Kw’itariki ya 25 Gicurasi, umuyobozi wa CNLG, Dr Jean-Damascène BIZIMANA, yasohoye inyandiko yise “Abahakana jenoside yakorewe Abatutsi mu rugamba rwo kubeshya ko bacitse kw’icumu rya jenoside yakorewe Abatutsi no guhimba indi jenoside itarabayeho”.

Muri iyo nyandiko, Dr Jean-Damascène BIZIMANA yagarutse cyane ku kiganiro urubyiruko ruba mu mahanga rwakoresheje ku mbuga nkoranyambaga, aho rwifuzaga kwibuka, rutitaye ku moko, inzirakarengane zose zahitanywe n’amahano yagwiririye u Rwanda mu myaka ya za 90.

Icyo kiganiro, cyiswe “RIBARA UWARIRAYE”, cyaranzwe n’ubuhamya bw’abacitse kw’icumu baturuka mu moko atandukanye, harimo abarokotse jenoside yakorewe Abatutsi, jenoside yakorewe Abahutu, ibyaha ndengakamere bikorwa mu gihe cy’intambara n’ubwicanyi bushingiye ku mpamvu za politiki.

Icyo kiganiro cyamaze amasaha atatu n’igice. Uwashaka kongera kugikurikira, yagisanga aha hakurikira: 

Mu nyandiko ye yo kunenga icyo kiganiro, Dr Jean-Damascène BIZIMANA yagarutse ku buhamya bwatanzwe n’abacitse kw’icumu rya FPR-INKOTANYI.

Yanditse avuga ko “NTA JENOSIDE YIGEZE IKORERWA ABAHUTU MU MATEKA Y’U RWANDA”.

Turifuza natwe kugaruka ku byo Dr Jean-Damscène BIZIMANA yasobanuye kuri jenoside yakorewe Abahutu, kuko hari byinshi yanditse biteye kwibaza.

Icya mbere ni uko Dr Jean-Damascène yabanje kwibutsa ko mu mategeko mpuzamahanga, “jenoside ari icyaha gitegurwa”. Nyamara, ibi ntaho byanditse na busa mu mategeko mpuzamahanga, nk’uko buri wese ashobora kubyisomera kuri site ya OHCHR (1).

Icyaha cya Jenoside cyirangwa n’ibintu bibiri:

1. Kwibasira abantu ubaziza ubwene gihugu, ubwoko, ibara ry’uruhu cyangwa idini ryabo
2. Kuba ugamije kubarimbura bose cyangwa kugabanya umubare wabo

Ntibyumvikana ko umuyobozi mukuru wa CNLG, uvuga ko afite impamyabumenyi yo mu cyiciro cya gatatu (PhD) mu by’amategeko, ashobora kuba atarasobanukirwa n’amategeko mpuzamahanga agenga icyaha cya jenoside!

Icya kabiri Dr Jean-Damascène BIZIMANA yanditse kuri jenoside yakorewe Abahutu, ni uko « nta mugambi wa jenoside wigeze uranga FPR-INKOTANYI ».

Usibye ko amategeko mpuzamahanga ntaho avuga ko hakenewe umugambi kugira ngo icyaha kitwe jenoside, aha turibaza impamvu Dr Jean-Damascène BIZIMANA yihutiye kwemeza ko « nta mugambi wa jenoside wigeze uranga FPR-INKOTANYI », mu gihe yasubizaga abacitse kw’icumu rya FPR-INKOTANYI ?

Yaba se yarashakaga gusobanurira Abanyarwanda ko ingabo za FPR-INKOTANYI zishe Abahutu zitabishaka ? 

Uretse n’ibyo, biratangaje kubona ko ari umuyobozi wa CNLG, ufata iyambere mu gushinjura FPR-INKOTANYI, kandi ibi ari akazi k’abunganira FPR-INKOTANYI.

Mu nshingano zayo (2), CNLG nta na hamwe yigeze ihabwa kurengera FPR-INKOTANYI cyangwa ishyaka iryo ari ryo ryose, ku buryo umuntu yakwibaza niba CNLG itica amatageko ya Repubulika y’uRwanda, no kugeza kw’itegeko nshinga, cyane cyane mu ngingo ryayo rya 16, rirebana no kwirinda ivangura mu Banyarwanda ! 

FPR-INKOTANYI ni yo yonyine igomba gusobanurira Abanyarwanda ibijyanye n’ubwicanyi bwayiranze nk’uko ejo bundi umwe mu bayobozi bakuru bayo (James KABAREBE) yasobanuriraga urubyiruko impamvu ku rugamba ngo byabaye ngombwa ko ingabo za FPR zirasa abasivili. Hari mu nama yahuje urubyiruko rwa AERG ku italiki ya 16/11/2019 i Kigali (3).

Icya gatatu Dr Jean-Damascène BIZIMANA yanditse kuri jenoside yakorewe Abahutu ni urutonde rw’ibibazo twese twibaza kandi bikeneye ibisubizo kugira ngo ubwo bwicanyi busobanuke.

Yagize ati : « Niba jenoside yakorewe Abahutu yarabaye, yateguriwe hehe? Ryari ? Yahagaritswe nande ? »

Uretse icyo kibazo cya nyuma gisa nk’ikitwumvisha ko jenoside iba jenoside ari uko hari umuntu wayihagaritse, ibi bibazo bya Dr Jean-Damascène BIZIMANA kuri Jenoside yakorewe Abahutu bifite ishingiro koko. 

