakabacinyira inkoro, bagasangirira ku nkongoro imwe yujujwemo amaraso y’ababo bishwe, bagashyoma bakiyereka mu mvugo ngo nziza ariko ziteye ishozi n’umujinya, ngo bari mu gihango! Igihango cya nde? Cya satani yo mu kuzimu! Bene abo bantu baba bazi kwiyoberanya nk’agacurama, baba ari ibihindugembe batagira isura n’ubwoko, utamenya niba ari abantu, niba ari inyamabere, niba ari inyoni, niba ari ibikururuka, niba bemera Imana, niba batayemera, niba ari abagabo cyangwa se ibinyabibiri!! Ntushlbora no kumenya niba basinziriye cyangwa se bakanuye! Usanga ntawe bavugira ahubwo bagwije abo bavuga! Bagwihe sbo bahakwaho n’abo bibonekezaho b’abahemu buhemu, b’abicanyi butwi! Baba basengera impyisi mu masenga y’impyisi, bateze ko impyisi zabasigariza! Iyo ziyobeje imikaka nabo zurabasingira zikabakanja, ubupfuragito bukarangirira mu nda y’impyisi ruhuna! Usanga ntawe batabara cyangwa batabariza ababaye mu by’ukuri ahubwo bagwije abo bataba mu nama! Usanga barigize imfuragito, ariyambuye ubumuntu! Bene abo bantu ni abo kwirinda! Gusa ntibakwiye kwangwa, ahubwo bakwiye kubwirwa kenshi, kabone n’iyo bahora bavunira ibiti mu matwi! Bene abo bantu bagira ubwenge n’ubuhanga bwo kuvuga no kwandika bihambaye, icyo bashaka kuvuga bakakimanurira amagambo aruta umusenyi ubwinshi akanarusha amasimbi ubwiza! Baihindukiza umo bashatse mu byo bavuga, ariko bakirinda guhinduka baba bazima! Abumva bose bagomba kwirinda kuba nkabo, nabo ubwabo bakwiye kwinginga Imana ikababariza undi mutima usumba inda kandi ugororotse! Kandi Imana itanga ku buntu ni ukuri izawubabariza! Icyiza rero ni uko baba batarambuwe ubumuntu, bagishobora kugororwa imitima!

Dukomeje kwibaza ikibazo cyacu cya kare, twagira tuti niba abanyapolitiki babuzemo uwiha, mu byo aharanira, umwihariko n’umugambi wihariye wo kuvuganira ku mugaragaro abarokotse jenoside ndetse n’abandi ba nyamucye bose, ubwo abanyarwanda twumva abo batavugirwa bazavugirwa nande mu biganiro bya politiki, mu mategeko azashyirwaho, no mu bindi? Ntibivuze ko hagomba kubaho amashyaka cyangwa se ishyaka rivugira abarokotse na ba nyamucye bonyine, ridaharaniye ukwishyira ukizana kw’abanyarwanda bose, ariko kandi rishatse ryanabaho. Kuko tutarebye neza bazicwa bagashira cyangwa bakadindizwa burundu byazabaviramo no gusibangana rwose (extinction). Harabura iki? Ni ukutabitekerezaho? Ni ukutabibona? Ni ukubisuzugura? Ni ukutabyumva? Ni ukwihugiraho gukabije? Ni iki? Twibuke ko ikindi amashyaka ariho cyangwa se ashobora kuzabaho atagombye kwibagirwa muri gahunda zayo, ari ukurwana intambara yo kugira ngo amadini n’amahuriro y’abahuje imyemerere avanwe mu gatebo k’imbohe, kuko iboherwa ryayo mu gatebo nk’ingwate za politiki risenya roho z’abantu, rigasenya imiryango, rigasenya n’igihugu cyose uko cyakabaye.

