Click here to view the embedded video.

Kuri uyu wa gatanu tariki ya 27 Ugushyingo 2015 nibwo muri Bazirika ntoya y’i Kabgayi habaye umuhango wo guherekeza umukecuru Asteria Bisinda, nyina wa Perezida Kagame. Iki gitambo cya Misa cyayobowe na Mgr Filipo Rukamba umushumba wa Diyoseze ya Butare.  Umushumba wa Diyoseze ya Kabgayi, Mgr Mbonyintege ukunze kuba hafi y’ubutegetsi bw’i Kigali ntiyari ahari yari yagiye muri Kenya kwakira Papa Francis wari wasuye icyo gihugu. Gushyingura byabereye ku musozi wa Buhoro, mu mudugudu wa Nyagatovu, Akagali ka Buhoro, umurenge wa Ruhango mu karere ka Ruhango. Aha ni naho hahambye Deogratias Rutagambwa na mukuru wa Perezida Kagame witwa Joseph bo bahambwe mu ibanga rikomeye!

Uyu muhango ubwawo kuba wabereye muri Bazilka ihambyemo abasenyeri bangiwe na Leta guhambwa muri za Katederali zabo nabyo byerekana ko FPR yasuzuguye Kiliziya kugeza aho Perezida Kagame aterura akabeshya mu muhango wo gushyingura nyina avuga ko atigeze yihorera kuko ngo nyina yari yarabimubujije!

Mu gihe abandi bapfusha ba nyina hagashyirwaho itegeko ribuza abashaka gutabara kubikora nyina wa Kagame we yaherekejwe bishoboka byose: abagize Guverinoma hafi ya bosebari bahari, abayobozi b’ingabo na Police, abayobozi b’ibigo bya Leta, abayobozi b’Intara ndetse n’ab’uturere twinshi, hari kandi bamwe mu bahagarariye ibihugu byabo mu Rwanda ndetse n’abantu bavuye mu mahanga baje gutabara.

Uyu mukecuru ashaje afite imyaka 84 asize abana 5, abuzukuru 13 n’abuzukuruza 7 n’ubwo aherekejwe na benshi agiye yishwe n’agahinda kuko ibyo yasabye muhungu we nta na kimwe yubahirije (kereka niba amagambo Perezida Kagame yavuze ko umubyeyi we yamutoje ‘kubabarira, kutitura inabi abayimugiriye ahubwo agahora ari umunyembabazi yamubeshyeye)

Kuva Perezida Kagame yatangira kuyobora, nyina ngo yakunze kumubwira ko akwiye kwita ku bibazo by’abo ayobora mbere y’ibindi byose. None se yarabikoze?

Uwo mukecuru yasabye Kagame ngo kuba umukristu nkawe! Sinzi niba iki cyifuzo yaracyubahirije kuko izina rya Pirato yiswe ntabwo ari izina ryamuhawe kubera ibikorwa bya gikristu. Agahomamunwa kabaye kwica abasenyeri batatu n’abandi bihaye Imana batabarika nabyo se ni ibikorwa bya gikristu?

Perezida Kagame yavuze ko mu buzima bwa nyina yaranzwe no kunyurwa no gusangira ibyo afite byose. Ndetse n’ubu ngo ibyo yamugeneraga byinshi yabyangaga akamubwira ati ‘bihe abandi banyarwanda ibyo mfite birampagije.’ Uyu mubyeyi sinamumenye cyane ariko ikizwi n’uko aho yacururizaga amata we n’abo mu muryango we haba kwa Rubangura cyangwa mujyi hafi ya Radio Rwanda byavugwaga ko kujya kugurayo amata ufite amazuru manini (ukekwaho ubuhutu) byabaga bigoye kuyahanywera keretse uguze ayo kujyana cyangwa rimwe na rimwe bakakwihorera ukibwiriza ukagenda.

Sinzi niba uyu nyakwigendera ataramenye ko mubyo Col Charles Ngoga yazize harimo n’uko nawe yacuruzaga amata, ndetse mugihe hari harateye indwara y’uburenge amata y’inka za Col Ngoga yamenwaga buri munsi kuri za bariyeri kugira ngo adatwara icyashara nyina wa Kagame ndetse na mushiki we bacuruzaga amata!

Perezida Kagame yavuze ko ngo kuba yarihanganiye abagiriye nabi umuryango we, bakawumenesha, bakawicira abantu akaba atumva impamvu bavuga ngo ntiyihanganira abo batavuga rumwe. Sinzi niba Perezida Kagame avuga abantu runaka bazwi bagize uruhare muri ibi bikorwa avuga byamukorewe we n’umuryango we akaba yarababariye batuye batuje cyangwa ashaka kuvuga abaturage b’abahutu muri rusange.

Mu gusoza niba uyu mukecuru uko bamutatse ko yari umugiraneza kandi akaba ntako atagize ngo ahe uburere bwiza abana be, ashobora kuba yarapfanye agahinda kuko umuhungu we ntabwo yabyubahirije ahubwo yakoze ibitandukanye n’izo mpanuro:

-None se ubukristu ni ukwica abihayimana no kubafunga? Ni ukujya kwigamba ko yishe Col Karegeya mu gihe cy’amasengesho? Ni ukubeshya uri mu Kiliziya gihambyemo abasenyeri babiri mu imva imwe kuko wanze ko bahambwa mu cyubahiro muri za katederali zabo?

-Gusangira n’abandi byose no kwita ku banyarwanda ni ukurara muri Hotel y’amadorari ibihumbi 20 nyuma ugafungira aba b’abanyeshuri Bourse, ndetse no gukenesha abaturage ku buryo benshi bagiye gutsembwa n’inzara?

-Kutihorera yigishijwe ni ugukurikira abanyarwanda b’impunzi z’abahutu kuva Kiyombe kugeza i Mbandaka ku birometero 3000?

-Kutihorera ni ugutaburuza umurambo wa Perezida Dominiko Mbonyumutwa wakubiswe bigateza imvururu zatumye Kagame ahunga we n’umuruango we?

Email: therwandan@ymail.com

Amakuru ava mu Rwanda mu ntara y’amajyepfo aravuga ko kubera kubungabunga umutekano wa Perezida Kagame ndetse n’abamuherekeje mu muhango wo guherekeza mama we umubyara witabye Imana byatumye umuhanda wa Kigali-Butare unyura hafi yaho imihango yaberaga mu gace k’ahitwa Buhoro ho mu Karere ka Ruhango ufungwa kuva hafi saa tatu za mu gitondo zo kuri uyu wa gatanu taliki 27/11/2015 kugeza hafi saa kumi n’imwe z’umugoroba imihango yose irangiye.

Ibi bikaba byarateye benshi kwibaza bivanze n’umujinya batumva ukuntu umuntu uvuga ko akunzwe n’abanyarwanda hafi ya bose agenderera ahantu ubuzima bugahagarara, amasoko akaremura, amaduka agafungwa ndetse n’imihanda ukabona nta n’inyoni itamba.