Muri iyi myaka 26 ishize, hagiye hagaragara abashakashatsi, impuguke, inzobere, abacamanza, abanditsi, abacitse kw’icumu, ndetse n’abatangabuhamya bahoze mu gisirikare cya FPR-INKOTANYI bagerageje gusubiza ibyo bibazo. Ingero twatanga ni izi zikurikira: 

• Abahoze mw’iperereza ry’urukiko mpuzamahanga rwa Arusha, batanze amaraporo avuga ukuntu abasirikare ba FPR-INKOTANYI bicaga abahutu mu buryo bwa jenoside. Hari muri 1997.
• Umucamanza w’umwespanyoli witwa Fernando ANDREU MERELLES, yagerageje kubisubiza abishyikiriza ubutabera mpuzamahanga, aho yasohoye impapuro zo guta muri yombi abacyekwagaho gutegura no gushyira mu bikorwa jenoside yakorewe Abahutu. Hari muri 2008.
• Impuguke za LONI zikurikira ibijyanye n’uburenganzira bwa muntu zakoze raporo ikomeye cyane ku bwicanyi bwakorewe impunzi z’Abahutu muri Congo hagati y’imyaka ya 1993 na 2003, ariyo Mapping Report yasohotse muri 2010.
• Uwahoze ari Umunyamabanga Mukuru wa FPR-INKOTANYI, Théogène RUDASINGWA, yaje kwemeza ko “urwego rwa gisirikari rw’ubutasi (Directorate of Military Intelligence, DMI) umutwe wa FPR” rwakoraga jenoside ku bahutu mu gihe yari ari muri biro politiki ya FPR-INKOTANYI. Na n’ubu aracyabyemeza. Hari muri 2016.
• Umushakashatsi w’umunya canada witwa Judi Rever yagerageje na we gusubiza ibyo bibazo mu gitabo yanditse cyitwa « In Praise of Blood, the crimes of Rwandan Patriotic Front”, hari muri 2018.
• No kugeza magingo aya, buri munsi haboneka abarokotse ubwicanyi bwakorewe Abahutu bagatanga ubuhamya bwerekeza ku bikorwa bya jenoside kandi bukaza bwuzuza ubuhamya bw’abahoze mu gisirikare cya FPR-INKOTANYI. Ubwa nyuma byabaye hari kuya 1 gicurasi w’uyu mwaka, mu gitaramo cyiswe “MPORE 2020”

Abanyarwanda benshi barokoste ubwicanyi bwa FPR Inkotanyi ntibashobora gutanga ubuhamya kubera ubutegesti bw’igitugu cya FPR, ariko bagize uburyo bwo kubutanga byafasha cyane mu guhoza imitima no kuzana ubwiyunge nyabwo mu Rwanda.

Ndetse n’Amahanga atangiye gusobanukirwa n’akamaro ko guha agaciro inzirakarengane zose zahitanywe n’amahano yagwiriye u Rwanda, nk’uko biherutse gukorwa na Leta zunze ubumwe z’Amerika, u Bwongereza n’ubuyapani mu nyandiko batanze muri Loni (4)!

Icya kane Dr Jean-Damascène BIZIMANA yanditse, ni uko hari abasirikare ba FPR-INKOTANYI bakoze “ibyaha”, ariko ngo bakaba barabihaniwe ndetse baranabirasiwe.

Na none biratangije kubona ko ari umuyobozi wa CNLG ujya gusobanura ibyaha byakozwe n’ingabo za FPR-INKOTANYI. Nibuze, bizatuma dushobora kubaza ibi bikurikira abahoze mu buyobozi bw’ingabo za FPR-INKOTANYI:

• Hishwe inzirakarengane Abahutu zingahe? Ahagana he? Ryari?
• Ese impfumbyi n’abapfakazi babaye abande? FPR-INKOTANYI yabageneye iki?
• Ese abo basirikare bahanishijwe urwo gupfa, imiryango yabo yarabimenye?
• Ese abo Bahutu baziraga ubusa bahambwe hehe? Bibukirwa hehe?

Dr Jean-Damascène BIZIMANA aha yakomoje ku byo Abanyarwanda benshi basigaye bibaza, ku buryo byaba byiza abisobanuye mu buryo burambuye, nibuze izo nzirakarengane Abahutu zigahabwa agaciro.

Mu gusoza inyandiko ye ku bwicanyi bwakorewe Abahutu na FPR-INKOTANYI, icya gatanu, ari nacyo cyanyuma, Dr Jean-Damascène BIZIMANA yageze aho yemeza ko abasirikare b’inkotanyi “bihoreraga”, kandi ko babikoraga nubwo “ubuyobozi bw’ingabo za FPR zari zarababujije kuva urugamba rwatangira”.

Iyi mpamvu itanzwe na Dr Jean-Damascène BIZIMANA, nyamara ntacyo ihindura ku buremere bw’ubwicanyi bwakorewe inzirakarengane Abahutu.

Kuva abo basirikare ba FPR-INKOTANYI baricaga Abahutu:

1. babaziza kuba Abahutu, kandi batarobanuye abagabo, abagore, abana, abasaza n’abakecuru,
2. bagamije kubarimbura bose cyangwa kugabanya umubare wabo,

Icyo gihe rero bakoraga jenoside ku Bahutu nk’uko amategeko mpuzamahanga abisobanura.

Ni ngombwa rero ko Dr Jean-Damascène BIZIMIANA, ushinzwe kurwanya ingengabitekerezo ya jenoside mu Banyarwanda, yasobanura kurushaho ubu bwicanyi bw’ingabo za FPR-INKOTANYI “zihoreraga”, kugira ngo ayo mahano yo kurimbura Abahutu adakomeza kwitirirwa abayoboke basanzwe ba FPR-INKOTANYI.

Igihe kirageze ngo amahano yakorewe Abanyarwanda bose mu myaka ya za 90 asobanuke neza, maze tugatangira kubaka ejo hazaza dushingiye ku mateka yuzuye. 

JAMBO ASBL
Perezida w’inama y’abayobozi
Robert MUGABOWINDEKWE 

Sources:

1. https://www.ohchr.org/FR/ProfessionalInterest/Pages/CrimeOfGenocide.aspx
2. https://cnlg.gov.rw/fileadmin/templates/documents/Law_establishing_CNLG.pdf
3. https://youtu.be/SEYYboG8iRw?t=44
4. https://igihe.com/amakuru/u-rwanda/article/amerika-n-u-bwongereza-byongeye-kuzamura-inyito-yakuweho-ya-jenoside-yakorewe</li>

20200531 – icyo JAMBO asbl ivuga kunyandiko ya BIZIMANA-CNLG

Yanditswe na Marc Matabaro

Amakuru aturuka mu gihugu cy’u Bubiligi aravuga ko Leta y’u Rwanda yirukanye ku butaka bwayo ababiligi 2 bari bahagarariye igihugu cyabo i Kigali.