Niba ba nyamucye batavugiwe na ba nyamwinshi bakaba babangamiwe, abo bose bakaba bicwamo ab’ingenzi, hakorwa iki kugira ngo bombi bagire ubuvugizi budacika intege haba imbere mu gihugu haba no hanze mu mashyaka aharanira impinduka mu miyoborere? Aho nta cyakorwa? Ibihe bitarambiranye bizatubwira. Amadini n’abayoboke bayo se bo, abahujwe n’ukwemera kumwe se bo bazakomeza kwemera ko abayobozi babo bo mu mwuka (roho) babuzwa Imana, bakayobya n’abo bashinzwe kwereka inzira, kubera ubwoba bwo gutinya gufungwa no kwicwa? Kubera ubwoba butanabuza uwica kubica? Bazakomeza kwemera ko abayobozi babo bigira ibiragi n’ibipfamatwi cyangwa ibiburamutima mu bihe bikomeye? Aho ntacyakorwa ngo n’amadini n’amahuriro y’imyemerere abohorwe, avuge, agire uruvugiro, kandi narwimwa arwihe kuko yaruhawe n’Imana, hanyuma igishatse kikaba? Igihango n’Imana kiruta igihango n’Imandwa yamanutse ishakisha indaro n’itungo. Ese hariho imiziro mu banyarwanda, imiziro yabuza aba bagowe kwegerana na bariya nabo bagowe, n’iyo baba badahuje ibara, isura, indeshyo, ingano cyangwa se imyemerere? OYA NTAYO! Ese igihe ibyo babyishoboje, hari ikibabuza gushyira inyungu za buri wese mu migambi y’ibiharanirwa n’ibyifuzwa? OYA NTACYO. Ese amateka ataravuzwe uko ari, yavuzwe nabi, yaba aya vuba cyangwa aya cyera,  yabuza abarohama kwisungana no gutangirana ngo bananire uruzi rushaka kubatwara bose byanze bikunze? OYA, NTIYABABUZA. Aho bahuje inyungu n’imitima bakisungana mu kwivugira no kuvuganirana bitajegajezwa, no kwihagararaho no kwanga guhora bicwa nabi, ntibyabahesha kunguka bose? YEGO BOSE BABA BUNGUKA.

None se kuki hatariho amashyaka, ishyaka cyangwa abantu Ku giti cyabo, ku bwinshi, haba mu gihugu imbere cyangwa se hanze yacyo, baharanira ko abatutsi barokotse jenoside batakomeza guhonyorwa, kwicwa no kwicirwa amateka? Dushatse twakwibaza tuti kuki hakiri benshi mu barokotse bagendera kure ibyo kumenya neza amateka y’ibyabaye muri jenoside? Kuki bakirimo n’abarwana intambara yo gupfukirana amateka nkana, cyangwa babitewe no kugira abo bakingira ikibaba byanze bikunze kandi barabahekuye babizi? Kuki hakiriho abarokotse bamagana kandi bakarwanya umuntu wese ugize icyo akora ngo ibyabaye bitungweho isitimu maze amateka avugwe mu kuri kwayo, yaba umunyarwanda cyangwa se umunyamahanga?  Kuki abarokotse bo ubwabo batumva ko amateka yabo abareba bo n’ababo, kandi ko kudaharanira ko avugwa uko yabaye bitari mu nyungu zabo? Baracyatinya iki? Ni iki batabonye? Aho bazi ko hariho ababo bitera kandi batera n’abandi inkota mu mutima bagira uruhare mu kubangamira ivugwa ry’amateka, babuza bose kumenya uko ababo bishwe mu by’ukuri? Kuki hari abashakisha kuyobya uburari bigira intyoza mu barokotse, kandi bakarenga bagashaka kugaragaza ko uwabiciye umwe ari mubi, undi wabiciye akaba mwiza? Imbabazi baha umwe kuki bazima undi? Urubanza batsindagira kuri umwe kuki baruvana ku wundi, kandi abicanyi bose ari bamwe? Bamagana ababiciye ibumoso bagacinyira inkoro ababiciye iburyo? Biha kuzinukwa ababaciye amaboko n’amaguru, maze ntibagire isoni zo gusangira no gukomera amashyi ababajoboyemwo amaso bakanabatsindagira ibiti mu matwi? Aho bazi ko divayi baterekwa ari amaraso y’ababyeyi n’abavandimwe babo? Aho bazi ko umutsima basamira ari imibiri y’ababyeyi, abavandimwe, inshuti n’abaturanyi babo? Aho bazi ko gusangirira ku meza arirwaho imibiri y’ababo bishwe/bicwa, no gusangirira ku nkongoro inywerwamo amaraso y’ababo bishwe/bicwa, ari ukwiroha mu nda imivumo yo gutuka Imana na Roho Mutafatifu? Alibyo binasobanuye gucumura igicumuro kidashobora kubabarirwa nk’uko Yezu yabibwiye abayoboke be? Aho bazi ko aho kwasamira ifunguro nk’iryo, icyiza ari ukwicwa na nzaramba no gupfa bagasanga abeza mu ijuru? Aho bazi ko aho kurwana birukira ameza nk’ayo, aho kwasamira gushukishwa umwanya ku meza nk’ayo, ku meza arirwaho ababo, icyo bakwiye kuba bakora ari ukurwana urugamba rwo kwanga no guhashya ishyano ryabateye mu buriri aho kuripfumbata kubera umutima mucye n’inda nini? Aha abaresikape-gatebo n’abahutu-gatebo (de service) barabwirwa, aha ba ntibindeba bo mu moko yose, aho batuye hose kuri iyi si, barabwirwa! kandi barasabwa gutererayo agatima! Barasabwa kuba abantu nyabantu, aho kuba udukoko mu bikoko cyangwa ibikoko mu bindi! Utudayimoni mu madayimoni cyangwa amadayimoni mu yandi! Utunyanga mu manyanga cyangwa amanyanfa mu yandi! Inyangabirama! Aho bazi ko uwo baba bakingira ikibaba we ataba abitayeho habe na gato? Bishora mu ntambara zitabareba kandi hari izibareba banga kurwana! Ntibagira isoni! Ntibagira ubwoba! Umutima wo barawuneye! Nibasenge Imana bayinginge cyane ibabarize umushya maze iwubatereke no mu gituza!