Ibi bisanzwe bimenyerewe ko aho Kagame ari bujye imihanda yose ifungwa, amatelefone yose agendanwa ntabwo aba akora, abaturage b’uturere twose tuhegereye barashorerwa bakajyanwa aho bateguriwe ku buryo akenshi bamara amasaha menshi ku zuba cyangwa banyagirwa n’imvura ntawe ushobora kujya no kwihagarika.

Email: therwandan@ymail.com

Abataripfana b’Ishyaka Ishema bafite umugambi mwiza kandi usobanutse. Bafite intego bihaye kandi ntibazatezuka batayigezeho. Bazi neza iaho bava n’aho bagana. Bagambiriye gufasha Abanyarwanda kugera ku mpinduka nziza basonzeye, igihugu cy’u Rwanda kikavanwa ku ngoyi y’ubutegetsi bw’igitugu bwubakiye ku kinyoma, iterabwoba n’ukwikubira ibyiza byose by’igihugu.
Kubera iyo mpamvu Abataripfana bakorera mu buhungiro basanze bagomba gutsinda iterabwoba, bagahaguruka bagasanga Abanyarwanda bari mu gihugu, bagafatanya uru rugamba rutagatifu rwo guharanira iyubahirizwa ry’uburenganzira bwa rubanda. Gahunda ntihinduka rero .

Muri iyi minsi mbere y’uko italiki ya 28 Mutarama 2016 igera, Abataripfana biyemeje kwitegura urwo rugendo bashyira ingufu mu kugenderera Abanyarwanda babarizwa mu bihugu binyuranye no mu gutsura umubano n’abategetsi b’ibihugu by’ibihangange bifite cyangwa bishobora kugira inyungu mu Rwanda no mu Karere k’Ibiyaga Bigari.

Muri urwo rwego, twasuye Umuryango w’Ubumwe bw’i Bulayi (Kanama), Ubwongereza( Nzeri), Leta Zunze Ubumwe z’Amerika(Ukwakira ), Australia (Ugushyingo)….kandi turacyakomeza. Twasobanuye ibibazo biremereye Abanyarwanda baterwa n’ubutegetsi bw’igitugu bw’Ishyaka rukumbi rya FPR-Inkotanyi na Perezida waryo Paul Kagame wiyemeje kugundira ubutegetsi no kuyobora u Rwanda nk’aho ari umunani yasigiwe na se Rutagambwa ! Abategetsi bakuru twaganiriye baduteze amatwi kandi badusezeranyije inkunga igaragara n’ubwo idakuraho uruhare Abanyarwanda ubwabo bagomba kugira mu rugamba rwo kwibohoza.

By’umwihariko muri uku kwezi k’Ugushyingo twasuye igihugu cya Australia. Reka twibutse izi ngingo tutagomba kwirengagiza :

(1) Australia ihuriye n’u Rwanda mu muryango wa COMMONWEALTH ugizwe ahanini n’ibihugu byahoze bikolonijwe n’Ubwongereza kandi ukaba ufite amategeko awugenga , Leta ya Paul Kagame ihora yica !

(2) Abasirikari bashinzwe kurinda amahoro (Peacekeepers) bakomoka muri Australia bari i Kibeho mu 1995 ubwo Paul Kagame na IBINGIRA bafataga icyemezo cyo kurimbura abaturageb’abasivile basaga ibihumbi 8 bari barahungiye muri iyo nkambi . Biboneye n’amaso yabo ubwicanyi ndengakamera Leta ya Kagame ikorera abaturage bayo. Buri mwaka abo basilikari babonye amahano abambari ba Kagame bafitemo uburambea bakora umuhango ukomeye wo gushishikariza Abanya-Australia kwibuka Abanyarwanda b’inzirakaregane baguye i Kibeho.

(3) Igihugu cya Australia cyakomeje gufasha impunzi z’Abanyarwanda ndetse cyakira ku butaka bwacyo imiryango igera ku bihumbi 19 kandi babayeho neza mu mutekano usesuye.

(4) Leta ya Australia yakomeje gufasha urubyiruko rw’Abanyarwanda mu kubaha buruse zo kwiga kaminuza cyane cyane mu bijyanye n’ubuhinzi n’ubworozi.

(5) Ubungubu Abategetsi ba Australia bazi neza ibibazo bikomeye u Rwanda ruterwa n’ubutegetsi kirimbuzi bwa Kagame ku buryo banze ko mu gihugu cyabo hafungurwa Ambasade y’u Rwanda mu rwego rwo gukumira iterabwoba na politiki y’amacakubiri abambari ba FPR bakwirakwiza aho bakandagije ikirenge hose .

Abayobozi ba Australia batwakiriye neza kandi, mu rwego rwa Commonwealth, bazakomeza gukurukirana no kwamagana ibyerekeye ihonyorwa ry’uburenganzira bwa kiremwamuntu rikorwa n’ubutegetsi bwa Kagame. Bazashyigikira gahunda yo kuzana impinduka nziza mu Rwanda mu guteza imbere politiki irwanya ivangura n’akarengane. Bazashyigikira ko habaho amatora adafifise kandi ashingiye kuri demokarasi isesuye mu mwaka w’2017.

Twaganiriye kandi n’Abanyarwanda batuye Australia

Hamwe no gusura abategetsi ba Australia twaganiriye kandi n’Abanyarwanda banyuranye batuye Australia . By’umwihariko twasuye imijyi ya Sydney na Perth .
Aho twanyuze hose intero ni imwe:

(1) Igihe kirageze ngo ubutegetsi bw’igitugu bw’AGATSIKO busezererwe Abanyarwanda basubirane ubwisanzure bwabo.
(2) Paul Kagame urangije manda ze yemererwa n’Itegekonshinga ryo mu 2003 akwiye kwemera kwegama nta yandi mananiza
(3) Gahunda yo guhindura ingingo y’ 101 y’Itegekonshinga ryo muri 2003 mu nyungu za Kagame wenyine n’umuryango we, ni gashozantambara bityo ikaba ari iyo kwamagana ndetse hagakorwa ibishoboka byose ngo iburizwemo bidasubirwaho .
(4) Abanyarwanda bakeneye kwitorera umukuru w’igihugu mushya bishakiye mu mwaka wa 2017.
(5) Gahunda y’Abataripfana yo kujya gukorera politiki mu Rwanda ni iyo gushyigikirwa kuko hari byinshi batashobora kugeraho badahawe inkunga igaragara
(6) Politiki yo guteza umwiryane uhoraho mu Karere k’ibiyaga bigari mu ntambara z’urudaca ikwiye guhagarikwa bidatinze. By’umwihariko Kagame akwiye kwamaganwa mu mugambi mubisha afite wo guteza umutekano muke mu gihugu cy’Abavandimwe b’Abarundi .

UMWANZURO
Turashimira Abanyarwanda batuye muri Australia batwakiriye neza , bakatwungura ibitekerezo n’inama nziza, bakatwugururira ingo zabo, bakadufasha mu ngendo, bakatwizeza inkunga ikomeye. By’umwihariko abatuye Sydney na Perth turababwira ko umurava bafite ari uw’agaciro gakomeye. Aho ibihe bigeze nitwemere ko abenegihugu bake BIYEMEJE kugira icyiza bakora baruta kure miliyoni nyinshi z’abahisemo kwituramira bakihindura ba NTIBINDEBA ! Igihe kizagera abakoze neza igihugu kibagororere .
Nk’uko babyifuje, Abataripfana bo muri Australia na NewZeland bakwiye kurushaho kwisuganya bidatinze, bakitoramo ikipe nyobozi nshya ishinzwe Umugabane, ahasigaye bakihutira kuagera ku Banyarwanda bose babamenyesha gahunda zihamye kandi zubaka Ishyaka ISHEMA rihishiye u Rwanda .