Abo birukanywe ni ushinzwe ubutwererane mu bya gisirikare (attaché militaire) n’umunyamabanga wa mbere (premier secrétaire)

Nk’uko amakuru agera kuri The Rwandan abivuga ngo aba babirigi birukanywe na Leta y’u Rwanda mu kwezi kwa Mata 2020 babuze uko bataha mu gihugu cyabo kubera icyorezo cya Covid-19 cyatumye ingendo z’indege zihagarikwa mu rwego mpuzamahanga ku buryo bashoboye kubona indege ibacyura iwabo kuri uyu wa gatandatu tariki ya 30 Gicurasi 2020!

Amakuru atangazwa na bamwe mu bahagarariye ibihugu byabo mu Rwanda avuga ko abo babirigi bazize kuba baragiye kunamira ahiciwe abasirikare b’ababiligi 10 muri Camp Kigali mu 1994 muri iki gihe cya Guma mu rugo mu muhango wamaze igihe gito.

Nk’uko ayo makuru akomeza abivuga ngo ntabwo birukanywe kuko bishe amategeko ya Guma mu rugo ahubwo bazize ko bagiye kwibuka tariki ya 6 Mata 2020!

Kujya kwibuka kuri iyi tariki bikunze gusharirira abayobozi b’u Rwanda ku buryo babifata nk’icyaha gikomeye badatinya kwita “gupfobya Genocide yakorewe abatutsi”, ibi bikaba bifatwa n’abo bayobozi nko kwibuka Perezida Habyalimana n’abo bari kumwe bishwe kuri iyo tariki ya 6 Mata 1994.

Muli iki kiganiro, abatumirwa Bwana Théobal Rutihunza na Bwana Marcel Sebatware, baranenga Raporo y’iperereza ryakozwe na CNLG – JENOSIDE YAKOREWE ABATUTSI MU YAHOZE ARI PEREFEGITURA YA CYANGUGU.

Barasanga CNLG, aho kugaragaza urutonde rw’abishwe, ababishe, ibimenyetso nyakuri n’ubuhamya budahatiwe ngo bunagorekwe, ahubwo CNLG yagiye itangaza amarangamutima yayo gusa ashingiye gufasha FPR kuguma ku butegetsi, iyo raporo iyuzuzamo amazimwe n’ibinyoma, hagamijwe gusiga ibyaha ababangamiye FPR.

Icyo JAMBO asbl ivuga kunyandiko ya Dr Jean-Damascène BIZIMANA, umuyobozi wa CNLG, aho yagarutse ku bwicanyi bwakorewe ABAHUTU na FPR-INKOTANYI

Yanditswe na Ben Barugahare

• Kuva ahagana byibuze muri 2008, Ubushinjacyaha bw’urukiko mpuzamahanga mpanabyaha rwashyiriweho u Rwanda rwakoreraga Arusha (ICTR) bwari buzi aho Kabuga Félicien aherereye
• Muri 2011, mu rukiko mpuzamahanga mpanabyaha rwashyiriweho u Rwanda (ICTR) habaye urubanza muri dosiye ya Kabuga rugamije kubika ibimenyetso bizakoreshwa mu rubanza ruzaza
• Ubushinjacyaha bw’urukiko mpuzamahanga mpanabyaha rwashyiriweho u Rwanda mu by’ukuri bwasabye ko haba urwo rubanza atari ukugirango habikwe ibimenyetso ahubwo bwashakaga kumenya niba koko hari ibimenyetso bifatika byatuma Kabuga ahamwa n’ibyaha
• Ubushinjacyaha bumaze kubona ko nta bimenyetso bifatika, bwasanze nta mpamvu ndetse nta n’inyungu byo gufata Kabuga ngo aburanishwe icyo gihe.
• Bwahisemo kumufata ubu kuko bukeka ko kubera imyaka afite n’ubuzima bwe muri iki gihe bishobora kuzatuma urubanza rutaba.

Urukiko Mpuzamahanga Mpanabyaha rwashyiriweho u Rwanda (ICTR) rwari rufite icyicaro i Arusha muri Tanzania, n’Urukiko Mpuzamahanga Mpanabyaha rwashyiriweho Yugosalaviya (ICTY) rwari rufite icyicaro i La Haye mu Buhorandi byashyizweho n’Umuryango w’Abibumbye (ONU) ngo biburanishe abagize uruhare muri Genocides zakorewe muri ibyo bihugu, zasoje imirimo yazo muri  ICTR muri 2015 naho ICTY muri 2017 zisimburwa n’ Urwego Mpuzamahanga Rwashyiriweho Gukora Imirimo y’Insigarira y’Inkoko Mpanabyaha (IRMCT) rufite icyicaro gikuru i La Haye, rukaba rugizwe n’amashami abiri, irikorera i La Haye ryasigariye ICTY n’irikorera Arusha ryasigariye ICTR.

Kabuga Felisiyani, yari mu bashakishwa na ICTR, afite dosiye ICTR-98-44B. Leta Zunze Ubumwe za Amerika (USA) zari zarashyizeho igihembo cya miliyoni eshanu z’ amadorali ya Amerika (US$ 5.000.000) ku muntu uzatanga amakuru yatuma Kabuga afatwa. Byakomeje kujya bivugwa rero ko aho Kabuga ari hatazwi kugeza ubwo amakuru atunguranye yasakaye mu kwezi kwa Gatanu 2020 ko Kabuga yafatiwe mu Bufaransa (France). 

Ikigaragara ni uko ibyavugwaga byose ko aho Kabuga ari hatazwi bitari ukuri, ndetse bikaba bitumvikana ukuntu igihugu cy’igihangange nka Amerika, cyashoboye gutahura, gufata cyangwa se kwivugana ibikomerezwa mu iterabwoba nka Osama Bin Laden n’abandi, cyananiwe kubona umuntu nka Kabuga, ndetse n’ibihembo icyo gihugu cyashyizeho ntibigire icyo bitanga. Ikiri ukuri ni uko Amerika yamenye ukuri kuri genocide yakorewe mu Rwanda mu myaka ya 1994 nyuma yo gusuzuma amakuru yose ifite kuri ako kaga kagwiriye u Rwanda ku buryo ubu igeze aho gusaba amahanga ko ibyabaye mu Rwanda muri 1994 “byavugwa ukuri uko byabaye”. Bityo rero Amerika ibyo gushakisha Kabuga yabishingutsemo kera.