Twongere twibaze ikibazo cyacu, kuki bisa nk’aho nta shyaka rya politiki ryiha inshingano yo gutabariza abarokotse mu buryo budasanzwe? Ngo rivuge rishize amanga ko abahotoye abatutsi b’imbere mu gihugu bose bagomba kumenyekana, bakavugwa, bakamaganwa, byashoboka bagakurikiranwa mu nkiko? Ko bene abo bantu batagomba guhabwa umwanya mu ruhando rw’abayoboye cyangwa se abaharanira kuzayobora u Rwanda, mu gihe cyose batarashyikirizwa inkiko, mu gihe cyose batarasabira imbabazi ku mugaragaro abo biciye, mu gihe cyose ibyabo bitarasobanurwa binyuze mu mategeko, mu gihe cyose bataracirwa urubanza ngo nirubahama bahanwe bagaruke bararangije ibihano? Kuki niba bene iryo shyaka rinariho ryaba ari rimwe gusa cyangwa abiri masa? Twibuke ko mu Rwanda hatishwe abatutsi gusa. Ishyaka ryashyira muri gahunda y’umwihariko ibimaze kuvugwa, ryaniyemeza gushyira mu migambi ubuhirimbanyi bwo kumenya uko iyicwa ry’abahutu ryateguwe niba ryarateguwe nk’uko bisa n’ibigaragarira benshi, n’uko ryagenze, n’umubarde w’abashobora kuba barariguyemo. Birumvikana ko iruhande rw’iyo mishinga yihariye, ryaba cyangwa se yaba afite umushinga muremure wo kubeshaho neza abantarwanda bose nta n’umwe ukuwemo. 

Ese ishyaka iri n’iri rizihandagaza rivuge riti dore mu gitabo cyacu cyashyinguwe kure twe tuvugamo ukurengera ba nyamuke bose, n’abareskape barimo? Ese iryo shyaka ribavugira mu kabati kashyinguwemo inyandiko, ryasobanura ko ribuzwa n’iki kubarwanirira ku mugaragaro? Ubwo buvugizi bwo mu kabati ntibutabara umuresikape wicwa! Dore ko na santima ze ziba zarashyinguwe muri ako kabati! Bene iryo shyaka rya politiki ntacyo riba ribamariye kigaragara mu bihe by’amakuba nk’ibi turimo? Riba ritinya cyane gukora igikwiye gukorwa mu gihe gikwiye.