Nta wundi ubitubereyemo, niba nawe wiyumvamo akariro nk’ako niyumvamo, haguruka dufatanye gushaka icyazahura u Rwanda.

Padiri Thomas Nahimana,
Umukandida w’ISHEMA Party mu matora ya Perezida yo mu 2017.

Amakuru agera kuri The Rwandan aravuga ko Bwana Willy Nyamitwe arimo agerwa amajanja ndetse ashobora gukurikira abandi barundi bakomeje kwicwa.

Amakuru twashoboye kubona ndetse afite gihamya yemeza ko abayobozi b’u Rwanda cyane cyane abo mu nzego z’iperereza barwaye Willy Nyamitwe ku buryo kuri bamwe ngo abahangayikishije kurusha Perezida Nkurunziza ubwe.

Uku kwijundika Willy Nyamitwe bagusangiye na bamwe mu banyamahanga bashaka ko ibintu bihinduka mu Burundi ariko abo banyamahanga bo birinda kugira icyo bamutwara cyangwa ngo bamushyire mu bafatirwa ibihano, biravugwa ko bamwibikiye ubu ngo hakaba hageragezwa uburyo bwo kumwinjirira ngo nabyemera abakorere cyangwa agire uruhare mu gushyikirana n’abarwanya ubutegetsi bwa Perezida Nkurunziza nyuma babonye bidashobotse hakurikiraho ibindi…

Ku ruhande rw’u Rwanda ntabwo Willy Nyamitwe yishimiwe na busa kubera akazi akora ko kugerageza guhindura isura y’ubutegetsi bwa Perezida Nkurunziza nyuma yo guhindanywa akaba mu bikorwa bitandukanye bijyanye n’itangazamakuru no kwiyegereza abafatanyabikorwa bashya ndetse akaba ari umwe mu Barundi basa nk’abakangutse basa nk’abagendana n’aho isi igeze. Kongeraho uburyo asa nk’uwasuzuguye mu kinyabupfura amagambo yavuzwe na Perezida Kagame.

Umwe mu bazi neza imikorere y’inzego z’iperereza z’u Rwanda n’abatanga amategeko y’abagomba guhitanwa yemeza ko iyo umuntu runaka izina rye rigarutse cyane mu biganiro by’abantu bamwe na bamwe mu nzego z’iperereza ndetse bakerekana ko bahangayitse akenshi bikurikirwa no gutangira gupanga uburyo uwo muntu yahitanwa byihuse.

Uretse ab’i Kigali abakurikirana ibibera i Burundi bahamya ko Willy Nyamitwe afite ingufu nyinshi benshi batamukekera mu butegetsi bw’u Burundi n’ubwo adafite umwanya wa politiki ukomeye, urugero n’igihe hajyagaho Guverinoma nshya aho yashoboye gukoresha ingufu ze maze umuvandimwe we Alain Nyamitwe ndetse n’ihabara rye bagahabwa imyanya muri Guverinoma.

Hari abahamya ko Willy Nyamitwe mu kutagira umwanya ukomeye ahubwo akaba umuvugizi wa Perezida Nkurunziza bisa nk’aho bimuha ububasha bujya kungana n’ubwa Perezida Nkurunziza ubwe.

Mu gihe mu Burundi benshi ubu barimo kwicwa abandi bagahushwa ntibyaba igitangaza twumvise na Willy Nyamitwe hari abagerageje kumugandagura nk’uko babivuga mu Kirundi dore ko hari andi makuru avuga ko muri iyi minsi yaba yaratezwe ariko agakizwa n’uko yaraye ahandi.

Email: therwandan@ymail.com

Mu kiganiro dusangire ijambo cyaciye kuri Radio Ijwi ry’Amerika kuri iki cyumweru tariki ya 29 Ugushyingo 2015 icyo kiganiro cyari kiyobowe na Bwana Etienne Karekezi abatumirwa bari Frank Mwine, umunyamategeko ndetse na Bwana Faustin Twagiramungu, umukuru w’ishyaka RDI Rwanda Rwiza, akaba yarabaye na Ministre w’intebe hagati ya 1994 na 1995. Haganiriwe ku bijyanye n’ihinduka ry’itegeko nshinga biciye muri Kamarampaka.

Kuri Bwana Faustin Twagiramungu ngo ntabwo bakuyeho bakuyeho ingoma y’abanyiginya ngo noneho bemere ingoma y’abega, ngo niba Perezida Kagame ashaka kugarura ubwami niyimike Umwami Kigeli V Ndahindurwa aracyariho!

Ku bijyanye n’uko ngo Perezida Kagame yakoze neza ngo agomba gukomeza, Bwana Twagiramungu asanga Kagame atararushije Perezida Kayibanda cyangwa Perezida Habyalimana gukora neza ngo keretse wenda gukubura imihanda abo ba Perezida bamubanjirije bubatse.

Ngo Bwana Twagiramungu abona azapfana agahinda kuko ibyo ngo yarwaniye atabigezeho

Mushobora kumva ikiganiro cyose hano guhera ku munota wa 30

Click here to view the embedded video.

Uhagarariye Leta Zunze Ubumwe z’Amerika mu muryango w’abibumbye ONU, Samantha Power, yasabye atarya iminwa Perezida Kagame kudahirahira ngo yiyamamarize manda ya gatatu.

Ngo ni ngombwa ko u Rwanda rugomba kuba urugero rw’imiyoborere myiza, ibyo byatangajwe na Samantha Power mu kiganiro n’abanyamakuru ubwo hatangazwaga gahunda ya Leta y’Amerika mu nama y’umuryango w’abibumbye ishinzwe amahoro kw’isi y’ukwezi kw’Ukuboza 2015.

Leta y’Amerika yifuza ko Perezida Kagame yagenda nyuma yo kurangiza manda ye mu 2017 ngo nk’uko yari yarabyijeje maze akareka ikigero gishya cy’abayobozi bakayobora igihugu mu kiringo gishya. Perezida Kagame ngo iki nicyo cyari igihe cyiza cyo kubera urugero abategetsi b’ibindi bihugu kuko ngo bigaragara ko mu karere hari abakuru b’ibihugu basa nk’aho bashyugumbwa bashaka kwibona nk’aho ari bo ba kamara.