Kuva byibuze ahagana muri za 2008, Ubushinjacyaha bwa ICTR bwari buzi aho Kabuga aherereye. Ibi bigaragazwa n’uko mu gihe ubu Bushinjacyaha byasabaga urukiko muri 2011 ko muri dosiye ya Kabuga habaho urubanza rugamije gukusanya no kubika ibimenyetso byazakoreshwa mu gihe urubanza rwe rwaba rubaye, bwemeje ko bufite amakuru y’impamo ko Kabuga yavuye muri Kenya muri 2008.

Aha umuntu akibaza ukuntu byashoboka ko bwaba butarashoboye kumenya aho yanyuze asohoka muri Kenya, aho yerekeje ndetse n’amazina yaba yarakoresheje kuko ahubwo aya makuru ariyo yibanze umuntu aheraho ashingiraho yemeza ko umuntu runaka yasohotse mu gihugu iki n’iki.

Ubushicyaha bwa ICTR ntibwigeze bubura Kabuga ahubwo bushingiye ku bimenyetso bwari bufite, bugendeye ku isura Kabuga yari yarahawe nk’umuntu watumye genocide ishoboka mu Rwanda, bwasanze kumufata akaburanishwa bishobora kuba byatuma hahinduka byinshi ku kuntu abanyarwanda n’amahanga bumva genocide ya 1994 nk’uko isobanurwa n’ubutegetsi bw’u Rwanda. Akaba ari mu rwego rw’imikoranire ya hafi yaranze Kigali n’Ubushinjacyaha bwa ICTR, ubu bushinjacyaha bwabaye buretse gufata Kabuga ngo ikibyimbye kitameneka! 

Ubushinjacyaha bwa ICTR rero bwasabye urukiko muri 2011 ko habaho urubanza rugamije kubika ibimenyetso, bwarabyemerewe maze urwo rubanza ruba guhera kuwa mbere tariki 23 Gicurasi 2011. Aho Ubushinjacyaha bwahamagaje abatangabuhamya barimo abari bafungiwe mu Rwanda 12.

Kabuga yagenewe n’urukiko abavoka bahagararira inyungu ze muri urwo rubanza. Ibimenyetso byagaragaye muri urwo rubanza byakomeje gushimangira ko bitatuma Kabuga ahamwa n’icyaha na kimwe aregwa bituma Ubushinjacyaha bukomeza icyemezo cyo kutamufata ngo aburanishwe. 

Impamvu rero igaragara yaba yaratumye Kabuga afatwa ubu ni uko bukeka ko imyaka agezemo n’ubuzima bwe muri iki gihe bishobora kuzatuma ataburana kuko aramutse aburanye byahindura byinshi ndetse no ku murage (legacy) urukiko mpuzamahanga ruzasiga.

Umucamanza w’urukiko rw’imanza z’iterabwoba ruri i Nyanza mu majyepfo y’u Rwanda yavuze ko urubanza ruregwamo Nsabimana Callixte uzwi nka ‘Sankara’ rwari rugiye kuba rusubitswe kubera kutagera ku ikoranabuhanga kw’abaregera indishyi bari i Rusizi.

Nsabimana Callixte wari umuvugizi w’inyeshyamba za FLN zirwanya leta y’u Rwanda aregwa ibyaha 17 bishingiye ku bitero ku Rwanda n’ibikorwa by’izo nyeshyamba.

Uyu munsi ku wa kane, hari gukoreshwa ikoranabuhanga mu iburanisha mu rwego rwo kwirinda coronavirus.

Abacamanza batatu n’ubwanditsi mu cyumba cy’iburanisha i Nyanza, uregwa muri gereza ya Mageragere i Kigali n’abaregera indishyi i Rusizi, bagahuzwa na Skype.

Muhima Antoine wari kuyobora iri buranisha amaze kwinjira mu cyumba cy’iburanisha yavuze ko hano ku rukiko no muri gereza ya Mageragere bari biteguye nta kibazo.

Avuga ko urubanza rusubitswe kuko abaregera indishyi bari i Rusizi badashobora kuhava kubera ingamba zahafatiwe, kandi badashobora kugera kuri iryo koranabuhanga.

Iburanisha riheruka kuri uru rubanza ryabaye mu kwezi kwa mbere aho humviswe ubushinjacyaha burega Nsabimana Callixte.

Icyo gihe, Bwana Nsabimana ahawe ijambo, yavuze ko ibyaha 17 byose yarezwe n’ubushinjacyaha abyemera ndetse abisabira imbabazi.

Gusa Nsabimana yahakanye ko ari mu bashinze umutwe wa FLN kandi ko nta ruhare yagize mu bitero byishe abantu.

Uru rubanza rwari gukomeza tariki ya 31/03/2020 ariko icyo gihe mu Rwanda ibikorwa byose byari byarahagaritswe (lockdown) kubera coronavirus, rwimurirwa uyu munsi.

Umucamanza Muhima Antoine uyu munsi yavuze ko uru rubanza rwimuriwe tariki 08 y’ukwezi gutaha kwa karindwi uyu mwaka.

Avuga ko bizeye ko ingamba zafatiwe akarere ka Rusizi icyo gihe zizaba zarorohejwe n’ababuze ikoranabuhanga uyu munsi babashije kurigeraho.

Inkuru dukesha Jean Claude Mwambutsa umunyamakuru wa BBC Gahuzamiryango i Nyanza

Urukiko rw’Ubujurire mu Bufaransa rwafashe icyemezo cyo kwohereza Felisiyani Kabuga kuburanishirizwa mu rukiko mpuzamahanga rwa ONU.

Umucamaza yanzuye ko nta mbogamizi z’ubuzima zabuza Felisiyani Kabuga kuburanishwa n’urukiko rwatanze urupapuro rwo kumufata.

Abunganira Felisiyani Kabuga bari bagaragaje ko ashaje, afite imyaka 87 kandi akaba anarwaye. Felisiyani Kabuga yavugaga ko urukiko mpuzamahanga rutarangwa no kutangira aho rubogamira.