Nk’uko tutahwemye kubisubiramo muri iyi nyandiko, mu batabariza abacitse ku icumu rya jenoside kandi batabariza n’abanyagihugu bose, harimo abazamura ijwi nk’abantu ku giti cyabo, rimwe na rimwe. Abo, barimo abarokotse ubwabo, bakabamo abandi batutsi, bakabamo abahutu, ndetse n’abanyamahanga. Abo bose ni abo gushimwa cyane ndetse bakwiye no gukomezwa cyane. Ikibabaje ni uko barimo abaterwa imijugujugu y’amacumu yaka umuriro, bakayiterwa n’inyangabirama zikoreshwa, ndetse zibonekamo n’abo umunysmulenge yakwita ”abacu”. Biteye ubwoba, umujinya n’agahinda kamwe kagira mubi! Abarwanya, abadindiza n’ababangamira ubushake n’ibikorwa byo gutera akamu no gutabariza abacikacumu mu kwicwa kwabo, baba bahemuka kandi bahemukira Urwanda rw’abanyarwanda. Babe abahutu, babe abatutsi, babe se abacikacumu mu bandi cyangwa abanyamahanga, bakwiye kwigaya no kugayirwa abumva! Bakwiye kugayirwa abazima, bakwiye kugayirwa abariho bicwa, bakwiye kugayirwa abishwe, bakwiye kugayirwa n’abakurambere! Icyo batinya bakwiye kugitsinda kugira ngo kitazabatsinda mu gahinda kagira mubi! Bakwiye kugitsinda kugira ngo kitazatsinda benshi mu gahinda kagira mubi! Nta kintu giteye agahinda n’umujinya nko kubona amwe mu mashyirahamwe abereyeho guharanira inyungu z’abarokotse b’ingeri zinyuranye, cyangwa se bose, agotwa agatabwa mu gatebo k’imbohe, kimwe na ya madini twavuze adatabara ntanatabarize abayoboke bayo n’abayobozi bayo bicwa. Twibuke ko abicwa barimo abicwa urubozo n’abicwa bakavaho. Ugira abo bavuzwe bose imbohe yibwira ko ari inyaryenge, nyamara siko bimeze, ahubwo ni inyangabirama! Nabohore abo yaboshye amayira akigendwa niba ashaka amahoro! Kandi n’abagizwe imbohe barakangurirwa kugira ubutwari bwo kwirwanaho no kwiyambaza inzira y’urugamba rwo kwihagararaho no kwibohora! Urugamba ruzira utuzi rukazira udufuni, urugamba ruzira amabombe n’amasasu, ruzira n’imipanga, ariko rukaba urugamba rw’abadakangishwa ibyo byose. Urukundo burya ruzimya amabombe yaka umuriro, rukubitira ahabona ubugome n’ubutindi. 

Abanyarwanda turagirwa inama yo kwitoza kugenda mu bwoko bwose bw’inzira no kutazongwa n’uburebure bw’inzira. Dukwiye kumenya ko amayira yose atagendwa kimwe. Dukwiye kumenya ko buri nzira igira ingendo iyibasha. Ngiyi impanuro ikaba n’impamba y’amahina. Ibanga ry’urugamba rwo kwiyemeza gukora igikwiye mu gihe gikwiye. 

Imana iragahora itaha iwacu i Rwanda.

Wowe usoma ubu butumwa ni wowe ubwirwa, wowe usomerwa ubu butumwa ni wowe ubwirwa, wowe wumva ubu butunwa ni wowe ubwirwa, nanjye utanze ubu butumwa ni jye ubwirwa. Nihagire igikorwa.

Nimugire amahirwe

Nimuhorane Amahirwe

Prosper Bamara

Mu Kinyarwanda bacaga umugani bagira bati: Akumiro ni amavunja! Mu byukuri babaga bashaka kwerekana ko amavunja ari indwara mbi ariko iterwa n’umwanda kandi ushobora kwirindwa. Umuntu rero urwara amavunja birashoboka ko yagerageza akirinda uwo mwanda maze agasa n’abandi.

Uyu mugani ariko ushobora no kuwukoresha no mu buzima busanzwe. Cyane cyane iyo wumijwe n’ibintu bikabije kuba bibi byakabaye byakosorwa. Aha ndavuga ibikorwa cyangwa se amagambo mabi atakabaye avugwa. Ni muri urwo rwego rero ntangazwa buri gihe n’amagambo avugwa n’uyu mugabo wahoze mu zari ingabo za RPA (Rwandan Patriotic Army) ariwe Major Theogène Rutayomba ubu akaba abarizwa mu muryango wa RNC (Rwanda National Congress).