Samantha Power yatanze urugero rwa Perezida Kikwete wa Tanzaniya watanze ubutegetsi mu mahoro ngo Kagame nawe yagombye gukurikira urwo rugero ngo dore ko mu minsi yashize yari yarijeje inshuro nyinshi ko atazagundira ubutegetsi ngo ibyo byaha amahirwe ikigero gishya cy’abayobozi yo kwigaragaza no kuganisha igihugu mu kiciro gikurikiyeho. Leta y’Amerika ngo yizeye ko Kagame azagenda narangiza manda ye mu 2017. Ngo babonye ko abashingamateka bagerageje gutekinika ariko ngo Kagame we ntacyo aravuga. U Rwanda ngo rwabaye icyitegererezo ku bijyanye kubungabunga ubuzima bw’abaturage no guteza imbere abategarugori ngo rwakagombye kuba icyitegererezo muri demokarasi no kubahiriza manda ntarengwa.

Perezida Kagame yasabye leta zunze ubumwe z’amerika kutivanga muri politiki y’igihugu cye ku kibazo cy’uko agomba kuguma k’ubutegetsi.

Ku rubuga nkoranyambanga rwa twitter, Perezida Kagame yavuze ko ikibazo cy’imiyoberere y’u Rwanda kireba Abanyarwanda, yavuze ko aribo bagomba kwihitiramo.

Yagize ati: ”Ibi bije byiyongera ku byafasha kugera ku mwanzuro mu gushakira umuti ibibazo bya politiki mu Rwanda bikozwe n’abanyarwanda”. yongeyeho ati: “mwibagirwe itekinika ryakozwe n’abadepite”.

Abasomye iki gisubizo cya Perezida Kagame abenshi bahamya ko kidasobanutse, abazi Kagame bahamya ko bitazatinda muri iyi minsi akifatira ku gahanga uriya munyamerikakazi nk’uko yabikoreye abandi bashatse kumugira inama mu minsi yashize.

Abasesengura politiki muri rusange basanga aya magambo ya Samantha Power ameze nk’aho ashaka kugira inama Perezida Kagame ngo ashake undi muntu ashyiraho akomeze inzira ye, dore ko Samantha Power asa nk’aho yemeza ko ibintu mu Rwanda ari munange uretse ibyiza nta kibi kihaba, abantu benshi bakibaza impamvu ubukana bukoreshwa mu kwibasira abayobozi b’ibindi bihugu budakoreshwa kuri Kagame kandi ibikorwa bibi bikorwa n’ubutegetsi bwe bigaragarira buri wese.

Uyu abaye umuyobozi wa Amerika wa kabiri usabye ko Perezida Kagame atashaka kugundira ubutegetsi nyuma ya 2017 dore ko mu minsi ishize umuvugizi wa Département ya Leta muri Amerika yari yatangaje ko mu gihe Kagame yashaka kugundira ubutegetsi ngo ibijyanye n’ubutwererane hagati y’ibihugu byombi byasubirwamo.

Nabibutsa ko Sena n’inteko nshingamategeko umutwe w’abadepite barangije kwemeza ko itegeko nshinga ryavugururwa maze Perezida Kagame agashobora kongera kwiyamamaza, ndetse habayeho no kumugenera manda yindi y’imyaka 7 izakurikirwa n’izindi manda 2 z’imyaka 5 ku buryo Imana imutije ubuzima yategeka kugeza mu 2034 dore ko nta gushidikanya ko amatora yose yabaho mu Rwanda mu gihe igihugu cyaba gikomeje gutegekewa nk’uko bimeze ubu yajya atekinikwa hakemezwa ko ari we watsinze. Ni kimwe n’itegeko nshinga ngo rizakorwaho Kamarampaka, uretse kurangiza umuhango no gusesagura umutungo w’igihugu iyo Kamaramapaka amajwi azavamo yarangije kwemezwa itaranaba muzangaye najya munsi ya 90%.

Igisigaye ngo n’uko Perezida Kagame yemeza ndetse akanatangaza itariki Kamarampaka izabera. Icyo navuga gusa ni ugusaba abanyarwanda kwitegura za kinamico zigiye gukinwa mu rwego rwo kwereka amahanga ko Kagame akunzwe, ubanza nitutareba neza hari abazicwa bikitwa ko biyahuye kuko bakekaga ko Kagame ataziyamamaza!

Mushobora kumva ijambo rya Samantha Power mu rurimi rw’icyongereza hano>>

Email: therwandan@ymail.com

Mu gihugu cyu Burundi abasirikare bakuru benshi birukanwe ku mugaragaro mu ngabo z’u Burundi.

Aba basirikare bakuru birukanwe biganjemo abagaragaye mu mugambi wo gushaka guhirika ubutegetsi bwa Perezida Nkurunziza waburiye mu kwezi kwa Gicurasi 2015.

Abirukanwe harimo abajenerali: 6, abakoloneli: 5, aba Liyetona Koloneli: 3, abamajoro:8 n’abandi..

Bamwe mu bajenerali birukanwe harimo:

-Gen Ndayirukiye

-Gen Niyombare

-Gen Gaciyubwenge

- Gen Niyungeko

-Gen Ngowenubusa

-Gen Habarugira

Click here to view the embedded video.

Amakuru agera kuri The Rwandan aravuga ko kuri uyu wa gatanu tariki ya 4 Ukuboza 2015 mu gitondo, polisi y’u Rwanda yataye muri yombi Bwana Boniface Twagirimana, Visi Perezida wa mbere w’ishyaka FDU Inkingi nta rwandiko rumufata abamufashe bitwaje!

Nk’uko bitangazwa mu itangazo ishyaka FDU-Inkingi ryashyize ahagaragara mu ijwi ry’umuvugizi waryo akaba na Komiseri ushinzwe ububanyi n’amahanga, Bwana Yusitini Bahunga, ngo Bwana Boniface Twagirimana arashinjwa kuba yaratanze ibitekerezo bye kuri Radio Ijwi ry’Amerika (VOA), akaba yaranengaga uburyo ishyaka FPR riri ku butegetsi mu Rwanda riyoboye igihugu, ndetse akamagana itekinika ririmo gukorwa ku itegeko nshinga n’ubutegetsi bwa Perezida Paul Kagame.

Nk’uko iryo tangazo rikomeza ribivuga ngo Bwana Twagirimana yabanje gufungirwa muri station ya polisi ya Remera, ariko ubu ngo yaba yajyanywe gufungirwa ahandi hataramenyekana!

Mu gusoza iryo tangazo  ishyaka FDU Inkingi riramaganira kure uburyo abanyarwanda bakomeje gucunaguzwa bazizwa gutanga ibitekerezo byabo.

Ku ishyaka FDU Inkingi ngo iri tabwa muri yombi rya Bwana Twagirimana ni imwe mu ntwaro ubutegetsi bw’u Rwanda burimo gukoresha ngo butere ubwoba abanyarwanda kugirango bashyigikire by’amaburakindi itekinika ririmo gukorerwa itegeko nshinga rizashimangirwa na Kamarampaka irimo gutegurwa.

Nabibutsa ko Bwana Boniface Twagirimana asanze mu buroko abayobozi n’abayoboke benshi b’ishyaka rye barimo Madame Victoire Ingabire, Perezida na Bwana Sylvain Sibomana, umunyamabanga mukuru!