Kabuga aracyafite ububasha kwo kujurira

Abamwunganira baravuga ko bazajurira, bakaba barimo bitegura kujya mu rukiko rusesa imanza. Ari abunganira Felisiyani Kabuga, kimwe n’umuryango we, babwiye Ijwi ry’Amerika ko ntacyo batangaza.

Ku ruhande rw’Urwego rwa ONU, rwasigariyeho urukiko mpuzamahanga mpamanyaha rwashyiriweho u Rwanda, nabo babwiye Ijwi ry’Amerika ko badashobora kugira icyo batangaza kubera kubaha inzego zo mu Bufaransa zigomba kurangiza imirimo yazo cyane cyane ko Kabuga Felisiyani afite ububasha bwo kujuririra kiriya cyemezo mu rukiko rusesa Imana.

Kabuga Felisiyani, yafashwe ku itaruki ya 16 z’ukwezi kwa gatatu. Yari amaze imyaka 26 ashakishwa kugirango abazwe ibyaha 7 akurikiranyweho birimo ibya genoside n’ibyaha byibasira inyoko muntu. Ibyo byaha byose arabihakana.

Leta y’u Bubiligi yemeje ko yahamagaje abadiplomate bayo babiri bari i Kigali ibisabwe na Leta y’u Rwanda. Kuri uyu wa kabiri, Ijwi ry’Amerika ryatangaje inkuru y’abadiplomate b’Ababiligi bahamagajwe mu gihugu cyabo, Leta y’u Rwanda imaze kugaragaza ko itishimiye ko bakoresheje umuhango wo kwibuka ku itariki ya gatandatu z’ukwezi kwa kane, abasirikare b’ababiligi baguye mu Rwanda muri 1994.

Mu nyandiko Ministeri y’ububanyi n’amahanga y’U Bubiligi yagejeje ku Ijwi ry’Amerika kuri uyu wa gatatu, umuvugizi wayo Arnaud Gerart aragira ati”: “Turemera rwose ko habaye ikosa ryo kudashishoza neza ryakozwe mu guhitamo itariki ya 6 kugirango hakoreshwe umuhango wo kwibuka abasirikare bacu 10 bari mu gabo za ONU bishwe ku itariki ya 7 z’ukwezi kwa kane 1994”.

Akomeza agira ati : “ Twabonye rwose ko uwo muhango wakoreshejwe kuri iyo itariki utishimiwe”. Ati “ariko muri iki gihe hubahizwa hagunda ya guma mu rugo, guhitamo iriya tariki byatewe no gushaka ibitubankugiye, nubwo bwose bitakiriwe neza, nta mugambi twari dufite wo kugira uwo tubangamira”.

Twahisemo kubungabunga ubucuti hagati y’ibihugu byombi

Ministeri y’Ububanyi n’amahanga y’u Bubiligi ivuga kandi yagiranye ibiganiro inshuro nyinshi na Leta y’U Rwanda kugira ngo bumvikane ariko ntibigire icyo bigeraho, bigatuma Ministiri Philippe Goffin, ushinzwe ububanyi n’amahanga, “afata icyemezo cyo gushyira ibintu mu buryo agamije kubungabunga ubucuti hagati y’ibihugu byombi”. Icyemero cyabaye rero icyo guhamagaza umunyabanga wa mbere n’ushinzwe ibikorwa bya gisirikare.

Mu nyandiko Ijwi ry’Amerika ryahawe by’umwihariko Ububiligi buragira buti: “ Nubwo bwose twemeye ikifuzo cya Leta y’u Rwanda cyo guhamagaza bariya bakozi bombi, icyo cyifuzo turasanga kidahwanye n’ikosa ryakozwe ritangambiriwe”.

Ministeri y’ububanyi n’amahanga y’u Bubiligi yarangije yibutsa ko Ububiligi bwiyemeje kurwanya uburyo ubwo aribwo bwose buhakana cyangwa se bupfobya genocide yakorewe Abatutsi muri 1994.

U Bubiligi buravuga ko bwifuza gukomeza kugirana umubano mwiza ushingiye ku butwererane na Leta y’u Rwanda.

Inkuru yateguwe n’umunyamakuru w’Ijwi ry’Amerika i Londres mu Bwongereza, Venuste Nshimiyimana.

Yanditswe na Jean-Jacques Bigwabishinze

Dore amezi atatu n’igice arashize umuvandimwe wacu KIZITO MIHIGO yishwe n’ubutegetsi bw’Inkotanyi. Na none kandi izo Nkotanyi zishe RICHARD SHEJA, umwana w’imyaka 8 wicanwe n’Abihayimana i Gakurazo, hari kuwa 5 Kamena 1994, ubu imyaka ikaba ibaye makumyabiri n’itandatu. Aba bavandimwe bacu bombi bahuriye ku kuba bararokotse itsembabwoko ryibasiye Abatutsi mu w’1994, nyuma bakaza kwicwa n’Inkotanyi zidahwema kwivuga imyato yo kuba ngo zarahagaritse Jenoside. 

Ikindi aba baziranenge bahuriyeho ni ukuba umwe ari Umumarayika, undi akaba Umutagatifu, bityo bombi bakaba bari bafite umutima utuyemo Imana. KIZITO MIHIGO yakunze Abanyarwanda bikomeye, kugeza ubwo atubereye igitambo cy’ikirenga, kuko yishwe azira kuba intumwa y’ubwiyunge nyakuri, buzira imbereka n’uburyarya.  RICHARD SHEJA na we yarangwaga n’urukundo n’impuhwe, nk’uko tubisanga mu buhamya bwanditse mu gatabo mama we yanditse, kitwa Bishe Umumalayika, Imfura yanjye Richard Sheja. Kandi koko burya ngo isuku igira isoko, kuko nyina umubyara na we arangwa no kurwanya amacakubiri yivuye inyuma; ubumwe bw’Abanyarwanda ni yo ntero, ni na yo nyikirizo; iyo ikaba ari imbuto yera ku rukundo.

Mu rwego rwo kuzirikana RICHARD SHEJA rero, tubararikiye umuvugo twise Imitima ibunga. Uzajya usohoka no mu gifaransa, aho twawise L’Innocence assassinée. Kubera uburebure bwawo ariko, uzabageraho mu bice 8, bishushanya imyaka nyakwigendera yari afite umunsi yatuvagamo. Reka twizere ko uyu muvugo uzunganira ibindi bitekerezo bigamije ubwiyunge, bwa bundi bwa nyabwo ariko, bwa bundi twigishwa na Mutagatifu KIZITO MIHIGO, kuko ari bwo bwonyine buzaca umwiryane watwokamye, ukaba warabaye karande muri bene Kanyarwanda.