Mwibuka muri benshi amagambo aherutse kuvugira kuri radio Itahuka avuga ngo abahutu 80% barishe! Gusa mushimira ko yahise yivuguruza bitarenze kabiri, maze ibyari 80% bihinduka hagati ya 10% na 15% nubwo njyewe nabyo ntabyemera keretse umunsi hashyizweho komisiyo itagize aho ibogamiye maze tukamenya ukuri nyako.

Ikinteye kwandika iyi nyandiko rero nuko uyu mugabo yirengagiza ukuri kandi akuzi(niko ntekereza), ndetse ukumva akoresha imvugo ikanganye cyane ivanze no kwishongora kuburyo wakeka ko akibeshya ko akiri muri RPA!

Mu kiganiro aheruka kugirana na radiyo yitwa Ikondera Libre, Major Rutayomba abajijwe niba yarabwiwe ibyihanurwa ry’indege ya Habyarimana yagize ati: ” Ubwo se bagombaga  kubitubwira? Cyangwa twari tubizi! Ntabyo batubwiye twari tubizi. Njyewe ntawabimbwiye nari mbizi. Ubwo mu magambo make ni ibyo ngibyo. Ntawabimbwiye nari mbizi ko izagwa(indege). Yego wenda nshobora kuba ntarinzi umunsi, ariko byibura mu minsi itatu, njyewe nari mbizi. Ibikoresho birasa indege nitwe twabipakiye“! 

Major Rutayomba kandi akomeza yemeza ko uwari umuyobozi we atari abizi! Tubibutse ko Major Rutayomba yari akuriye umutwe ushinzwe kurinda umuyobozi wari uwa DMI (Directorate of Military Intelligence) ariwe General Kayumba Nyamwasa. Major Rutayomba yagize ati:”Umuntu witwa general Kayumba Nyamwasa yabaga mu mishyikirano. Niyo yazaga ku mulindi yazaga muri consultation icyumweru, iminsi ingahe bagahita basubirayo… Kayumba se ubundi yari kubirwirwa ni iki, na nde kandi yari mu mishyikirano? Ibintu byakorwaga muri CND (Conseil National de Development), byakorwaga na Kabarebe, Kagame na Kayonga“.

Ubwo se koko ibyo bikoresho bihanura indege byageze muri batayo yari iyobowe na general Kayumba Nyamwasa atabizi koko???

Igitangaje ariko, mu kiganiro mbarankuru general Kayumba Nyamwasa yagiranye na Jane Corbin umunyamakuru ukora inkuru zicukumbuye mu cyo yise “Rwanda’s untold story” aribyo bivuze ngo “Ibitaravuzwe ku Rwanda” uyu mugabo wahoze ayobora DMI ndetse n’igisirikare cyose muri rusange yabivuze ukundi.

Jane Corbin yabajije general Kayumba niba yaba azi uri inyuma yihanurwa ry’indege ya Habyarimana maze asubiza muri aya magambo:”Ni Paul Kagame. Ntagushidikanya. Yego nibyo ijana ku ijana 100%“. Jane Corbin arongera ati: Wari munama iyo migambi itegurwa? Nyamwasa ati:”Yego nari… ndabizi. Nari mu mwanya wo kubimenya. Na we (Kagame) arabizi ko nari mu mwanya wo kubimenya“. Jane Corbin arongera ati: Nuramuka ubibwiye umucamanza nawe bikaba byagushinja waba witeguye kubivuga? Kayumba ati: ” Mhh… yego. Birumvikana nibiramuka najye bimpama, kuberaki se ntabivuga? Nkeka ko ukuri ariko gukenewe“.

Nonese koko ubu iyo Major Rutayomba yihanukira akavuga ko shebuja Nyamwasa atari kubimenya kandi nyiri ubwite avuga ko yari mu mwanya mwiza wo kubimenya, aba ashaka kuvuga iki? Kandi ariko nibwira ko ari ubuhenda abana, kuko ntakuntu Major Rutayomba yari kubimenya mbere y’iminsi itatu nk’uko abyivugira haruguru, maze umuyobozi we ntabimenye!