Email: therwandan@ymail.com

Mu itangazo ryashyizwe ahagaragara n’umuryango w’ubumwe bw’uburayi (EU/UE) mu ijwi rya Federica Mogherini, uwo muryango uvuga ko ivugururwa ry’itegeko nshinga ari ikintu gisaba ko hitabwaho inyungu z’abatuye igihugu bose, ayo mavugurura akaba agomba kunoza imikorere n’amategeko hagamijwe gutuma inzego z’ubutegetsi zishobora gukora mu buryo bujyanye n’igihe. Buri gihugu kikaba gifite uburenganzira bwo kuvugurura imitegekere yacyo.

Ariko, kwemeza amavugurura akorewe umuntu umwe bigabanya ukwizerwa kw’inzira igamije ivugurura ry’itegekonshinga kuko bihonyora uburyo bwo gusimurana ku butegetsi biciye mu nzira za demokarasi biteganywa mu ngingo ya 23 y’amasezerano nyafurika agenga amahame ya demokarasi, amatora, n’imitegekere. Amahinduka yakozwe ku itegeko nshinga mu Rwanda vuba aha akemezwa n’inteko nshingamategeko (niyemezwa muri Kamarampaka) araganisha kunyuranya n’ayo mahame nyafurika.

Umuryango w’ubumwe bw’uburayi ushyigikiye bidasubirwaho ihame ryo gusimburana ku butegetsi biciye mu nzira ya demokarasi, bikozwe mu mucyo, ntawe uhejwe kandi hashyizwe mu gaciro nk’uko biteganywa mu mahame nyafurika agena imitegekere ya demokarasi. Mu bihugu byubahirije igihe cyose ibiringo ntarengwa bigatuma habaho n’amahinduka abaturage babyo bacengewe na demokarasi kandi hubakwa inzego zizewe na bose ingero ni nyinshi ku mugabane w’Afrika

Ku bw’ibyo umuryango w’ubumwe bw’uburayi uzakomeza guharanira ko habaho amahoro n’umutekano mu karere k’ibiyaga bigari by’Afrika kandi uyu muryango uhanze amaso inzira y’ibiganiro udasiba n’abayobozi b’u Rwanda.

Email: therwandan@ymail.com

Amakuru ava mu Burundi mu mujyi wa Bujumbura kuri uyu wa gatanu tariki ya 4 Ukuboza 2015, aravuga ko abantu batatu bari bambaye imyenda isa n’iy’igipolisi cy’u Burundi barashwe bakicwa ubwo bageragezaga kwica umukuru w’umutwe udasanzwe wa polisi y”u Burundi, Gen Christophe Manirambona.

Ibyo byabereye ku muhanda Peuple Murundi, hafi ya Avenue de l’imprimerie aho abateye barashe igisasu cyo mu bwoko bwa rokete (RPG ) ku rukurikirane rw’imodoka uwo mupolisi mukuru yarimo ariko icyo gisasu cyakubise mu idirishya ry’imodoka uwo musirikare mukuru yari asanzwe agendamo (ntabwo yari ayirimo muri icyi gitondo) kirahuranye gisohokera mu rindi dirishya.

Hahise hakurikiraho kurasana hagati y’abamurinda n’abari bateye maze babiri mu bateye bagwa aho undi wa gatatu arakurikiranwa nawe aza kwicwa nyuma. Hari amakuru avuga ko byabereye hafi ya station ya King Stars.

Polisi y’u Burundi ivuga ko yafashe intwaro ndetse n’imodoka abo bateye bari barimo, iyo modoka ngo ikaba yari iy’umwe mu bakozi bakuru mu biro by’umukuru w’igihugu cy’u Burundi yari yibwe ku munsi wo ku cyumweru tariki ya 29 Ukwakira 2015.

Ibitero nk’ibi bimaze kumenyerwa mu gihugu cy’u Burundi, kuko bimaze kwibasira benshi barimo Gen Prime Niyongabo, umukuru w’igisirikare cy’u Burundi wahushijwe ndetse na Lt Gen Adolphe Nshimirimana we utarashoboye kurusimbuka.

Email: therwandan@ymail.com

Fransisko Ngarukiyintwali wabaye Ministre w’ububanyi n’amahanga n’ubutwererane ku butegetsi bwa Perezida Habyalimana yitabye Imana kuri uyu wa gatandatu tariki ya 5 Ukuboza 2015 aguye i London mu Bwongereza aho yari yarahungiye.

Uyu mugabo uvuka mu cyahoze ari Ruhengeli mu gace kitwa Ubukonya yakoze mu myanya ikomeye mu butegetsi bwa Perezida Habyalimana aho yabaye Ministre w’Ububanyi n’amahanga hagati ya 1979 na 1989.

Yagiye kuri uwo mwanya asimbuye Colonel Aloys Nsekalije aza gusimburwa na Dr Casimir Bizimungu. Uyu nyakwigendera yabaye  Depite, ndetse n’Ambasaderi w’u Rwanda mu gihugu cy’u Bubiligi intambara ya 1990 niho yamusanze ndetse n’iya 1994 niho yamusanze.

Yaje kuva mu Bubiligi ajya i Kinshasa muri Zaïre y’icyo gihe nyuma agaruka ku mugabane w’uburayi aho yaguye mu gihugu cy’u Bwongereza aho yari atuye igihe kinini.

Yitabye Imana ku myaka ikabakaba 75, bivugwa ko yaba yazize indwara ya Cancer.

Email: therwandan@ymail.com

Amakuru agera kuri The Rwandan ava ahantu hizewe aremeza ko Bwana Boniface Twagirimana, Visi Perezida w’ishyaka FDU-Inkingi wari watawe muri yombi na polisi y’u Rwanda mu gitondo cyo ku wa gatanu tariki ya 4 Ukuboza 2015, yarekuwe ku mugoroba wo kuri uyu wa gatandatu tariki ya 5 Ukwakira 2015 ahagana saa kumi n’ebyiri na mirongo ine n’itanu (18:45).

Amakuru The Rwandan yashoboye kubona avuga ko Bwana Boniface Twagirimana yabanje kujya mu mitsi n’abashakaga kumufata kuko yari yanze ko bamujyana bitewe n’uko bari bambaye imyenda ya gisivire ndetse nta n’urupapuro rwo kumufata bitwaje!

Byabaye ngombwa ko abaturage bari hafi aho batabara ndetse banaherekeza Bwana Twagirimana kugera kuri station ya Polisi i Remera kugira ngo bibonere ko koko afashwe na polisi ndetse hanatangwe n’abagabo.

Abasesengura ibibera mu Rwanda benshi bemeza ko Bwana Boniface Twagirimana yagize amahirwe kuko iyo ataza gutabarwa n’abaturage ngo bibonere ko agejejwe kuri polisi yashoboraga kuburirwa irengero ndetse na Polisi ikabihakana. Hari n’amakuru anemeza ko hari abahagarariye ibihugu by’amahanga mu Rwanda basabye ibisobanuro Leta y’u Rwanda kuri iki kibazo ibi bikaba bishobora kuba ari bimwe mu byatumye ahita arekurwa.