Turi kumwe na Bwana Gasana Anastase, uyu ukunze kuvugwaho kuba umwe mu baba barashinze interahamwe. Nibyo sibyo ? Arabyivugira.

Ikondera Libre kuko benshi mwabibasabye ngo bazamubaze nyine ibijyanye n’interahamwe muri iki gihe havugwa urubanza rw’umunyarwanda Kabuga Félician ngo waba ari mu bazihaye ingufu.

Nk’umuntu wabaye mu Rwanda, yewe no ku gihe cya FPR yakomeje umwanya yari afite ku bwa Habyarimana, Ministri w’ububanyi n’amahanga avuga ko imihoro barega Kabuga ari ipine bashaka gutwikiraho Kabuga.

Ndetse uyu Gasana aravuga no kuri RTLM. Banamubajije ukuntu Habyarimana Juvénali bari kumwe i Dar es Salaam ku itariki ya 06/04/1994, amaze kwicwa, uyu Gasana yahise yiyambukira asanga FPR, iyi FPR ivugwaho kuba ariyo yahanuye indege yari itwaye Prezida Habyarimana, agapfa yishwe.

Uyu munsi Ikondera Libre yahisemo kubagezaho uko Anastase Gasana asesengura iby’interahamwe n’imihoro.

Ikiganiro mwagiteguriwe na Agnès Mukarugomwa afatanije na Vestina Umugwaneza.

Ndi Umunyarwanda izwi nka gahunda ya Leta yaje yigisha ubunyarwanda ariko ikibanda yuko abana b’abahutu bagomba gusaba abatutsi imbabazi ku byaha byakozwe n’ababyeyi babo.

Iyi gahunda yari igamije gushyira ipfunwe ku banyarwanda bo mu bwoko bw’abahutu ntiyavuzweho rumwe na benshi.

Dr Innocent Justice Ndagijimana na Bwana Gallican Gasana barebera hamwe ingaruka za Ndi Umunyarwanda ku muryango nyarwanda.

Ku matariki ya 23 na 24 Gicurasi umwaka w’i 2020 habaye inama karundura ku buryo bw’ikoranabuhanga yiswe: “Rwanda Abubatsi b’ikiraro” (Rwanda Bridge Builders) yahuje abahagarariye amwe mu mashyaka ya politike (political parties) ndetse n’imiryango itegamiye kuri leta iharanira uburenganzira bwa muntu (civil society) ikorera mu buhungiro. Nubwo ariko iyo nama yishimiwe nabatari bake mu bakurikiranira hafi politike yo mu karere k’ibiyaga bigari, abatari bake bakomeje kunenga uburyo yateguwemo, kuba hari abatarayitabiriye ndetse n’umusaruro ya zatanga mu gihe cyiri imbere.

Mu byukuri ubumwe ku baharanira impinduka mu Rwanda buracyenewe. Ariko kugirango ubwo bumwe bwa nyabwo bugerweho hagomba kubanza kunononsorwa ibyabuhungabanyije mu myaka isaga 26 nyuma ya Jenoside yakorewe Abatutsi n’ubundi bwicanyi butarahabwa izina bwibasiye Abahutu. Twabibutsa ko kandi abateguye iyo nama kwikubitiro bari bane aribo: Ambassador Jean- Marie Vianney Ndagijimana, Ambassador Charlotte Mukankunsi, Gilbert Mwenedata na Dafi Nkundwa.

Nyamara ariko abantu benshi batangiye kugira impungenge nyuma yo kubona ko amwe mu mazina azwi mu ruhando rwa politike nyarwanda 

Atagaragaye muri iyo nama. Muri abo batagaragaye twavuga nka: Faustin Twagiramungu wabaye ministiri w’intebe wa leta y’inzibacyuho nyuma ya Jenoside yakorewe abatutsi, Paul Rusesabagina wa MRCD, Padiri Nahima Thomas w’ishyaka ISHEMA, Dr Théogène Rudasingwa umuyobozi w’Ishakwe, Generali Kayumba Nyamwasa wa RNC n’abandi. Gusa nanone twavuga ko ishyaka ISHEMA ryohereje Madame Claire Nadine Kasinge ndetse ihuriro RNC naryo rikaba ryari rihagarariwe na Jervais Condo na Ambassador Charlotte Mukankusi.

Mugihe nari nkibaza impamvu aya mazina atagaragaye n’uburyo iyo nama yateguwe hamwe n’icyo twakwizera mu musaruro wazavamo, nabashije gukurikirana ibiganiro bigera kuri bine byaje bikurikira iyo nama maze bimpa ishusho y’ibyo bibazo byose nibazaga haruguru. 

Nakurikiye ikiganiro n’abanyamakuru cyateguwe na komite twavuze haruguru yateguye iyo nama kuri radio Urumuri, nkurikira ikiganiro umunyamakuru na Tharcisse Semana, nkurikira kandi ikiganiro cyahise kuri radio Imenagitero hamwe na Dr Théogène Rudasingwa hamwe n’ikindi kiganiro cyahise kuri radiyo yitwa Kabeho Kanyarwanda ya sylivestre Nsengiyumva.

Ku byerekeranye n’imitegurire yiyo nama mu kiganiro na Tharcisse Semana uwitwa Kayumba Ringuyeneza Richard ubarizwa mu kitwa(National People Concern NPC) yemeza ko umushinga wo gutegura iyo nama ariwe wawuteguye ariko agatanzwa no guhezwa ku mushinga we ndetse akemeza ko umushinga we wibwe. Wakurikirana icyo kiganiro kirambuye kanda hano.

Ku bwanjye ikibazo ntabwo ari uwatanze igitekerezo mbere ariko niba dushaka gukorera hamwe kandi tugakorera mu mucyo, ni byiza kuvugisha ukuri no kwirinda kuba “Njye” ni njyewe ushoboye! 