Gusa kongera kuvuga ku iraswa ry’indege sicyo nari ngambiriye cyane kuko byagarutsweho kenshi. Gusa sinari kureka bigenda gutyo gusa cyane ko uyu mugabo akunda kwivuguruza cyane kandi twese tuzi icyo DMI yari cyo, ndetse nuyu munsi iyo DMI yirirwa icura inkumbi.

Nakwibutsa kandi Major Rutayomba ko turi mu isi y’ikorana-buhanga (Wolrd Digital) aho udashobora guhisha ikintu uko wishakiye. Mu minsi ishize nigeze kubabwira ko dukwiye kwitondera ibyo tuvugira ku mbuga nkoranya-mbaga. Nkubu ibyo tuvuga, twandika ntaho bijya rero dukwiye kwitondera ibyo dutangariza abatwumva. Ikindi kandi abanyarwanda bubu barajijutse batandukanye n’abanyarwanda bo hambere.

Ikindi kandi nta muntu uyobewe uwahanuye indege ya Habyarimana nabo bari kumwe. Gusa mbona abanyarwanda atari nabyo dukeneye cyane kuko abantu bacu bapfuye kugeza na nubu ntibateze kugaruka. Gusa dukeneye ukuri kandi mbona ariko kuzakiza abasigaye ndetse bikazafasha n’abazadukomokaho.

Ikindi kandi nakwibwirira Major Rutayomba, ni uko Abanyarwanda bazi ukuri. Abatutsi, Abatwa n’Abahutu buri wese azi uwamwiciye. Gusa tubonye amakuru yinyongera kubyo tuzi kandi yivugiwe namwe mwabonaga aho bitegurirwa byakomora imitima ya benshi. Kwirirwa mwisobanura mushaka gusisibiranya ibimenyetso ntacyo bizatumarira ndetse namwe ubwanyu.

Ikindi kandi nabwira general Kayumba Nyamwasa ndetse na Major Rutayomba nuko gukora politiki yubakiye kubinyoma ntaho izageza u Rwanda. Abagize uruhare bose mw’iyicwa ry’Abanyarwanda bakagombye kuvugisha ukuri maze uwakosheje wese (umuhutu & umututsi) akabihanirwa cyangwa akababarirwa ariko abanje gusaba imbabazi abahemukiwe kuko dushaka kubaka ubumwe n’ubwiyunge.

Ni mureke gukomeza kwigiza nkana ngo iyicwa ry’abahutu ntiryari rigambiriwe. Koko Nyamwasa we ngo abahutu barapfuye ariko ntibyari bigambiriwe!!! Ubu se za nama mwakoreshaga mwarangiza mugatsemba no kugeza kunda ivuka byabaga byateguwe nande?Iyo biba gutungurana ntabwo byajyaga gukorwa muburyo bumwe kandi mugihugu hose. Kuko muri hanze y’u Rwanda muti byakozwe na Kayonga, Kagame na Kabarebe! Ubu Kayonga na Kabarebe nabo bahunze bavuga ko ari Kagame! Kagame yahunga nawe ati ni Rwigema na Kayitare!!

Twibutse abantu kandi ko izi nama zabyaye kwitaba Imana zateguwe neza mu gihugu hose ndete no kugera muri Congo. Hari nandi makuru yagiye agaragara mu gihe Genocide yakorwaga aho hagiye hagaragara ibyobo binini mu ngo zimwe na zimwe z’Abatutsi kuburyo nabyo bikwiye kuzakorwaho ubushakashatsi maze ukuri nyako kukajya ahagaragara.

Banyarwanda ba nyarwandakazi, yaba abato ndetse n’abakuru mureke duhagurukire rimwe nk’abitsamuye turwanye imbuto z’umwijima maze twubake u Rwanda runogeye buri wese. Yaba umututsi, yaba umuhutu n’umutwa ndetse n’abanyamahanga twese twisanzure mu gihugu cyacu maze dutahirize umugozi umwe. Nimuhagurukire rimwe twamagane ikinyoma kandi duce umuco wo kudahana. Nimureke tubwizanye ukuri kandi dufate mu mugongo uwahohotewe kandi twige no kubabarira abaduhemukiye ariko gusabana imbabazi tuvugisha ukuri ni byo bizubaka umuryango nyarwanda.

Mugire amahoro.