Ikindi kidasanzwe muri iki kibazo n’uko Bwana Twagirimana yahise arekurwa ntacyo Leta ivuze uretse ibyatangajwe n’umuvugizi wa Polisi, Céléstin Twahirwa abwira Radio Ijwi ry’Amerika ko Bwana Twagilimana yafashwe ngo aryozwe amakosa yakoze! Uku guhisha iri tabwa muri yombi  benshi baribonyemo ubushimusi bwaburiyemo kubera amaso y’abaturage bikaba byari bigoye kumufunga ngo bahite bamutekinikira idosiye mu gihe gito abo kumushinja batarigishwa.

Email: therwandan@ymail.com

Amakuru agera kuri The Rwandan aravuga ko Bwana Jacques Bihozagara yafatiwe mu gihugu cy’u Burundi akekwaho gukora ibikorwa by’ubutasi.

Nabibutsa ko Bwana Jacques Bihozagara uretse kuba yarabaye mu gihugu cy’u Burundi igihe kinini nk’impunzi, yabaye umwe mu bantu bakomeye muri FPR ikiri umutwe w’inyeshyamba ndetse ifashe igihugu aba Ministre, ndetse n’ambasaderi w’u Rwanda mu gihugu cy’u Bufaransa.

Bwana Bihozagara yari yarashyizwe ku gatebe yarahawe akato muri politiki ndetse yarigiriye mu bworozi bw’ingurube yakoreraga mu karere k’u Bugesera. Ariko mu mwaka wa 2014 byavugwaga ko ubworozi bwe bw’ingurube bwatangiye kutagenda neza ngo ahitamo kujya gukorera ubucuruzi mu gihugu cy’u Burundi.

Amakuru yagiye atangwa na bamwe mu bavugana nawe avuga ko Bwana Bihozagara ahakana ko atahunze igihugu ko yanaretse politiki ahubwo yibereye mu bikorwa by’ubucuruzi. Dore ko mu minsi yashize byavuzwe ko umugore wa Bihozagara we n’abana batse ubuhungiro mu gihugu cya Canada igihe Bwana Bihozagara yari akuwe ku mwanya wa ambasaderi.

Hari amakuru avuga ko ngo mu gihugu cy’u Burundi yari abayeho ubuzima bubi cyane ku buryo hari n’abagereranyije inzu yabagamo nk’akaruri.

Email: therwandan@ymail.com

Amakuru ava mu Rwanda aravuga ko Perezida Kagame yazamuye mu ntera abasirikare barenga 5000 muri bo harimo umwe mu bahoze mu barinda Perezida Habyalimana, n’ubundi wari usanzwe warayobotse ubutegetsi bwa FPR, rero Koloneli Evariste Murenzi yahawe ipeti rya Jenerali de Brigade.

Evariste Murenzi yari muri Promotion ya 23 y’ishuri rikuru rya gisirikare ry’i Kigali (ESM) yasohotse mu 1986, yabaye mu mitwe ya gisirikare itandukanye irimo Bataillon Paracommando, na Bataillon Garde Présidentielle.

Mu 1994 yari mu baherekeje Perezida Habyalimana i Dar es Salaam, nyuma yo gufata ubutegetsi kwa FPR yahungiye muri Congo, aba mu mutwe wa FDLR aza gutahuka mu nkubiri ya ba Gen Rwarakabije na Gen Ngendahimana.

Muri ngabo za RDF yahawe imyanya itandukanye irimo ubuyobozi bwa Brigade ya 201 ndetse yaherejwe no mu gihugu cya Centrafrika.

Siwe wenyine wazamuwe mu ntera kuko  hagizwe abajenerali abandi 9. Ni ukuvuga ko mu bantu 10 bazamuwe mu rwego rwa Jenerali harimo umuhutu umwe n’abatutsi 9. Mbere y’uko ayo mapeti atangwa byavugwaga ko muri RDF abasirikare bari kuva kuri Koloneli kuzamura bari 337 muri bo harimo abahutu 7 gusa!

abari ba koloneli bagizwe ba Jenerali de Brigade

Major Désiré Nyaruhirira wahoze ari umujanama wa mbere akaba na maneko muri Ambasade y’u Rwanda mu Burundi ubu arabarizwa mu gihugu cy’u Bubiligi!

Nabibutsa ko uyu mugabo wanakuriye mu gihugu cy’u Burundi yirukanwe n’abategetsi b’u Burundi ashinjwa gufatanya n’abahungabanya umutekano mu Burundi.

Ubu ikibazo benshi bibaza ni ukumenya niba uyu mu major ari mu Bubiligi byo guhunga cyangwa ahari mu rwego rw’akazi.

Email: therwandan@ymail.com

Kuri iki cyumweru, tariki 06 Ukuboza; Perezida wa Repubulika Paul Kagame wari utegerejweho umwanzuro kuri referendum izaha umwanya Abanyarwanda wo gutora umushinga mushya w’Itegeko Nshinga, yemeye ikifuzo cy’inama ya Biro Politike yaguye ya RPF-Inkotanyi cyo gushyira amatora ya referendum tariki 18 Ukuboza 2015.

Nyuma yo kuvuga ijambo risoza iyi nama ya Biro Politike yaguye, umunyamuryango wa RPF-Inkotanyi witwa Erasme Ntazinda yabajije Perezida itariki ya Referendum izemeza cyangwa igahakana impinduka zakozwe mu Itegeko Nshinga.

Icyakora, Perezida Paul Kagame wagaragaje ko yari ataratekereza kuri iyo tariki, yasabye abanyamuryango kumubwira itariki bifuza.

Minisitiri w’ubutabera, akaba n’intumwa nkuru ya Leta Johnston Busingye yahise agaragaza ko itariki ndetse n’imyiteguro byatekerejweho bihagije.

Ati “Mubyemeye, twatekerezaga ko Inama y’igihugu y’Umushyikirano na Noheri bikwiye kuba referendum yacu yarabaye,…turifuza itariki 18/12/2015,…Kandi turabyiteguye nyakubahwa.”

Amaze kumva icyo Umunyamabanga mukuru wa RPF-Inkotanyi Francois Ngarambe, n’umuyobozi wungirije (Vice-Chairman) Bazivamo Christophe babitekerezaho, Perezida Paul Kagame yemereye abanyamuryango ba RPF-Inkotanyi ko ibyifuzo byabo abyemeye.

Gusa, gusa nk’uko biteganywa n’amategeko Perezida wa Repubulika agomba gutangaza Kamarampaka ndetse agatangariza Abanyarwanda n’impamvu yayo, bityo Perezida akaba yasabye kurindira bikazasohoka mu myanzuro y’inama y’abaminisitiri izaterana muri iki cyumweru.

Mu ijambo yavuze adasoma ibyanditse, Perezida Paul Kagame yabwiye abanyamuryango ba RPF-Inkotanyi ko ibizava muri referendum bifite ingaruka nyinshi ku buzima bw’igihugu buri imbere, gusa abasaba kwitegura bakazahagarara kucyo bazaba bahisemo.

Abanyamuryango banyuranye ba RPF-Inkotanyi banyuranye, basohokanye ibyishimo ko icyifuzo cyabo cyumviswe, ndetse bakavuga ko bakurukije ubusabe bw’Abanyarwanda n’uburyo biteguye, ngo bizeye ko abazatora “YEGO” bazaba 100%.