Tugarutse na none ku mitegurire mu cyiganiro cyahise kirimo kuba kuri radiyo Itahuka na radiyo Urumuri, cyaranzwe no guterana amagambo mu banyamakuru bamwe na bamwe hamwe nabateguye icyo kiganiro. Kuri ibi nkaba numva dukwiye kurangwa no kwihanganirana niba dushaka kubaka igihugu kigendera kuri demokarasi duharanira ubwisanzure bw’itangazamakuru. Ariko kandi abanyamakuru na bo bagomba kubahiriza amahame agenga umwuga w’itangazamakuru.

Ku bijyanye n’abatumiwe ariko ntibitabire ikiganiro nabashije ku menya zimwe mu mpamvu zabiteye, gusa bikaba byaranyeretse ko inzira ikiri ndende akaba ariyo mpamvu natangiye mvuga ko “urwishe yanka rukiriyimo”!

Mu kiganiro na Sixbert Musangamfura, Joseph Ngarambe hamwe na Dr Théogène Rudasingwahagaragayemo amagambo yanteye kwibaza niba koko uburyo ibiganiro bya opozisiyo bitangiye hari icyo bizageraho kigaragara. 

Ku mpamvu ishya ISHAKWE rititabiye iyo nama mpuzamashyaka Dr Théogène Rudasingwa yagize ati: << Ni byo koko itariki 10 z’ukwa gatanu niho nabonye ubutumire bwako kanama bakaba barantumiye mu izina ry’ishyaka (People Freedom Mouvement).

Nkibibona naguye mu kantu kuko uretse Ndagijimana na Mukankunsi, Madamu Dafrause Nkundwa na Girlbert Mwenedata ntabwo nari mbazi. Nabanje rero kugwa mu kantu kandi ikindi nuko Mukankunsi arumwe mu bayobozi ba RNC naho Ndagijimana we uretse ko muzi sinzi ko muri iyi myaka yashize hari igihe nigeze kuvugana nawe>>.

Dr Théogène Rudasingwa akomeza avuga ko yabanje gutumwaho intumwa ebyiri ariko we akemeza ko izo ntumwa zari zitumwe na RNC ishyaka yahozemo aribereye umuyobozi. Akemeza ko izo ntumwa yazibwiye uko abyumva agira ati: << Icyambere nababwiye nyine ko bintangaje kuko abantu umuntu adaheruka kuvugana na bo cyangwa se ataravugana na bo kugirango bagire batya bashishimure urwandiko bagutumira mu nama ubibone muri email ahubwo ibyo byagora umuntu gushingira kuri ibyo ngibyo gusa kugirango witabire inama nk’iyo ngiyo>>.

Dr Théogène Rudasingwa akomeza avuga ko uwo mugambi bidashidikanywaho ari umugambi wa RNC. Yagize ati: << Kuba RNC yatekereza gukora ikintu nk’icyi ngiki hamwe n’abandi bo bafatanyije kwaba ari ukwirengagiza cyane. Icyambere nuko burya iyo abantu batanye kandi bagatana nabi ntabwo biba bivuze ngo imiryango irakinze ngo ntibazongera kugira aho bahurira. Mu buzima ntabwo wakwihanukira ngo ubivuge utyo ariko byagorana ni nk’umugore n’umugabo batandukanye bagatandukana nabi, eehh niyo bafite abana kugirango bazarere abo bana birabagora kuberako mu byukuri cya kiraro ubundi cyakabaye kibahuza kiba cyarasenyutse>>!

Dr Théogène Rudasingwa akomeza avuga ko izo ngorane zituma icyizere gitakara bamwe kubandi. Bityo bikaba byaba byiza gushaka abantu mbere mu kabanza gusasira icyo gikorwa nyirizina kugirango abantu bongere bizerane. Akomeza avuga ko hakabaye haragaragajwe igitekerezo nshingirwaho cyo kuganiraho ariko bigasa nk’aho kitari gihari. Yagize ati: << Kuvuga ko ari ukuvanaho ubutegetsi bwa Kagame na FPR numvaga ntakindi mu byukuri gihuje abo bantu>>.

Dr Théogène Rudasingwa akomeza avuga ko atigeze asobanurirwa impavu yanyayo kandi akemeza ko inama zisa nkiyo zagiye zibaho na mbere ariko ntizitange umusaruro. Akomeza kandi avuga ko bamwe mubateguye iyo nama ngo banyereje amafaranga ya leta mugihe cyo hambere bityo bikaba bigoye kubizera. 

Yagize ati: << Mu bantu bari muri leta (1994) ninde muntu utazi ko Ndagijimana mugihe twari dukennye dushonje twese dufite inzara tugerageza gushyira hamwe ibintu mu buryo umuntu bagize batya bagaha amafaranga amadorali ibihumbi $250,000 ngo ajye gufasha gusana kongera kugira ibikorwa New York muri Ambasade, Ndagijimana akagira atya amafaranga yose akayatwara>>! Wakumva icyo kiganiro hano.

Gusa kubwanjye baravuga ngo: “uwavuga ibyinzuki nta warya ubuki”! Nakwibutsa Rudasingwa ko umuvandimwe we Gerard Gahima mubyo yashinjwaga mbere yuko ahunga hari ideni (loan) ryahawe umubyeyi wabo binyujijwe muri Banki rya miliyoni FRW 300,000,000 kandi bigaragara ko nta bwishyu buzaboneka habayeho guhomba! Ku bwanjye rero mbona abanyamakosa ari benshi!

Mu kindi kiganiro cyahise kuri Kabeho Kanyarwanda cyiswe ngo”Rukokoma ya Nyamwasa ipfuye mw’iterura” cya sylivestre Nsengiyumva yasobanuye ko bigoye kugirango abantu bagirirwe icyizere kandi baterekana aho bahagaze ku marorerwa yahekuye abanyarwanda. Akomeza avuga ko kugirango abanyepolitike bo mu burayi bagirirwe ikizere mu bihugu byabo, babanza kwerekana aho bahagaze ku byerekeranye na Jenoside yakorewe Abayahudi.

Bityo rero Abanyapolitike ba banyarwanda nabo bagomba kwerekana aho bahagaze kubyerekeranye n’amahano yagwiririye u Rwanda.