Umusomyi

ITANGAZO RIGENEWE ABANYAMAKURU RYO KUWA 01 KAMENA 2020

Mu rwego rwo gukumira ikwirakwizwa ry’icyorezo cya COVID-19, Leta y’u Rwanda yatangaje ku italiki ya 21 Werurwe 2020 ibihe by’amage byubahirijwe mu nkiko zose z’u Rwanda.

Nk’uko abatavugarumwe na Leta y’u Rwanda baba mu Rwanda batahwemye kubivuga, iki cyemezo cyagize ingaruka zikomeye ku mubare mu nini w’Abanyarwanda  bari batunzwe no guca inshuro buri munsi mu gihe Leta y’u Rwanda itari yarateganyije uburyo bwo kubatunga nk’uko mu bindi bihugu byagenze.

Uko iminsi yagiye ihita , Leta y’u Rwanda yaje kuva ku izima  maze yoroshya ibyemezo bimwe bijyanye n’ibihe by’amage harimo kureka imirimo imwe n’imwe igasubira gukorwa, nk’uko byemejwe n’Inama ya Leta yo kuwa 30 Mata 2020.

Kuva Leta y’u Rwanda yafata icyo cyemezo biragaragara ko iki cyorezo kitibasiye abantu nk’uko imibare itangwa na Minisiteri y’Ubuzima ibyerekana ahubwo imibare y’abandura iragabanuka ari na ko iy’abakira nayo igenda yiyongera naho kugeza ubu hakaba hamaze gupfa umuntu umwe na we wanduriye hanze y’u Rwanda.

Abatavugarumwe na Leta y’u Rwanda baba mu Rwanda barasanga ibihe by’amage bigomba kuvaho burundu kuko bibangamiye uburenganzira bw’ibanze bw’Abanyarwanda burimo  cyane cyane uburenganzira  bwo kujya aho umuntu ashaka nta nkomyi, uburenganzira bwo gukora kugirango yibesheho, uburenganzira bwo gusenga, uburenganzira bwo gukoresha ubukwe n’ubwo kwidagadura  byose bikajyana no gukuraho amasaha y’umukwabo. 

Abatavuga rumwe na Leta y’u Rwanda barasaba ko Abanyarwanda basubizwa uburenganzira busesuye bari barambuwe muri ibi bihe by’amage bibutsa ko byanakozwe hirengangijwe Itegeko Nshinga. 

Mu gusoza, abatavurumwe na Leta y’u Rwanda baba mu Rwanda barasaba  Abanyarwanda gukomeza kubahiriza ingamba zo kwirinda icyorezo cya COVID-19 zirimo kwambara agapfukamunwa, kutegerana no kwitabira isuku. Barasaba bakomeje Abanyarwanda  kumva ko aribo bagomba gufata iya mbere mu kubungabunga ubuzima bwabo birinda icyi cyorezo. 

Bikorewe i Kigali, kuwa 01 Kanama 2020

Mme Victoire INGABIRE UMUHOZA

Prezidate wa DALFA UMURINZI (Sé)

Me NTAGANDA Bernard

Prezida Fondateri wa PS Imberakuri (Sé)

Amerika n’Ubwongeleza bati twibuke jenoside yo mu Rwanda tutavangura abayizize

Ku wa 20 mata 2020 ba Ambasaderi wa Leta zunze ubumwe za Amerika n’Ubwongeleza bandikiye Perezida w’Inama Rusange y’Umuryango w’Abibumbye bavuga ko abazize jenoside yo mu Rwanda atari Abatutsi gusa kandi ko n’abandi bagomba kwibukwa.

Ni ubwa mbere ibi bihangange byashyigikiye Leta ya FPR/DMI byerura bikavuga ko bitemera inyito Paul Kagame yemeje amahanga.

Dr Theogene Rudasingwa, Umuyobozi mukuru w’Ishakwe Rwanda Freedom Movement aradusesengurira icyo izo mvugo zihatse n’ingaruka zizagira kuri politiki ya jenoside yo mu Rwanda.

Aributsa kandi ko muri 2014 yandikiye abayobozi bakuru b’ibyo bihangage abereka ko inzira bashyigikiramo u Rwanda izateza izindi ngorane mu gihugu.

Niba ba mpats’ibihugu bakangutse, nibakangukane ishema n’isheja maze baharanire ku mugaragaro ko abishwe bose bazira ubwoko bwabo bibukwa nta vangura.