Inyito ya Kamarampaka yashyizwe mu majwi na bamwe mu banyamuryango, nka Vincent Munyeshyaka, umunyamabanga uhoraho muri Minisiteri y’ubutegetsi bw’igihugu yavuze ko nta mpamvu yo kuyita kamarampaka kandi nta mpaka abanyarwanda barimo.

Ni byemezwa ko referendum izaba kuwa gatanu tariki 18 uku kwezi, Abanyarwanda mu gihe kitageze ku byumweru bibiri barasabwa guhaguruka bakitabira amatora ari benshi bakagaragaza amahitamo yabo.

Vénuste KAMANZI
Source: UMUSEKE.RW

IMYANZURO Y’INAMA YA BIRO POLITIKI YAGUYE Y’UMURYANGO FPR-INKOTANYI YO KU ITARIKI YA 6 UKUBOZA 2015:

Uyu munsi tarikiya 6 Ukuboza 2015; Inama ya Biro Politiki yaguye y’Umuryango FPR-INKOTANYI yateraniye i Rusororo mu Karere ka Gasabo, Umujyi wa Kigali iyobowe na Nyakubahwa KAGAME Paul, Perezida wa Repubulika akabana Chairman w’Umuryango FPR- INKOTANYI. Nyakubahwa Perezida wa Repubulika akabana Chairman w’Umuryango FPR-INKOTANYI yagejeje kubateraniye mu nama ya Biro Politiki yaguye ijambo rikubiyemo ibibikurikira: 

• Umukoro Abanyamuryango bahawe mu mwaka wa 2012 wogushaka uburyo bunoze bw’imiyoborere y’u Rwanda bushingiye kubintu bine by’ingenzi “ Change, Stability, Continuity and Independence “ ;
• Ivugururwa ry’Itegeko Nshinga rifite impamvu ziremereye kandi zishingiye kubushake n’ubwigenge bw’Abanyarwanda;
• Mu gukemura ibibazo u Rwanda rwanyuzemo na n’ubu rukinyuramo tugomba gukoresha uburyo budasanzwe;
• Abanyarwanda bose bagomba guhora iteka baharanira kwihesha agaciro;
• Gukora igenamigambi rifasha kureba kure hirindwa guhuzagurika;
• Igisubizo kubyifuzo by’Abanyarwanda Nyakubahwa Perezida wa Repubulika akabana Chairman w’Umuryango FPR-INKOTANYI azagitanga hashingiwe kubizava muri Referendumu;
• Abanyamuryango bagize Biro Politiki yaguye bahawe ikiganiro kumpinduka z’ingenzi zakozwe mu Itegeko Nshinga rya Repubulika y’u Rwanda ryo kuwa 4 Kamena 2003 ryavuguruwe mu mwaka wa 2015. Mu kungurana ibitekerezo, Abanyamuryango ba FPR-INKOTANYI bibanze kuri ibi bikurikira: 1. Impamvu n’ishingiro by’ubusabe bw’Abanyarwanda ku ivugurura ry’Itegeko Nshinga no gukomeza kuyoborwa na Nyakubahwa KAGAME Pau lnyuma ya 2017 kubera ibikorwa by’indashyikirwa birimo guhagarika jenoside yakorewe Abatutsi mu 1994 igihe amahanga yari yatereranye u Rwanda n’Abanyarwanda, ubumwe n’ubwiyunge, kugarura umutekano, guca akarengane, iterambere, no guteza imbere imibereho myiza y’Abaturage n’ibindi.

2. Uburenganzira ntavogerwa n’Ubwigenge busesuye bw’Abanyarwanda bwo kwihitiramo imiyoborere ibabereye mu gihe kizaza kugirango intambwe imaze kugerwaho n’Abanyarwanda bayobowe na Nyakubahwa KAGAME Paul itazasubira inyuma. Twebwe Abanyamuryango bagize Biro Politiki yaguyeya FPR INKOTANYI tumazekubonako:

• Inteko Ishinga Amategeko yasanze ubusabe bw’Abanyarwandabufiteishingiro,igatora umushinga w’ivugururwa ry’Itegeko Nshinga ariko kandi hakaba hakiri indi ntambwe irebana na Referandumu igomba guterwa kugirango ibyasabwe byose n’Abanyarwanda bikorwe;
• Abanyarwanda bategereje mu mutuzo umwanzuro kubireba ubuyobozi bw’ejo hazaza, hitawe kugukomeza gusigasira no kurinda ibyagezweho mu buryo burambye “Change, Stability, Continuity and Independence”. Dufashe Imyanzuro ikurikira: 1. Twiyemeje gukomeza gushyigikira urugendo rw’ivugurura ry’Itegeko Nshinga no kuzagira uruhare rukomeye muri Referandumu.

2. Dushimangiye ko Abanyarwanda aribo bonyine, mu bwigenge busesuye, bigenera uko bayoborwa n’imiyoborere ikwiriye igihugu cyabo.

3. By’umwihariko;

• Abagabo, Abagore n’Urubyiruko bagize Biro Politiki yaguye biyemeje gutera ikirenge mu cya Nyakubahwa KAGAME Paul, Perezida wa Repubulika akaba na Chairman w’Umuryango FPR-INKOTANYI mu gukunda no kwitangira igihugu, kwiha agaciro, gusigasira ibyagezweho no guharanira kugeza u Rwanda ku iterambere rirambye rizagirira akamaro n’abazadukomokaho.
• Abikorera biyemeje kunoza imikorere kugirango bakomeze guteza imbere igihugu cyabo bagishoramo imari kandi bafatanya n’abandi bashoramari bo mu karere n’ahandi cyane cyane ko nabo ubwabo bashima imiyoborere ya Nyakubahwa KAGAME Paul.

4. Dushingiye kububasha Nyakubahwa Perezida wa Repubulika ahabwa n’Itegeko Nshinga kubirebana na Referandumu ndetse n’ubusabe Abagize Guverinoma bamugejejeho;

Turasaba Nyakubahwa Perezida wa Repubulika akaba na Chairman w’Umuryango FPR-INKOTANYI, ko mu bushishozi bwe, yakwemera ko Referandumu iba.

Turasaba ko Nyakubahwa Perezida wa Repubulika aramutse abyemeye, Referandumu yaba kuwa 18 Ukuboza 2015.

5. Twiyemeje ko mubyo dukora byose dukora duharanira agaciro no kwigira

6. Twiyemeje guhinduka no guhindura imikorere yacu mu ishyirwa mu bikorwa rya gahunda z’Igihugu, dukorera hamwe, turwanya kandi tudahishira ruswa n’ibindi byaha bifitanye isano nayo, tubaza kandi tukemera kubazwa ibyo dukora, duhuza kandi dukurikirana ibikorwa uko bikwiye, aho biri ngombwa tugakora mu buryo budasanzwe.

7. Twiyemeje gukomeza gushyigikira Nyakubahwa KAGAME Paul, tumwizeza ko Abanyamuryango ba FPR-INKOTANYI turikumwe nawe mu rugamba rwo kubaka igihugu cy’u Rwanda kuburyo bw’umwihariko, na Afurika muri rusange, kandi duhize ko buri wese ahuza imvugo n’ingiro, yiha agaciro kandi akarangiza inshingano ashinzwe uko bikwiye.