Sylivestre Nsengiyumva akomeza avuga ko abanyarwanda baba abahutu cyangwa abatutsi bose bazi ko habayeho ubwicanyi ndengakamere ku mpande zombi hagati y’umwaka 1990 kugeza mu mwaka 2000. Yagize ati: <<Umuntu wese ushaka kugira uruhare mu mitegekere agomba kwipozisiyona kuri izo Jenoside zombi zabaye cyangwa se ko atemera ko zabaye, cyangwa se ko yemera imwe izindi atazemera ariko akabivuga de manière extrémement clère (kuburyo butomoye)>>.

Sylivestre Nsengiyumva akomeza avuga ko kwerekana aho uhagaze bidatuma utorerwa kuba umuyobozi ariko bituma abantu bamenya uwo uri we naho uhagaze maze abaturage bakihitiramo. Bityo rero akaba asaba abanyepolitike bose kwerekana aho bahagaze kuri icyo kibazo kingutu gihangayikishije rubanda. Ibi ngo byatuma inama mpuzamashyaka igera ku mugambi wayo. Icyo kiganiro wagikurikira ukanze hano.

Mu kwanzura biragaragara ko ibibazo n’ubwumvikane buke haga y’amashyaka na sosiyete civile bukigaragara. Nibyiza ko abo bireba bakwicarana bakabanza bagacoca ibyo bibazo byose twavuze haruguru ndetse n’ibindi bitavuzwe ahangaha. Cyane cyane ikibazo cy’amateka yacu maze mugasenyera umugozi umwe mukababarirana ariko mbere na mbere mukagerageza kuvugisha ukuri. Tugomba ariko kwibuka ko ubutabera ariyo nkingi y’ubwiyunge nyakuri. 

Mugire amahoro

Umusomyi

Minisiteri y’Ububanyi n’Amahanga yu Rwanda yoherereje iy’u Burundi ubutumwa bw’ishimwe bwo gushimira iki gihugu ku bw’intsinzi ya Gen. Evariste Ndayishimiye watowe ku mwanya wa Perezida wa Repubulika mu gihe cy’imyaka irindwi (2020-2027).

Mbere y’uko ubu butumwa bumenywa n’Abanyarwanda na mbere y’uko busakara ku mbuga nkoranyambaga, bwabanje gushyirwa ahabona n’Umugambwe CNDD-FDD, Ishyaka riri ku butegetsi mu Burundi, ari naryo Perezida Nkurunziza ucyuye igihe na Gen. Evariste watowe babarizwamo.

Ubu butumwa bugishyirwa ahabona na CNDD FDD, ku mbuga nyinshi za Whatsapp mu Rwanda hatangiye impaka z’urudaca, bamwe ngo ntibishoboka abandi ngo ni impuha, abandi ngo ni amagambo yacuzwe ashyirwaho ibirango, abandi bati n’ikimenyimenyi uburyo byanditse buracuritse.

Izi mpaka zamaze amasaha zatewe n’uko ubusanzwe ubutumwa bwose bw’ingenzi busohotse mu Rwanda bubanza kunyuzwa ku mbuga za Twitter z’urwego bireba, ku rubuga rwabo  bwite (official website), kandi bikanasomwa kuri Radio ya Leta, Radio Rwanda. Ibi byose nta na kimwe cyari cyakozwe ku buryo nta waveba abagize impungenge ko byaba ari ibicurano, banafatiye ku mwuka utari mwiza umaze igihe hagati y’ibi bihugu byombi.

Uburyo u Rwanda rwikuye mu ipfunwe n’ikimwaro

Mu byagiye byigaragaza mu bitangazamakuru byandikirwa mu Rwanda (byegamiye kuri Leta) no ku bindi by’Abarundi ariko na byo bikorera mu Rwanda, bagiye bavuga kenshi ko mu Burundi hagiye kumeneka amaraso, ko hagiye kuba intambara, kubera amatora ya Perezida, n’ibindi. Perezida Kagame yanohereje ingabo nyinshi n’ibifaru mu Bugesera no muri Gisagara /Nyaruguru hafi y’Akanyaru, binatuma Abarundi nabo bongera ingabo hafi yabo n’umupaka w’u Rwanda, ngo baryamire amajanja mu minsi y’amatora yabo.

Amatora yagenze neza, aba mu mutuzo n’amahoro, n’Abarundi bategerezanya umutuzo usesuye kumenya ibyayavuyemo. Ibihugu byo mu Karere, amahanga ya hafi n’aya kure byashimiye u Burundi ko matora yagenze neza, ariko u Rwanda rwaranumye.

Aho Urukiko Rurinda Iremezo ry’Itegeko Nshinga rwemereje burundu ibyavuye mu matora, ibihugu byose bya Afurika y’Iburasirazuba (EAC) byoherereje u Burundi ubutumwa bw’ishimwe, kandi bikorwa n’inzego zo mu bushorishori bw’ibyo bihugu, ariko u Rwanda rwo ruraceceka. N’aho rubikoreye aho kuba Perezida Kagame ari we ushimira Mugenzi we atowe, ubutumwa bwanyujijwe muri Ministeri y’Ububanyi n’Amahanga.

Ubu butumwa kandi bwoherejwe bucece, ntibwasakuzwa ku mizindaro ya Leta ya Kigali nk’uko basanzwe babigenza iyo babwoherereje abandi. Ibi bikaba byateye impaka ndende ku mbuga nkoranyambaga, izi mpaka zisozwa no kuba Minisiteri y’Ububanyi ‘amahanga y’u Rwanda isa n’iyokejwe igitutu bikaba ngombwa ko yububa igashyiraho itangazo mu masaha y’ijoro, kandi ryari ryoherejwe I Burundi hakibona.

Kwikura mu ipfunwe n’ikimwaro binashingiye ku kuba Perezida Kagame ariwe uyoboye Umuryango wa Afurika y’Iburasirazuba (EAC), bikaba bitari bihwitse kuba ari we wenyine usigara igihugu cye kidashimiye abaturanyi amatora yabaye meza no ku ntsinzi y’Umuyobozi bazahura kenshi mu bijyanye n’ubuziam bw’Akarere.

Ubu butumwa bwa Leta y’u Rwanda buje bukurikira kandi ubutumwa bw’ishimwe bwoherejwe na Perezida w’agateganyo w’Urugaga FDLR