Bikorewe i Rusororo, kuwa 6 Ukuboza 2015

Mushobora no kumva ijambo Perezida Kagame yavuze hano hasi

Click here to view the embedded video.

Amwe mu mafoto yafatiwe i Rusororo

Mu Rwanda hatangiye ku mugaragaro urubanza rwa Colonel Tom Byabagamba n’abagenzi be General Frank Rusagara na Sergent Francois Kabayiza bombi basezerewe mu ngabo z’u Rwanda.

Urubanza rwo kuri uyu wambere rwahariwe Colonel Byabagamba wireguye ibirego by’Ubushinjacyaha.

Urwo rubanza rutangijwe nyuma y’amezi 16 abo bagabo bafashwe.

Mushobora kumva uko urubanza rwagenze nk’uko bitangazwa n’umunyamakuru w’ijwi ry’Amerika Assumpta Kaboyi

Dore n’uko ikinyamakuru izuba rirashe kivuga ukuntu urubanza rwagenze

Ubushinjacyaha bwa gisirikare bwazaniye Urukiko Rukuru rwa Gisirikare kuri uyu wa Mbere ibimenyetso birimo ibishinja Col Tom Byabagamba kuba yarise abayobozi b’u Rwanda abicanyi.

Urukiko Rukuru rwa Gisirikare rwatangiye kuburanisha mu mizi urubanza ruregwamo Col Col Tom Byabagamba, Rtd. Brig. Gen. Frank Rusagara na Rtd Sgt Kabayiza Francois ku byaha bashinjwa .

Haherewe ku bimenyetso, ariko umunsi wose warangiye higwa ku gishinjwa Col Byabagamba, wayoboraga abasirikare abarinda Perezida Kagame, icyaha cyitwa ‘icyo gukwiza nkana ibihuha agomesha rubanda abangisha ubutegetsi. ’

Abasirikare bagenzi be babanye mu butumwa bw’amahoro muri Sudani y’Epfo, nibo ubushinjacyaha bwabwiye Urukiko ko aribo biyumviye Col Byabagamba abwira amagambo abantu batandukanye, ahantu hatandukanye.

Ubushinjacyaha bwagaragaje ko bukimushinja bushingiye ku mutangabuhamya Col David Bukenya wari mu butumwa bw’amahoro muri Sudani y’Epfo, Col Byabagamba yagaragarije ko abayobozi bariho mu Rwanda ari abicanyi. Agera n’aho avugira mu ruhame abwira abasirikare ati ‘muzunamura icumu ryari?”

Aya magambo, uyu musirikare akavuga ko yavuzwe Col Byabagamba yikuye mu bandi basirikare. Ibi akaba yarabivuze nyuma y’urupfu rwa Maj Gen John Sengati wari Umudemobe, wapfuye arashwe ku butaka bw’u Rwanda.

Mu mvugo za Col Byabagamba, Ubushinjacyaha buvuga ko abatangabuhamya bagaragaje ko yari agamije kubangisha ubutegetsi buriho, kandi ko ibyo yababwiraga byari gutuma abasirikare banga abayobozi.

Col Byabagamba yanashinjwe ko yavuganaga n’abatavuga rumwe n’ubutegetsi bw’u Rwanda ariko nta bimenyetso biratangwa.

Mu nyandiko mvugo ye, Lt Col Bukenya yabwiye Ubushinjacyaha ko Col Tom Byabagamba yanamubuzaga gukoresha inama z’abasirikare, ntanitabire gahunda zitandukanye zirimo izo kwibuka Jenoside yakorewe Abatutsi ku nshuro ya 20.

Col Bukenya yavuze ko byageze naho ngo yiyemeje guhangana na Col Byabagamba, abonye ko ari kubiba amagambo mabi mu basirikare.

Uretse Col Bukenya, Col Tom ngo yanabwiye Col Ibambasi ati “Leta y’u Rwanda ibyayo ni ukwica abantu gusa.” Ibi ngo yabivuze nyuma y’urupfu rw’umuhungu w’umusirikare witwa Rtd Lt Kagarama, ariko uyu Ubushinjacyaha bukagaragaza ko butamuzi.

Uyu mwana w’umuhungu ngo Col Byabagamba yavuze ko yiciwe mu Rwanda akuwe mu modoka, ariko iby’iyi nkuru Umucamanza ntacyo yabisobanuriweho, kuko na Col Byabagamba yibazaga uwo mwana icyo leta yari kuba imuziza, ko n’uwo se Ubushinjacyaha butanerekana ko abaho.

Uretse ibyo, Col Ibambasi yanavuze ko Col Byabagamba yanagaragarije mu ruhame kunenga Umukuru w’Igihugu. Aha ngo yavuze ko “Umukuru w’Igihugu ahubuka mu gufata ibyemezo, kandi ko ngo n’abajenerali bamwe ntawe ufata icyemezo kirebana n’igisirikare.

Ikindi ngo yumvise telefone ya Lt Col Karakire ivuze, yumva ari Perezida Kagame uvuga iyo agiye kwitaba, Colonel Tom aramubaza ngo ariko uwo mugabo umushakaho iki, umubitsemo iki?

Nubwo Ubushinjacyaha bwatanze ubu buhamya, Col Tom n’abamwunganira bakomeje guhata urukiko kubwira Urukiko ko Ubushinjacyaha bwagaragaza ibimenyetso bifatika, bigaragaza igihe ibyo byaha yabikoreye.

Uru ruhande rwanavuze ko ibyo ashinjwa atari byo, kuko ni uko bavuga ko batumvikanaga na Col Mukenya, ko batari gutegereza umwaka wose ngo babone kubivuga nk’uko Ubushinjacyha bubigaragaza.

Col Tom yabwiye Urukiko ko ibyo bamushinja ari ibinyoma, ndetse ko mu nshingano yari afite mu butumwa bw’akazi, ntaho yahuriraga bya buri munsi na Col Bukenya, byongeye ngo Col Ibambasi we yagiye muri Sudani y’Epfo, Tom ari kuharangiza inshingano ze.

Me Valery umwunganira yanavuze ko nta kuntu umukiriya we yari kuba afite imyitwarire mibi mu butumwa yari arimo, akarangiza manda ye, akongezwa indi.

Uregwa yavuze byinshi yiregura, bizagenda binagaruka mu rubanza rwe mu mizi, hamwe n’abo bashinjwa hamwe. Ariko bagiye bagaragaza ko ibyo abatangabuhamya bavuga ari ibinyoma, kandi umuntu umwe wabwirwaga atari rubanda. Kandi aho bavuga ko byaberaga muri Sudani y’Epfo ntacyo byari guteza imvururu muri rubanda mu Rwanda.

Col. Tom Byabagamba ashinjwa icyaha cyo gukwiza nkana ibihuha agomesha rubanda abangisha ubutegetsi buriho, icyo gusebya Leta, gusuzugura ibendera ry’igihugu no guhisha nkana ibimenyetso byashoboraga gufasha kugenza icyaha gikomeye.

Urubanza rwasubitswe ku mugoroba, ruzasubukurwa kuwa 11 Ukuboza 2015.